1-2. (a) Sortu aksi wi o piki na ini na artikel disi? (b) Fa wi sabi taki Yehovah e angri fu yepi wi?

 YEHOVAH kan yepi wi te wi e kisi problema na ini wi libi èn a kan meki wi feni prisiri na ini a wroko di wi e du gi en. Na sortu fasi a e yepi wi? Èn fa wi kan kisi wini trutru fu a yepi di Yehovah e gi? Na artikel disi o piki den aksi disi. Ma fosi wi go ondrosuku den piki, meki wi taki fu wan aksi di abi fu du nanga a tori disi: Yehovah e angri trutru fu yepi wi?

² Na ini wan brifi di Paulus skrifi gi den Hebrewsma, a gebroiki wan wortu di kan yepi wi fu feni a piki tapu na aksi dati. Paulus ben skrifi: „Yehovah na mi yepiman. Mi no o frede. San libisma kan du mi?” (Hebr. 13:6) Bijbel wortubuku e taki dati a wortu „yepiman” na ini a vers disi e sori go na wan sma di e lon go yepi wan sma di e bari suku yepi. Pruberi fu si fa Yehovah e hasti ensrefi fu frulusu wan sma di de na nowtu. Disi e sori krin taki Yehovah de klariklari fu yepi wi, iya a e angri fu du dati. Efu Yehovah de na wi sei, dan wi kan horidoro nanga prisiri awinsi problema e miti wi.

3. San na dri fasi fa Yehovah e yepi wi fu horidoro nanga prisiri te problema miti wi?

³ San na wan tu fasi fa Yehovah e yepi wi fu horidoro nanga prisiri te problema miti wi? A buku Yesaya o gi wi a piki disi. Fu san ede wi kan taki dati? Furu fu den profeititori di Yehovah meki Yesaya skrifi abi fu du nanga den dinari fu Gado na ini a ten disi tu. Boiti dati, Yesaya e taki fu Yehovah na wan fasi di makelek gi wi fu frustan. Teki Yesaya kapitel 30 leki eksempre. Drape Yesaya e gebroiki  makelek agersitori fu fruteri fa Yehovah e yepi a pipel fu en. A taki dati Yehovah (1) e arki bun èn a e piki den begi fu wi (2) a e gi wi leri, èn (3) a e du bun sani gi wi now èn a o blesi wi na ini a ten di e kon. Meki wi luku moro fini fa Yehovah e yepi wi na den dri fasi disi.

4. (a) San Yehovah ben taki fu den Dyu na ini a ten fu Yesaya, èn san pasa nanga den? (b) Sortu howpu Yehovah ben gi den getrow sma? (Yesaya 30:18, 19)

⁴ Na a bigin fu kapitel 30, Yehovah e taki dati den Dyu na „tranga-ede man” di „e du a wan sondu baka a trawan”. A e taki moro fara: „A pipel disi na wan tranga-ede pipel . . . di no wani gi yesi na den wèt fu Yehovah” (Yes. 30:1, 9). Fu di a pipel no ben wani arki, meki Yesaya taki na fesi dati Yehovah ben o gi pasi taki rampu miti den (Yes. 30:5, 17; Yer. 25:8-11). Èn na so a pasa tu. Den Babilonsma teki den tyari gwe leki katiboman. Ma yu ben abi wan tu getrow sma na mindri den Dyu, èn Yesaya ben abi wan boskopu di ben o gi den howpu. A taigi den taki wan dei Yehovah ben o meki den drai go baka na a kondre fu den. (Leisi Yesaya 30:18, 19.) Èn dati pasa trutru. Yehovah frulusu den. Ma Yehovah no frulusu den wantewante. A profeititori ben taki: „Yehovah o tan wakti unu, fu di a wani du bun gi unu”. Den wortu disi e sori taki wan pisi ten ben o pasa fosi den getrow sma kon fri. Fu taki en leti, den Israelsma ben tan 70 yari langa na ini Babilon fosi wan grupu fu den kisi primisi fu drai go baka na Yerusalem (Yes. 10:21; Yer. 29:10). Di den sma doro baka na ini den eigi kondre, den no ben e krei moro fu di den ben sari, ma den ben e krei fu di den ben prisiri.

5. Sortu dyaranti Yesaya 30:19 e gi wi?

⁵ Tide na a dei wi e kisi deki-ati fu den wortu disi: „Te a yere wan fu unu e bari kari en, a o du bun gi en nomonomo” (Yes. 30:19). Yesaya e gi wi a dyaranti taki Yehovah o arki bun te wi e bari kari en, èn a o piki esi-esi te wi e begi en. Yesaya e taki tu: „Fa a o yere a babari fu en, a o piki en.” Den wortu disi e gi wi a dyaranti taki wi Tata de klariklari fu yepi wi. Iya, a e angri fu yepi den wan di e suku yepi na en. Fu di wi sabi dati, meki wi man horidoro nanga prisiri.

6. Fa den wortu fu Yesaya e sori taki Yehovah e arki den begi fu ibriwan fu den dinari fu en?

⁶ Sortu tra sani a vers disi e leri wi fu den begi fu wi? Yehovah e poti prakseri na den begi fu ibriwan fu wi. Fu san ede wi kan taki dati? Na ini a fosi pisi fu Yesaya kapitel 30 Yehovah e taki nanga en pipel leki wan grupu. Ma den wortu „wan fu unu” nanga „en” na ini vers 19 e sori taki a e taki nanga ibri sma aparti. Yesaya e skrifi: „Te a yere wan fu unu e bari kari en, a o du bun gi en nomonomo. Fa a o yere a babari fu en, a o piki en.” Yehovah na wan lobi-ati Tata, dati meki a no o taigi en manpikin noso umapikin: „Yu musu de moro tranga leki yu brada noso sisa.” Na presi fu dati, a e broko en ede nanga ibriwan fu wi èn ensrefi e poti prakseri na den begi fu wi.​—Ps. 116:1; Yes. 57:15.

7. Fa Yesaya nanga Yesus e sori taki a de prenspari fu tan begi?

⁷ Te wi e taki nanga Gado fu wan sani di e gi wi broko-ede, dan wantewante Yehovah kan gi wi krakti fu horidoro na ini a  situwâsi fu wi. Èn efu a problema no e gwe so esi leki wi ben fruwakti, dan kande wi musu aksi Yehovah furu tron fu gi wi a krakti fu horidoro. Yehovah wani taki wi tan begi en. Yesaya skrifi: „Un no musu tan pî” (Yes. 62:7). Den wortu disi kan vertaal tu nanga „No meki [Yehovah] rostu”. San disi wani taki? Wi no musu tapu fu taki nanga Yehovah, ma wi musu tan begi en. A musu de leki wi no e gi Yehovah na okasi fu rostu. Den wortu fu Yesaya e meki wi prakseri den agersitori pe Yesus ben e taki fu begi na ini Lukas 11:8-10, 13. Drape Yesus e gi wi deki-ati fu tan begi èn fu „tan aksi” Gado meki a gi wi en santa yeye. Wi kan begi Yehovah tu fu gi wi rai di o yepi wi fu teki bun bosroiti.

8. Fa den wortu fu Yesaya 30:20, 21 kon tru na ini owruten?

⁸ Leisi Yesaya 30:20, 21. Di a legre fu Babilon lontu a foto Yerusalem wán nanga afu yari langa, dan a pipel ondrofeni so furu nowtu taki a ben tron wan aladei sani gi den, leki nyanyan nanga dringi. Ma soleki fa vers 20 nanga 21 e taki, dan Yehovah ben pramisi den Dyu taki efu den sori berow èn den kenki a fasi fa den e tyari densrefi, dan a ben o frulusu den. Yesaya ben kari Yehovah a „Gran Leriman” èn a pramisi a pipel taki Yehovah ben o leri den fa den musu anbegi En na a yoisti fasi. Den wortu dati kon tru di den Dyu kon fri fu katibo. Yehovah ben de wan Gran Leriman gi den, èn ondro a tiri fu en den ben man seti a tru anbegi kon bun baka. Wi breiti srefisrefi taki wi abi Yehovah leki wi Gran Leriman na ini a ten disi.

9. San na wan fasi fa wi e kisi leri fu Yehovah na ini a ten disi?

⁹ Yesaya e go doro nanga den agersitori fu en. A e taki dati wi na studenti di e kisi leri fu Yehovah na tu fasi. Na a fosi presi, Yesaya e taki: „Den ai fu unu o si un Gran Leriman.” Na ini na agersitori disi a Leriman e tanapu na fesi den studenti fu en. Wi abi a grani fu kisi leri fu Yehovah na ini a ten disi. Fa a e gi wi leri? A e gebroiki en organisâsi fu du dati. Wi de nanga tangi srefisrefi taki Yehovah en organisâsi e gi wi leri di de krin fu frustan! A leri di den e gi wi na den gemeente konmakandra, den kongres, nanga den buku fu wi, tapu JW broadcasting, èn na furu tra fasi e  yepi wi fu horidoro nanga prisiri awinsi wi abi en muilek.

10. Fa wi e yere „wan sten na [wi] baka”?

¹⁰ Yesaya e taki fu a di fu tu fasi fa Yehovah e gi wi leri. A e taki: „Nanga un eigi yesi unu o yere wan sten na un baka.” Dyaso a profeiti e fruteri taki Yehovah de leki wan bun leriman di e waka baka den studenti fu en fu sori den sortu pasi den musu teki. Na ini a ten disi wi e yere Gado sten na wi baka. Fa so? We, Gado Wortu skrifi na ini Bijbel langa ten pasa kaba, na ini wan ten di de bun fara na wi baka. Sobun te wi e leisi Bijbel, dan a de leki wi e yere Gado sten na wi baka.​—Yes. 51:4.

11. San wi musu du efu wi wani horidoro nanga prisiri, èn fu san ede?

¹¹ Fa wi kan kisi wini dorodoro fu a leri di Yehovah e gi nanga yepi fu en organisâsi èn en Wortu? Luku taki Yesaya e taki tu sani. A fosiwan na: „Disi na a pasi. A di fu tu sani na: „Waka na tapu” (Yes. 30:21). Sobun, a no sari fu sabi „a pasi” nomo. Wi musu „waka na tapu” a pasi tu. Na organisâsi fu Yehovah e fruklari En Wortu gi wi, èn na so wan fasi wi e kon sabi san Yehovah e aksi fu wi. Wi e leri tu fa wi musu gebroiki den sani di wi leri. Fu man horidoro nanga prisiri na ini a diniwroko fu Yehovah, wi musu du den tu sani disi. Dan fosi wi kan de seiker taki Yehovah o blesi wi.

12. Fa Yehovah ben o blesi a pipel fu en soleki fa Yesaya 30:23-26 e sori?

¹² Leisi Yesaya 30:23-26. Fa a profeititori disi kon tru gi den Dyu di drai go baka na den kondre Israel? Yehovah ben gi den bun furu sani di ben o yepi den fu tan na libi èn fu tan dini en. A blesi a pipel fu en nanga bogobogo nyanyan. Ma san moro prenspari na taki a gi den bun furu leri na a ten di den seti a tru anbegi safrisafri kon bun baka. Noiti ete Gado ben blesi en pipel so. Soleki fa vers 26 e sori, dan Yehovah yepi den fu frustan en Wortu moro krin (Yes. 60:2). Den blesi di Yehovah gi den dinari fu en ben yepi den fu dini en nanga prisiri èn nanga a krakti di den abi, fu di „den abi wan bun ati”.​—Yes. 65:14.

13. Fa a profeititori fu Yesaya di ben taki dati a tru anbegi ben o seti baka, kon tru na ini a ten disi?

¹³ A profeititori disi fu Yesaya di ben taki dati a tru anbegi ben o seti kon bun baka, abi fu du nanga wi na ini a ten disi  tu? Iya seiker! Fa so? Sensi 1919, milyunmilyun sma komoto na ini katibo fu Babilon a Bigiwan, dati na ala den falsi kerki na grontapu. Gado meki den ondrofeni wan sani di bun moro a Pramisi Kondre di den Israelsma ben o kisi. Den kon de na ini wan situwâsi pe den alamala e anbegi Yehovah makandra leki wán man. Den kon de ini wan agersi paradijs.​—Yes. 51:3; 66:8.

14. Sortu blesi den salfuwan nanga den „tra skapu” e kisi, èn san den musu du fu man kisi den blesi disi?

¹⁴ Sensi 1919, den salfuwan e anbegi Yehovah na ini wánfasi. Baka wan pisi ten den „tra skapu”, dati na den sma di abi a howpu fu libi na grontapu, kon anbegi Gado makandra nanga den. Na presi fu falsi bribi, den e leri bun furu sani di e yepi den fu dini Gado na wan yoisti fasi èn den e prisiri fu preiki a bun nyunsu fu Gado Kownukondre. Wi alamala abi wan bun matifasi nanga Yehovah, èn wi e libi na ini freide nanga den lobi brada nanga sisa fu wi di e yepi wi fu horidoro nanga prisiri te a libi lai problema. Wi e kon na ini a bigi famiri disi te wi bigin anbegi Yehovah na a yoisti fasi èn te wi e du ala san wi man fu waka na en baka.​—Yoh. 10:16; Yes. 25:6; 65:13.

15. Pe a paradijs fu a pipel fu Gado de?

¹⁵ Pe na agersi paradijs disi de na ini a ten disi? Den anbegiman fu Yehovah de na ala sei fu grontapu. Dati meki a paradijs disi de na heri grontapu tu. Sobun, awinsi pe wi e tan na grontapu na ini a ten disi, wi kan de wan memre fu a bradafasi disi solanga wi e horibaka fayafaya gi a tru anbegi.

16. San wi musu du fu man tan na ini a moi paradijs fu wi?

¹⁶ Efu wi wani tan na ini a paradijs fu Gado pipel, dan wi musu tan abi furu warderi gi wi brada nanga sisa na heri grontapu. Fa wi kan du dati? We, wi no musu poti prakseri na den fowtu fu wi brada nanga sisa, ma na den moi fasi fu den (Yoh. 17:20, 21). Fu san ede dati de so prenspari? Denki a tori disi. Te wi e go na wan moi busi, dan wi e si someni difrenti moi bon. Na so den gemeente na ini a ten disi moi fu di den abi difrenti sortu sma di wi kan agersi nanga bon (Yes. 44:4; 61:3). Wi musu sorgu taki wi  e poti prakseri na a moi fu a busi na presi fu luku wán bon di de krosibei fu wi èn di kande no moi so. Wi no musu meki wi eigi fowtu noso den fowtu fu trawan na ini a gemeente breni wi taki wi no man si moro o moi a de fu abi brada nanga sisa na heri grontapu.

17. San ibriwan fu wi kan du fu sorgu taki wi abi wánfasi na ini a gemeente?

¹⁷ San ibriwan fu wi kan du fu sorgu taki wi abi wánfasi na ini a gemeente? Wi musu suku fu libi na ini freide nanga trawan (Mat. 5:9; Rom. 12:18). Ibri leisi te wi e du sani fu abi freide nanga trawan na ini a gemeente, dan wi e meki a paradijs fu Gado pipel kon moro moi. Wi musu hori na prakseri taki na Yehovah hari ibriwan fu den sma na ini a gemeente kon na ini a tru anbegi (Yoh. 6:44). Prakseri fa Yehovah e prisiri te a e si taki wi e wroko tranga fu meki freide nanga wánfasi de na mindri den anbegiman fu en di warti gi en!​—Yes. 26:3; Hag. 2:7.

18. Fu sortu sani wi musu denki dipi èn fu san ede?

¹⁸ Fa wi kan kisi wini dorodoro fu den blesi di Gado e gi wi leki anbegiman fu en? Wi kan denki dipi fu den sani di wi e studeri na ini Gado Wortu èn na ini den buku fu wi. Te wi e studeri na so wan fasi, dan wi o kisi Kresten fasi di o yepi wi fu „lobi makandra trutru”, iya, wi o „lobi makandra leki brada” na ini a gemeente (Rom. 12:10). Te wi e prakseri den blesi di wi abi now, dan wi e tranga a matifasi di wi abi nanga Yehovah. Èn te wi e denki dipi fu den blesi di Yehovah o gi wi na ini a ten di e kon, dan a howpu di wi abi fu dini en fu têgo o de wan trutru sani gi wi. Ala den sani disi o yepi wi fu dini Yehovah nanga moro prisiri now.

19. (a) Fu san wi kan de seiker soleki fa Yesaya 30:18 e sori? (b) San o yepi wi fu horidoro nanga prisiri?

¹⁹ Yehovah „o opo du wan sani” gi wi te a o tyari wan kaba kon na a ogri grontapu disi (Yes. 30:18). Wi de seiker taki Yehovah na „wan Gado di e koti krutu na wan reti fasi” èn taki a no o gi pasi taki a grontapu fu Satan tan moro langa leki san de fanowdu (Yes. 25:9). Wi e wakti nanga pasensi tapu a dei te Yehovah o frulusu wi. Na a srefi ten wi musu abi a fasti bosroiti fu tan warderi a grani di wi abi fu begi, fu studeri, fu gebroiki Gado Wortu na ini wi libi èn fu denki dipi fu den blesi di wi e kisi. Efu wi du dati, dan Yehovah o yepi wi fu horidoro èn fu tan anbegi en nanga prisiri.