1-2. Sortu „bun wroko” wan owruman e du?

 EFU yu e dini leki dinari ini a diniwroko, dan seiker yu e du tranga muiti fu doro den marki fu man tron wan owruman. Yu ben o wani dini leki owruman?​—1 Tim. 3:1.

² Sortu wroko wan owruman e du? A e preiki fayafaya makandra nanga a gemeente, a e wroko tranga fu sorgu gi den skapu èn fu gi den leri. Boiti dati, a e tranga a bribi fu den brada nanga sisa nanga yepi fu den sani di a e taki èn e du. Wi kan ferstan fu san ede Bijbel e kari owruman di e wroko tranga „mansma di abi spesrutu koni”.​—Ef. 4:8.

3. Fa wan brada kan tron wan owruman? (1 Timoteyus 3:1-7; Titus 1:5-9)

³ Fa yu kan tron wan owruman? A no soso den sani di wan sma man du e meki taki a man tron wan owruman. Na ini a grontapu disi a de so nofo tron taki te wan sma e suku wan wroko, dan a wrokobasi e luku nomo sortu sani a sma man du. Ma a de tra fasi efu yu wani tron wan owruman. Fu man tron wan owruman, dan a no nofo te yu na wan bun preikiman noso wan bun leriman. Yu musu doro den marki tu di skrifi na 1 Timoteyus 3:1-7 nanga Titus 1:5-9. (Leisi en.) Na artikel disi o poti prakseri na wan tu fu den marki dati. Wi o luku fa wan brada kan kon abi wan bun nen, fa a kan de wan bun osofamiri-edeman, èn san kan yepi en fu dini a gemeente nanga en heri ati.

ABI WAN BUN NEN

4. Fa wan brada kan kon abi wan bun nen?

⁴ Efu yu wani tron wan owruman, dan yu musu „de wan sma di trawan no man feni fowtu na en tapu”. Disi wani taki dati yu abi wan bun nen na ini a gemeente fu di yu e tyari  yusrefi na wan bun fasi. Boiti dati, yu „musu abi wan bun nen na sma na dorosei fu a Kresten gemeente”. Sma di no e dini Yehovah, kan krutu a Kresten bribi fu wi, ma den no musu abi reide fu tweifri taki yu na wan bun sma (Dan. 6:4, 5). Aksi yusrefi: ’Mi abi wan bun nen na den brada nanga sisa na ini a gemeente èn na den sma di no e dini Yehovah?’

5. Fa yu kan sori taki yu na „wan sma di lobi san bun”?

⁵ Efu yu na „wan sma di lobi san bun”, dan yu o si den bun fasi fu trawan èn yu o prèise den gi dati. Yu o prisiri tu fu du bun gi trawan, srefi te sma no e ferwakti dati fu yu (1 Tes. 2:8). Fu san ede a prenspari taki owruman na „sma di lobi san bun”? Te den lobi san bun, dan den o prisiri fu gebroiki den ten fu sorgu gi den brada nanga sisa na ini a gemeente èn fu tyari den frantwortu fu den (1 Petr. 5:1-3). Aladi den abi furu wroko fu du, tòg a e gi den prisiri fu yepi trawan.​—Tori 20:35.

6. San na wan tu fasi fa wan brada kan sori taki a „lobi fu gi sma wan switikon”? (Hebrewsma 13:2, 16; luku a prenki.)

⁶ Yu e sori taki yu „lobi fu gi sma wan switikon”, te yu e du bun sani gi trawan, sosrefi gi den wan di no de yu bun mati (1 Petr. 4:9). Wan buku e taki dati wan man di lobi fu gi trawan wan switikon e sori swit’fasi srefi gi sma di a no sabi èn a breiti fu kari den kon na ini en oso. Aksi yusrefi: ’Mi na wan sma di e sori swit’fasi gi sma di e kon na den konmakandra?’ (Leisi Hebrewsma 13:2, 16.) Wan man di lobi gi sma wan switikon e sori swit’fasi gi ala sma di e kon na ini a gemeente. Fu eksempre, a e sori swit’fasi gi pôtisma, gi brada di e kon hori lezing, èn gi tra sma di e du tranga muiti fu gi den brada nanga sisa dek’ati, soleki kring owruman.​—Gen. 18:2-8; Odo 3:27; Luk. 14:13, 14; Tori 16:15; Rom. 12:13.

7. Fa wan owruman e sori taki a no de „wan sma di lobi moni”?

⁷ No de „wan sma di lobi moni”. Disi wani taki dati moni nanga gudu a no den moro prenspari sani gi yu. Awinsi yu gudu noso pôti, yu e poti Kownukondre afersi na a fosi presi na ini yu libi (Mat. 6:33). Yu e gebroiki yu ten, yu krakti, nanga tra sani fu anbegi Yehovah, fu sorgu gi yu osofamiri, èn fu yepi a gemeente (Mat. 6:24; 1 Yoh. 2:15-17). Aksi yusrefi: ’Fa mi e si moni? Mi de tevrede nanga den sani di mi  abi fanowdu fu man tan na libi? Noso mi e suku nomo fu kon abi moro moni nanga moro gudu?’​—1 Tim. 6:6, 17-19.

8. San na wan tu fasi fa yu kan sori taki yu no e „du sani pasa marki” èn taki yu ’man dwengi yusrefi’?

⁸ Efu yu na wan sma di ’no e du sani psa marki’ èn di ’man dwengi ensrefi’, dan dati wani taki dati ala ten yu e hori na prakseri san fiti èn san no fiti. Fu eksempre, yu no e nyan noso dringi tumsi furu, yu e weri krosi di fiti, yu e seti yu w’wiri netjes, èn yu e teki bun besroiti te a abi fu du nanga prisiriten. Yu no e libi leki den sma fu a grontapu disi di e libi wan yayolibi (Luk. 21:34; Yak. 4:4). Yu no e kisi atibron te trawan e du hati sani nanga yu. Yu a no „wan sopiman”; sma no sabi yu tu leki wan sma di e dringi furu sopi. Aksi yusrefi: ’A fasi fa mi e libi e sori taki mi no e du sani psa marki èn taki mi man dwengi misrefi?’

9. Fa yu kan sori taki yu „de nanga krin frustan” en taki ’yu libi orga bun’?

⁹ Efu yu „de nanga krin frustan”, dan dati wani taki dati yu e teki besroiti nanga yepi fu Bijbel gronprakseri. Fu di yu e denki dipi fu Bijbel gronprakseri, meki yu man ferstan sani moro bun èn yu e teki koni besroiti. Yu no de gaw fu teki besroiti te yu no sabi sani krin. Na presi fu dati, yu e sorgu taki yu e kon sabi sani finfini (Odo 18:13). Na so yu kan teki koni besroiti di e kruderi nanga a fasi fa Yehovah e denki. Efu yu ’libi orga bun’, dan dati wani taki dati yu libi no bruya èn taki yu lobi du sani biten. Sma man fertrow yu èn te den owruman gi yu wan wroko, dan yu e du en soleki fa den taigi yu. Te yu doro den marki di kari kba, dan dati o yepi yu fu kon abi wan bun nen. Now wi o go luku den marki di wan owruman musu doro fu man de wan bun eksempre leki osofamiri-edeman.

DE WAN BUN OSOFAMIRI-EDEMAN

10. Fa wan man kan sori taki a e „tiri en osofamiri na wan bun fasi”?

¹⁰ Efu yu na wan masra èn yu wani tron wan owruman, dan yu osofamiri musu de wan bun eksempre gi trawan. Dus, yu musu „de wan man di e tiri en osofamiri na wan bun fasi”. Sma musu sabi yu leki wan osofamiri-edeman di lobi en osofamiri èn di e teki bun besroiti gi den. Disi wani taki dati yu e hori na osofamiri anbegi, yu e sorgu taki na osofamiri e go na den Kresten konmakandra, èn yu e yepi den fu du a preikiwroko so bun leki den man. Fu san ede disi prenspari so? Na apostel Paulus ben aksi: „Efu wan sma no sabi fa fu tiri en eigi osofamiri, dan fa a o man sorgu a gemeente fu Gado?”​—1 Tim. 3:5.

11-12. Efu wan brada wan tron wan owruman, dan fu san ede a prenspari taki den pkin fu en e tyari densrefi na wan bun fasi? (Luku a prenki.)

¹¹ Efu yu na wan p’pa, dan yu musu sorgu taki den pkin fu yu ’e gi yesi èn taki den e tyari densrefi na wan bun fasi’. Yu musu gi den leri nanga lobi èn yu musu train den tu. A no de fu taki dati yu wani taki den de koloku èn taki den e prisiri neleki ala tra pkin. Ma yu musu leri den tu fu gi yesi na yu, fu lespeki trawan, èn fu tyari densrefi na wan bun fasi. Boiti dati, yu musu du ala san yu man fu yepi den pkin fu yu fu hori densrefi na den leri fu Bijbel èn fu du muiti fu doro den marki fu man teki dopu.

¹² „Den pikin fu en musu de na bribi èn den no musu abi a nen taki den e libi wan yayolibi noso taki den trangayesi.” Efu wan pkin di dopu du wan seryusu sondu, dan sortu bakapisi dati ben o abi gi a p’pa? Efu a papa no train a pkin èn efu a no leri en san bun èn san no bun, dan a de krin taki a p’pa disi no o man tron wan owruman èn efu a de wan owruman kba, a kan  lasi a grani dati.​—Luku A Waktitoren fu 1 oktober 1996, blz. 28, par. 6-7.

YEPI A GEMEENTE

13. Fa yu kan sori taki yu man ’fiti yusrefi makriki na trawan’ èn taki yu no e ’du nomo san yu wani’?

¹³ Brada di e sori taki den abi moi Kresten fasi, na wan bigi yepi gi a gemeente. Wan man di „e fiti ensrefi makriki na trawan” e du tranga muiti fu sorgu taki a abi freide nanga trawan èn a e yepi trawan tu fu abi freide nanga makandra. Boiti dati, wan man di e fiti ensrefi makriki na trawan, e arki trawan èn a e pruberi fu ferstan fa den e firi. Kow taki dati yu na wan owruman kba, èn na wan konmakandra fu a skin fu owruman, furu fu den owruman e agri nanga wan besroiti di e kruderi nanga Bijbel gronprakseri. San yu o du? Yu o horbaka gi a besroiti dati awinsi yu ben o wani du sani tra fasi? Efu yu no de wan sma di wani ’du nomo san yu wani’, dan dati wani taki dati yu no e dwengi trawan fu du sani soleki fa yu wani. Yu e arki san trawan abi fu taki fu di yu sabi taki dati prenspari (Gen. 13:8, 9; Odo 15:22). Yu no „de wan sma di lobi meki trobi” èn yu no e „kisi atibron esi”. Disi wani taki dati yu no e taki grofu nanga trawan èn yu no e hartaki nanga den. Na presi fu dati, yu e sori swit’fasi gi den. Fu di yu na wan man di lobi freide, meki yu e du tranga muiti fu meki freide nanga trawan, srefi na ini muilek situwâsi (Yak. 3:17, 18). Yu e taki switi nanga trawan èn dati e yepi den fu no kisi atibron, srefi efu den no e agri kwetkweti nanga a bribi fu wi.​—Krut. 8:1-3; Odo 20:3; 25:15; Mat. 5:23, 24.

14. Fu san ede wan brada di wani kisi grani „no musu de wan sma di de nyun na ini a bribi” èn fa a e sori taki a e „tai hori na Gado”?

¹⁴ Wan brada di doro den marki fu man tron owruman „no musu de wan sma di de nyun na ini a bribi”. Fu man tron wan owruman, yu no abi fu de wan sma di dopu furu yari kba. Ma tòg yu musu gro kon tron wan lepi Kresten fu man kisi a grani dati èn dati e teki ten. Fosi yu tron wan owruman, dan neleki Yesus, yu musu sori  taki yu abi sakafasi èn taki yu de klarklari fu wakti teleki Yehovah gi yu wan grani (Mat. 20:23; Fil. 2:5-8). Yu e sori taki yu e „tai hori” na Yehovah te yu e tan gi yesi na en. Dati meki yu e hori yusrefi na den wet fu Yehovah èn na den rai di yu e kisi nanga yepi fu en organisâsi.​—1 Tim. 4:15.

15. A de so taki wan owruman musu de wan bun publiki takiman? Ferklari dati.

¹⁵ Bijbel e taki krin taki owruman musu „musu sabi fa fu gi leri”. Disi wani taki dati yu musu man hori kfalek moi lezing? Nôno. A no ala owruman na bun publiki takiman. Ma te owruman e preiki, èn te den e go luku den skapu, dan den musu man gebroiki Bijbel bun fu gi den brada nanga sisa dek’ati èn fu gi den leri. (Luku 1 Korentesma 12:28, 29 nanga Efeisesma 4:11.) Ma aladi yu no abi fu de wan bun publiki takiman, tòg yu musu tan du muiti fu tron wan moro bun leriman. Fa yu kan du dati?

16. Fa yu kan tron wan moro bun leriman? (Luku a prenki.)

¹⁶ „A fasi fa a e gi leri, musu sori taki a e hori finifini na a wortu di tru.” Efu yu wani tron wan moro bun leriman, dan sorgu taki den rai di yu e gi den brada nanga sisa, ala ten e kruderi nanga Bijbel. Fu man du disi, yu musu studeri Bijbel nanga den buku fu wi bun (Odo 15:28; 16:23). Te yu e studeri, dan luku bun fa den buku fu wi e ferklari den Bijbel vers, so taki yu kan fiti den na a yoisti fasi. Èn te yu e gi sma leri, dan du tranga muiti fu doro na ati fu den sma di e arki yu. Yu kan tron wan moro bun preikiman te yu e aksi owruman di abi ondrofeni fu gi yu rai (1 Tim. 5:17). Owruman musu ’man gi’ den Kresten brada nanga sisa ’dek’ati’. Ma son leisi, a de fanowdu taki owruman gi den rai noso taki den „piri-ai” srefi gi den. Awinsi san na a situwâsi, den owruman musu sori swit’fasi ala ten. Efu yu abi swit’fasi nanga lobi gi trawan, èn efu yu e hori yusrefi na Gado Wortu te yu e gi leri, dan yu o de wan bun leriman fu di yu e teki na eksempre fu a Bigi Leriman, Yesus.​—Mat. 11:28-30; 2 Tim. 2:24.

 TAN DU MUITI FU DORO DEN MARKI

17. (a) San kan yepi wan dinari ini a diniwroko fu tan du muiti fu doro den marki fu man tron owruman? (b) San owruman musu hori na prakseri te den e luku efu wan brada kan tron wan owruman? (Luku a faki „ No luku tumsi fini te unu musu besroiti efu wan brada kan tron wan owruman”.)

¹⁷ Son dinari ini a diniwroko ben kan feni taki den no o man tron owruman noiti fu di den musu wroko na so furu sani. Ma hori na prakseri taki Yehovah no e ferwakti taki yu no o meki fowtu, èn na organisâsi fu en no e ferwakti dati tu (1 Petr. 2:21). Boiti dati, a santa yeye fu Yehovah o yepi yu fu doro den marki disi (Fil. 2:13). Wan sani de di yu ben o wani du moro bun? Begi Yehovah fu a tori dati. Ondrosuku a tori dati moro fini èn aksi wan fu den owruman fa yu kan du a sani dati moro bun.

18. San ala dinari ini a diniwroko musu du?

¹⁸ Meki wi alamala, sosrefi den wan di e dini kba leki owruman, tan du muiti fu doro den marki di kari na ini na artikel disi (Fil. 3:16). Yu na wan dinari ini a diniwroko? Tan du muiti fu go na fesi. Aksi Yehovah fu train yu so taki a kan gebroiki yu moro bun na ini a gemeente (Yes. 64:8). Yehovah seiker o blesi a muiti di yu e meki fu man tron wan owruman.