STUDIE-ARTIKEL 45
Yehovah e yepi wi fu du a preikiwroko
„Den o sabi taki wan profeiti ben de na den mindri.”—ESEK. 2:5.
SINGI 67 „Preiki a wortu”
SAN WI O LERI a
1. San wi kan fruwakti, ma fu san wi kan de seiker?
WI KAN fruwakti taki son sma o gens wi te wi e du a preikiwroko. Èn o moro a kaba e kon krosibei, wi kan fruwakti taki a o kon moro ogri (Dan. 11:44; 2 Tim. 3:12; Openb. 16:21). Ma wi kan de seiker taki Yehovah o yepi wi. Fu san ede wi kan taki dati? We, ala ten Yehovah yepi den futuboi fu en fu du den wroko, awinsi o muilek a wroko fu den ben de. Meki wi go luku eksempre fa a ben yepi a profeiti Esekièl di ben musu preiki gi den Dyu di ben de leki katiboman na ini Babilon.
2. Soleki fa Yehovah ben taki, dan fa den sma ben de di Esekièl ben musu preiki gi? San wi o luku na ini na artikel disi? (Esekièl 2:3-6)
2 Fa den sma ben de di Esekièl ben musu preiki gi? Yehovah taki dati den ben de „sma di no abi syen”, di ben „tranga-ede” èn di ’ben e opo densrefi teige Gado’. Den sma disi ben de leki maka di e dyuku èn den ben kefalek neleki kruktutere. Wi kan frustan fu san ede Yehovah taigi Esekièl taki a ’no ben musu frede den’! (Leisi Esekièl 2:3-6.) Esekièl ben man du a preikiwroko fu en fu di (1) na Yehovah ben seni en, (2) Gado yeye ben e gi en krakti, èn (3) a wortu fu Gado ben e tranga en bribi. Fa den dri sani disi ben yepi Esekièl? Èn fa den kan yepi wi?
YEHOVAH BEN SENI ESEKIÈL FU PREIKI
3. Sortu sani di Yehovah taigi Esekièl ben gi en deki-ati? Fa Yehovah meki Esekièl sabi taki a o horibaka gi en?
3 Yehovah taigi Esekièl: „Mi e seni yu” (Esek. 2:3, 4). Den wortu dati ben musu gi Esekièl deki-ati. Fu san ede? We, a musu de so taki Esekièl ben e memre ete taki Yehovah ben taigi Moses nanga Yesaya den srefi sani di a ben teki den leki en profeiti (Eks. 3:10; Yes. 6:8). Esekièl ben sabi tu fa Yehovah ben yepi den tu profeiti dati fu du den wroko. Sobun, di Yehovah taigi Esekièl tu leisi: „Mi e seni yu”, dan Esekièl ben sabi taki a kan frutrow tapu Yehovah taki a o yepi en. Boiti dati, na furu presi na ini a buku Esekièl wi e leisi den wortu: „Yehovah taki nanga mi”, noso „Yehovah taigi mi” (Esek. 3:16; 6:1). Sobun, Esekièl ben de seiker taki na Yehovah ben seni en. Boiti dati, Esekièl ben de a manpikin fu wan priester. Sobun, a musu fu de so taki en papa ben fruteri en taki ala ten Yehovah ben taigi den profeiti fu en taki a o horibaka gi den. Yehovah ben taigi Isak, Yakob nanga Yeremia: „Mi de nanga yu.”—Gen. 26:24; 28:15; Yer. 1:8.
4. Sortu sani di Yehovah taki ben gi Esekièl deki-ati fu go doro nanga en wroko?
4 San furu Israelsma ben o du te Esekièl ben o preiki gi den? Yehovah taki: „Den Israelsma no o wani arki yu, fu di den no wani arki mi tu” (Esek. 3:7). Sobun te den sma no ben e arki Esekièl, dan fu taki en leti na Yehovah den no ben e arki. Den wortu dati ben e memre Esekièl taki a no fu di a no du en wroko bun leki profeiti, meki den sma no ben wani arki. Yehovah ben taigi Esekièl tu taki te a yuru ben doro fu a krutu den ogrisma, dan den ben o „sabi taki wan profeiti ben de na den mindri” (Esek. 2:5; 33:33). A no de fu taki dati den sani di Yehovah taigi Esekièl, gi en deki-ati fu go doro nanga en wroko.
YEHOVAH SENI WI FU GO PREIKI
Neleki Esekièl wi kan kisi gens èn a kan taki sma no wani arki wi, ma wi sabi taki Yehovah de nanga wi (Luku paragraaf 5-6)
5. San o gi wi deki-ati soleki fa Yesaya 44:8 e sori?
5 Wi srefi abi deki-ati fu di wi sabi taki na Yehovah seni wi fu preiki. A e kari wi en kotoigi (Yes. 43:10). Dati na wan bigi grani! Neleki fa Yehovah ben taigi Esekièl taki a ’no ben musu frede’ na so a e taigi wi tu taki „un no musu frede”. Fu san ede wi no abi fu frede gensman? Fu di na Yehovah seni wi fu go preiki, neleki fa a ben seni Esekièl. Èn a e horibaka gi wi.—Leisi Yesaya 44:8.
6. (a) Fa Yehovah pramisi taki a o yepi wi? (b) Sortu sani e gi wi trowstu?
6 Yehovah pramisi wi taki a o yepi wi. Fu eksempre, leti fosi a taki: „Unu na mi kotoigi”, a ben taki: „Efu unu musu pasa na ini watra, mi o de nanga unu. Efu unu musu pasa na ini liba, mi o sorgu taki unu no sungu. Efu unu musu pasa na ini faya, unu no o bron. Iya, nowan faya o bron unu” (Yes. 43:2). Son leisi te wi e du wi preikiwroko, wi e kisi bigi gens di gersi frudu di e kon na wi tapu èn son tesi muilek so te taki den gersi faya di e bron. Toku Yehovah e yepi wi fu tan preiki (Yes. 41:13). Neleki fa a ben de ini a ten fu Esekièl, furu sma na ini a ten disi no wani arki a boskopu fu wi. Ma dati no wani taki dati wi no du wi preikiwroko bun. A e gi wi trowstu fu sabi taki Yehovah e breiti te wi e tan prati a boskopu fu en awinsi son sma no e arki. Na apostel Paulus ben taki dati ’ibri sma o kisi en eigi pai fu a wroko di a du’ (1 Kor. 3:8; 4:1, 2). Wan sisa di e pionier langa ten kaba, taki: „Mi breiti fu sabi taki Yehovah e warderi a muiti di wi e meki.”
GADO YEYE BEN GI ESEKIÈL KRAKTI
Esekièl e si wan fisyun fu a hemel wagi fu Yehovah èn a sani disi e tranga en bribi taki Yehovah o yepi en fu du en diniwroko (Luku paragraaf 7)
7. Fa Esekièl ben e firi te a ben prakseri a fisyun di a ben si? (Luku a fowtow na tapu a kafti.)
7 Esekièl ben si o furu makti a yeye fu Gado abi. Na ini wan fisyun Esekièl ben si fa santa yeye ben yepi den makti engel èn fa a ben sorgu taki a bigi hemel wagi e rij bun snel (Esek. 1:20, 21). San Esekièl du di a si a fisyun disi? A skrifi san pasa. A taki: „Di mi si a sani disi mi boigi nanga mi fesi go na gron.” A fisyun ben meki Esekièl kisi so furu lespeki taki a boigi nanga en fesi go na gron (Esek. 1:28). Bakaten te Esekièl ben prakseri a fisyun disi, dan a ben musu gi en a deki-ati taki nanga yepi fu Gado yeye a o man du en preikiwroko.
8-9. (a) San Yehovah ben taigi Esekièl fu du? (b) Fa Yehovah tranga Esekièl moro fara so taki a ben kan du a muilek wroko di a kisi?
8 Yehovah taigi Esekièl: „Manpikin fu libisma, opo tanapu na tapu yu futu, bika mi wani taki nanga yu.” A sani disi di Yehovah taigi Esekièl èn sosrefi a santa yeye fu Yehovah, gi en a krakti fu opo. Esekièl skrifi: „Yeye kon na mi tapu. A meki mi opo tanapu na tapu mi futu” (Esek. 2:1, 2). Bakaten èn na ini a heri pisi ten di Esekièl ben e du a wroko fu en, Gado yeye ben e horibaka gi en (Esek. 3:22; 8:1; 33:22; 37:1; 40:1). Gado yeye ben gi Esekièl a krakti fu du a wroko di a ben kisi fu preiki gi den ’tranga-ede Israelsma’ (Esek. 3:7). Yehovah taigi Esekièl: „Mi meki yu fesi kon tranga neleki a fesi fu den èn mi meki yu fesi-ede kon tranga neleki a fesi-ede fu den. Mi meki a fesi-ede fu yu tron leki dyamanti, iya, mi meki a kon moro tranga leki a moro tranga ston. No frede den èn no beifi te yu si den fesi” (Esek. 3:8, 9). Fu taki en leti, Yehovah taigi Esekièl: ’No lasi-ati fu di den sma tranga-ede. Mi o gi yu krakti.’
9 Baka dati a yeye fu Gado tyari Esekièl go na a presi pe a ben musu preiki. Esekièl skrifi: „Yehovah ben de nanga mi.” A profeiti ben teki wan wiki fu frustan a boskopu di a ben musu preiki so taki a ben kan taki nanga faya (Esek. 3:14, 15). Baka dati Yehovah taigi en fu go na wan lagipresi. Di a go drape „a yeye fu [Gado] kon na [en] tapu” (Esek. 3:23, 24). Esekièl ben kaba now fu bigin nanga en diniwroko.
WI E KISI KRAKTI FU GADO YEYE
Neleki Esekièl, san e yepi wi fu du wi preikiwroko? (Luku paragraaf 10)
10. Sortu yepi wi abi fanowdu fu man du wi preikiwroko èn fu san ede?
10 Sortu yepi wi abi fanowdu fu man du wi preikiwroko? Fu man piki na aksi disi, dan denki baka san ben pasa nanga Esekièl. Fosi a bigin nanga en preikiwroko, Gado yeye ben gi en a krakti di a ben abi fanowdu. Na ini a ten disi, wi man du a preikiwroko soso nanga yepi fu Gado yeye. Fu san ede? Fu di Satan e feti nanga wi so taki a kan stop a preikiwroko (Openb. 12:17). Libisma fasi wi ben o denki taki wi no o man wini Satan. Ma juist nanga a preikiwroko wi e wini en! (Openb. 12:9-11) Fa so? Te wi e preiki, dan wi e sori taki wi no e frede den sani di Satan e du fu tapu skreki gi wi. Ibri leisi te wi e preiki, Satan e lasi. Sobun, te wi e si taki wi man du a preikiwroko aladi wi e kisi gens, dan san dati e sori? Disi e sori taki Yehovah e gi wi krakti nanga yepi fu en santa yeye èn taki a feni wi bun.—Mat. 5:10-12; 1 Petr. 4:14.
11. San Gado yeye o du gi wi èn san wi musu du fu tan kisi en?
11 San wi e leri moro fara te wi e luku taki Yehovah ben gi Esekièl a krakti fu man du en preikiwroko? Gado yeye kan gi wi a krakti fu pasa iniwan tesi di wi e kisi na ini a preikiwroko (2 Kor. 4:7-9). San wi kan du fu sorgu taki wi e tan kisi krakti fu Gado yeye? Wi musu tan begi èn abi a frutrow taki Yehovah o arki den begi fu wi. Yesus ben leri den disipel fu en: ’Tan aksi, . . . tan suku, . . . tan naki na tapu a doro.’ Dan Yehovah fu en sei o „gi santa yeye na den sma di e aksi en”.—Luk. 11:9, 13; Tori 1:14; 2:4.
GADO WORTU BEN TRANGA A BRIBI FU ESEKIÈL
12. Soleki fa Esekièl 2:9–3:3 e sori, dan pe a bukulolo ben komoto èn san ben skrifi na ini?
12 Boiti taki Esekièl ben kisi krakti fu Gado yeye, a wortu fu Gado ben e tranga en bribi tu. Na ini wan fisyun, Esekièl ben si wan anu e hori wan bukulolo. (Leisi Esekièl 2:9–3:3.) Fu pe a bukulolo ben komoto? San ben skrifi na ini? Fa a tranga a bribi fu Esekièl? Meki wi go luku. A bukulolo ben kon fu a kownusturu fu Gado. Kande Yehovah ben meki wan fu den fo engel di Esekièl ben si na fesi, gi en a bukulolo (Esek. 1:8; 10:7, 20). A bukulolo ben abi Gado wortu na ini. Wan bun langa krutu boskopu ben skrifi na ini èn na dati Esekièl ben musu fruteri den trangayesi Israelsma di ben de na strafu (Esek. 2:7). A boskopu ben skrifi na fesisei èn na bakasei fu a bukulolo.
13. San Yehovah ben taigi Esekièl fu du èn fu san ede a bukulolo ben switi?
13 Yehovah taigi a profeiti fu nyan a bukulolo ’teleki en bere furu’. Esekièl arki Yehovah èn a nyan a heri bukulolo. San a pisi disi fu a fisyun wani taki? We, Esekièl ben musu frustan a boskopu bun di a ben o go preiki. A ben musu bribi a boskopu dati so taki a ben kan preiki en nanga faya. Baka di a nyan a bukulolo, wan aparti sani pasa. Esekièl kon si taki a bukulolo „ben switi leki oni” (Esek. 3:3). Fu san ede? Fu di Esekièl ben e si a grani di a ben abi fu taki fu Yehovah leki wan sani di switi fu du, wan sani di ben e meki a firi bun (Ps. 19:8-11). A ben breiti taki Yehovah ben feni en bun fu dini leki profeiti.
14. San ben yepi Esekièl fu bigin nanga en wroko?
14 Bakaten Yehovah taigi Esekièl: „Arki san mi o taigi yu èn kibri ala den sani disi na ini yu ati” (Esek. 3:10). Sobun Yehovah ben taki dati Esekièl no ben musu frigiti sani skrifi na ini a bukulolo. A ben musu denki dipi fu den sani dati. Di Esekièl du dati, en bribi kon tranga. Boiti dati, a bukulolo ben abi wan seryusu boskopu di a ben musu fruteri a pipel (Esek. 3:11). Now di Esekièl ben frustan a boskopu fu Gado èn a ben bribi en, a ben de klariklari fu bigin preiki teleki a ben kaba nanga en wroko.—Luku Psalm 19:14.
GADO WORTU E TRANGA WI BRIBI
15. San wi musu ’kibri na ini wi ati’ efu wi wani tan horidoro?
15 Fu man tan du wi preikiwroko, dan wi musu meki Gado wortu tranga a bribi fu wi. Wi musu kibri ala den sani di Yehovah e taigi wi ’na ini wi ati’. Na ini a ten disi Yehovah e taki nanga wi nanga yepi fu en Wortu Bijbel. Fa wi kan sorgu taki Gado Wortu e tan abi krakti tapu a fasi fa wi e denki, e firi èn e du sani?
16. Fa wi kan meki Gado Wortu saka go dipi na ini wi ati?
16 Neleki fa wi skin e kisi krakti te wi e nyan bun, na so wi bribi e kon tranga te wi e studeri Gado Wortu èn wi e denki dipi fu en. Wi no wani frigiti san wi kan leri fu a bukulolo. Te a abi fu du nanga Gado Wortu, dan Yehovah wani taki wi musu ’furu wi bere’ nanga en. Dati wani taki wi musu frustan en bun. Wi kan du dati te wi e begi, te wi e leisi Gado Wortu èn e denki dipi fu en. Wi e begi fosi fu sreka wi ati gi san wi o leisi. Baka dati wi e leisi wan pisi fu Bijbel. Te wi kaba, dan wi e wakti eife fu denki dipi fu san wi leri. San o pasa te wi e du dati? O moro wi e denki dipi fu san wi leisi, o moro wi o frustan Gado Wortu èn a o tranga wi bribi.
17. Fu san ede a prenspari fu denki dipi fu san wi e leisi na ini Bijbel?
17 Fu san ede a prenspari fu leisi Bijbel èn fu denki dipi fu en? Fu di na so fasi wi e kisi krakti fu preiki a Kownukondre boskopu now èn fu man tyari a krutuboskopu di wi o fruteri sma fosi a kaba doro. Boiti dati, te wi e denki dipi fu den moi fasi fu Yehovah, dan wi e tron moro bun mati fu en. Disi o meki taki wi abi wan sani di switi èn di e meki wi firi bun. Iya, wi o abi freide èn wi o de koloku.—Ps. 119:103.
WI O HORIDORO
18. San den sma na ini wi kontren o abi fu erken èn fu san ede?
18 Esekièl ben de wan profeiti, ma wi a no profeiti. Toku wi wani tan fruteri sma a boskopu fu Yehovah di a kibri na ini en Wortu. Wi o tan du disi teleki Yehovah feni taki a wroko kaba. Te a krutudei doro, den sma na ini a birti fu wi no o man taki dati wi no warskow den noso taki Gado ben frigiti den (Esek. 3:19; 18:23). Na presi fu dati, den o abi fu erken taki a boskopu di wi ben e preiki ben kon fu Gado.
19. San o gi wi a krakti fu tan du wi preikiwroko?
19 San o gi wi a krakti fu du wi preikiwroko? Na den srefi sani di ben gi Esekièl krakti. Wi e tan preiki fu di wi sabi taki na Yehovah seni wi, en yeye e gi wi krakti èn a Wortu fu en e tranga wi bribi. Nanga a krakti fu Yehovah wi wani tan du wi preikiwroko èn horidoro „te na a kaba”.—Mat. 24:13.
SINGI 65 Go na fesi!
a Na ini na artikel disi wi o luku dri sani di ben yepi a profeiti Esekièl fu du en preikiwroko. Te wi o si fa Yehovah ben yepi a profeiti, dan wi o abi a bribi taki Yehovah o yepi wi tu fu du wi preikiwroko.