1. San ben de a boskopu fu a profeiti Yesaya gi den tra Israelsma?

 A PROFEITI Yesaya ben taki dati Yehovah na „a tru Gado”. A wortu di vertaal nanga „tru” wani taki „amen” (Yes. 65:16). „Amen” wani taki „na so a de” noso „seiker”. Nofo tron Bijbel e gebroiki a wortu „amen” fu sori taki ala sani di Yehovah nanga Yesus taki, tru. Sobun, a boskopu di Yesaya ben tyari gi den Israelsma de krin: Te Yehovah e taki dati wan sani o pasa, dan ala ten a sani dati e pasa. Yehovah sori taki a de fu fertrow fu di a meki ibriwan fu den pramisi fu en kon tru.

2. (a) Fu san ede wi kan bribi taki den sani di Yehovah pramisi gi a ten di e kon, o kon tru? (b) Sortu aksi wi o luku?

² Wi kan bribi tu taki den sani di Yehovah pramisi gi a ten di e kon, o kon tru? Sowan 800 yari baka di Yesaya dede, na apostel Paulus ferteri fu san ede wi kan bribi taki den sani di Yehovah pramisi o kon tru ala ten. Paulus ben taki: „Gado no man lei kwetikweti” (Hebr. 6:18). Neleki fa wan manyabon no kan meki sinas, na so Yehovah di e taki soso san tru, no man lei. Fu dati ede wi kan de seiker trutru taki ala sani di Yehovah e taki, owktu den sani di a pramisi gi a ten di e kon, o kon tru. Na ini na artikel disi wi o taki fu den aksi disi: San Yehovah pramisi fu gi wi na ini a ten di e kon? Sortu dyaranti Yehovah e gi wi taki a pramisi fu en o kon tru?

3. (a) Sortu pramisi den futuboi fu Gado lobi srefsrefi? (Openbaring 21:3, 4) (b) San son sma e taki te wi e ferteri den fu a pramisi disi?

³ Den futuboi fu Gado na heri grontapu lobi a pramisi di wi o taki fu en now. (Leisi Openbaring 21:3, 4.) Yehovah  pramisi taki wan ten o de te „dede no o de moro. Nowan sari, noso krei, noso pen no o de moro.” Furu fu wi e leisi den vers disi fu trowstu sma na ini a preikiwroko èn fu sori den fa a libi o de na ini a paradijs. San son sma e taki te wi e ferteri den a pramisi disi? Kande den e taki: „Den sani disi moi, ma mi no e bribi taki den o pasa trutru.”

4. (a) San Yehovah ben sabi na fesi? (b) Boiti taki Yehovah meki wan pramisi, san a du moro?

⁴ Di Yehovah meki na apostel Yohanes skrifi fa a libi o de na ini a paradijs, a ben sabi taki wi na ini a ten disi ben o ferteri tra sma fu a howpu disi te wi preiki a Kownukondre boskopu. Yehovah ben sabi tu taki furu sma ben o feni en muilek fu bribi taki den „nyun sani” disi o pasa na ini a ten di e kon (Yes. 42:9; 60:2; 2 Kor. 4:3, 4). Sobun, fa wi kan yepi trawan fu bribi taki den blesi di kari na ini Openbaring 21:3, 4 o kon tru? Èn fa wi srefi kan tranga wi bribi na ini Yehovah nanga den pramisi fu en? Yehovah no pramisi wi a moi sani disi nomo, ma a ben taki wan tu sani sosrefi di e sori krin fu san ede wi kan bribi en. San na den sani di a taki?

5. Sortu vers e sori fu san ede wi kan bribi taki a Paradijs o kon trutru soleki fa Gado pramisi, èn san den vers e taki?

⁵ Na ini den vers na baka, wi e si fu san ede wi kan bribi taki a Paradijs o kon trutru soleki fa Yehovah pramisi. Drape skrifi: „A sma di ben e sidon na tapu a kownusturu taki: ’Luku, mi e meki ala sani kon nyun.’ A taki sosrefi: ’Skrifi, bika den wortu disi tru èn sma kan bribi den.’ Dan a taigi mi: ’Den sani disi pasa kaba! Mi na a Alfa nanga na Omega, a bigin nanga a kaba.’”​—Openb. 21:5, 6a.

6. Fu san ede den wortu na ini Openbaring 21:5, 6 e tranga wi bribi taki Gado o du san a pramisi?

⁶ Fu san ede den Bijbeltekst disi e tranga wi bribi taki Gado o du san a pramisi? A sani di Yehovah taki na ini den vers disi, de neleki na Yehovah srefi teken wan dokumenti fu sori wi taki a o du trutru san a pramisi. Sobun, na ini Openbaring 21:3, 4 Gado skrifi a pramisi. Ma dan na ini vers 5 nanga 6, a de neleki Yehovah poti en handtekening fu gi wi a dyaranti taki a o du trutru san a pramisi. Kow poti prakseri now na den wortu di Yehovah e gebroiki fu sori taki wi kan bribi en.

7. Suma e bigin taki na ini vers 5, èn fu san ede dati de so prenspari?

⁷ Vers 5 e bigin so: „A sma di ben e sidon na tapu a kownusturu taki” (Openb. 21:5a). Den wortu disi prenspari srefisrefi fu di disi na wán fu den dri leisi nomo na ini a buku Openbaring pe Yehovah srefi e taki. Sobun, a no wan tranga engel gi a dyaranti disi. Srefi Yesus no du dati. Ma na Yehovah srefi taki en! A sani disi e gi wi bun reide fu bribi den sani di Yehovah e taki baka dati. Fu san ede? Fu di Yehovah „no man lei” (Tit. 1:2). Sobun, wi kan de seiker taki den wortu di wi e leisi na Openbaring 21:5, 6 o kon tru.

8. San Yehovah e taki fu sori taki a o du trutru san a pramisi? (Yesaya 46:10)

⁸ Baka dati Yehovah e taki: „Luku” (Openb. 21:5). A Griki wortu di vertaal  nanga „luku” skrifi furu tron na ini a buku Openbaring. Wan wortubuku e taki dati a wortu disi na fu „meki a leisiman poti bun prakseri na san o kon baka dati”. San Gado e taki baka dati? A e taki: „Mi e meki ala sani kon nyun.” A tru taki Yehovah o tyari den kenki disi kon na ini a ten di e kon. Ma fu di a de so seiker taki a o du san a pramisi, meki a e taki fu den sani dati neleki a e du den nownow kba.​—Leisi Yesaya 46:10.

9. (a) Sortu tu sani Yehovah o du te a e taki: „Mi e meki ala sani kon nyun”? (b) San o psa nanga a „hemel” nanga a „grontapu” fu now?

⁹ Meki wi ondrosuku a tra pisi fu Openbaring 21:5: „Mi e meki ala sani kon nyun.” Na ini a kapitel disi a pisi disi e sori taki Yehovah o du tu sani. A fosi sani na taki Yehovah o pori na owru grontapu. Èn a di fu tu sani na taki a o tyari wan nyun grontapu kon. Na ini Openbaring 21:1 wi e leisi: „A fosi hemel nanga a fosi grontapu pasa gowe.” „A fosi hemel” wani taki den politiek makti di Satan nanga den ogri yeye fu en abi krakti na tapu (Mat. 4:8, 9; 1 Yoh. 5:19). Te Bijbel e gebroiki a wortu „grontapu”, dan dati kan sori go na den sma di e libi na grontapu (Deut. 32:1; Ps. 96:11). Sobun, „a fosi grontapu” e sori go na den ogri sma fu a ten disi. Yehovah no o meki a „hemel” nanga a „grontapu” fu now kon bun baka, ma a o pori den. Èn na presi fu dati a o tyari „wan nyun hemel nanga wan nyun grontapu” kon. Dati wani taki dati wan nyun regering o tiri wan libimakandra fu ret’ati sma.

10. San Yehovah o meki nyun?

¹⁰ Na sortu tra fasi Yehovah o meki ala sani kon nyun? (Openb. 21:5) Yehovah o meki grontapu nanga libisma kon nyun baka, fu di a o meki den kon bun dorodoro teleki den no abi nowan fowtu noso sondu. Soleki fa Yesaya ben taki na fesi, heri grontapu o tron wan moi presi neleki a dyari fu Eden. Gado o meki wi kon nyun, fu di a o meki ibriwan fu wi kon betre. Den lansma, den brenisma nanga den dofusma o kon betre, èn srefi den dedesma o kon na libi baka.​—Yes. 25:8; 35:1-7.

11. San Yehovah ben taigi Yohanes fu du èn fu san ede?

¹¹ Sortu tra sani Gado taki fu sori taki wi kan bribi en? Yehovah ben taigi Yohanes: „Skrifi, bika den wortu disi tru èn sma kan bribi den” (Openb. 21:5). Yehovah no ben gi en a komando nomo fu „skrifi”. A ferteri en tu fu san ede a ben musu du dati. A taki: „Bika den wortu disi tru èn sma kan bribi den.” Dati wani taki dati wi kan fertrow den sani di Gado taki. Wi breiti taki Yohanes arki Gado fu „skrifi” den wortu fu en, bika dati meki wi kan leisi now taki Gado pramisi wan Paradijs èn wi kan denki dipi fu den moi sani di a o du gi wi.

12. Fu san ede Yehovah ben taki: „Den sani disi pasa kaba!”

¹² San Gado e taki baka dati? A e taki: „Den sani disi pasa kaba!” (Openb. 21:6) Fu san ede Yehovah e taki dati den pramisi pasa kaba? A e du dati fu di nowan sani kan tapu en fu du san a abi na prakseri. Yehovah e taki ete wan sani di e gi wi a dyaranti taki a o du trutru san a pramisi. San a e taki?

13. Fu san ede Yehovah taki: „Mi na a Alfa nanga na Omega”?

¹³ Soleki fa wi ben taki na a bigin, Yehovah srefi ben taki dri leisi na ini den fisyun di Yohanes ben kisi (Openb. 1:8; 21:5, 6; 22:13). Ibri leisi Yehovah ben taki a srefi sani: „Mi na a Alfa nanga na Omega.” Alfa na a fosi letter fu a Griki alfabet èn omega na a lasti letter. Te Yehovah e taki dati en „na a Alfa nanga na Omega”, dan na so a e meki wi ferstan taki te a e bigin nanga wan sani, dan a e klari en tu.

14. (a) O ten wi kan taki dati Yehovah ben taki „Alfa”, èn o ten a o taki „Omega”? (b) Fa den wortu na ini Genesis 2:1-3 e sori taki Gado o du trutru san a abi na prakseri?

¹⁴ Baka di Yehovah meki Adam nanga Eva, a ben taigi den san a wani gi libisma nanga grontapu. Bijbel e taki: „Gado blesi den. Dan a taigi den: ’Meki pikin èn kon furu, teleki unu kon lai na grontapu èn basi ala sani na grontapu’” (Gen. 1:28). Na a momenti dati, Yehovah ben taki krin san a ben abi na prakseri gi libisma nanga grontapu. Dati ben de a bigin noso na „Alfa”. Te ala sani kon tru precies soleki fa Gado abi na prakseri èn den pkin fu Adam nanga Eva di e gi yesi na En kon lai na grontapu èn den meki grontapu tron wan paradijs, dan dati o de na „Omega”. Baka di Yehovah meki „hemel, grontapu, nanga ala den sani na hemel èn na grontapu”, dan a taki wan sani fu sori taki a o du trutru san a abi na prakseri. Wi kan leisi dati na ini Genesis 2:1-3. (Leisi en.) Yehovah ben taki dati a di fu seibi dei na wan santa dei. San dati wani taki? Disi wani taki dati ala sani di a abi na prakseri gi libisma nanga  grontapu, o kon tru na a kaba fu a di fu seibi dei.

15. Fu san ede a ben kan gersi leki Satan tapu Gado fu du san a abi na prakseri gi libisma?

¹⁵ Baka di Adam nanga Eva opo densrefi teige Gado, den tron sondusma èn na so den meki taki den pkin fu den kisi sondu èn taki den e dede (Rom. 5:12). Dati meki a ben kan gersi leki Satan tapu Gado fu du san a abi na prakseri fu meki grontapu kon furu nanga libisma di no abi sondu èn di e gi yesi na Gado. A ben kan gersi leki Satan meki taki Yehovah no ben o man taki „Omega” moro. Kande Satan prakseri taki Yehovah no ben abi nowan fasi moro fu du san a pramisi. Kande a denki taki Gado ben o kiri Adam nanga Eva èn taki a ben o meki wan tra man nanga uma di no abi sondu fu du san a abi na prakseri gi libisma. Ma efu Gado ben o du dati, dan Didibri ben o taki dati Gado na wan leiman. Fu san ede? Fu di, soleki fa skrifi na Genesis 1:28, Yehovah ben taigi Adam nanga Eva taki den pkin fu den ben o kon lai na grontapu.

16. Fu san ede Satan ben kan prakseri taki a ben o man taki dati Yehovah no man meki a pramisi fu en kon tru?

¹⁶ San na wan tra sani di Satan ben kan prakseri taki Gado ben o du? Kande Satan ben denki taki Yehovah ben o meki Adam nanga Eva kisi pkin di abi sondu, èn taki den pkin dati noiti no ben o bun dorodoro. Den ben o tan abi sondu fu ala ten (Preik. 7:20; Rom. 3:23). Efu den pkin fu Adam nanga Eva ben o tan abi sondu, dan Didibri ben o man taki dati Yehovah no ben man meki a pramisi fu en kon tru. Grontapu no ben o lai nanga libisma di no abi sondu.

17. Fa Yehovah lusu a tori di Satan nanga den fosi libisma opo densrefi teige en, èn san o psa te fu kba? (Luku a prenki.)

¹⁷ Satan noiti no ben kan sabi san Yehovah ben o du. Di Satan, nanga den fosi tu libisma opo densrefi teige Yehovah, dan Yehovah ben sabi san na a moro bun fasi fu lusu a problema dati (Ps. 92:5). Yehovah meki Adam nanga Eva kisi pkin èn na so den wortu fu en kon tru. A no de wan leiman. Èn Yehovah sori taki efu a taki dati a o du wan sani, dan noti kan tapu en fu du dati. Yehovah meki a pramisi fu en kon tru, di a sorgu taki wan  „pikin” kon fu ferlusu den bakapkin fu Adam nanga Eva di ben o gi yesi na Gado (Gen. 3:15; 22:18). A pkin disi ben o gi en libi leki wan lusu-paiman fu ferlusu libisma. Satan no ben ferwakti kwetkweti taki Yehovah ben o du disi! Fu san ede? Fu di a lusu-paiman na wan seti di e sori taki Yehovah lobi libisma trutru èn taki a no e denki ensrefi nomo (Mat. 20:28; Yoh. 3:16). Satan no abi a fasi disi, a no lobi sma èn a e denki ensrefi nomo. Sobun, san o pasa fu di Yehovah seti wan lusu-paiman? Na a kaba fu a 1000 yari tiri fu Krestes, den pkin fu Adam nanga Eva di gi yesi na Gado èn di no abi sondu moro, o libi na ini wan paradijs na grontapu soleki fa Yehovah ben abi na prakseri sensi a bigin. Na a ten dati, Yehovah o taki „Omega”.

18. Sortu dri sani Gado taki fu sori taki wi kan bribi en? (Luku a faki „ Dri reide fu bribi a pramisi fu Yehovah”.)

¹⁸ Na ini na artikel disi wi luku wan tu sani di e sori taki wi kan bribi trutru taki grontapu o tron wan Paradijs. San wi kan ferteri trawan di e tweifri taki disi o pasa trutru? A fosi sani, na taki Yehovah srefi pramisi en. A buku Openbaring e taki: „A sma di ben e sidon na tapu a kownusturu taki: ’Luku, mi e meki ala sani kon nyun.’” Na en abi a koni nanga a makti fu meki en pramisi kon tru, èn a e angri fu du dati tu. A di fu tu sani, na taki Yehovah sabi taki den sani di a taki o pasa trutru. Dati meki a taki: „Den wortu disi tru èn sma kan bribi den. . . . Den sani disi pasa kaba!” A di fu dri sani, na taki te Yehovah e bigin nanga wan sani, dan a e klari en tu. Dati meki a taki: „Mi na a Alfa nanga na Omega.” Yehovah o sori taki Satan na wan leiman èn taki a no man tapu Yehovah fu du san a abi na prakseri.

19. Te sma e feni en muilek fu bribi taki Gado pramisi wan Paradijs, dan san yu kan du?

¹⁹ Hori na prakseri taki ibri leisi te yu e fruteri sma taki den pramisi fu Gado o kon tru, dan yu e tranga yu eigi bribi na ini en. Sobun, wan tra leisi te yu o leisi a moi pramisi fu a Paradijs di o kon na ini Openbaring 21:4, èn wan sma taigi yu: ’Den sani disi moi, ma mi no e bribi taki den o kon tru’, dan san yu kan du? Yu kan leisi èn ferklari vers 5 nanga 6 gi en. Sori en fa Yehovah poti en handtekening fu gi wi a dyaranti taki den sani di a pramisi o kon tru.​—Yes. 65:16.