1-2. (a) Fu san ede na apostel Paulus taki dati lobi na ’a moro prenspari’ fasi? (b) Sortu aksi wi o go luku?

 DI NA apostel Paulus ben taki fu bribi, howpu nanga lobi, dan na a kba a taki: „A moro prenspariwan fu den [fasi disi] na lobi” (1 Kor. 13:13). Fu san ede Paulus taki a sani disi? Na ini a ten di e kon, a no o de fanowdu moro fu bribi na ini den pramisi fu Gado noso fu howpu taki den pramisi dati o kon tru, fu di na ini a nyun grontapu den pramisi dati kon tru kba. Ma wi o abi fu tan lobi Yehovah nanga tra sma. Fu taki en leti, a lobi di wi abi gi den o tan gro fu ala ten.

² Fu di wi o abi fu sori lobi ala ten, meki wi o luku dri aksi. A fosiwan: Fu san ede wi musu lobi makandra? A di fu tu: Fa wi e sori taki wi lobi makandra? Èn a di fu dri: Fa wi kan sorgu taki a lobi di wi abi gi makandra no e kon kowru?

3. Sortu reide wi abi fu lobi makandra?

³ Fu san ede a prenspari fu lobi makandra? Wan reide na taki sma e si taki wi na tru Kresten te wi abi lobi gi makandra. Yesus ben taigi den apostel fu en: „Na a fasi disi ala sma o sabi taki unu na mi disipel, te unu lobi makandra” (Yoh. 13:35). Boiti dati, te wi abi lobi, dan wi o tan na ini wánfasi. Paulus ben taki dati lobi „e meki sma  kon de wán trutru” (Kol. 3:14). Ma wan tra prenspari reide de fu san ede wi musu lobi makandra. Na apostel Yohanes ben skrifi den Kresten taki: „A sma di lobi Gado, musu lobi en brada tu” (1 Yoh. 4:21). Te wi e sori lobi gi makandra, dan wi e sori taki wi lobi Gado.

4-5. Gi wan eksempre di e sori fa a lobi di wi abi gi wi brada nanga s’sa e sori taki wi lobi Gado.

⁴ Fu san ede a lobi di wi abi gi wi brada nanga s’sa e sori taki wi lobi Gado? Fu eksempre: Son leisi wan datra e tyèk yu pols fu kon sabi efu yu ati e wroko bun. San na eksempre disi e leri wi?

⁵ Neleki fa wan datra kan kon sabi efu wi ati e wroko bun te a e tyèk wi pols, na so wi kan kon sabi efu wi lobi Gado trutru te wi e luku efu wi lobi trawan trutru. Efu wi si taki wi no abi so furu lobi moro gi wi brada nanga s’sa, dan dati e sori taki a lobi di wi abi gi Gado kon kowru. Ma te wi abi a gwenti fu sori lobi gi wi brada nanga s’sa, dan disi e sori taki wi lobi Gado trutru.

6. Fu san ede wi musu si en leki wan seryusu sani efu a lobi di wi abi gi wi brada nanga s’sa kon kowru? (1 Yohanes 4:7-9, 11)

⁶ Efu wi si taki a lobi di wi abi gi wi brada nanga s’sa e kon kowru, dan wi musu si dati leki wan seryusu sani. Fu san ede? Fu di dati kan sori taki a matifasi di wi abi nanga Yehovah kon swaki. Na apostel Yohanes ben tyari disi kon na krin di a taki: „A sma di no lobi en brada di a man si, no man lobi Gado di a no man si” (1 Yoh. 4:20). San a tekst disi e leri wi? Yehovah breiti nanga wi soso te wi „lobi makandra”.​—Leisi 1 Yohanes 4:7-9, 11.

7-8. San na wan tu sani di wi kan du fu sori taki wi lobi makandra?

⁷ Na someni presi na ini Gado Wortu wi e leisi taki wi musu „lobi makandra” (Yoh. 15:12, 17; Rom. 13:8; 1 Tes. 4:9; 1 Petr. 1:22; 1 Yoh. 4:11). Lobi e kmoto fu wi ati, èn nowan sma man si na ini wi ati. Sobun fa wi kan sori wi brada nanga s’sa taki wi lobi den? Wi kan du dati nanga den sani di wi e taki èn e du.

⁸ Difrenti fasi de fa wi kan sori wi brada nanga s’sa taki wi lobi den. Luku wan tu sani di wi kan du: „Taki san tru” te unu e taki nanga makandra (Sak. 8:16). „Tan libi bun nanga makandra” (Mark. 9:50). „De a fosiwan fu sori trawan lespeki” (Rom. 12:10). „Abi a gwenti fu gi sma wan switikon” (Rom. 12:13). „Tan gi . . . makandra pardon” (Kol. 3:13). „Tan tyari den hebi fu makandra” (Gal. 6:2). „Tan trowstu makandra” (1 Tes. 4:18). „Tan yepi makandra”(1 Tes. 5:11). „Begi gi makandra.”​—Yak. 5:16.

9. Fu san ede a prenspari fu trowstu trawan efu wi wani sori den taki wi lobi den?

⁹ Meki wi taki fu wán fu den sani di kari na ini a paragraaf na fesi. Wi o luku a rai di Paulus gi fu „tan trowstu makandra”. Fu san ede a prenspari fu trowstu trawan efu wi wani sori den taki wi lobi den? Soleki fa wan buku di e fruklari Bijbel e sori, dan a wortu di Paulus gebroiki gi „trowstu” wani taki dati yu e „tnapu na sei wan sma fu gi en dek’ati te wan bigi nowtu miti en”. Sobun, te wi e trowstu wan brada noso wan s’sa di abi problema, dan wi e yepi en fu opo tnapu  èn fu tan waka na tapu a pasi fu libi. Ibri leisi te wi e trowstu wan brada noso wan s’sa, wi e sori lobi gi en.​—2 Kor. 7:6, 7, 13.

10. Fu san ede wi musu firi gi trawan?

¹⁰ Fu man trowstu trawan, wi musu abi sar’ati nanga den. Fu san ede dati de so? Te wi abi sar’ati nanga trawan, dan wi o wani trowstu den èn wi o wan du wan sani fu yepi den. Sobun, na te wi abi sar’ati nanga trawan, dan wi o man trowstu den. Paulus ben sori taki na fu di Yehovah abi sar’ati meki a e trowstu sma. Fu dati ede a e kari Yehovah „a Tata di abi furu sari-ati” èn „a Gado fu ala trowstu” (2 Kor. 1:3). Sobun, fu di Yehovah abi furu sar’ati, meki a man trowstu wi „te wi de na ini ala sortu banawtu” (2 Kor. 1:4). Te watra e kiri wan sma èn a e dringi krin watra fu wan watra-olo, dan a e firi bun baka. Na so wan sma e firi bun baka te Yehovah e trowstu en. Fa wi kan sori taki wi abi sar’ati nanga trawan èn fa wi kan trowstu den neleki fa Yehovah e du dati? Wan fasi fa wi kan du dati, na te wi e du muiti fu kon abi fasi di o meki en makelek gi wi fu trowstu trawan èn fu abi sar’ati nanga den. San na wan tu fu den fasi dati?

11. Soleki fa Kolosesma 3:12 nanga 1 Petrus 3:8 e sori, dan san o yepi wi fu lobi trawan èn fu trowstu den?

¹¹ San o yepi wi fu tan lobi makandra èn fu „tan trowstu makandra” ibri dei? Wi musu leri fu firi gi wi brada nanga s’sa, wi musu leri fu lobi den, èn fu sori switifasi gi den. (Leisi Kolosesma 3:12; 1 Petrus 3:8.) Fa den fasi disi o yepi wi? Te wi abi sar’ati nanga trawan èn te wi e broko wi ede trutru nanga den, dan seiker wi o wani yepi den te den de na nowtu. Dati meki Yesus taki: „San furu na ati, na dati mofo e taki. Wan bun sma e taki bun sani, fu di en ati bun” (Mat. 12:34, 35). Iya, wan prenspari fasi fa wi e sori taki wi lobi wi brada nanga s’sa na te wi e trowstu den na ini muilek ten.

12. (a) Nanga san wi musu luku bun? (b) Sortu aksi wi o luku now?

¹² A no de fu taki dati wi alamala wani „tan lobi makandra” (1 Yoh. 4:7). Ma a prenspari fu hori na prakseri taki Yesus ben warskow taki „a lobi fu furu sma o kon kowru” (Mat. 24:12). Yesus no ben taki dati bun furu fu den disipel fu en no ben o sori lobi moro gi makandra. Toch wi musu luku bun taki wi no kon de leki den sma fu grontapu di no abi lobi. Dati meki wi o taki fu a prenspari aksi disi: Fa wi kan sabi efu a lobi di wi abi gi wi brada nanga s’sa tranga?

13. San kan meki en muilek gi wi fu sori lobi?

¹³ Wi kan sabi o tranga a lobi fu wi de te wi e luku san wi e du na ini son situwâsi (2 Kor. 8:8). Paulus ben taki fu wan fu den situwâsi dati. A ben skrifi: „A moro prenspari sani, na taki un musu lobi makandra nanga un heri ati, bika lobi e tapu bun furu sondu” (1 Petr. 4:8). Sobun, te wan brada noso wan s’sa meki wan fowtu noso du wan hati sani nanga wi, dan den sani di wi e du o sori efu wi lobi den trutru.

14. Soleki fa 1 Petrus 4:8 e sori, dan fa wi musu sori lobi gi makandra? Gi wan eksempre.

 ¹⁴ Meki wi luku den wortu fu Petrus moro fini. A fosi pisi fu vers 8 e sori fa wi musu sori lobi gi makandra. Wi musu lobi makandra ’nanga wi heri ati’. A lasti pisi fu a vers e sori san wi o du te wi lobi makandra na so wan fasi. Lobi e tapu den sondu fu wi brada nanga s’sa. Luku na eksempre disi: Kow taki dati yu abi wan tafra nanga omeni flaka nanga krabkrabu. Yu kan teki wan tafraduku fu tapu den flaka nanga den krabkrabu. Yu no o tapu wán noso tu nomo, ma yu o tapu alamala. Na so a de tu taki te wi lobi wi brada nanga s’sa nanga wi heri ati, dan nanga lobi wi o tapu den sondu fu den. Sobun, wi o gi den pardon. A no gi wán noso tu sondu nomo, ma gi „bun furu sondu”.

15. San wi o man du te a lobi di wi abi gi wi brada nanga s’sa tranga? (Kolosesma 3:13)

¹⁵ A lobi di wi abi gi wi brada nanga s’sa musu tranga nofo so taki wi man gi den pardon fu den fowtu fu den. Wi musu du dati, awinsi a muilek son leisi.  (Leisi Kolosesma 3:13.) Te wi e gi trawan pardon, dan wi e sori taki a lobi fu wi tranga èn Yehovah o breiti nanga wi. San o yepi wi tu fu gi trawan pardon gi den fowtu fu den èn fu no mandi esi nanga den?

16-17. San o yepi wi tu fu no luku den pkin fowtu fu trawan? Gi wan eksempre.

¹⁶ No poti prakseri na den fowtu fu yu brada nanga s’sa, ma luku den bun fasi fu den. Luku na eksempre disi: Kow taki dati yu de makandra nanga wan tu brada nanga s’sa. Ala sma breiti èn te un de fu gwe yu e meki wan fowtow fu a grupu. Kande yu e meki ete tu fowtow, so taki yu kan abi trawan efu a fosiwan no bun. Now yu abi dri fowtow, ma na tapu wan fu den yu e si taki wan brada e span en fesi. San yu e du nanga a fowtow dati? Yu e puru en fu di yu sabi taki yu abi ete tu fowtow pe ala sma e lafu.

¹⁷ Wi kan agersi den bun fowtow di wi e hori, nanga den moi momenti di wi no wani fergiti. Nofo tron te wi de makandra nanga wi brada nanga s’sa, furu moi sani e psa di wi no wani fergiti. Ma kow taki dati na wan fu den okasi dati wan brada noso s’sa taki wan sani noso a du wan sani di wi no lobi. San yu o du? Yu  o tan prakseri a sani dati? Fu san ede yu no e puru en neleki fa yu e puru wan fowtow di no bun? (Odo 19:11; Ef. 4:32) Wi kan fergiti den pkin fowtu fu wi brada nanga s’sa fu di wi abi furu moi sani di wi kan memre fu den. Na den bun sani wi wani tan memre.

18. Sortu prenspari sani wi leri na ini na artikel disi te a abi fu du nanga lobi?

¹⁸ Fu san ede wi wani sorgu taki a lobi di wi abi gi makandra no e kon kowru? Soleki fa wi si, dan te wi e sori lobi gi wi brada nanga s’sa, dan wi e sori lobi gi Yehovah. Fa wi e sori lobi gi wi brada nanga s’sa? Wán fasi fa wi e du dati, na te wi e trowstu den. Wi o man „tan trowstu makandra” te wi e firi gi makandra. Fa wi kan sorgu taki a lobi di wi abi gi makandra no e kon kowru? Na te wi e du ala muiti fu gi trawan pardon te den meki wan fowtu.

19. Fu san ede a prenspari srefisrefi fu sori lobi gi makandra na ini a ten disi?

¹⁹ Fu san ede a prenspari srefisrefi fu sori lobi gi makandra na ini a ten disi? Luku san Petrus e taki: „A kaba fu ala sani kon krosibei. Fu dati ede . . . un musu lobi makandra nanga un heri ati” (1 Petr. 4:7, 8). San wi kan ferwakti o moro a kba fu a grontapu disi e kon krosbei? Luku san Yesus ben taki fu den bakaman fu en: „Na ini ala kondre sma o teige unu fu mi nen ede” (Mat. 24:9). Fu man psa a muilek ten dati, wi musu abi wánfasi. Te wi abi wánfasi, dan Satan no o man prati wi fu di wi lobi makandra èn lobi „e meki sma kon de wán trutru”.​—Kol. 3:14; Fil. 2:1, 2.