1. Fu san ede wi alamala abi trowstu fanowdu?

WI ALAMALA abi trowstu fanowdu. Kande wi abi furu broko-ede nanga problema. A kan taki wi e sari fu di wi siki, fu di wi e kon owru noso fu di wan sma di wi lobi dede. Kande sma e libi takru nanga sonwan fu wi. Boiti dati, wi e si taki moro nanga moro sma e du ogri. Iya, den ’muilek ten disi di tranga fu pasa’ e sori krin taki wi e libi na ini „den lasti dei” èn taki ibri dei a nyun grontapu e kon moro krosibei (2 Tim. 3:1). Ma a kan taki wi e wakti bun langa kaba fu si fa Yehovah o du san a pramisi èn kande a situwâsi fu wi e kon moro muilek. Sobun, pe wi kan feni trowstu?

2, 3. (a) San wi sabi fu a buku Habakuk? (b) Fu san ede wi o luku a buku Habakuk moro fini?

² Fu feni a piki tapu na aksi disi, dan wi o luku san wi kan leri fu a buku Habakuk. Bijbel no e taki finifini fu a libi fu Habakuk nanga den sani di a du, ma a buku disi kan gi wi deki-ati. A nen Habakuk wani taki „Steifi Brasa”. Disi kan abi fu du nanga a fasi fa Yehovah e trowstu wi. A de neleki  a e brasa wi hori. Noso a kan abi fu du nanga a fasi fa wi e tai hori na Yehovah. Iya, wi e hori en so steifi, taki wi no wani lusu en. Di Habakuk ben e taki nanga Gado, a poti wan tu aksi gi en. Yehovah piki den aksi fu a profeiti èn a meki a skrifi ala sani na ini en Wortu Bijbel, so taki wi kan leri wan sani fu en.​—Hab. 2:2.

³ A buku Habakuk e taki soso fu a takimakandra di Yehovah ben abi nanga a profeiti Habakuk di ben lasi-ati. A no e taki nowan tra sani fu a profeiti. Toku a buku disi na wan pisi fu Bijbel èn a e „yepi wi fu horidoro èn fu kisi trowstu fu Gado Buku, so taki wi kan abi howpu” (Rom. 15:4). Fa a buku Habakuk kan yepi ibriwan fu wi? A kan yepi wi fu frustan san a wani taki fu frutrow tapu Yehovah. Boiti dati, a profeititori fu Habakuk e sori wi taki wi kan tan abi wan korostu firi awinsi sortu problema noso tesi wi e kisi. Meki wi luku sortu moi sani wi kan leri fu a buku Habakuk.

4. San ben gi Habakuk broko-ede?

⁴ Leisi Habakuk 1:2, 3. Habakuk ben e libi na ini wan muilek ten. A ben e sari srefisrefi fu di den sma fu a kondre fu en ben e du furu ogri. O ten wan kaba ben o kon na a sani dati? Fu san ede Yehovah ben wakti so langa fosi a du wan sani? Habakuk ben firi leki a no ben man du noti. Dati meki a begi Yehovah fu du wan sani. A kan taki Habakuk ben e bigin denki taki Yehovah no e broko en ede nanga a situwâsi. A ben gersi leki Yehovah ben e draidrai fu du wan sani. Oiti yu ben firi so tu?

5. Sortu prenspari sani a buku Habakuk e leri wi? (Luku a prenki na a bigin fu na artikel.)

⁵ A de so taki Habakuk no ben e frutrow moro tapu Yehovah? A ben lasi bribi na ini den pramisi fu Gado? Kwetikweti! Habakuk ben aksi Yehovah fu yepi en nanga den broko-ede fu en. Dati e sori taki a no ben lasi howpu, ma a ben e frutrow ete tapu Yehovah. Na frustan a no ben e frustan fu san ede Yehovah ben e wakti so langa fosi a du wan sani èn fu san ede Yehovah ben e gi pasi taki a ben de na ini so wan muilek situwâsi. Yehovah meki Habakuk skrifi den broko-ede fu en na ini Bijbel fu di a wani leri wi a prenspari sani disi: Wi no musu frede fu fruteri Yehovah den broko-ede fu wi. Fu taki en leti, Yehovah wani taki wi musu fruteri en ala san de tapu wi ati (Ps. 50:15; 62:8). Odo 3:5 e gi wi a deki-ati fu ’frutrow na tapu Yehovah nanga wi heri ati’ èn fu ’no frutrow na tapu wi eigi frustan’. A kan taki Habakuk ben sabi na odo disi èn a ben e du san na odo disi taki.

6. Fu san ede a prenspari fu begi?

⁶ Habakuk teki a bosroiti fu kon moro krosibei na Yehovah, di ben de en bun Mati nanga en Papa. Habakuk no ben e sidon broko en ede nomo nanga a situwâsi fu en èn a no ben suku fu lusu den problema ensrefi. Na presi fu dati a fruteri Yehovah fa a ben e firi èn san ben gi en broko-ede. Disi na wan bun eksempre gi wi. Yehovah, a sma di e arki begi, wani taki wi musu frutrow na en tapu èn taki wi fruteri en den broko-ede fu wi (Ps. 65:2). Te wi e du dati, dan wi o si fa Yehovah e piki den begi fu wi. A o de neleki a e gi  wi wan steifi brasa, fu di a e trowstu wi èn a e tiri wi (Ps. 73:23, 24). Awinsi sortu problema wi abi, Yehovah o yepi wi fu frustan fa a e si a situwâsi fu wi. Te wi e begi en nanga wi heri ati, dan dati na wan fu den moro bun fasi fa wi e sori taki wi e frutrow na en tapu.

7. San Yehovah du di Habakuk fruteri en den broko-ede fu en?

⁷ Leisi Habakuk 1:5-7. Baka di Habakuk fruteri Yehovah ala den broko-ede fu en, dan kande a ben e aksi ensrefi san Yehovah ben o du. Yehovah na wan lobi-ati Papa èn a ben e frustan fa Habakuk ben e firi. A no krutu en fu di a ben sabi taki Habakuk ben e pina èn dati meki a ben e suku yepi. A fruteri Habakuk san a ben o du nanga den trangayesi Dyu. A kan taki Habakuk na a fosi profeiti di Yehovah fruteri taki a ben o strafu den Dyu.

8. Fu san ede Habakuk ben skreki fu a sani di Yehovah taki?

⁸ Yehovah sori Habakuk taki a ben o du wan sani heri esi. A ben o meki den Kaldeyasma, sobun den Babilonsma, strafu den ogrisma fu Yuda. Yehovah ben taki: „Na ini a ten fu unu wan sma o du wan sani.” Disi e sori taki na ini a ten fu Habakuk noso den speri fu en, Yehovah ben o strafu den ogrisma. Habakuk no ben fruwakti taki Yehovah ben o du so wan sani. Den Kaldeyasma ben ogri moro den Israelsma di ben sabi den wet fu Yehovah. Sobun, fu san ede Yehovah ben o gebroiki ogri-ati sma di no e dini en fu strafu en pipel? Fa yu ben o firi efu yu ben de Habakuk?

9. San Habakuk ben aksi ensrefi kande?

⁹ Leisi Habakuk 1:12-14, 17. Aladi Habakuk ben sabi taki Yehovah ben o meki den Babilonsma strafu den ogrisma fu en ten, toku a ben broko en ede ete. Ma a ben abi sakafasi èn dati meki a tan si Yehovah leki en „Stonbergi” (Deut. 32:4; Yes. 26:4). A ben abi a frutrow taki Yehovah ben o sori lobi nanga switifasi gi en. Dati meki a poti ete wan tu aksi gi Yehovah. A ben sabi taki Yehovah na a „Santawan” èn taki en „ai soifri tumusi fu si san ogri”. Sobun, a ben wani sabi fu san ede Yehovah ben o gi pasi taki a situwâsi na ini Yuda kon moro ogri èn fu san ede a ben o gi pasi taki furu sma ben o pina? Fu san ede a no ben o du wan sani wantewante? Fu san ede a ben o „tan pî” aladi a ben e si fa sma na ala sei e du ogri?

10. Fu san ede wi kan firi son leisi leki Habakuk?

¹⁰ Son leisi wi kan firi leki Habakuk. Kande wi e arki Yehovah, wi e frutrow na en tapu, wi e leisi èn studeri en Wortu. Den sani disi e meki taki wi abi howpu. Boiti dati, na organisâsi fu Yehovah e memre wi na den sani di a pramisi wi. Toku wi kan aksi wisrefi ete: ’O ten Gado o puru pina gi wi?’ San wi kan leri fu a sani di Habakuk du baka dati?

11. Sortu bosroiti Habakuk teki baka di a taki nanga Yehovah?

¹¹ Leisi Habakuk 2:1. Baka di Habakuk taki nanga Yehovah, a ben abi wan korostu firi. A ben de klariklari fu wakti tapu Yehovah. A ben o du dati ala ten. Dati meki a taki ete wan leisi taki  a o ’tan pî, aladi a e wakti a dei fu banawtu’ (Hab. 3:16). Tra futuboi fu Yehovah ben de klariklari fu wakti tapu Yehovah tu. Na eksempre fu den e gi wi a deki-ati fu du a srefi sani.​—Mika 7:7; Yak. 5:7, 8.

12. San wi kan leri fu Habakuk?

¹² San wi kan leri fu a bosroiti di Habakuk teki? A fosi sani na taki awinsi sortu tesi wi e kisi, noiti wi musu tapu fu begi Yehovah. A di fu tu sani na taki wi musu arki san Yehovah e taigi wi nanga yepi fu en Wortu nanga en organisâsi. Leki lasti, wi musu wakti tapu Yehovah èn wi musu abi a frutrow taki te en ten doro a o puru pina na grontapu. Efu wi e tan du den sani disi neleki Habakuk, dan wisrefi o abi wan korostu firi èn wi o man horidoro. A howpu di wi abi o yepi wi fu abi moro pasensi èn fu no lasi wi prisiri, awinsi sortu tesi wi e kisi. A o meki wi abi a frutrow taki wi hemel Tata o du wan sani.​—Rom. 12:12.

13. Fa Yehovah trowstu Habakuk?

¹³ Leisi Habakuk 2:3. Wi kan de seiker taki Yehovah ben breiti taki Habakuk ben wakti tapu en. Na Almakti Gado ben si taki Habakuk ben de na ini wan muilek situwâsi. Dati meki a trowstu Habakuk. A gi en a dyaranti taki heri esi a ben o du wan sani fu puru den broko-ede di a ben abi. Te yu luku en bun, dan Gado taigi Habakuk: „Abi pasensi, frutrow tapu mi. Mi o piki a begi fu yu, awinsi a gersi leki yu musu wakti langa!” Yehovah memre Habakuk taki a ben poti wan ten kaba fu du san a pramisi. A gi Habakuk a deki-ati fu tan wakti. A no ben o wakti fu soso.

14. San wi musu du te wi e kisi tesi?

¹⁴ Wi musu wakti tapu Yehovah èn wi musu arki san a e taigi wi. Dan wi o man frutrow na en tapu èn wi o abi wan korostu firi awinsi sortu problema noso tesi wi e kisi. Yesus leri wi taki wi no musu broko wi ede tumusi nanga a ten di Yehovah poti fu du san a pramisi (Tori 1:7). Wi musu abi a frutrow taki Yehovah sabi san na a yoisti ten fu du wan sani. Dati meki wi musu wakti nanga pasensi, wi musu abi sakafasi èn wi musu abi bribi. Wi musu gebroiki a ten di wi abi fu du ala san wi man gi Yehovah.​—Mark. 13:35-37; Gal. 6:9.

15, 16. (a) San Yehovah pramisi wi na ini a buku Habakuk? (b) San wi e leri fu den pramisi disi?

¹⁵ Luku san Yehovah pramisi: „A reti-ati sma o tan libi fu di a abi bribi”, èn „a sabi fu a glori fu Yehovah o lai na grontapu” (Hab. 2:4, 14). Iya, Yehovah o gi den sma di e wakti tapu en, têgo libi.

¹⁶ Prakseri a sani di Yehovah pramisi na ini Habakuk 2:4. A pramisi disi ben prenspari so te gi na apostel Paulus, taki na ini dri brifi a taki fu en! (Rom. 1:17; Gal. 3:11; Hebr. 10:38) Awinsi sortu problema wan reti-ati sma abi, a kan de seiker taki efu a tan arki Yehovah èn efu a tan frutrow na en tapu, a o si fa den pramisi fu Yehovah o kon tru. Yehovah wani taki wi musu poti prakseri na den sani di a o du gi wi na ini a ten di e kon.

17. Sortu dyaranti a buku Habakuk e gi wi?

¹⁷ Wi di e libi na ini den lasti dei disi, kan leri wan moi sani fu a buku Habakuk.  Yehovah pramisi taki a o gi ibri reti-ati sma di e frutrow na en tapu, têgo libi. Sobun, meki wi tan tranga wi bribi èn meki wi tan frutrow na en tapu awinsi sortu problema noso broko-ede wi abi. Den sani di Yehovah taigi Habakuk e gi wi a dyaranti taki a o yepi wi èn taki a o frulusu wi. A wani nomo taki wi e frutrow na en tapu èn taki wi e wakti a ten te en Kownukondre o tiri. Na a ten dati, grontapu o furu nanga safri-ati sma di de koloku èn di e dini Yehovah.​—Mat. 5:5; Hebr. 10:36-39.

18. Fu san ede wi kan taki dati den sani di Yehovah taki ben doro Habakuk ati?

¹⁸ Leisi Habakuk 3:16-19. Den sani di Yehovah taigi Habakuk ben doro en ati. A ben denki dipi fu den bigi sani di Yehovah ben du gi en pipel na ini a ten di pasa. Now a ben e frutrow moro tapu Yehovah. A ben sabi taki Yehovah ben o du wan sani heri esi. A sani disi ben trowstu en aladi a ben sabi taki a ben o pina ete fu wan syatu pisi ten. A no ben e tweifri moro, ma a ben de seiker taki Yehovah ben o frulusu en. Den sani di a taki na ini Habakuk 3:18 e sori taki a ben e frutrow trutru tapu Gado. Nowan tra sma taki so wan sani. Son sabiman e taki dati Habakuk e taki na ini a vers disi: „Mi o dyompo fu prisiri gi Masra. Mi o dansi fu prisiri gi Gado.” Disi na wan moi les gi wi! Yehovah no pramisi wi moi sani nomo, ma a e sori wi tu taki nownow kaba a e du sani fu meki den pramisi dati kon tru.

19. Fa wi kan feni trowstu neleki Habakuk?

¹⁹ A prenspari sani di wi e leri fu a buku Habakuk, na taki wi musu frutrow tapu Yehovah (Hab. 2:4). Fu man tan du dati, wi musu abi wan bun matifasi nanga Yehovah. Wi kan tron bun mati fu en (1) te wi e tan begi en èn te wi e fruteri en ala wi problema nanga broko-ede, (2) te wi e arki san a e taigi wi nanga yepi fu en Wortu nanga en organisâsi èn (3) te wi e wakti nanga pasensi tapu Yehovah. Na dati Habakuk ben du. Na a bigin fu a buku fu en, a ben e sari. Ma na a kaba wi e si taki a ben kisi deki-ati èn a ben de nanga furu prisiri. Meki wi teki na eksempre fu en, dan wi srefi o firi a steifi brasa fu wi hemel Tata, Yehovah. Na en wawan kan gi wi so furu trowstu na ini a dungru grontapu disi.