1. Fa na apostel Paulus ben e si dinari ini a diniwroko?

 DINARI ini a diniwroko e du prenspari wroko na ini den gemeente. A de krin taki na apostel Paulus ben e warderi den getrow brada disi. Fu eksempre, di a ben skrifi den Kresten na ini Filipi, dan a taki spesrutu den dinari ini a diniwroko odi èn sosrefi den owruman.​—Fil. 1:1.

2. Fa wan brada di nen Luis feni en fu de wan dinari ini a diniwroko?

² Furu dopu brada, awinsi den yongu noso owru, e prisiri fu de dinari ini a diniwroko. Fu eksempre, Devan ben abi 18 yari di a tron wan dinari ini a diniwroko. Ma wan tra brada di nen Luis, tron dinari ini a diniwroko di a ben psa 50 yari. A e taki: „Mi e si en leki wan grani taki mi mag dini leki dinari ini a diniwroko, spesrutu te mi e prakseri fa den brada nanga sisa na ini a gemeente e sori so furu lobi gi mi.” Na so furu dinari ini a diniwroko e firi.

3. Sortu aksi wi o luku?

³ Efu yu na wan dopu brada èn yu no e dini ete leki dinari ini a diniwroko, dan yu denki taki yu man poti dati leki marki? San kan yepi yu fu du dati? Èn sortu marki Bijbel e taki dati yu musu doro fu man tron wan dinari ini a diniwroko? Na ini na artikel disi wi o luku den piki tapu den aksi disi. Ma meki wi go luku fosi sortu wroko wan dinari ini a diniwroko e du.

SORTU WROKO WAN DINARI INI A DINIWROKO E DU?

4. Sortu wroko wan dinari ini a diniwroko e du? (Luku a prenki.)

⁴ Wan dinari ini a diniwroko na wan dopu brada di poti na wroko nanga yepi fu santa yeye fu yepi den owruman.  Den e du furu prenspari sani na ini a gemeente. Son dinari ini a diniwroko e sorgu taki den preikiman abi nofo gebied nanga buku gi a preikiwroko. Trawan e yepi fu krin a Kownukondre zaal èn fu hori en bun. Dinari ini a diniwroko e sori sma pe den kan sdon na den gemeente konmakandra èn den e sorgu gi audio nanga video. Ma san moro prenspari, na taki den brada disi lobi Yehovah èn den e libi na wan fasi di Gado feni bun. Boiti dati, den lobi den Kresten brada nanga sisa nanga den heri ati (Mat. 22:37-39). San wan dopu brada kan du fu tron wan dinari ini a diniwroko?

5. San wan brada kan du fu tron wan dinari ini a diniwroko?

⁵ Bijbel e sori sortu marki wan brada musu doro fu man tron wan dinari ini a diniwroko (1 Tim. 3:8-10, 12, 13). Efu yu wani tron wan dinari ini a diniwroko, dan kon sabi san na den marki disi èn ondrosuku den moro fini. Baka dati, du tranga muiti fu doro den. Ma yu musu aksi yusrefi fosi fu san ede yu wani tron wan dinari ini a diniwroko.

FU SAN EDE YU WANI TRON WAN DINARI INI A DINIWROKO?

6. San musu de a reide fu san ede yu wani dini yu brada nanga sisa? (Mateyus 20:28; luku na tapu a kafti.)

⁶ Prakseri Yesus, a moro bun eksempre fu wi. Ala sani di a ben e du, na fu di a lobi en P’pa èn fu di a lobi sma. Dati meki a ben e wroko tranga èn a ben e du sani gi trawan di son sma ben e si leki lagi wroko (Leisi Mateyus 20:28; Yoh. 13:5, 14, 15). Efu yu wani yepi yu brada nanga sisa fu di yu lobi den, dan Yehovah o blesi yu èn a o yepi yu fu doro den marki fu man dini leki dinari ini a diniwroko.​—1 Kor. 16:14; 1 Petr. 5:5.

7. Fu san ede a no bun te wan brada wani tron wan dinari ini a diniwroko, soso fu di a wani taki trawan prèise en?

⁷ Na ini a grontapu disi, furu sma lobi den wan di e pruberi fu sori taki den man du sani moro bun leki ala tra sma. Ma a pipel fu Yehovah no de so. Wan brada di lobi trawan neleki fa Yesus ben lobi sma, no wani basi trawan èn a no wani du leki a prenspari moro trawan. Efu wan sma di e du leki a prenspari moro trawan e kisi  frantwortu na ini a gemeente, dan a kan taki a no o wani du son wroko di musu du fu man sorgu gi den warti skapu fu Yehovah. Kande a o feni taki a prenspari tumsi fu du den sortu wroko dati (Yoh. 10:12). Yehovah no o blesi wan sma di e du sani soso fu di a e denki taki a prenspari moro trawan.​—1 Kor. 10:24, 33; 13:4, 5.

8. Sortu rai Yesus ben gi den apostel fu en?

⁸ Son leisi, srefi den moro bun mati fu Yesus ben wani kisi son grani, ma a denki fu den no ben bun. Luku san ben psa nanga Yakobus nanga Yohanes, tu fu den apostel fu Yesus. Den ben aksi Yesus fu gi den wan prenspari posisi na ini a Kownukondre fu en. Yesus no prèise den gi a sani di den ben aksi en. Na presi fu dati, a taigi ala den 12 apostel: „Efu wan sma wani de wan bigiwan na un mindri, dan a musu de un dinari. Efu wan sma wani de a fosiwan na un mindri, dan a musu de srafu fu un alamala” (Mark. 10:35-37, 43, 44). Brada di wani tron dinari ini a diniwroko fu di den wani dini trawan, abi a yoisti denki èn den o de wan blesi gi a gemeente.​—1 Tes. 2:8.

SAN KAN YEPI YU FU KISI NA ANGRI FU DINI YU BRADA NANGA SISA?

9. Fa yu kan kisi na angri fu dini yu brada nanga sisa?

⁹ A no de fu taki dati yu lobi Yehovah èn taki yu wani dini trawan. Ma tòg a kan taki yu no abi na angri fu du a wroko di wan dinari ini a diniwroko e du. San kan yepi yu fu kisi na angri fu du a wroko disi? Prakseri fa a o gi yu prisiri fu du sani gi yu brada nanga sisa. Yesus ben taki: „Wan sma o de moro koloku te a e gi sani, leki te a e kisi sani” (Tori 20:35). Na dati en srefi ben e du. A ben e prisiri srefsrefi fu di a ben e dini trawan, èn yu o prisiri tu.

10. Fa Yesus sori taki a ben lobi fu dini trawan? (Markus 6:31-34)

¹⁰ Luku wan eksempre di e sori taki Yesus ben lobi fu dini trawan. (Leisi Markus 6:31-34.) Wan leisi, Yesus nanga den apostel fu en ben weri. Den ben e go na wan presi pe den ben kan de den w’wan èn pe den ben kan rostu pkinso. Ma wan grupu sma doro drape fosi den èn den ben howpu taki Yesus ben o gi den leri. Yesus ben kan taki ’no’, fu di en nanga den apostel fu en „no ben abi ten fu nyan”. Noso Yesus ben kan leri den sma wan tu sani nomo èn seni den gwe baka dati. Ma fu di a ben abi lobi, meki a „bigin leri den furu sani”. Èn a tan gi den leri teleki „a ben kon lati kba” (Mark. 6:35). A no du dati fu di a ben musu, ma fu di „a ben sari den”. A ben wani gi den leri fu di a ben lobi den. A ben e gi Yesus furu prisiri fu dini trawan.

11. San Yesus du fu yepi den disipel fu en? (Luku a prenki.)

¹¹ Di Yesus ben e poti prakseri na den sma, dan a du moro leki fu gi den leri nomo. A gi den tu san den ben abi fanowdu. A du wan wondru fu sorgu taki den abi n’nyan èn baka dati, den disipel fu en prati a n’nyan (Mark. 6:41). Na so a leri den disipel fu en fa fu dini trawan. A sori den tu taki a wroko di den ben e du fu yepi trawan, na wan prenspari wroko. Na den srefi sortu wroko disi dinari ini a diniwroko e du. Prakseri fa den apostel ben breiti taki den ben man wroko makandra nanga Yesus fu gi a pipel n’nyan teleki „ala den sma nyan den bere furu” (Mark. 6:42). A no de fu taki dati disi no ben de a wan-enkri leisi di Yesus ben broko en ede moro nanga trawan leki nanga ensrefi. A du dati en heri libi langa di a ben de na grontapu (Mat. 4:23; 8:16). Yesus ben breiti srefsrefi fu gi sma leri èn fu gi den san den  ben abi fanowdu. A no de fu taki dati yu o prisiri tu te yu de klarklari fu dini trawan leki dinari ini a diniwroko.

12. Fu san ede nowan fu wi musu denki taki wi abi spesrutu koni fanowdu fu man yepi a gemeente?

¹² Efu yu feni taki yu no abi spesrutu koni, dan no las’ati. A musu fu de so taki yu man du son sani fu yepi a gemeente. Prakseri san Paulus ben taki na 1 Korentesma 12:12-30, èn baka dati aksi Yehovah fu yepi yu fu kon si san den vers disi e leri yu. Den wortu fu Paulus e sori krin taki yu prenspari gi a gemeente, neleki ibri tra futuboi fu Yehovah. Efu yu no doro den marki ete fu man dini leki dinari ini a diniwroko, dan no las’ati. Na presi fu dati, du san yu man du fu dini Yehovah èn fu yepi den brada nanga sisa fu yu. Yu kan de seiker taki den owruman o poti prakseri na yu èn taki den o gi yu wroko di yu man du.​—Rom. 12:4-8.

13. Fu san ede a no muilek fu doro den marki fu man tron wan dinari ini a diniwroko?

¹³ Luku ete wan reide fu san ede yu musu du muiti fu doro den marki fu man tron wan dinari ini a diniwroko: Furu fu den marki dati na sani di ala Kresten musu du. Fu taki en leti, ala Kresten musu tron bun mati fu Yehovah, den musu lobi fu gi sma sani, èn den musu libi na wan fasi di Gado feni bun. Ma san wan brada kan du fu man tron wan dinari ini a diniwroko?

SAN YU KAN DU FU TRON WAN DINARI INI A DINIWROKO

14. San a wani taki fu „de seryusu”? (1 Timoteyus 3:8-10, 12)

¹⁴ Meki wi go luku sonwan fu den marki di wan brada musu doro, soleki fa a skrifi na 1 Timoteyus 3:8-10, 12. (Leisi en.) Wan dinari ini a diniwroko musu „de seryusu”. Dati wani taki dati „sma musu man lespeki en”. Disi no wani taki dati yu no mag lafu noiti noso taki yu no mag abi prisiri (Preik. 3:1, 4). Ma a wani taki dati yu musu wroko tranga fu tyari ala den frantwortu fu yu. Efu ala ten yu e klari a wroko di yu kisi fu du èn efu yu e du en bun, dan den brada nanga sisa na ini a gemeente o sabi taki den kan fertrow yu èn den o lespeki yu.

15. San a wani taki fu ’no hoigri’ èn fu ’no gridi fu feni wini na wan fasi di no fiti’?

¹⁵ Dinari ini a diniwroko „no musu hoigri”. Dati wani taki dati den no e bedrigi trawan, den de eerlijk, èn den de fu  fertrow. Den e du san den pramisi trawan èn den no e kori trawan (Odo 3:32). Dinari ini a diniwroko „no musu gridi fu feni wini na wan fasi di no fiti”. Dati wani taki dati den de eerlijk te den e du bisnis nanga trawan èn te den musu tyari frantwortu fu a moni di brada nanga sisa e gi leki bijdrage ini a gemeente. Yu no o suku fu meki moni tapu den brada nanga sisa fu yu na ini a gemeente.

16. (a) San a wani taki fu ’no lobi dringi tumusi furu win’? (b) San a wani taki fu abi „wan krin konsensi”?

¹⁶ Dinari ini a diniwroko „no musu lobi dringi tumusi furu win”. Disi wani taki dati den no musu dringi sopi psa marki èn sma no musu sabi den leki wan sma di e dringi furu. Fu abi „wan krin konsensi”, wani taki dati yu e hori yusrefi na den wet fu Yehovah. Aladi yu e meki fowtu, tòg yu abi wan korostu firi fu di yu na wan mati fu Yehovah.

17. Fa wan brada kan sori taki a „bun nofo fu du a wroko”? (1 Timoteyus 3:10; luku a prenki.)

¹⁷ Te yu sori taki yu „bun nofo fu du a wroko”, dan dati wani taki dati den owruman man si kba taki yu man tyari frantwortu bun èn taki den kan fertrow na yu tapu. Dati meki te den owruman e gi yu wan wroko, dan sorgu taki yu e du en na a fasi fa den taigi yu èn na a fasi fa na organisâsi besroiti fu du sani. Sorgu taki yu e ferstan krin san yu musu du èn o ten yu musu klari a wroko. Te yu e du yu wroko fayafaya, dan den brada nanga sisa na ini a gemeente o si taki yu e go na fesi èn den o breiti nanga yu. Owruman, sorgu taki unu e train dopu brada. (Leisi 1 Timoteyus 3:10.) Yu gemeente abi dopu brada di abi sowan 10 te go miti 14 yari? Den abi a gwenti fu studeri èn fu sreka bun gi den konmakandra? Den abi a gwenti fu gi piki na den konmakandra èn fu teki prati na a preikiwroko? Efu dati de so, dan gi den wroko di fiti a yari nanga a situwâsi fu den. Na so den yongu brada disi kan sori efu den „bun nofo fu du a wroko”. Èn te den abi sowan 15 te go miti 19 yari, den o de srekasreka kba fu tron dinari ini a diniwroko.

18. San a wani taki dati „nowan fowtu de fu feni na [yu] tapu”?

¹⁸ Te „nowan fowtu de fu feni na [yu] tapu”, dan dati wani taki dati nowan sma kan krutu yu taki yu du wan sani di no bun kwetkweti. A no de fu taki dati sma kan  ferteri lei fu wi leki Kresten. Sma ben lei gi Yesus èn a ben taki dati sma ben o du a srefi nanga den bakaman fu en (Yoh. 15:20). Ma efu yu e tan tyari yusrefi na a yoisti fasi, neleki fa Yesus ben du dati, dan yu o kon abi wan bun nen na ini a gemeente.​—Mat. 11:19.

19. San a wani taki dati „dinari ini a diniwroko musu de masra fu wán wefi nomo”?

¹⁹ Yu musu de wan „masra fu wán wefi nomo”. Efu yu trow, dan yu musu hori yusrefi na den wet di Yehovah seti biginbigin gi a trowlibi. Yehovah taki dati wán man mag trow nanga wán uma nomo (Mat. 19:3-9). Wan Kresten man noiti musu du hurudu (Hebr. 13:4). Ma dati a no ala. A musu tan getrow na a wefi fu en. Dati wani taki dati a no mag kisi lobi firi noiti gi tra uma.​—Yob 31:1.

20. Fa wan brada e ’tiri den pkin nanga na osofamiri fu en na wan bun fasi’?

²⁰ „Den musu tiri den pikin nanga na osofamiri fu den na wan bun fasi.” Efu yu na wan osofamiri-edeman, dan yu musu si den frantwortu fu yu leki wan seryusu sani. Studeri ibri wiki nanga yu osofamiri. Go na ini a preikiwroko nanga ibri sma fu yu osofamiri èn du dati so furu leki yu man. Yepi den pkin fu yu fu kon abi den eigi matifasi nanga Yehovah (Ef. 6:4). Wan man di e sorgu gi en osofamiri e sori taki a man sorgu gi a gemeente.​—Luku 1 Timoteyus 3:5.

21. Efu yu no e dini ete leki dinari ini a diniwroko, dan san yu kan du?

²¹ Brada, efu unu no e dini ete leki dinari ini a diniwroko, dan grantangi leisi na artikel disi bun èn begi Yehovah fu yepi yu. Ondrosuku den marki di yu musu doro fu man tron wan dinari ini a diniwroko èn du tranga muiti fu doro den marki dati. Prakseri a lobi di yu abi gi Yehovah èn gi yu brada nanga sisa. Kon abi moro lobi gi den brada nanga sisa èn prakseri fu san ede yu wani dini den (1 Petr. 4:8, 10). Du muiti fu tron wan dinari ini a diniwroko, dan yu o de koloku fu di yu o dini yu brada nanga sisa na ini a gemeente. Meki Yehovah blesi a muiti di yu e du fu du moro gi en leki dinari ini a diniwroko.​—Fil. 2:13.