1-2. Fu san ede wi kan feni taki Yehovah no e piki den begi fu wi?

 „PRISIRI pasa marki nanga Yehovah, dan a o gi yu san yu ati wani” (Ps. 37:4). Dati na wan heri moi pramisi. Ma wi musu ferwakti taki Yehovah o gi wi iniwan sani di wi aksi en wantewante? Fu san ede na aksi disi na wan bun aksi? Luku den eksempre di e kon now. Wan s’sa di no trow e begi Gado efu a kan kisi a kari fu go na a Skoro gi Kownukondre preikiman. Ma wan tu yari e pasa èn a no kisi wan kari ete. Wan yongu brada di abi wan seryusu siki e aksi Yehovah fu meki a kon betre baka so taki a kan du moro na ini a gemeente. Ma a situwâsi fu en no e kenki. Kresten papa nanga mama e begi taki den pkin fu den tan na ini waarheid. Ma toch wan pkin fu den e tapu fu anbegi Yehovah.

² Kande yu aksi Yehovah wan sani tu, ma yu no kisi a sani dati. Sobun, yu ben kan denki taki Yehovah e piki den begi fu tra sma, ma a no e piki di fu yu. Noso kande yu feni taki yu du wan sani di no bun. Na so wan s’sa di nen Janice b ben e firi. En nanga en masra ben e begi Yehovah fu di den ben e angri fu go dini na Betel. A e taki: „Mi ben de seiker taki wi ben o de na Betel heri esi.” Ma furu yari baka dati, a trowpaar disi no ben kisi wan kari ete fu go dini na Betel. Janice e taki: „Mi ben e sari èn mi no ben sabi san fu denki. Mi ben e aksi misrefi efu mi ben du wan sani di Yehovah no feni bun. Mi ben begi en so  furu fu go na Betel. Fu san ede a no ben piki a begi fu mi?

3. San wi o luku na ini na artikel disi?

³ Son leisi, wi kan aksi wisrefi efu Yehovah e arki den begi fu wi. Srefi wan tu getrow man di ben e libi langa ten pasa, ben aksi densrefi a sani dati (Yob 30:20; Ps. 22:2; Hab. 1:2). San kan yepi yu fu bribi taki Yehovah o poti prakseri na den begi fu yu? (Ps. 65:2) Fu kisi piki tapu na aksi dati, wi musu piki den aksi disi fosi: (1) San wi kan ferwakti fu Yehovah? (2) San Yehovah e ferwakti fu wi? (3) Fu san ede a kan de fanowdu taki wi begi fu wan tra sani?

4. Soleki fa Yeremia 29:12 e sori, dan san Yehovah pramisi taki a o du?

⁴ Yehovah e pramisi taki a o arki den begi fu wi. (Leisi Yeremia 29:12.) A Gado fu wi lobi den getrow anbegiman fu en èn dati meki ala ten a o poti prakseri na den begi fu wi (Ps. 10:17; 37:28). Ma disi no wani taki dati a o gi wi ala san wi e aksi en. Kande wi o abi fu wakti teleki a nyun grontapu kon, fosi wi e kisi wan tu fu den sani di wi aksi en.

5. San Yehovah e luku te a e arki den begi fu wi? Ferklari dati.

⁵ Yehovah e luku fa den sani di wi e aksi en e kruderi nanga a wani fu en (Yes. 55:8, 9). Wan fu den sani di Yehovah abi na prakseri fu du, na taki a wani grontapu fu kon lai nanga sma di e prisiri fu anbegi en leki den Tiriman. Ma Satan taki dati a ben o moro bun te libisma e tiri densrefi (Gen. 3:1-5). Fu sori taki Didibri e lei, dan Yehovah gi pasi taki libisma tiri densrefi. Toch a tiri fu libisma meki taki problema lai na grontapu tide na a dei (Preik. 8:9). Wi e ferstan taki Yehovah no o puru ala den problema disi na a srefi ten. Efu a ben o du dati, dan son sma ben kan denki taki a tiri fu libisma e wroko èn taki den man lusu den problema na grontapu.

6. Fu san ede wi musu abi a fertrow taki Yehovah ala ten o du sani nanga lobi èn na wan reti fasi?

⁶ Te sma e begi fu den srefi sortu sani, dan Yehovah kan piki den begi dati na difrenti fasi. Fu eksempre, di Kownu Heskia ben e siki seryusu, dan a begi Yehovah fu meki a kon betre baka. Yehovah du san a aksi (2 Kow. 20:1-6). Ma di na apostel Paulus begi Yehovah fu puru a ’maka na ini en skin’ di ben kan de wan problema nanga en gosontu, dan Yehovah no du dati (2 Kor. 12:7-9). Luku sosrefi na eksempre fu den apostel Yakobus nanga Petrus. Kownu Herodes ben wani kiri den ala tu. A gemeente begi gi Petrus èn a musu de taki den begi tu gi Yakobus. Ma sma kiri Yakobus, aladi wan engel kibri a libi fu Petrus (Tori 12:1-11). Wi ben kan aksi wisrefi: ’Fu san ede Yehovah no kibri a libi fu Yakobus, ma a kibri a libi fu Petrus?’ Bijbel no e taki fu san ede. c Ma wi kan de seiker taki ’ala ten Yehovah e du san reti’ (Deut. 32:4). Èn wi sabi taki Yehovah ben feni Yakobus nanga Petrus bun (Openb. 21:14). A kan taki son leisi Yehovah no e piki den begi fu wi na a fasi di wi ben ferwakti. Ma fu di wi abi a fertrow taki ala ten Yehovah o piki den begi fu wi nanga lobi èn na wan reti fasi, meki wi no e krutu a fasi fa a e bosroiti fu piki den begi fu wi.​—Yob 33:13.

7. San wi no musu du, èn fu san ede?

 ⁷ Wi e pruberi fu no teki a situwâsi fu wi gersi nanga a di fu trawan. Fu eksempre, wi ben kan aksi Yehovah fu yepi wi na wan spesrutu fasi, ma toku a no e piki a begi fu wi. Baka ten wi e kon sabi taki wan tra sma aksi Yehovah wan srefi sortu sani èn Yehovah piki a begi fu a sma dati. Wan s’sa di nen Anna ben ondrofeni a sani dati. Fu di Matthew, a masra fu en, ben abi kanker, meki a s’sa disi begi Yehovah fu meki a kon betre baka. Na a srefi ten dati, tu owru Kresten s’sa ben abi kanker tu. Anna begi fayafaya gi Matthew èn gi den tu s’sa. Den s’sa kon betre baka, ma Matthew dede. Na a bigin Anna ben aksi ensrefi: ’Efu den s’sa kon betre fu di Yehovah yepi den, dan fu san ede a no meki Matthew kon betre?’ A no de fu taki dati wi no sabi san meki taki den tu s’sa kon betre baka. San wi sabi, na taki Yehovah o tyari wan kaba kon fu ala ten na ala pina nanga problema, èn taki a e angri fu gi den mati fu en di dede wan opobaka.​—Yob 14:15.

8. (a) Soleki fa Yesaya 43:2 e sori, dan fa Yehovah e horbaka gi wi? (b) Fa begi kan yepi wi te wi e kisi muilek tesi? (Luku sosrefi a felem Begi e yepi wi na ini muilek ten.)

⁸ Yehovah o horbaka gi wi ala ten. Fu di Yehovah na wi lobi-ati Papa, meki a no wani taki wi e pina (Yes. 63:9). Toch a no e kibri wi gi ala den tesi fu wi di de leki nanga liba noso faya. (Leisi Yesaya 43:2.) Ma a e pramisi wi taki a o yepi wi fu „pasa” den tesi dati. Èn awinsi sortu tesi e miti wi now, wi o sorgu taki wi e tan dini Yehovah. Wan tra sani di Yehovah e gi wi fu yepi wi fu hordoro, na en makti santa yeye (Luk. 11:13; Fil. 4:13). Na so wi kan de seiker taki ala ten a o gi wi soifri san wi abi fanowdu fu man hordoro èn fu man tan dini en getrow. d

9. Soleki fa Yakobus 1:6, 7 e sori, dan fu san ede wi musu abi a fertrow taki Yehovah o yepi wi?

⁹ Yehovah e ferwakti taki wi e fertrow na en tapu (Hebr. 11:6). Son leisi a kan gersi leki den tesi fu wi hebi tumusi. Kande wi e bigin tweifri srefi efu Yehovah o yepi wi. Ma Bijbel e gi wi a dyaranti taki Gado kan gi wi a krakti fu „kren wan skotu” (Ps. 18:29). Sobun, na presi fu tweifri, wi musu begi Yehovah nanga ala fertrow taki a o piki den begi fu wi.​—Leisi Yakobus 1:6, 7.

10. Ferteri fa wi srefi kan meki muiti te wi begi Yehovah fu yepi wi.

¹⁰ Yehovah e ferwakti taki wi srefi e meki muiti tu. Fu eksempre, wan brada ben kan aksi Yehovah fu yepi en fu kisi vrij fu wroko so taki a kan go na wan kongres. Fa Yehovah kan piki a begi dati? Kande a e gi a brada a deki-ati di a abi fanowdu fu go na a baas fu en. Ma a brada o abi fu aksi a baas primisi. Kande a o abi fu aksi en difrenti leisi. Kande a musu kenki wroko yuru srefi nanga wan tra wrokoman. Èn efu a de fanowdu, kande a o abi fu teki vrij sondro fu kisi pai gi den dei dati.

11. Fu san ede wi musu tan begi Yehovah fu den sani di prenspari gi wi?

¹¹ Yehovah e ferwakti taki wi e tan begi en fu den sani di prenspari gi wi (1 Tes. 5:17). Yesus ben taki dati Yehovah no o piki wan tu fu den begi fu wi wantewante  (Luk. 11:9). Sobun, no gi abra. Begi fayafaya ibri tron baka (Luk. 18:1-7). Te wi e tan begi Yehovah fu wan sani, dan wi e sori en taki a sani dati prenspari trutru gi wi. Wi e sori tu taki wi e bribi taki a man yepi wi.

12. (a) Te a abi fu du nanga den begi fu wi, dan san na wán sani di wi musu aksi wisrefi, èn fu san ede? (b) Fa wi kan de seiker taki den begi fu wi e sori taki wi abi lespeki gi Yehovah? (Luku a faki „ Den begi fu mi e sori taki mi e lespeki Yehovah?”)

¹² Efu Yehovah no e piki a begi fu wi, dan wi kan aksi wisrefi dri sani. A fosiwan na: ’Mi e begi gi a yoisti sani?’ Nofo tron wi e denki taki wi sabi san bun gi wi. Ma kande den sani di wi e aksi Yehovah no o tyari wini kon gi wi te fu kaba. Efu wi e begi Yehovah fu yepi wi nanga wan problema, dan a kan taki Yehovah sabi wan moro bun fasi fa fu lusu a problema. Èn son sani di wi e aksi Yehovah kande no e kruderi nanga a wani fu en (1 Yoh. 5:14). Luku na eksempre fu den papa nanga mama di aksi Yehovah fu yepi a pkin fu den fu tan na ini waarheid. A no fowtu fu begi gi so wan sani. Toch a de so taki Yehovah no e dwengi nowan sma fu anbegi en. A wani taki wi alamala, sosrefi den pkin fu wi, musu bosroiti srefi fu anbegi en (Deut. 10:12, 13; 30:19, 20). Dati meki a moro bun efu den papa nanga mama e aksi Yehovah fu yepi den fu doro na ati fu a pkin fu den, so taki a pkin o du muiti fu lobi Yehovah èn fu tron wan mati fu en.​—Odo 22:6; Ef. 6:4.

13. Soleki fa Hebrewsma 4:16 e sori, dan o ten Yehovah o yepi wi? Ferklari dati.

¹³ A di fu tu sani di wi kan aksi wisrefi  na disi: ’Disi na a yoisti ten gi Yehovah fu du san mi aksi en?’ Kande wi feni taki wi musu kisi piki wantewante tapu a begi fu wi. Ma fu taki en leti, Yehovah sabi san na a moro bun ten fu yepi wi. (Leisi Hebrewsma 4:16.) Te wi no e kisi wantewante san wi aksi Yehovah, dan kande wi o denki taki Yehovah no wani yepi wi. Ma a kan tu taki a feni taki a ten no doro ete fu yepi wi. Prakseri a yongu brada baka di ben begi fu kon betre fu a siki fu en. Efu Yehovah ben du wan wondru fu dresi en, dan Satan ben kan taki dati a brada tan dini Yehovah soso fu di Yehovah dresi en (Yob 1:9-11; 2:4). Boiti dati, Yehovah poti wan ten kaba te a o dresi ala siki (Yes. 33:24; Openb. 21:3, 4). Fosi a ten dati doro, wi no kan ferwakti taki Yehovah o du wondru fu dresi siki sma. Sobun, a brada ben kan aksi Yehovah fu gi en a krakti nanga wan korostu firi fu man hordoro èn fu tan dini en nanga en heri ati.​—Ps. 29:11.

14. San yu e leri fu na ondrofenitori fu Janice?

¹⁴ Memre Janice di ben begi fu kan dini na Betel. Feifi yari pasa fosi a kon ferstan fa Yehovah ben piki a begi fu en. A e taki: „Yehovah gebroiki a ten dati fu leri mi furu sani èn fu yepi mi fu tron wan moro bun Kresten. Mi ben musu leri fu fertrow moro na en tapu. Mi ben musu studeri moro bun. Èn mi ben musu leri taki mi kan de nanga prisiri awinsi pe mi e dini Yehovah.” Bakaten, Janice nanga en masra kisi a kari fu du a kringwroko. Janice e taki: „Te yu luku en bun, dan Yehovah piki den begi fu mi trutru, aladi a no du dati na a fasi fa mi ben ferwakti. A teki pikinso ten fosi mi kon ferstan taki a fasi fa Yehovah piki a begi fu mi  ben de wan blesi trutru. Mi breiti so te taki mi kisi na okasi fu firi a lobi nanga a switifasi fu Yehovah.”

15. Fu san ede wi no musu taigi Yehovah fa wi wani taki a piki a begi fu wi? (Luku den prenki.)

¹⁵ A di fu dri sani di wi ben kan aksi na: ’Mi musu begi gi wan tra sani?’ A bun fu taigi Yehovah krin na ini begi taki wi abi a yepi fu en fanowdu. Ma son leisi a moro bun fu no taigi Yehovah fa wi wani taki a piki a begi fu wi. Na so wi kan kon sabi san a abi na prakseri gi wi. Luku na eksempre fu a s’sa di no trow èn di e begi Yehovah fu yepi en so taki a kan go na a Skoro gi Kownukondre preikiman. A wani go na a skoro so taki a kan dini na ini wan kontren pe moro preikiman de fanowdu. Sobun, aladi a e begi fu man kisi wan kari fu go na a skoro, a kan aksi Yehovah tu fu yepi en fu kon si na sortu tra fasi a kan du moro na ini a diniwroko (Tori 16:9, 10). Baka te a begi fu a sani disi, dan a kan aksi a kring-owruman efu wan gemeente krosibei abi moro preikiman fanowdu. Noso a kan skrifi go na a bijkantoro fu aksi den efu wan kontren de pe moro Kownukondre preikiman de fanowdu. e

16. Fu san wi kan de seiker?

¹⁶ Soleki fa wi si, wi kan de seiker taki Yehovah o piki den begi fu wi nanga lobi èn na wan reti fasi (Ps. 4:3; Yes. 30:18). A kan pasa son leisi taki Yehovah no piki den begi fu wi na a fasi fa wi e ferwakti dati. Ma Yehovah o poti prakseri na den begi fu wi ala ten. A lobi wi trutru. Èn a no o drai baka gi wi noiti (Ps. 9:10). Sobun, tan „frutrow tapu [en] ala ten” èn ferteri en ala san de na tapu yu ati.​—Ps. 62:8.