TE WAN sma sori switifasi gi wi, dan disi kan trowstu wi èn a e sori taki a sma lobi wi. Wi e firi bun te wi e si taki wan sma e broko en ede nanga wi. Wi alamala lobi en te sma e sori switifasi gi wi. Sobun, fa wi srefi kan kon abi a moi fasi disi?

Wan sma di abi switifasi e broko en ede nanga trawan. A e taki sani di e gi trawan deki-ati èn a e du bun gi den. Te wan sma abi switifasi, dan dati no wani taki nomo taki a abi bun maniri. A musu abi lobi tu èn a musu firi gi sma. Boiti dati, switifasi na wan fu den fasi di a yeye fu Gado e meki sma kisi èn Kresten e kisi a deki-ati fu kon abi a fasi disi (Gal. 5:22, 23). Sobun, meki wi go luku fa Yehovah nanga en Manpikin e sori a fasi disi èn fa wi kan teki na eksempre fu den.

Yehovah abi switifasi. A e du bun gi ala sma, srefi gi „den sma di no de nanga tangi èn gi den ogri sma” (Luk. 6:35). Fu eksempre, Yehovah „e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti” (Mat. 5:45). Sobun, srefi den sma di no e si Yehovah leki den Mekiman, e kisi wini fu den sani di a meki fu hori sma na libi. Disi e meki taki den sma disi srefi kan prisiri nanga a libi.

A sani di Yehovah du gi Adam nanga Eva, e sori taki a abi switifasi trutru. Syatu baka di Adam nanga Eva sondu, den „teki wiwiri fu wan figabon èn den nai den na makandra fu meki wan sani fu tapu den syenpresi”. Ma Yehovah ben sabi taki den ben o abi moro bun krosi fanowdu te den ben o libi dorosei fu Eden pe „makabon nanga takru wiwiri” ben o gro fu di Gado ben fluku a gron. Dati meki Yehovah sori switifasi gi den. A meki „langa krosi fu metibuba” gi den.​—Gen. 3:7, 17, 18, 21.

Aladi Yehovah e sori switifasi „gi ogri sma èn gi bun sma”, a e du dati spesrutu gi den reti-ati futuboi fu en. Fu eksempre, na ini a ten fu a profeiti Sakaria, wan engel ben e sari di a si taki a pipel fu Gado ben tapu fu bow a tempel na ini Yerusalem. Di na engel taigi Yehovah fa a ben e firi, Yehovah arki en èn a taigi en „bun sani èn sani di e gi trowstu” (Sak. 1:12, 13). Yehovah ben du wan srefi sortu sani gi a profeiti Elia. Wan leisi a profeiti disi ben brokosaka so te, taki a aksi Yehovah fu meki a dede. Yehovah ben frustan fa Elia ben e firi èn dati meki a seni wan engel fu gi en deki-ati. Boiti dati, Gado taigi Elia taki en wawan no ben de, tra sma ben de ete di e anbegi en. Baka di Yehovah taki so nanga Elia èn a kisi a yepi di a ben abi fanowdu, a ben man go doro nanga en wroko (1 Kow. 19:1-18). Fu ala den anbegiman fu  Yehovah, Yesus na a moro bun eksempre te wi e luku fa a sori switifasi. Meki wi go luku na eksempre fu en.

Di Yesus ben de na grontapu, a ben sori switifasi gi sma èn a ben e firi gi den. Noiti a ben e taki grofu nanga sma èn a no ben e prei basi gi den. Na wan switifasi a taki: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. . . . A tyatyari fu mi switi fu tyari” (Mat. 11:28-30). Yesus ben abi switifasi èn dati meki ala sei pe a ben e go, sma ben e waka na en baka. Fu di Yesus „ben sari den” sma disi, meki a ben e gi den nyanyan, a ben e dresi den sikiwan èn a ben e leri den „furu sani” fu en Tata.​—Mark. 6:34; Mat. 14:14; 15:32-38.

Fu di Yesus ben abi switifasi, meki a ben e frustan fa sma ben e firi. Awinsi Yesus ben weri, toku nanga „prisiri” a ben e meki sma kon na en (Luk. 9:10, 11). Wan leisi wan uma di ben lasi brudu ben fasi den krosi fu Yesus, fu di a ben wani kon betre. Soleki fa a Wet fu Moses e sori, dan na uma disi no ben krin. Toku Yesus no bari en (Lef. 15:25-28). Yesus ben firi sari gi na uma disi di ben e siki 12 yari kaba. A taigi en: „Mi umapikin, a bribi fu yu meki yu kon betre. No broko yu ede moro. Yu o de gosontu now, bika yu no abi a takru siki moro” (Mark. 5:25-34). Iya, Yesus ben abi switifasi trutru!

Den eksempre di wi taki fu den e sori taki wan sma e sori trutru switifasi te a e du bun gi trawan. Na ini na agersitori fu a Samaria man, Yesus sori o prenspari a de fu du disi. Aladi den Samariasma nanga den Dyu no ben lobi makandra, toku a Samaria man na ini na agersitori ben firi sari gi a Dyu man di fufuruman ben ròs èn fon te fu dede. A Samaria man du bun gi a Dyu disi fu di a ben abi switifasi. A dresi den soro fu a man èn a tyari en go na wan presi pe sma e yuru kamra. A gi a man di ben abi a presi moni fu sorgu a Dyu èn a taigi en taki efu a gebroiki moro moni, a o pai en a moni dati baka.​—Luk. 10:29-37.

Wan tra fasi fa wi kan sori switifasi, na te wi e taki sani fu gi sma deki-ati. Bijbel e taki: „Tumusi furu broko-ede o meki wan sma lasi-ati, ma te sma e taki switi nanga en, dan a e firi prisiri” (Odo 12:25). Te wi abi switifasi èn te wi lobi du bun, dan wi o taki sani di o gi sma deki-ati. * Den sani di wi o taki o sori den taki wi e broko wi ede nanga den. Fu di den o kisi deki-ati, meki den o man horidoro aladi den e kisi tesi.​—Odo 16:24.

Fu di libisma meki „soleki fa Gado de”, meki wi alamala kan sori switifasi (Gen. 1:27). Luku na eksempre fu Yulius, wan legre-ofsiri fu Rome di ben e tyari Paulus go na Rome. Di den doro Sidon, „Yulius ben de so bun fu gi Paulus primisi fu go na den mati fu en, so taki den ben kan sorgu en” (Tori 27:3). Wan pisi ten baka dati, den sma fu Malta ben sori switifasi gi Paulus nanga tra sma, di a sipi fu den ben sungu. Den ben meki faya gi den sma disi fu waran den skin (Tori 28:1, 2). Den sma disi ben sori switifasi, ma switifasi no wani taki dati wi e du bun wán leisi nomo gi trawan.

Efu wi wani taki Gado prisiri nanga wi, dan ala ten wi musu sori switifasi. A musu tron wan gwenti fu wi. Ma a no ala ten a makelek gi wi fu sori a fasi disi. Fu san ede? Kande fu di wi e syen, kande wi e si leki wi no  o man, kande wi e kisi gens noso kande wi e frigiti son leisi fu prakseri trawan. Toku wi o man sori switifasi te wi e frutrow tapu a santa yeye èn te wi e teki na eksempre fu Yehovah.​—1 Kor. 2:12.

Fa wi kan sori moro switifasi gi trawan? Wi kan aksi wisrefi: ’Mi e arki trawan nanga pasensi? Mi man si te trawan abi yepi fanowdu? O ten ben de a lasti leisi di mi du bun gi wan sma di no de mi famiri noso mati?’ Efu wi e si taki wi e misi fu du wan fu den sani disi, dan kande wi kan pruberi fu kon sabi moro fu den sma di wi e miti, spesrutu den wan na ini a Kresten gemeente. Disi o yepi wi fu kon sabi a situwâsi fu den èn san den abi fanowdu. Te yu kon sabi dati, dan sori switifasi gi den leki fa yu ben o wani taki sma sori switifasi gi yu (Mat. 7:12). Yehovah o yepi wi tu fu sori switifasi te wi e aksi en fu gi wi en santa yeye.​—Luk. 11:13.

Na apostel Paulus ben taki dati wan fu den fasi di wan dinari fu Gado musu abi na „switifasi” (2 Kor. 6:3-6). Sma ben lobi Paulus fu di a ben e sori switifasi gi den. A ben e taki sani fu gi sma deki-ati èn a ben e du bun gi den (Tori 28:30, 31). Na so a de tu taki te wi e sori switifasi, dan wi kan hari sma kon na ini a tru anbegi. Te wi e sori switifasi gi ala sma, srefi gi den sma di e gens wi, dan wi kan safu den ati èn kande den no o gens wi moro (Rom. 12:20). A kan taki baka wan pisi ten, den o wani arki a boskopu fu Bijbel.

Na ini a paradijs, wi o sori switifasi gi milyunmilyun sma di kisi wan opobaka. Kande den sma disi o breiti srefisrefi fu di noiti ete sma sori switifasi gi den so. Dan densrefi o wani sori switifasi gi trawan tu. Den sma di e weigri fu sori switifasi gi trawan èn fu yepi den, no o man libi na ini Paradijs. Ma den sma di Gado feni bun fu libi fu têgo na ini Paradijs, o libi bun nanga makandra èn den o sori switifasi gi trawan (Ps. 37:9-11). A o switi fu libi na ini wan grontapu pe ala sma o libi na ini freide nanga makandra! Ma fosi a moi ten dati doro, sortu wini wi e kisi nownow kaba te wi e sori switifasi?

Bijbel e sori taki wan man di e du bun gi trawan „e tyari wini gi ensrefi” (Odo 11:17). Te wan sma e sori switifasi, dan trawan o lobi en èn den o sori switifasi gi en tu. Yesus ben taki: „Na a fasi fa unu e libi nanga trawan, na a fasi dati den sa libi nanga unu tu” (Luk. 6:38). Dati meki a makelek gi sma di e sori switifasi fu feni bun mati èn fu tan hori den mati dati.

Na apostel Paulus ben taigi den brada nanga sisa fu Efeise fu ’sori switifasi gi makandra, fu abi sari-ati èn fu gi makandra pardon nanga den heri ati’ (Ef. 4:32). Te ala sma na ini wan gemeente e firi gi makandra, te den e sori switifasi gi makandra èn te den e yepi makandra, dan sani o waka bun na ini a gemeente. Den sma disi noiti o taki grofu nanga makandra, den no o krutu makandra èn den no o taigi makandra hati sani. Den no o taki ogri fu trawan, ma den o taki sani di e gi trawan deki-ati (Odo 12:18). Disi o meki taki den sma na ini a gemeente o abi wan tranga bribi èn den o dini Yehovah nanga prisiri.

Leki fa wi si, dan den sani di wi e taki èn e du e sori taki wi abi switifasi. Te wi e sori a fasi disi, dan wi e teki na eksempre fu Yehovah wi Gado (Ef. 5:1). A bakapisi o de taki wi o gi trawan na ini a gemeente deki-ati èn wi o yepi sma fu kon anbegi a tru Gado. Sobun, meki wi alamala de sma di e sori switifasi ala ten!