1. Sortu grani Yehovah gi wi?

YEHOVAH gi wi a grani fu teki wi eigi bosroiti na ini wi libi. A e leri wi fa fu teki bun bosroiti èn a e yepi wi fu abi bun bakapisi (Ps. 119:173). Sobun, te wi e wroko nanga den koni rai fu Bijbel, dan wi o teki moro bun bosroiti.​—Hebr. 5:14.

2. San kan pasa baka te wi teki wan bosroiti?

² Ma awinsi wi teki wan bun bosroiti, a kan muilek gi wi fu du san wi bosroiti. Luku wan tu eksempre: Wan yongu brada bosroiti fu leisi a heri Bijbel. A e leisi wan tu wiki, ma dan a e stop. Wan sisa bosroiti fu dini leki gewoon pionier, ma a e tan skoifi a dei te a o bigin nanga a wroko disi. Den owruman fu a gemeente bosroiti taki den o meki moro muiti fu go luku den brada nanga sisa na oso fu gi den deki-ati, ma baka wan tu mun den no du ete san den bosroiti. Na ini ala den difrenti situwâsi disi den sma no du san den ben bosroiti. Den Kresten na ini a gemeente fu Korente ben abi wan srefi sortu problema. Meki wi luku san wi kan leri fu den.

3. Sortu bosroiti den Kresten na ini Korente ben teki, ma san pasa?

³ Na a pisi ten fu a yari 55, den Kresten na ini a gemeente fu Korente bosroiti fu du wan prenspari sani. Den ben yere taki den brada nanga sisa na Yerusalem nanga Yudea ben abi en muilek èn den ben e pina. Den ben yere tu taki tra gemeente ben e piki moni fu yepi den brada nanga sisa dati. Fu di a gemeente fu Korente ben wani sori switifasi,  meki den bosroiti fu yepi den brada nanga sisa. Den aksi na apostel Paulus fa den ben kan yepi. Paulus meki a gemeente sabi san den ben kan du èn a seni Titus fu go teki a moni di den ben o tyari kon na wán (1 Kor. 16:1; 2 Kor. 8:6). Ma wan tu mun baka dati Paulus yere taki den brada nanga sisa fu Korente no poti a moni soleki fa den ben taki. A bakapisi ben de taki den no ben o man tyari ala moni kon na wán biten, fu kan tyari en go na Yerusalem makandra nanga a moni fu den tra gemeente.​—2 Kor. 9:4, 5.

4. Sortu deki-ati Paulus gi a gemeente fu Korente na 2 Korentesma 8:7, 10, 11?

⁴ Den Korentesma ben teki wan bun bosroiti. Paulus ben prèise den taki den ben abi wan tranga bribi èn taki den ben wani gi moni fu yepi den brada nanga sisa. Ma a ben musu gi den deki-ati tu fu du san den ben bosroiti. (Leisi 2 Korentesma 8:7, 10, 11.) A tori disi e leri wi taki awinsi wan Kresten teki wan bun bosroiti, a kan muilek gi en fu du san a bosroiti.

5. Sortu aksi wi o piki na ini na artikel disi?

⁵ Neleki den Korentesma, wi kan feni en muilek fu du san wi bosroiti. Fu san ede? Fu di wi na sondusma, meki wi e draidrai son leisi fu du sani. Noso sani kan pasa di wi no ben fruwakti èn di kan meki taki wi no man du srefisrefi san wi bosroiti (Preik. 9:11; Rom. 7:18). San wi kan du fu teki koni bosroiti noso fu kenki wan bosroiti di wi teki kaba? Fa wi kan sorgu taki wi du san wi bosroiti?

6. O ten wi o abi fu kenki wan bosroiti di wi teki?

⁶ Son prenspari bosroiti di wi teki wi no wani kenki noiti. Fu eksempre, wi o tan dini Yehovah èn ala ten wi wani tai hori na wi trowpatna (Mat. 16:24; 19:6). Ma son leisi wi abi fu kenki wan bosroiti di wi teki. Fu san ede? Fu di a kan taki a situwâsi fu wi de tra fasi now. San kan yepi wi fu teki moro bun bosroiti?

7. San wi kan aksi Yehovah èn fu san ede?

⁷ Begi Gado fu gi yu koni. Yehovah meki Yakobus skrifi: „Efu wan fu unu e mankeri koni, dan meki a tan aksi Gado fu dati, bika te Gado e gi sma sani, a e du dati nanga en heri ati” (Yak. 1:5). Wi alamala e „mankeri koni” fu du son sani. Sobun, aksi Yehovah fu yepi yu te yu musu teki bosroiti èn te yu musu kenki wan bosroiti di yu teki kaba. Yehovah o yepi yu fu teki koni bosroiti.

8. San wi musu du fosi wi teki wan bosroiti?

⁸ Ondrosuku sani finifini. Suku rai na ini Gado Wortu, leisi den buku fu na organisâsi fu Yehovah èn taki nanga sma di yu kan frutrow (Odo 20:18). A prenspari fu ondrosuku sani finifini fu kan teki wan bun bosroiti te wi musu suku wan tra wroko noso te wi musu froisi. Wi musu luku tu sortu skoroleri o yepi wi fu feni wan wroko pe wi kan sorgu wisrefi èn tan dini Yehovah.

9. Sortu wini a o tyari kon gi wi te wi de eerlijk nanga wisrefi?

⁹ Luku fu san ede yu wani du wan sani. A prenspari gi Yehovah fu san ede wi e du sani (Odo 16:2). A wani taki wi de eerlijk na ini ala sani. Sobun, te wi e teki bosroiti wi musu de eerlijk nanga wisrefi. Efu wi no ben o de eerlijk, dan a kan pasa taki wi no o man du san wi bosroiti. Fu eksempre, kande wan yongu brada wani tron wan gewoon pionier. Ma baka wan pisi ten a no man doro den yuru èn a no  e du a preikiwroko nanga prisiri. Kande a ben denki taki a ben wani pionier fu di a lobi Yehovah. Ma a kan taki a moro prenspari reide fu san ede a bigin pionier, na taki a ben wani plisi en papa nanga mama noso wan tra sma di a e lespeki.

10. San kan yepi wi fu tyari kenki kon?

¹⁰ Prakseri wan Bijbelstudie di bosroiti fu no smoko moro. Na ini a bigin a e feti fu stop èn a e go bun wán noso tu wiki. Dan a e bigin smoko baka. Ma te fu kaba a man tapu nanga smoko! Fu di a lobi Yehovah èn fu di a wani prisiri en ati, meki a ben man tapu nanga a takru gwenti disi.​—Kol. 1:10; 3:23.

11. Fu san ede a prenspari fu sabi san yu wani du?

¹¹ Sabi san yu wani du. Te yu sabi san yu wani du, dan a o moro makelek fu du dati tu. Fu eksempre, kande yu bosroiti fu leisi Bijbel ibri dei. Ma efu yu no bosroiti o ten yu wani du en èn o furu yu wani leisi, dan a kan taki yu no o man du san yu bosroiti. * Noso kande den owruman fu wan gemeente bosroiti fu go luku den brada nanga sisa moro furu fu kan gi den deki-ati. Ma baka wan pisi ten den no du ete san den ben bosroiti. Fu man abi bun bakapisi, den kan aksi densrefi: „Wi luku sortuwan fu den brada noso sisa abi yepi fanowdu? Wi taki tapu sortu dei wi wani go luku den?”

12. San wi o abi fu du son leisi èn fu san ede?

¹² No fruwakti tumusi furu fu yusrefi. Nowan fu wi abi a ten nanga a krakti fu du ala san wi wani. Sobun, no fruwakti tumusi furu fu yusrefi. Te a de fanowdu, dan yu o abi fu kenki wan bosroiti di yu teki, fu di yu no man du moro san yu ben abi na prakseri (Preik. 3:6). Ma kon meki wi taki dati yu luku a bosroiti fu yu, yu tyari wan tu kenki kon, èn now yu si taki yu o man du san yu abi na prakseri. Meki wi luku feifi sani di kan yepi yu fu du san yu bosroiti.

13. Fa yu kan kisi krakti fu du san yu bosroiti?

¹³ Begi Gado fu gi yu krakti fu du san yu bosroiti. Gado kan gi yu „a krakti fu du” san yu bosroiti (Fil. 2:13). Fu dati ede, aksi Yehovah fu gi yu en santa yeye di o gi yu krakti. Tan begi awinsi a gersi leki Yehovah no piki den begi fu yu ete. Yesus taki: „Tan aksi, dan unu sa kisi [santa yeye].”​—Luk. 11:9, 13.

14. Fa Odo 21:5 kan yepi yu fu du san yu bosroiti?

¹⁴ Sabi fa yu o du en. (Leisi Odo 21:5.) Fu kan du iniwan sani di yu abi na prakseri, yu musu sabi fa yu o du en. Dan yu musu du sani soleki fa yu seti na fesi. Na so a de tu te yu e teki bosroiti. Skrifi den sani di yu musu du èn di o yepi fu du san yu bosroiti. Te yu musu du wan muilek sani, dan prati en na ini pikinpikin wroko. Ibri leisi te yu du wan fu den pikin wroko disi, yu o man si san yu musu du ete fu man klari a heri wroko. Paulus ben gi den Kresten na ini Korente a deki-ati fu poti moni na wan sei „ibri fosi dei fu a wiki”, na presi fu wakti teleki a kon, fosi den bigin piki moni (1 Kor. 16:2). Te yu e prati bigi wroko na ini pikinpikin wroko, dan yu no o kisi a firi leki yu no man klari a wroko.

15. San o yepi wi fu du san wi bosroiti?

¹⁵ Efu yu skrifi san yu wani du, dan dati  kan meki en moro makelek fu du san yu bosroiti (1 Kor. 14:40). Fu eksempre, den owruman fu a gemeente e kisi a rai fu meki wan fu den owruman skrifi sortu bosroiti den teki, suma o du a wroko èn o ten a wroko musu kaba. Te owruman e wroko nanga a rai disi, dan a moro makelek gi den fu du san den bosroiti (1 Kor. 9:26). Yu kan du wan srefi sortu sani. Fu eksempre, ibri dei yu kan meki wan lijst fu den sani di yu wani du èn skrifi den moro prenspari sani di yu wani du na tapusei fu a lijst. Disi o yepi yu fu du san yu bosroiti èn fu no lasi ten.

16. San yu musu du fu kan du san yu bosroiti èn fa Romesma 12:11 e sori disi?

¹⁶ Du ala san yu man fu hori yusrefi na a bosroiti di yu teki. Yu musu meki muiti fu du san yu bosroiti. (Leisi Romesma 12:11.) Paulus taigi Timoteyus fu „tan meki muiti” fu tron wan moro bun leriman. A rai disi fu Paulus kan yepi wi nanga iniwan sani di wi wani du gi Yehovah.​—1 Tim. 4:13, 16.

17. Fa a rai na Efeisesma 5:15, 16 kan yepi yu fu du san yu bosroiti?

¹⁷ Gebroiki yu ten na wan koni fasi. (Leisi Efeisesma 5:15, 16.) Poti wan ten fu du san yu bosroiti èn hori yusrefi na a ten dati. Efu yu no meki a ten, yu no o man du san yu bosroiti (Preik. 11:4). No lasi yu ten nanga krakti nanga sani di no de so prenspari (Fil. 1:10). Efu a kan, pruberi fu du sani na wan ten te sma no man puru yu prakseri. Taigi tra sma taki yu musu poti ala yu prakseri na a sani di yu e du. Kande yu kan kiri yu telefon noso luku den boskopu di sma seni gi yu, baka te yu kaba. *

18-19. San o yepi yu fu tan meki muiti fu du san yu bosroiti, awinsi sani no e waka soleki fa yu ben abi na prakseri?

¹⁸ Prakseri den bun bakapisi. Te yu e du san yu bosroiti, dan a de leki te yu doro wan presi pe yu ben wani go. Te yu e prakseri fa a o de te yu doro, dan awinsi a pasi tapu, yu o suku wan tra pasi fu doro pe yu wani go. Na so a de tu taki te wi e prakseri den bun bakapisi di wi o kisi te wi du san wi bosroiti, dan wi no o gi abra awinsi sani no e waka soleki fa wi ben abi na prakseri.​—Gal. 6:9.

¹⁹ A no makelek fu teki bun bosroiti èn a kan muilek tu fu du san wi bosroiti. Ma Yehovah kan gi yu koni nanga krakti fu du san yu bosroiti.