Mi gebore na ini 1983. Mi ben de wan gosontu pikin, ma di mi ben abi tin yari mi skin bigin hati mi. Tu yari baka dati mi wiki wan mamanten èn mi no ben man buweigi mi futu. Awinsi san mi ben e du, noti no ben yepi. Sensi a dei dati mi no waka moro. A siki disi meki taki mi no ben gro moro tu. Te nanga now mi skin pikin leki di fu wan pikin-nengre.

Baka di mi siki mi no ben komoto na oso moro. Ma wan tu mun baka dati tu Yehovah Kotoigi kon na mi oso. Nofo tron te sma ben kon na wi oso mi ben go kibri. Ma a dei dati mi meki den tu frow taki nanga mi. Di den ben taki fu a paradijs, mi ben memre san mi ben yere di mi ben abi feifi yari. Na a ten dati Jethro, wan zendeling di ben libi na ini Sranan, ben kon wán leisi na ini a mun na a dorpu fu wi fu studeri Bijbel nanga mi papa. Jethro ben sori switifasi gi mi. Mi ben lobi en. Wan tra sani na taki wanwan leisi mi granpapa nanga mi granmama ben tyari mi go na den konmakandra di ben hori na ini a dorpu fu wi. Dati meki mi ben feni en bun di Florence, wan fu den frow di ben kon na mi a dei dati, aksi mi efu mi ben wani sabi moro.

Florence ben kon baka nanga en masra Justus èn den bigin studeri Bijbel nanga mi. Di den si taki mi no ben man leisi, den leri mi fu leisi. Baka wan pisi ten mi srefi ben man leisi. Wan dei a trowpaar disi taigi mi taki den ben o go dini na Sranan. Mi ben sari fu di sma no ben de na ini Orealla di ben man studeri go doro nanga mi. Ma mi breiti taki Yehovah no ben frigiti mi.

Syatu baka dati Floyd, wan brada di ben pionier, kon na Orealla èn a miti mi di a ben preiki na ini a dorpu. Di a aksi mi efu mi wani studeri Bijbel, mi bigin lafu. A aksi mi: „Fu san ede yu e lafu?” Mi taigi en taki mi ben studeri a brochure San Gado e aksi foe wi? kaba èn taki mi ben bigin nanga a buku Sabi di e tjari joe go na têgo libi. * Mi fruteri en tu fu san ede mi stop nanga a studie. Floyd klari a Sabi-buku nanga mi, ma baka dati en srefi go dini na wan tra presi. A sani disi meki taki mi no ben abi sma baka fu studeri nanga mi.

 Ma na ini 2004 Granville nanga Joshua, tu spesrutu pionier, kon na Orealla. Di den ben preiki na ini a dorpu den kon na mi oso. Di den aksi mi efu mi wani studeri Bijbel, mi bigin lafu. Mi aksi den fu studeri a Sabi-buku baka nanga mi. Mi ben wani si efu den ben o leri mi den srefi sani di den tra brada ben leri mi. Granville taigi mi taki den ben hori konmakandra na ini a dorpu. Aladi mi no ben komoto na oso bijna tin yari kaba, mi ben wani go na den konmakandra. Dati meki Granville kon na mi oso, a opo mi poti na ini wan rol-sturu èn a pusu mi go na a Kownukondre zaal.

Bakaten, Granville gi mi deki-ati fu hori lezing na a Theokrasia Diniwroko-skoro. A ben taigi mi: „Yu no man waka, ma yu man taki. Wan dei yu o hori wan publikitaki. Mi de seiker taki yu o man.” A sani di a taki gi mi deki-ati.

Mi bigin go na ini a preikiwroko nanga Granville. Ma furu fu den santi pasi na ini a dorpu ben lai olo èn a ben muilek fu preiki nanga mi rol-sturu. Dati meki mi aksi Granville fu poti mi na ini wan kroiwagi te wi ben go preiki. A sani disi ben wroko bun. Na ini april 2005 mi dopu. Syatu baka dati den brada leri mi fa mi musu seti a bukukasi nanga a geluid na ini a Kownukondre zaal.

Na ini 2007 mi papa dede. A kisi hebi mankeri di a fadon komoto na ini wan boto. Mi famiri ben sari srefisrefi. Granville begi nanga wi èn a leisi wan tu Bijbeltekst nanga wi fu trowstu wi. Tu yari baka dati wan tra sari sani pasa. Granville dede baka di a boto pe a ben de na ini sungu.

A pikin gemeente fu wi ben sari srefisrefi. Wi no ben abi nowan owruman moro èn wi ben abi wán dinari nomo. A ben hati mi taki Granville ben dede fu di a ben de wan bun mati fu mi. A ben yepi mi fu tron wan moro bun mati fu Yehovah èn a ben yepi mi nanga tra sani di mi ben abi fanowdu. Na a konmakandra di hori baka a dede fu en, mi ben musu leisi na a Waktitoren-studie. Mi ben man leisi soso den fosi tu paragraaf, dan mi bigin krei. Fu di mi no ben man stop krei meki mi ben abi fu komoto fu a podium.

Mi bigin prisiri baka di brada fu wan tra gemeente ben kon yepi na Orealla. Boiti dati, a bijkantoro ben seni Kojo, wan spesrutu pionier, kon gi wi. Wan tra sani di gi mi furu prisiri na taki mi mama nanga mi pikin brada bigin studeri Bijbel èn den dopu. Na ini maart 2015 mi tron dinari ini a diniwroko. Baka wan pisi ten mi hori mi fosi publikitaki. A dei dati mi ben breiti, ma mi krei di mi prakseri a sani di Granville ben taigi mi: „Wan dei yu o hori wan publikitaki. Mi de seiker taki yu o man.”

Den JW Broadcasting^® programa yepi mi fu si taki tra brada nanga sisa de na ini a srefi situwâsi leki mi. Ma aladi den siki, toku den de koloku èn den man du furu gi Yehovah. Mi srefi kan du son sani ete. Mi ben wani du ala san mi man gi Yehovah èn dati meki mi tron gewoon pionier. Èn na ini september 2019 mi kisi bigi nyunsu! A mun dati mi yere taki mi tron owruman na ini a gemeente fu wi di abi 40 preikiman.

Mi e warderi den brada nanga sisa di studeri nanga mi èn di yepi mi fu dini Yehovah. Ma san moro prenspari na taki noiti Yehovah frigiti mi.