Fosi mi fruteri san pasa baka dati, meki mi fruteri unu fa mi bigin nanga a furuten diniwroko.

Mi gebore na ini 1942 tapu a moi èilanti Korsow. Mi papa ben de fu Sranan, ma a froisi go na Korsow fu wroko drape. Wan tu yari fosi mi gebore a tron wan fu den fosi Yehovah Kotoigi di teki dopu na Korsow. a Ibri wiki a ben e studeri Bijbel nanga wi aladi wi no ben wani studeri ala ten. Di mi ben abi 14 yari, mi papa froisi wi go na Sranan so taki a ben kan sorgu a grani mama fu en.

Na Sranan mi ben abi wan tu yongu mati na ini a gemeente di ben e dini Yehovah fayafaya. Den ben de wan tu yari moro owru leki mi èn den ben e dini leki gewoon pionier. Te den ben e taki fu den sani di den ondrofeni na ini a preikiwroko, dan mi ben kan si na den fesi taki den ben de koloku srefisrefi. Baka den gemeente konmakandra mi nanga den mati fu mi ben abi takimakandra fu Bijbel tori, son leisi dorosei na ondro den stari fu hemel. Den mati disi yepi mi fu kon sabi san mi ben wani du nanga mi libi: mi ben wani wroko gi Yehovah. Dati meki mi dopu di mi ben abi 16 yari. Bakaten, di mi ben abi 18 yari mi bigin nanga a gewoon pionierwroko.

Mi leri furu sani leki pionier èn den les disi yepi mi na ini mi furuten diniwroko. Fu eksempre, wan fu den fosi sani di mi leri na taki a prenspari fu gi trawan leri. Di mi bigin pionier, dan wan zendeling, Willem van Seijl, teki a ten fu gi mi leri.  b A ben leri mi furu fu a fasi fa mi musu tyari frantwortu na ini a gemeente. Na a ten dati, mi no ben sabi taki mi ben abi a leri dati so tranga fanowdu.  A yari na baka, mi kisi wan toewijziging leki spesrutu pionier èn baka dati mi bigin yepi pikin grupu brada nanga sisa di ben tan na ini a busi fu Sranan, bun fara fu tra gemeente. Mi e warderi en trutru taki den brada gi mi a leri na a yoisti ten! Sensi a ten dati mi pruberi fu waka baka na eksempre fu den èn fu teki a ten fu gi trawan leri tu.

Wan tra sani di mi leri na taki a bun fu libi wan simpel libi èn fu seti sani heri bun na fesi. Na a bigin fu ibri mun mi nanga mi pionier mati ben pruberi fu prakseri na fesi sortu nyanyan nanga tra sani wi ben o abi fanowdu gi wan tu wiki. Dan wan fu wi ben teki a langa pasi go na foto fu bai den sani di wi ben abi fanowdu. Wi ben musu luku bun fa wi ben e gebroiki a moni di wi kisi fu a mun. Wi ben musu prati den sani bun, so taki den ben o hori wi wan heri mun. Efu nofo nyanyan noso tra sani no ben de te wi ben de na busi, dan wan tu sma ben kan yepi wi, ma dati na efu sma ben de. Mi denki taki fu di mi leri na ini mi yongu yari fu libi wan simpel libi èn fu seti sani bun na fesi, dati meki mi ben man poti prakseri na a wroko fu Yehovah mi heri libi langa.

Ete wan sani di mi leri na taki a bun fu gi sma leri na ini den eigi tongo. Mi gro kon nanga Bakratongo, Ingrisitongo, Papiamento nanga Sranantongo (den e kari en Sranan tu), a tongo di sma e taki furu na Sranan. Ma na ini busikondre mi si taki sma ben frustan a bun nyunsu moro bun te wi ben preiki na ini den eigi tongo. Mi ben feni en muileki fu taki sonwan fu den tongo disi, soleki Sramakatongo pe sma e gebroiki wan hei nanga lagi sten. Ma mi breiti taki mi meki a muiti. Na ini den yari di pasa, mi ben man leri moro furu sma a waaheid fu di mi ben man taki a tongo fu den.

A no de fu taki dati mi syen fu wan tu sani di pasa. Fu eksempre, wan leisi mi ben wani aksi wan uma, wan Sramaka bijbelstudenti, fa a ben e firi, fu di en bere ben hati en. Ma na presi fu dati, mi aksi en efu a ben de nanga bere! Mi no abi fu fruteri unu taki a no ben lobi na aksi fu mi. Aladi mi ben meki den sortu fowtu disi, toku mi ben du furu muiti ala ten fu taki a tongo fu den sma na den presi pe mi ben go.

Na ini 1970 mi kisi a toewijziging fu tron kring-opziener. A yari dati mi go na busi pe yu ben abi furu grupu brada nanga sisa, farawe fu tra gemeente. Drape mi sori den wan felem pe den ben kan si fowtow fu na edekantoro fu Yehovah Kotoigi. Fu man doro den, dan mi nanga wan grupu brada ben pasa den liba fu a busi na ini wan langa smara boto fu udu. Na ini a boto wi lai wan generator, wan bari nanga oli, lampu, nanga masyin di wi ben o abi fanowdu fu sori a felem. Di wi doro drape wi ben musu tyari ala lai go te na ini a busi pe wi ben o sori a felem. Ma a sani di mi man memre moro bun na a fasi fa den sma fu den farawe presi disi ben lobi a felem dati. A ben gi mi so furu prisiri fu yepi tra sma kon sabi Yehovah èn sosrefi a pisi fu en organisâsi  na grontapu. A wroko ben tranga, ma te mi ben si fa sma ben kon krosibei na Yehovah, dan dati ben gi mi furu prisiri fu du a wroko fu En.

Aladi mi ben si taki a moro makriki fu du a diniwroko sondro wan trowpatna, toku mi ben wani trow. Dati meki mi bigin begi spesrutu fu feni wan frow di ben o prisiri fu dini makandra nanga mi na ini a muilek furuten wroko disi na busikondre. Wán yari so baka dati mi bigin hori nanga Ethel, wan spesrutu pionier di ben de klariklari fu wroko tranga gi Yehovah. Sensi Ethel ben yongu a ben lobi na apostel Paulus trutru èn a ben wani gi ensrefi na ini a Kresten preikiwroko neleki en. Wi trow na ini september 1971 èn wi bigin du kringwroko makandra.

Ethel no gro kon nanga furu gudu. Sobun a ben makelek gi en fu du a kringwroko na busikondre. Fu eksempre, te wi ben e sreka wisrefi fu go na den gemeente farawe na busi, dan wi no ben tyari furu sani nanga wi. Wi ben wasi wi skin èn den krosi fu wi na ini den liba. Wi ben kisi a gwenti tu fu nyan ala san den brada ben gi wi fu nyan, efu na legwana, piranya, noso iniwan sani di den onti na busi noso di den fanga na liba. Efu preti no ben de, dan wi ben poti a nyanyan na ini banablad. Efu spun no ben de, dan wi ben nyan nanga wi anu. Mi nanga Ethel feni taki wi kon de leki dri titei di frekti bun steifi kon na wán fu di wi wroko tranga gi Yehovah èn fu di wi du dati makandra (Preik. 4:12). Den sani di wi ondrofeni, wi no ben o wani kenki nanga nowan tra sani!

Wan dei di wi gwe fu den brada na busikondre, dan a sani di mi fruteri na a bigin kon pasa. Di a boto doro na den sula, a saka go na ondro a watra, ma heri esi a sutu go na loktu baka. Mi breiti taki wi ben weri zwemvest èn taki wi no fadon komoto fu a boto. Ma a boto ben furu nanga watra.  Wi trowe a nyanyan fu den patu go na ini a liba, dan wi gebroiki den patu fu puru a watra na ini a boto.

Fu di wi no ben abi nyanyan moro, meki wi bigin suku fisi na liba. Ma wi no ben e fanga noti. Dat meki wi begi aksi Yehovah efu a ben kan gi wi a nyanyan di wi ben abi fanowdu gi a dei. Leti baka a begi fu wi, wan fu den brada trowe wan uku go na ini a watra èn a fanga wan fisi di bigi nofo gi wi alamala a neti dati. Wi ben de nanga feifi sma èn wi nyan wi bere furu.

Baka di wi du a kringwroko feifi yari, mi nanga Ethel kisi wan blesi di wi no ben fruwakti. Wi ben o tron papa nanga mama. Mi ben breiti fu yere a nyunsu dati, ma mi no ben de seiker fa wi libi ben o waka moro fara. Mi nanga Ethel ben abi a tranga winsi fu tan na ini a furuten diniwroko efu dati ben man. Ethniël, a boi fu wi, gebore na ini 1976. A tra boi fu wi, Giovanni, gebore tu nanga afu yari baka dati.

Fu di yepi ben de fanowdu na Sranan na a ten dati, meki a bijkantoro seti sani so taki mi ben kan tan dini leki kring-owruman aladi mi ben e sorgu den pikin fu mi. Di den boi fu wi ben yongu, dan mi ben du kringwroko ma mi no ben kisi furu gemeente fu du. Disi ben gi mi na okasi fu du kringwroko wan tu wiki ibri mun èn fu tan a tra pisi fu a mun leki pionier na ini a gemeente pe wi ben kisi wan toewijzing. Ethel nanga den boi ben kon makandra nanga mi te mi ben go na gemeente krosibei fu wi oso. Ma te mi ben musu go na den gemeente noso bigi konmakandra na busi, dan mi ben go mi wawan.

Mi ben musu seti sani bun so taki mi ben kan tyari mi frantwortu. Mi ben sorgu taki wi hori na osofamiri-studie ibri wiki. Te mi ben go na den gemeente na busi, dan Ethel ben hori na osofamiri-studie nanga den boi na oso. Ma wi ben e du sani makandra leki osofamiri so furu leki wi ben man. Mi nanga Ethel ben e prei tu nanga den boi, noso wi ben e go koiri nanga den. Nofo tron mi ben de na ai te lati neti fu sreka den toewijzing fu mi. Èn Ethel na wan bun wefi soleki fa Odo 31:15 e taki en. A ben opo fosi dei broko fu sorgu taki wi ben man leisi a deitekst leki osofamiri èn taki wi ben man nyan nanga makandra fosi den boi go na skoro.  Mi de nanga tangi srefisrefi taki mi abi so wan frow di e gi ensrefi èn di horibaka gi mi ala ten so taki mi man tyari den frantwortu di Yehovah gi mi!

Leki papa nanga mama wi wroko tranga fu yepi den boi fu wi fu lobi Yehovah nanga a Kresten preikiwroko. Wi ben wani den boi fu go na ini a furuten diniwroko, no fu di wi taigi den fu du dati, ma fu di densrefi teki a bosroiti fu du dati. Ala ten wi ben e taki nanga den fu a prisiri di a furuten diniwroko ben kan gi den. Problema ben de, ma wi ben poti krakti tapu a fasi fa Yehovah yepi wi èn fa a blesi wi leki famiri. Wi ben sorgu tu taki den boi ben moksi nanga tra Kotoigi di e poti Yehovah na a fosi presi na ini den libi.

Yehovah sorgu gi ala san wi ben abi fanowdu na ini a pisi ten di wi ben e kweki den pikin. A no de fu taki dati mi du ala san mi ben man fu sorgu mi osofamiri. A libi di mi ben abi na busi leki spesrutu pionier fosi mi trow ben leri mi fu poti moni na wan sei gi sani di wi ben o abi fanowdu. Ma awinsi wi ben meki ala muiti, toku son leisi wi no ben abi san wi ben abi fanowdu. Mi bribi taki na den momenti dati Yehovah langa en anu fu yepi wi. Fu eksempre, na ini den yari leti fosi 1990 èn syatu na baka, sma ben opo densrefi na ini Sranankondre. Na ini den yari dati, son leisi a ben tranga fu feni den moro prenspari nyanyan sani srefi. Toku Yehovah sorgu taki wi ben abi den sani dati.—Mat. 6:32.

Wi heri libi Yehovah sorgu ala ten gi wi èn a gi wi bun furu koloku nanga prisiri. Den pikin fu wi na wan bigi blesi gi wi èn wi de nanga tangi taki wi ben man yepi den fu dini Yehovah. Wi breiti taki den teki a bosroiti tu fu gebroiki den libi na ini a furuten diniwroko. Ethniël nanga Giovanni ben go na wan diniwroko-skoro èn den e dini now na a bijkantoro fu Sranan makandra nanga den frow fu den.

Mi nanga Ethel kon moro owru now, ma wi e wroko ete gi Yehovah leki spesrutu pionier. Fu taki en leti, wi abi so furu fu du taki mi no abi ten ete fu leri swen! Ma a no e hati mi. Te mi e prakseri mi libi, dan trutru mi kan taki dati a go di mi go na ini a furuten diniwoko na ini mi yongu yari ben de wan fu den moro bun bosroiti di mi teki na ini mi libi.