1-3. (a) Fa wi musu si den tru leri fu Bijbel? Gi wan eksempre. (Luku den prenki na a bigin fu na artikel.) (b) San wi o luku na ini na artikel disi?

SON sma abi a gwenti fu bai wan sani, dan den e tyari en go baka na a wenkri. A sani disi e pasa moro furu te sma e bai sani na tapu Internet. Kande den e du disi fu di den no lobi a sani di den bai noso kande a sani no bun. Dati meki den wani kenki en gi wan tra sani noso den wani den moni baka.

² Noiti wi wani du a sani disi nanga den tru leri fu Bijbel. Te wi „bai” den kaba, noso te wi kon sabi den tru leri, dan noiti wi wani „seri” den noso drai baka gi den (leisi Odo 23:23; 1 Tim. 2:4). Soleki fa wi si na ini na fosi artikel, wi meki ten fu kon sabi den tru leri fu Bijbel. Sonwan fu wi bosroiti fu no feti baka wan wroko pe wi ben kan meki furu moni èn trawan kisi gens fu famiri nanga mati. Boiti dati, wi ben abi fu kenki wi denki nanga wi libi èn wi ben musu tapu nanga gwenti di Yehovah no lobi. Ma awinsi  o furu sani wi libi na baka, toku den blesi di wi kisi warti moro den sani dati.

³ Yesus ben gi wan agersitori fu wan bisnisman di ben e waka e seri sani èn di ben e suku diri peri. Di a man feni wan peri di ben warti furu, dan „wantewante a seri” ala san a ben abi fu kan bai en (Mat. 13:45, 46). A peri dati na den tru leri fu Gado Kownukondre. Yesus ben wani sori wi o warti den tru leri ben o de gi den sma di e suku den. Di wi kon sabi den tru leri fu Gado Kownukondre èn den tra moi leri fu Bijbel, dan wi srefi ben de klariklari fu du iniwan sani fu feni den. Efu wi e tan si den leki warti sani, dan noiti wi o „seri” den. Ma a sari taki son anbegiman fu Gado gowe libi a tru anbegi fu di den no ben si en moro leki wan warti sani. Noiti wi wani du dati! Dati meki wi musu gi yesi na a rai di Bijbel e gi fu ’tan du san wi leri’. (Leisi 3 Yohanes 2-4.) Disi wani taki dati wi musu poti a tru anbegi na a fosi presi na ini wi libi. Ma fu san ede wan sma ben o wani „seri” san tru èn fa dati kan pasa? Fa wi kan sorgu taki noiti wi e meki a fowtu dati? San kan yepi wi fu ’tan du san wi leri’? Wi o piki den aksi dati na ini na artikel disi.

4. Fu san ede son sma ben tapu fu waka na Yesus baka?

⁴ Na ini a ten fu Yesus son sma ben lobi den tru leri fu en, ma den no tan waka na en baka. Fu eksempre, baka di Yesus gi wan bigi grupu sma nyanyan na wan wondru fasi, den sma go na en baka di a go na abrasei fu a Se fu Galilea. Drape Yesus taigi den wani sani di skreki den. A taki: „Efu unu no e nyan a skin fu a Manpikin fu libisma èn unu no e dringi en brudu, dan unu no abi libi na ini unsrefi.” Na presi taki den aksi Yesus san den wortu dati wani taki, den naki futu èn den taki: „A sani di a taki e gi groskin. Suma kan tan arki den sani disi?” A bakapisi ben de taki „furu fu den disipel fu en gowe go du den sani di den ben e du fosi. Den no ben wani waka moro nanga en.”​—Yoh. 6:53-66.

5, 6. (a) Fu san ede son sma na ini a ten disi gowe libi a tru anbegi? (b) Fa wan sma ben kan drifi gowe safrisafri fu a tru anbegi?

⁵ A sari taki son sma na ini a ten disi gowe libi a tru anbegi. Sonwan fu den naki futu fu di den no ben e agri nanga a nyun fasi fa den brada fruklari son Bijbeltekst. Noso kande den atibron di wan brada di abi bigi frantwortu taki noso du wan sani di den no lobi. Tra sma mandi di den kisi rai fu Bijbel, èn trawan no ben man feni en nanga wan sma na ini a gemeente. Son sma arki den falsi leri fu sma di fadon komoto na bribi noso den arki den sma di no lobi a tru anbegi. Disi na wan tu sani di e meki taki son sma e bosroiti fu ’hari densrefi puru’ fu Yehovah nanga a gemeente (Hebr. 3:12-14). A ben o moro bun efu den ben o teki na eksempre fu na apostel Petrus. Di den sma drai baka gi Yesus, dan Yesus aksi den apostel efu den no ben wani gowe tu. Petrus piki en: „Masra, na suma wi musu go? Yu abi wortu di e gi sma têgo libi.”​—Yoh. 6:67-69.

⁶ Trawan drifi gowe safrisafri fu a  tru anbegi sondro taki den sabi dati. Wi kan agersi den sma disi nanga wan boto di e drifi gowe fu a syoro. Dati meki Bijbel e warskow wi fu luku bun taki wi no e „drifi gowe” (Hebr. 2:1). Tra fasi leki sma di e hari densrefi puru fu a tru anbegi, wan sma di e drifi gowe no e du dati fu espresi. Ma toku so wan sma e du sani di kan pori a matifasi di a abi nanga Yehovah. Fa wi kan sorgu taki a sani disi no miti wi?

7. San o yepi wi fu no seri san tru?

⁷ Fu man tan waka a reti pasi, dan wi musu gi yesi na ala san Yehovah e taki. A tru anbegi musu de a moro prenspari sani na ini wi libi èn wi musu du san wi leri na ini Bijbel. Kownu David ben taigi Yehovah na ini begi: „Mi o waka a reti pasi fu yu” (Ps. 86:11). David ben teki a bosroiti fu tan na ini a tru anbegi. Wisrefi musu du dati. Efu wi no teki a bosroiti dati, dan wi ben kan prakseri den sani di wi libi na baka èn te fu kaba wi ben kan angri fu kisi den sani dati baka. Dati meki wi musu lobi ala den tru leri fu Bijbel. Wi no kan lobi wan tu nomo. Bijbel e taki dati wi musu hori wisrefi na „ala san tru” (Yoh. 16:13). Meki wi go luku feifi sani di wi ben musu du fu kan bai san tru. Disi o yepi wi fu tan abi warderi gi san tru èn fu no seri den baka.​—Mat. 6:19.

8. Te wi no e gebroiki wi ten na wan bun fasi, dan fa dati kan meki taki wi drifi gowe fu a tru anbegi? Fruteri wan ondrofenitori.

⁸ Ten. Efu wi no wani drifi gowe fu a tru anbegi, dan wi musu gebroiki wi ten na wan koni fasi. Efu wi no luku bun, dan wi kan gebroiki tumusi furu ten fu meki prisiri, fu du sani di wi lobi, fu go tapu Internet noso fu luku telefisi. A no fowtu fu du den sani disi. Ma wi musu sorgu taki wi no gebroiki a ten di wi abi fu studeri èn fu du tra sani na ini na anbegi, fu du den sani disi. Luku san ben pasa nanga wan sisa di nen Emma. * Sensi di Emma ben yongu, a ben lobi asi èn solanga a ben abi na okasi, a ben e go rèi asi. Baka wan pisi ten, en konsensi ben e fon en fu di a ben si taki a ben e gebroiki tumusi furu ten fu rèi asi. Dati meki a tyari kenki kon. Na ondrofenitori fu Cory Wells, wan sisa di ben lobi rèi asi fosi, ben gi en deki-ati. * Now Emma e gebroiki furu fu en ten fu dini Yehovah èn fu du sani nanga en famiri nanga mati di e dini Yehovah. A tron wan moro bun mati fu Yehovah èn a e firi bun fu di a sabi taki a e gebroiki en ten na wan bun fasi.

9. Fa gudu kan tron a moro prenspari sani gi wan sma?

⁹ Den gudu fu wi. Efu wi wani tan waka a reti pasi, dan wi musu luku bun taki den gudu fu wi no e tron den moro prenspari sani gi wi. Di wi leri sabi den tru leri fu Bijbel, wi kon frustan taki na anbegi fu Yehovah prenspari moro gudu. Dati meki wi no ben feti baka gudu moro fu di wi ben wani waka a reti pasi. Ma a kan taki now wi e si taki tra sma e bai den moro nyun telefon noso tra moimoi sani. Wi kan  bigin wani den sani dati tu. Kande wi no de tevrede moro nanga den sani di wi abi èn wi kan bigin feti baka gudu na presi fu poti na anbegi fu Yehovah na a fosi presi. Na dati ben pasa nanga Deimas. A ben lobi „a grontapu disi” so te taki a tapu fu wroko makandra nanga na apostel Paulus (2 Tim. 4:10). Fu san ede Deimas du dati? Kande a ben lobi gudu moro Yehovah noso kande a ben kon weri fu wroko nanga Paulus fu di a ben musu libi furu sani na baka. San disi e leri wi? Kande wi ben lobi gudu fosi. Ma wi musu luku bun taki wi no wiki a lobi dati baka. Efu dati pasa, dan wi kan lasi a lobi di wi abi gi den tru leri fu Bijbel.

10. Efu wi wani tan waka a reti pasi, dan nanga san wi musu luku bun?

¹⁰ Mati nanga famiri. Efu wi wani tan waka a reti pasi, dan wi no musu meki tra sma dwengi wi fu du sani di no bun. Di wi kon sabi den tru leri fu Bijbel, dan son mati nanga famiri di no de Kotoigi bigin denki tra fasi fu wi. Sonwan fu den e lespeki a nyun bribi fu wi, ma trawan bigin gens wi (1 Petr. 4:4). A no de fu taki dati wi e du ala san wi man fu libi bun nanga den famiri fu wi. Ma wi musu luku bun tu taki wi no e du sani di Yehovah no lobi, soso fu plisi den. Soleki fa 1 Korentesma 15:33 e sori, dan wi wani de bun mati soso nanga sma di lobi Yehovah.

11. Fa wi kan sorgu taki wi no libi na wan fasi di Yehovah no feni bun?

¹¹ Takru denki nanga wan libi di no krin. Ala sma di e waka a reti pasi musu de santa (Yes. 35:8; leisi 1 Petrus 1:14-16). Di wi bigin dini Yehovah wi alamala tyari kenki kon fu kan libi soleki fa Bijbel e leri wi. Son sma ben musu tyari bigi kenki kon fu kan libi wan krin libi. Ma wi musu luku bun taki wi no bigin libi baka na wan fasi di Yehovah no feni bun. Fa wi kan sorgu taki dati no pasa? Prakseri o furu Yehovah pai fu meki wi kon santa. A meki en lobi Manpikin Yesus Krestes dede gi wi! (1 Petr. 1:18, 19) Efu wi wani tan libi wan krin libi, dan wi no musu frigiti o furu waarde a lusu-paiman fu Yesus abi.

12, 13. (a) Fu san ede wi musu si son fesa neleki fa Yehovah e si den? (b) San wi o luku now?

¹² Gwenti di Gado no feni bun. Famiri, sma na wrokope èn pikin na skoro kan dwengi wi fu hori son fesa nanga den. San kan yepi wi te sma wani dwengi wi fu teki prati na fesa di Yehovah no feni bun? Wi musu hori na prakseri fu san ede Yehovah no lobi den fesa disi. Wi kan ondrosuku san den buku fu wi e taki fu son fesa. Te wi e prakseri fu san ede wi no e hori son fesa, dan wi no o tweifri taki wi e du „san Masra feni bun” (Ef. 5:10). Te wi e frutrow tapu Yehovah nanga a Wortu fu en, dan wi no o „frede libisma”.​—Odo 29:25.

¹³ Wi wani waka a reti pasi fu têgo. San wi musu du efu wi no wani taki noti puru wi na tapu a reti pasi? Meki wi poti prakseri na dri sani.

14. (a) Te wi e tan studeri Bijbel, dan fa dati o yepi wi fu no gowe libi a tru bribi? (b) Fu san ede koni, piri-ai nanga frustan prenspari?

¹⁴ A fosi sani na taki wi musu studeri Gado Wortu èn wi musu denki dipi  fu san wi leri. Meki ten fu du disi. O moro wi e studeri, o moro wi o kon lobi den tru leri fu Bijbel èn noiti wi o wani drai baka gi den. Boiti taki wi bai san tru, Odo 23:23 e taki dati wi musu bai „koni, piri-ai, nanga frustan” tu. Wi no musu sabi den tru leri nomo, ma wi musu du tu san wi leri. Frustan prenspari fu di te wi frustan wan tori, dan wi e si san a tori dati abi fu du nanga den sani di wi sabi kaba fu Yehovah. Koni o meki taki wi du san wi leri. Son leisi den sani di wi kon sabi, kan de leki piri-ai gi wi fu di den e sori wi taki wi musu tyari kenki kon. Wi musu teki a piri-ai dati wantewante fu di a warti moro solfru.​—Odo 8:10.

15. Fa den tru leri fu Bijbel kan de leki wan leribuba di e kibri wi?

¹⁵ A di fu tu sani, na taki wi musu meki muiti ala dei fu du san wi leri. Ala sani di tru musu de leki wan leribuba na yu mindribere (Ef. 6:14). Na ini Bijbel ten, a leribuba fu wan srudati ben e kibri en mindribere. Ma a ben musu tai en bun. Efu a no ben tai steifi, dan a no ben o kibri en. Fa den tru leri kan de leki wan leribuba gi wi? Efu wi e poti prakseri na den tru leri fu Bijbel na ini ala san wi e du, dan den o yepi wi fu no kon abi wan fowtu denki èn fu teki bun bosroiti. Te wi e kisi seryusu problema noso tesi, dan den sani di wi leri o gi wi a krakti fu du san bun. Neleki fa wan srudati no ben o go feti sondro en leribuba, na so a de tu taki noiti wi musu du wan sani sondro fu poti prakseri na den tru leri fu Bijbel. Ala ten wi wani sorgu taki wi e tan du san wi leri na ini Bijbel. Na ini owruten wan srudati ben kan fasi en feti-owru na en leribuba tu. Meki wi go luku fa wi kan du a srefi sani tu.

16. Te wi e yepi trawan fu kon sabi den tru leri fu Bijbel, dan fa dati e yepi wi fu tan waka a reti pasi?

¹⁶ A di fu dri sani na taki wi musu du ala san wi man fu gi trawan leri fu Bijbel. Te wi e du dati, dan wi o man hori a feti-owru fu a yeye, noso „Gado Wortu” steifi (Ef. 6:17). Wi alamala kan tron bun leriman „di man gebroiki a tru leri na ini Gado wortu na wan yoisti fasi” (2 Tim. 2:15). Te wi e gebroiki Bijbel fu gi trawan leri, dan wisrefi e kon sabi Bijbel moro bun èn wi e kon kisi moro warderi gi en. Disi o yepi wi fu tan waka a reti pasi.

17. Fu san ede yu e si den tru leri fu Bijbel leki warti sani?

¹⁷ Den tru leri na ini Bijbel na wan warti sani di wi kisi fu Yehovah. Den e yepi wi fu abi wan bun matifasi nanga wi hemel Tata èn dati na a moro prenspari sani di wi abi. Aladi wi kon sabi furu sani fu Yehovah kaba, toku a abi furu sani fu leri wi ete. A pramisi wi taki fu têgo a o tan gi wi leri. Sobun, si den tru leri fu Bijbel leki warti sani. Du ala san yu man fu „bai san tru” èn fu „no seri en”. Dan neleki David yu o man pramisi Yehovah a sani disi: „Mi o waka a reti pasi fu yu.”​—Ps. 86:11.