1. San a wani taki fu „de nanga krin frustan”? (2 Timoteyus 4:5)

 TE WAN sani pasa di hati wi, dan dati kan meki en muilek gi wi fu tan gi yesi na Yehovah nanga en organisâsi. San wi kan du te so wan sani pasa? Wi musu tan de nanga krin frustan, wi musu tan na ai èn wi musu tanapu kánkan na ini a bribi. (Leisi 2 Timoteyus 4:5.) Fa wi kan du dati? Na te wi no e bruya èn te wi de rustig, te wi e denki krin èn te wi e du muiti fu si sani soleki fa Yehovah e si den. Te wi du dati, dan den firi fu wi no o abi krakti tapu wi denki.

2. San wi o luku na ini na artikel disi?

² Na ini na artikel na fesi, wi ben taki fu dri problema di kan kon fu dorosei fu a gemeente. Na ini na artikel disi wi o taki fu dri problema di wi kan kisi na ini a gemeente èn di kan meki en muilek gi wi fu tan gi yesi na Yehovah. Dati na (1) te wi feni taki wan brada noso wan sisa du wan hati sani nanga wi, (2) te wi kisi piri-ai fu Yehovah, èn (3) te wi feni en muilek fu fiti wisrefi na kenki di kon na ini na organisâsi. Fa wi kan tan de nanga krin frustan èn tan gi yesi na Yehovah nanga en organisâsi te den sortu sani disi e miti wi?

3. San kan pasa te wi feni taki wan brada noso wan sisa du wan hati sani nanga wi?

³ A pasa wan leisi kaba taki wan brada noso wan sisa, kande wan owruman srefi du wan hati sani nanga yu? A kan taki a sma no du a sani dati fu espresi (Rom. 3:23; Yak. 3:2). Ma toku a sani e hati yu. Kande yu no man sribi srefi fu di yu e tan prakseri san pasa. Kande yu aksi yu srefi: ’Fa wan brada kan du so wan sani? Disi na Gado en organisâsi trutru?’ Na dati Satan wani wi denki (2 Kor. 2:11). Efu wi e bigin denki so, dan a kan pasa taki wi no dini  Yehovah moro èn wi gwe libi en organisâsi. Dus efu wi feni taki wan sma du wan hati sani nanga wi, dan fa wi kan tan de nanga krin frustan? Fa wi kan sorgu taki wi no bigin denki soleki fa Satan wani wi fu denki?

4. Fa Yosef tan de nanga krin frustan di trawan du hati sani nanga en, èn san wi kan leri fu en? (Genesis 50:19-21)

⁴ No kisi bita-ati. Di Yosef ben yongu ete, den bigi brada fu en no libi bun nanga en. Den no ben lobi en srefisrefi èn sonwan fu den ben wani kiri en srefi (Gen. 37:4, 18-22). Te fu kaba den seri en leki srafu. Disi meki taki Yosef kisi furu hebi tesi sowan 13 yari langa. Yosef ben kan aksi ensrefi efu Yehovah ben lobi en trutru. Kande a ben denki taki Yehovah ben gwe libi en na a ten di a ben abi yepi fanowdu. Ma Yosef no ben kisi bita-ati. Na presi fu dati, a tan de nanga krin frustan èn a no bruya. Di a kisi na okasi fu du ogri baka nanga den brada fu en, dan a no du dati, ma a sori lobi gi den èn a gi den pardon (Gen. 45:4, 5). Yosef ben man du dati fu di a ben man denki krin. Na presi fu tan poti prakseri na den problema fu en, a tan prakseri san Yehovah ben wani. (Leisi Genesis 50:19-21.) San disi e leri wi? Efu wan sma du wan hati sani nanga yu, dan no kisi bita-ati, no atibron tapu Yehovah èn no aksi yusrefi efu a gwe libi yu. Tan denki dipi fu den fasi fa a e yepi yu fu horidoro te yu e kisi tesi. Boiti dati te wan trawan du wan hati sani nanga yu, dan gi en pardon èn prakseri taki „lobi e tapu bun furu sondu”.—1 Petr. 4:8.

5. Fa Miqueas tan de nanga krin frustan di a feni taki trawan du en wan hati sani?

⁵ Luku wan eksempre fu a ten disi. Wan owruman fu Zuid-Amerika di nen Miqueas b e memre fa a ben firi di wan tu brada di abi frantwortu na ini na organisâsi du hati sani nanga en. A e taki: „Noiti ete mi kisi so furu stress. Mi ben broko mi ede srefisrefi. Mi no ben sribi na neti èn mi ben e krei fu di mi ben feni taki mi no ben man du noti.” Toku Miqueas tan de nanga krin frustan èn a du tranga muiti no meki den firi fu en basi en. A ben e begi furu èn a ben aksi Yehovah en santa yeye nanga a krakti fu horidoro. A go suku sani tu na ini den buku fu wi di ben yepi en. San disi e leri wi? Efu yu feni taki wan brada noso wan sisa du wan hati sani nanga yu, dan no bruya èn pruberi fu basi den firi fu yu. Kande yu no sabi san meki taki wan sma taki noso du a sani dati. Begi Yehovah èn aksi en fu yepi yu fu si sani soleki fa a tra sma e si den. Disi kan yepi yu fu no denki taki na fu espresi a sma du wan hati sani nanga yu èn a kan meki en moro makelek gi yu fu gi en pardon (Odo 19:11). No frigiti taki Yehovah e si a situwâsi fu yu èn a o gi yu krakti fu horidoro.—2 Kron. 16:9; Preik. 5:8.

6. Fu san ede a prenspari fu frustan taki Yehovah e gi wi piri-ai fu di a lobi wi? (Hebrewsma 12:5, 6, 11)

⁶ Te wi kisi piri-ai fu Yehovah, dan wi kan firi sari srefisrefi. Ma efu wi e tan poti prakseri nomo na a fasi fa wi e firi, dan wi kan bigin denki taki a piri-ai no de gi wi noso taki a hebi tumusi. Disi kan meki taki wi no frustan a tumusi prenspari sani disi: Yehovah e strafu den wan di a lobi. (Leisi Hebrewsma 12:5, 6, 11.) Èn efu wi tan poti prakseri na a fasi fa wi e  firi, dan wi kan gi Satan na okasi fu tesi wi. A wani taki wi no teki a piri-ai fu Yehovah. San moro ogri, a wani taki wi no dini Yehovah moro èn taki wi gwe libi a gemeente. Efu yu kisi piri-ai fu Yehovah, dan fa yu kan tan de nanga krin frustan?

7. (a) Fa Yehovah ben kan gebroiki Petrus baka di a teki a piri-ai di a kisi, soleki fa a prenki e sori? (b) San yu e leri fu Petrus?

⁷ Teki a piri-ai fu Yehovah èn tyari kenki kon. Moro leki wán leisi Yesus piri-ai gi Petrus na fesi den tra apostel (Mark. 8:33; Luk. 22:31-34). A sani disi ben kan meki Petrus firi syen srefisrefi! Ma Petrus tan waka baka Yesus. A teki a piri-ai èn a leri fu no meki den srefi fowtu baka. Dati meki Yehovah blesi Petrus fu di a ben de getrow èn a gi en prenspari frantwortu na ini a gemeente (Yoh. 21:15-17; Tori 10:24-33; 1 Petr. 1:1). San wi kan leri fu Petrus? A e tyari wini kon gi wi èn gi trawan te wi no tan poti prakseri na a fasi fa wi e firi te wi kisi piri-ai. Boiti dati wi o teki a piri-ai èn wi o tyari kenki kon. Te wi du dati, dan Yehovah nanga den brada fu wi kan gebroiki wi fu du moro sani na ini na organisâsi.

8-9. Fa Bernardo ben e firi di a kisi piri-ai, ma san yepi en fu kenki en denki?

⁸ Luku san ben pasa nanga Bernardo, wan brada na ini Mosambik. Den ben puru en leki owruman. Fa Bernardo ben e firi na a bigin? A e taki: „Mi ati ben bron fu di mi no ben lobi a piri-ai di mi kisi.” A ben broko en ede taki trawan na ini a gemeente ben o denki takru fu en. A e taki tu: „A ben teki wan tu mun fosi mi kon si a situwâsi fu mi na a yoisti fasi èn fu frutrow Yehovah nanga en organisâsi baka.” San yepi Bernardo fu kenki?

⁹ Bernardo kenki a fasi fa a ben e denki. A e taki: „Di mi ben dini leki owruman, dan mi ben e gebroiki Hebrewsma 12:7 fu yepi trawan fu si a piri-ai fu Yehovah na a yoisti fasi. Now mi ben e aksi misrefi: ’Suma musu fiti a tekst disi?’ Ala den futuboi fu Yehovah. Dus mi tu.” Baka dati Bernardo tyari tra kenki kon èn disi yepi en frutrow Yehovah nanga en organisâsi baka. A teki moro ten fu leisi Bijbel èn fu denki dipi fu den sani di a ben e leisi. Aladi a ben e broko en ede ete fa den brada nanga sisa ben o si en, toku a go nanga den na ini preikiwroko èn a tan gi  piki na den gemeente konmakandra. Baka wan pisi ten, den poti Bernardo leki owruman baka. Efu yu kisi piri-ai fu Yehovah tu neleki Bernardo, dan pruberi fu no tan poti prakseri na a fasi fa yu e firi, ma teki den rai di yu kisi èn tyari kenki kon c (Odo 8:33; 22:4). Efu yu du dati, dan yu kan de seiker taki Yehovah o blesi yu fu di yu tai hori na en nanga en organisâsi.

10. Sortu kenki ben kan de wan tesi gi sonwan fu den mansma fu Israel?

¹⁰ A kan de wan tesi gi wi te sani e kenki na ini na organisâsi. Efu wi no luku bun, a sani disi kan prati wi fu Yehovah. Fu eksempre, prakseri fa wan kenki di ben kon na ini a Wet fu Moses ben kan abi krakti tapu den Israelsma. Fosi Yehovah ben gi den a Wet, osofamiri-edeman ben e du den sani di priester ben e du. Den ben e bow altari èn den ben e tyari ofrandi gi Yehovah gi na osofamiri fu den (Gen. 8:20, 21; 12:7; 26:25; 35:1, 6, 7; Yob 1:5). Ma di Yehovah gi den a Wet, dan den osofamiri-edeman no ben abi a grani dati moro. Yehovah ben poti a famiri fu Aron leki priester fu tyari ofrandi. Sensi a ten dati, soso den bakapikin fu Aron ben kan du priesterwroko. Efu wan osofamiri-edeman di no ben de wan bakapikin fu Aron, ben du den sani di wan priester ben musu du, dan den ben kan kiri en d (Lef. 17:3-6, 8, 9). A de so taki na a kenki disi meki taki Korak, Datan, Abiram nanga den 250 edeman opo densrefi teige Moses nanga Aron? (Num. 16:1-3) Wi no sabi seiker. Awinsi fa a no fa, Korak nanga den tra man no tai hori na Yehovah. San yu kan du efu wan kenki di kon na ini na organisâsi e meki en muilek gi yu fu tai hori na Yehovah?

11. San wi e leri fu na eksempre fu wan tu fu den Keihatsma?

¹¹ Horibaka gi den kenki di e kon na ini na organisâsi. Na a ten di den Israelsma ben e waka na ini a sabana, den Keihatsma ben abi wan prenspari wroko fu du. Ibri leisi te den Israelsma ben musu froisi a kampu, wan tu fu den Keihatsma ben e tyari na ark fu a frubontu na fesi a heri pipel (Num. 3:29, 31; 10:33; Yos. 3:2-4). Dati ben de trutru wan bigi grani! Ma sani kenki gi den Keihatsma di den Israelsma go libi na ini a Pramisi Kondre. Den no ben abi fu tyari na ark moro fu a wan presi go na a trawan. Sobun, di Salomo ben e tiri leki kownu, den Keihatsma kisi a wroko fu singi, fu hori wakti na den portu èn fu sorgu gi den sani na ini den maksin (1 Kron. 6:31-33; 26:1, 24). Bijbel no e taki dati den Keihatsma ben e krutukrutu noso taki den ben de nomonomo fu kisi wan moro prenspari frantwortu leki fa a ben de fosi. San disi e leri wi? Horibaka nanga yu heri ati gi den kenki di kon na ini Yehovah en organisâsi, awinsi yu kisi wan tra toewijzing. De nanga prisiri awinsi sortu toewijzing yu e kisi. No frigiti taki a no a toewijzing fu yu e meki taki yu prenspari gi Yehovah. San moro prenspari gi en na te yu e gi yesi.—1 Sam. 15:22.

12. Fa Zaina ben e firi di a kisi wan tra toewijzing?

¹² Luku na eksempre fu Zaina, wan sisa  di ben kisi wan tra toewijzing. A sisa disi lasi wan grani di a ben lobi srefisrefi. Baka di a dini moro leki 23 yari na Betel, a kisi a toewijzing fu go dini leki spesrutu pionier. A e taki: „Mi ben skreki srefisrefi di mi kisi wan tra toewijzing. Mi ben firi leki mi no warti noti èn mi ben tan aksi misrefi: ’Sortu fowtu mi meki?’” A sari taki son brada nanga sisa na ini a gemeente ben taigi en sani di ben meki en moro hebi gi en. Den ben taigi en: „Efu yu ben bun nofo, dan na organisâsi no ben o gi yu wan tra toewijzing.” Wan heri pisi ten Zaina ben lasi-ati srefisrefi èn a ben e krei ibri neti. Ma a e taki: „Noiti mi no gi pasi taki den sani disi meki mi lasi frutrow na ini na organisâsi fu Yehovah noso fu bribi taki Yehovah no lobi mi.” Fa Zaina ben man tan de nanga krin frustan?

13. San yepi Zaina di a ben lasi-ati?

¹³ Zaina ben man kenki a fasi fa a ben e denki. Fa a du dati? A ben leisi artikel na ini den buku fu wi di e taki fu a sani di miti en èn dati yepi en fu horidoro. Na artikel „Yu Kan Kakafutu te wan Sani E Meki Yu Lasi-ati!” na ini A Waktitoren fu 1 februari 2001, yepi en furu. Na artikel e sori fa a Bijbel skrifiman Markus ben kan abi den srefi firi tu di a kisi wan tra wroko. Zaina e memre taki di a ben lasi-ati, dan „na eksempre fu Markus ben de leki wan dresi” gi en. Boiti dati Zaina tan moksi nanga den mati fu en. A no tan poti prakseri na a fasi fa a ben e firi, ma a tan bumui nanga den brada nanga sisa fu en èn a tan go na ini a preikiwroko nanga den. A kon si taki a santa yeye fu Yehovah e tiri na organisâsi fu en èn taki den brada di e teki fesi e broko den ede trutru nanga en. Ma a kon frustan tu taki Gado en organisâsi musu du san de fanowdu so taki a wroko fu Yehovah kan go na fesi.

14. Sortu kenki ben muilek gi Vlado èn san yepi en?

¹⁴ Vlado, wan owruman fu 73 yari di e libi na ini Slovenia, ben feni en muilek fu fiti ensrefi di a gemeente fu en moksi tron wán nanga wan tra gemeente èn di den no ben e gebroiki a Kownukondre zaal moro pe a ben go. A e taki: „Mi no ben frustan fu san ede wi no ben e gebroiki  so wan moi Kownukondre zaal moro. A sani disi ben hati mi srefisrefi fu di paspas wi ben seti a zaal kon bun baka. Mi na wan temreman èn mi ben bow wan tu fu den sani na ini a zaal. Boiti dati, a no ben makriki gi wi leki preikiman di owru kaba fu fiti wisrefi na a kenki disi.” San yepi Vlado fu horibaka gi a kenki disi? A taki: „Te wi e fiti wisrefi na den kenki di na organisâsi fu Yehovah e tyari kon, dan ala ten dati e tyari blesi kon. Den kenki disi e sreka wi gi moro bigi kenki na ini a ten di e kon.” Yu feni en muilek fu fiti yusrefi fu di a gemeente fu yu moksi tron wán nanga wan tra gemeente? Noso a muilek gi yu di yu kisi wan tra toewijzing? Yu kan de seiker taki Yehovah e frustan fa yu e firi. Te yu e horibaka gi den kenki disi èn yu e tai hori na Yehovah nanga en organisâsi, dan seiker yu o kisi blesi.—Ps. 18:25.

15. Fa wi kan tan de nanga krin frustan te wi e kisi problema na ini a gemeente?

¹⁵ O moro a kaba fu a grontapu disi e kon krosibei, o moro wi kan fruwakti taki problema kon na ini a gemeente. Den sani dati kan meki en muilek gi wi fu tai hori na Yehovah. Fu dati ede wi musu tan de nanga krin frustan. Efu yu feni taki wan brada noso wan sisa du wan hati sani nanga yu, dan sorgu taki yu no kisi bita-ati. Efu yu kisi piri-ai fu Yehovah, dan no tan poti prakseri na a fasi fa yu e firi, ma teki a rai èn tyari kenki kon. Èn te na organisâsi fu Yehovah e tyari kenki kon di abi krakti tapu yu eigi libi, dan horibaka nanga yu heri ati gi den kenki dati èn gi yesi.

16. Fa yu kan tan frutrow tapu Yehovah nanga en organisâsi?

¹⁶ Yu kan tan frutrow tapu Yehovah nanga en organisâsi aladi yu e kisi tesi. Ma fu man du dati yu musu tan de nanga krin frustan. Dati wani taki dati yu no musu bruya, yu musu de rustig, yu musu denki krin, èn yu musu si sani soleki fa Yehovah e si den. Tan meki muiti fu studeri den Bijbel eksempre fu sma di ben kisi den srefi sortu problema disi èn denki dipi fu den. Begi Yehovah fu yepi yu. Èn tan krosibei fu a gemeente ala ten. Dan awinsi san e pasa, Satan no o man prati yu fu Yehovah noso en organisâsi.—Yak. 4:7.