STUDIE-ARTIKEL 47
No meki noti prati yu fu Yehovah
„Yehovah, na yu mi e frutrow.”—Ps. 31:14.
SINGI 122 Tanapu kánkan!
SAN WI O LERI a
1. Fa wi du sabi taki Yehovah wani wi kon krosibei na en?
YEHOVAH e gi wi a kari fu kon krosibei na en (Yak. 4:8). A wani de wi Gado, wi Papa, èn wi Mati. A e piki den begi fu wi èn a e yepi wi te wi abi en muilek. A e gebroiki na organisâsi fu en fu gi wi leri èn fu kibri wi. Ma san wi musu du fu kon krosibei na Yehovah?
2. Fa wi kan kon krosibei na Yehovah?
2 Wi kan kon krosibei na Yehovah te wi e begi, te wi e leisi en Wortu Bijbel èn te wi e denki dipi fu dati. Te wi e du dati, dan wi o kon abi moro lobi nanga warderi gi en. Disi e meki taki wi wani gi yesi na en èn gi en a grani di a musu kisi (Openb. 4:11). O moro wi e kon sabi Yehovah, o moro wi o frutrow en nanga en organisâsi. A seti na organisâsi disi fu yepi wi.
3. Fa Didibri e pruberi fu prati wi fu Yehovah, ma san o yepi wi fu no drai baka noiti gi Gado nanga en organisâsi? (Psalm 31:13, 14)
3 Ma Didibri e pruberi fu prati wi fu Yehovah, spesrutu te wi e kisi problema. Fa a e du dati? A e pruberi fu meki wi tweifri safrisafri na Yehovah nanga en organisâsi. Ma wi kan kakafutu gi en. Te a bribi fu wi tranga èn wi e frutrow tapu Yehovah nanga wi heri ati, dan wi no o drai baka gi Gado nanga en organisâsi.—Leisi Psalm 31:13, 14.
4. San wi o luku na ini na artikel disi?
4 Na ini na artikel disi wi o taki fu dri problema di kan meki wi tweifri na Yehovah nanga en organisâsi. Den sani disi kan komoto dorosei fu a gemeente. Fa den problema disi kan prati wi fu Yehovah? San wi kan du fu kakafutu gi Satan?
TE WI ABI PROBLEMA
5. Fa problema kan meki taki wi e bigin tweifri na Yehovah nanga en organisâsi?
5 Son leisi wi abi en muilek na ini a libi. Kande wi famiri e gens wi noso wi lasi wi wroko. Fa den problema disi kan meki wi tweifri na Yehovah en organisâsi èn prati wi fu en? Te wi abi problema fu wan langa pisi ten, dan wi kan firi leki wi no abi nowan howpu èn wi kan lasi-ati. Satan e gebroiki den okasi disi fu meki wi denki taki Yehovah no lobi wi. Didibri wani wi denki taki na Yehovah noso en organisâsi e meki wi kisi den problema disi. Wan srefi sortu sani ben pasa nanga den Israelsma na ini Egepte. Na a bigin den ben e bribi taki Yehovah ben seni Moses nanga Aron fu puru den na ini katibo (Eks. 4:29-31). Ma bakaten di Farao meki a libi fu den kon moro hebi, dan den taki dati na Moses nanga Aron poti den na ini a problema dati. Den ben taigi den: „Unu meki wi kon de leki wan tingi sani gi a kownu nanga den futuboi fu en. A de neleki unu gi den wan feti-owru fu kiri wi” (Eks. 5:19-21). Na wan sari tori taki den ben e denki so fu den futuboi fu Gado. Efu yu abi problema fu wan langa ten kaba, dan san yu kan du fu sorgu taki yu e tan frutrow tapu Yehovah nanga en organisâsi?
6. Te wi abi problema, dan san wi kan leri fu a profeiti Habakuk? (Habakuk 3:17-19)
6 Begi Yehovah nanga yu heri ati èn suku yepi na en. A profeiti Habakuk ben abi furu problema. Sani ben kon muilek so te gi en, taki a ben gersi leki a ben e tweifri efu Yehovah ben lobi en ete. Dati meki a fruteri Yehovah fa a ben e firi. A taki: „O Yehovah, o langa mi musu bari, fosi yu arki mi? . . . Fu san ede yu e tan luku nomo fa sma e du ogri?” (Hab. 1:2, 3) Yehovah arki a begi fu a futuboi fu en di a ben lobi (Hab. 2:2, 3). Baka di Habakuk denki dipi fu den sani di Yehovah du fu frulusu en pipel, a kon de nanga prisiri baka. A ben de seiker now taki Yehovah ben lobi en èn taki a ben o yepi en fu horidoro awinsi san pasa. (Leisi Habakuk 3:17-19.) San disi e leri wi? Te yu abi problema, dan begi Yehovah èn fruteri en fa yu e firi. Boiti dati, suku yepi na en. Te yu du dati, yu kan de seiker taki Yehovah o gi yu a krakti fu horidoro. Te yu e si fa Yehovah e yepi yu, dan yu bribi o kon moro tranga.
7. San den famiriman fu Shirley ben pruberi fu du nanga en èn san yepi en fu no lasi bribi?
7 Tan du den sani di o yepi yu fu tan krosibei na Yehovah. Na disi ben yepi Shirley, wan sisa na ini Papuwa Nyun Ginea, di a ben abi problema. b Shirley en famiri ben pôti srefisrefi èn son leisi den no ben abi nofo nyanyan. Wan famiriman fu en pruberi fu meki a tweifri na Yehovah. A ben taigi en: „Yu e taki dati a santa yeye fu Gado e yepi yu, ma pe a yepi de? A famiri pôti ete. Somaar yu e go preiki.” Shirley e taki: „Mi ben e aksi misrefi efu Gado e broko en ede trutru nanga wi. Dati meki mi begi Yehovah wantewante èn mi fruteri en ala sani. Mi tan leisi Bijbel nanga den buku fu wi èn mi tan go na ini a preikiwroko nanga den konmakandra.” Heri esi Shirley kon frustan taki Yehovah ben e sorgu gi en famiri. Ala ten a famiri fu en ben abi wan sani fu nyan èn den ben de koloku. Shirley e taki: „Mi ben firi taki Yehovah ben e piki den begi fu mi” (1 Tim. 6:6-8). Efu yu e tan du den sani di o yepi yu fu tan krosibei na Yehovah, dan tweifri noso problema no o man prati yu fu Yehovah.
TE SMA E DU OGRI NANGA DEN BRADA FU WI DI ABI FRANTWORTU
8. San kan pasa nanga brada di abi frantwortu na ini Yehovah en organisâsi?
8 Den feanti fu wi e gebroiki nyunsu nanga social media fu fruteri lei noso fu drai tori di abi fu du nanga brada di abi frantwortu na ini Yehovah en organisâsi (Ps. 31:13). Skowtu grabu sonwan fu den brada disi èn den taki dati den du ogri. Den fosi Kresten ben de na ini wan srefi sortu situwâsi di sma ben sroto na apostel Paulus èn krutu en fu wan sani di a no du. San den Kresten disi du?
9. San son Kresten du di sma poti Paulus na strafu-oso?
9 Sonwan fu den fosi Kresten no ben e horibaka moro gi na apostel Paulus di a ben de na strafu-oso na ini Rome (2 Tim. 1:8, 15). Fu san ede? A de so taki den ben e syen gi Paulus fu di sma ben e si en leki wan ogriman? (2 Tim. 2:8, 9) Noso den ben e frede taki sma ben o frufolgu den tu? Awinsi fa a no fa, wi kan frustan fa Paulus ben e firi. A ben kisi furu problema na ini en libi èn a ben yepi den aladi a ben kan lasi en libi (Tori 20:18-21; 2 Kor. 1:8). Noiti wi musu de leki den sma di no ben yepi Paulus di a ben de na nowtu. San wi musu hori na prakseri te sma e frufolgu brada di abi frantwortu na ini na organisâsi?
10. San wi no musu frigiti te sma e frufolgu den brada di abi frantwortu èn fu san ede wi no musu frigiti dati?
10 No frigiti suma e meki taki sma frufolgu wi èn fu san ede a sani disi e pasa. Tu Timoteyus 3:12 e taki: „Sma o frufolgu ala den wan di wani dini Gado fayafaya leki bakaman fu Krestes Yesus.” Dati meki a no musu fruwondru wi taki Satan du sani spesrutu nanga den brada di abi frantwortu na ini a gemeente. A e meki sma frufolgu den fu di a wani taki den brada disi no de getrow moro na Yehovah èn a wani taki wi frede.—1 Petr. 5:8.
Aladi Paulus ben de na strafu-oso, toku Oneisiforus yepi en sondro fu frede. Na ini a ten disi Kotoigi e horibaka gi den brada nanga sisa fu den di de na strafu-oso soleki fa a prenki e sori (Luku paragraaf 11-12)
11. San wi e leri fu na eksempre fu Oneisiforus? (2 Timoteyus 1:16-18)
11 Tan yepi den brada fu yu èn horibaka gi den awinsi san pasa. (Leisi 2 Timoteyus 1:16-18.) Na ini a gemeente fu den fosi Kresten, wan brada di nen Oneisiforus no ben de leki den tra sma. Di Paulus ben de na strafu-oso, dan a „no ben syen taki [Paulus] ben tai nanga keti”. Na presi fu dati, Oneisiforus go suku Paulus èn di a feni en a pruberi fu yepi en nanga den sani di a ben abi fanowdu. Oneisiforus ben kan lasi en libi di a yepi Paulus. San disi e leri wi? Wi no musu frede libisma èn wi musu tan horibaka gi den brada fu wi di sma e frufolgu. Sobun, meki wi du ala san wi man fu yepi den (Odo 17:17). Den abi a lobi nanga a yepi fu wi fanowdu.
12. San wi e leri fu den Kotoigi na ini Rosiakondre?
12 Luku fa den Kotoigi na ini Rosiakondre yepi den lobi brada nanga sisa fu den di de na strafu-oso. Te sonwan fu den musu go na krutu, dan furu brada nanga sisa e kon na a krutu-oso fu horibaka gi den. San disi e leri wi? Te sma e pori a nen fu den brada di abi frantwortu, te den e grabu den noso den e frufolgu den, dan wi no musu frede. Begi gi den, yepi den famiriman fu den, èn suku tra fasi fu sori taki yu e horibaka gi den.—Tori 12:5; 2 Kor. 1:10, 11.
TE SMA E SPOTU WI
13. Fa wi kan bigin tweifri na Yehovah nanga en organisâsi te sma e spotu wi?
13 Den famiriman fu wi di no de na bribi, den sma na wrokope noso na skoro kan spotu wi fu di wi e preiki noso fu di wi e hori wisrefi na den wet fu Yehovah (1 Petr. 4:4). Kande den e taki: „Mi lobi fa yu de, ma a kerki fu yu strak tumusi èn unu e hori unsrefi na wan lo wet di no de fu a ten disi.” Son sma e krutu wi kande fu di wi no e bumui nanga sma di puru fu a gemeente. Kande den e taki: „Fa yu kan taki dati yu lobi tra sma?” Den sortu sani disi di sma e taki kan meki taki wi bigin tweifri efu den wet fu Yehovah bun gi wi. Kande wi o bigin aksi wisrefi: ’Yehovah e fruwakti tumusi furu fu mi? Na organisâsi fu en strak tumusi?’ Efu yu de na ini so wan situwâsi, dan san yu kan du fu tan krosibei na Yehovah nanga en organisâsi?
Yob weigri fu bribi den lei fu den man di ben e spotu en. Ma a ben abi a fasti bosroiti fu tai hori na Yehovah (Luku paragraaf 14)
14. San wi musu du te trawan e spotu wi fu di wi e du san Yehovah feni bun? (Psalm 119:50-52)
14 Abi a fasti bosroiti fu tan du san Yehovah feni bun. Yob ben de wan man di ben tan du san Yehovah feni bun aladi sma ben e spotu en. Wan fu den man di ben du neleki a ben de wan mati fu Yob, ben pruberi srefi fu meki Yob bribi taki Gado no ben e span efu Yob ben e du san Gado feni bun (Yob 4:17, 18; 22:3). Ma Yob ben weigri fu bribi den lei dati. Yob ben sabi taki den wet fu Yehovah bun èn a ben abi a fasti bosroiti fu hori ensrefi na den wet dati. A tai hori na Yehovah awinsi san trawan ben e du (Yob 27:5, 6). San disi e leri wi? No tweifri na den wet fu Yehovah te sma e spotu yu. Prakseri san pasa na ini yu eigi libi. Yu si furu leisi kande taki yu libi e waka moro bun te yu e du san Yehovah feni bun. No meki noti tapu yu fu tan na ini na organisâsi di e hori den wet fu Yehovah. Awinsi fa sma wani spotu wi, wi no o meki noti prati wi fu Yehovah.—Leisi Psalm 119:50-52.
15. Fu san ede famiriman ben e spotu Brizit?
15 Luku na eksempre fu Brizit, wan sisa na ini India. Den famiriman fu en ben e spotu en fu di a de wan Kotoigi. Syatu baka di a dopu na ini 1997, en masra di no de wan Kotoigi, lasi en wroko. Dati meki a masra bosroiti taki en nanga Brizit nanga den umapikin fu den musu froisi go tan nanga en papa nanga mama di ben e libi na ini wan tra foto. Ma a sani disi ben o meki Brizit kisi moro bigi problema. Fu di en masra no ben abi wroko, meki Brizit ben musu wroko heri wiki fu sorgu gi en osofamiri. Boiti dati, a moro krosibei gemeente pe a ben kan go ben de 350 kilometer moro fara. A sari taki a famiri fu en masra ben e gens en fu di a de wan Kotoigi. A situwâsi ben kon ogri so te taki Brizit nanga en osofamiri ben musu froisi baka. Ne sondro fu fruwakti dati, Brizit en masra kon dede. Bakaten, wan fu den umapikin fu en, di ben abi 12 yari nomo, dede fu kanker. Ma san moro ogri, na taki den famiriman fu Brizit ben taki dati na en meki ala den ogri sani disi pasa. Den ben taki dati efu Brizit no ben tron wan Yehovah Kotoigi, ala den sari sani dati no ben o pasa nanga en. Ma toku Brizit tan frutrow tapu Yehovah èn a tan krosibei fu en organisâsi.
16. Sortu blesi Brizit kisi fu di a tan krosibei na Yehovah nanga en organisâsi?
16 Fu di Brizit ben libi so fara fu a gemeente, meki wan kring-owruman gi en a deki-ati fu preiki na ini a kontren pe a ben libi èn fu hori konmakandra na en oso. Na a bigin, Brizit ben feni en muilek fu du den sani disi. Ma toku a du san a brada ben taigi en. A ben e preiki a bun nyunsu gi trawan, a ben e hori konmakandra na en oso, èn a ben e hori na Osofamiri Anbegi nanga den umapikin fu en. San ben de a bakapisi? Brizit ben abi furu Bijbelstudie èn furu fu den sma disi teki dopu. Na ini 2005, Brizit bigin dini leki gewoon pionier. Brizit kisi blesi fu di a tan frutrow tapu Yehovah èn a tan horibaka gi na organisâsi fu en. Now den umapikin fu en e dini Yehovah èn tu gemeente de na ini a kontren dati. Brizit de seiker taki Yehovah gi en a krakti fu horidoro di a ben de na ini muilek situwâsi èn di den famiriman fu en ben e spotu en.
TAI HORI NA YEHOVAH NANGA EN ORGANISÂSI
17. Sortu fasti bosroiti wi musu abi?
17 Satan wani wi fu bribi taki Yehovah no o yepi wi te wi de na ini muilek situwâsi èn taki Yehovah en organisâsi e meki a libi kon moro hebi gi wi. Satan wani taki wi frede te sma e pori a nen fu den brada di abi frantwortu, te sma e frufolgu den, noso te sma poti den na strafu-oso. Satan e meki sma spotu wi fu di a wani taki wi bigin tweifri na den wet fu Yehovah èn na en organisâsi. Ma wi sabi heri bun san Satan wani du èn a no o kori wi (2 Kor. 2:11). Abi a fasti bosroiti fu kakafutu gi den lei fu Satan èn tai hori na Yehovah nanga en organisâsi. No frigiti taki Yehovah noiti no o gwe libi yu (Ps. 28:7). Fu dati ede no meki noti prati yu fu Yehovah!—Rom. 8:35-39.
18. Fu san wi o taki na ini a tra artikel?
18 Na ini na artikel disi wi taki fu problema di e kon fu sma dorosei fu a gemeente. Ma wan tra sani di kan meki wi tweifri na Yehovah nanga en organisâsi na te wi e kisi problema na ini a gemeente. San wi kan du te den sortu sani dati pasa? Wi o taki fu dati na ini a tra artikel.
SINGI 118 „Gi wi moro bribi”
a Fu man horidoro na ini den lasti dei disi, dan wi musu tan frutrow tapu Yehovah nanga en organisâsi. Didibri e meki wi kisi tesi fu sorgu taki wi no abi a frutrow dati moro. Na ini na artikel disi wi o taki fu dri sani di Didibri e du fu meki wi tweifri èn wi o luku tu san wi kan du fu tan gi yesi na Yehovah nanga en organisâsi.
b Wi kenki wan tu fu den nen.