Paul: Wi ben breiti so te! Na ini november 1985 wi ben de na pasi fu go na Liberia, na West-Afrika, a fosi toewijzing fu wi. A plane fu wi saka na ini Senegal. Anne taki: „Ete wán yuru, dan wi o de na ini Liberia!” Ne wi yere disi: „Sma di e go na Liberia musu saka fu a plane. Wi no man saka na ini Liberia fu di sma pruberi fu teki a regering drape abra.” Den tin dei baka dati, wi ben e tan nanga wan tu zendeling na ini Senegal. Wi ben e arki nyunsu fu Liberia di ben e ferteri taki bun furu sma ben e lasi den libi èn taki a regering no ben wani taki sma de na strati te neti, noso den srudati ben o sutu den kiri leti drape.

Anne: Wi a no sma di lobi dyugudyugu. Fu taki en leti, sensi di mi pkin mi ben e wai pasi gi den sortu situwâsi dati. Mi e frede srefi fu abra strati. Ma tòg wi ben wani go na Liberia, awinsi ogri sani ben e psa drape.

Paul: Mi nanga Anne gro kon bigi na ini a srefi kontren na a westsei fu Ingrisikondre. Wi ala tu bigin pionier di wi klari skoro. Mi p’pa nanga m’ma èn a m’ma fu Anne ben gi wi furu dek’ati fu du dati. Den ben breiti srefsrefi taki wi ben wani go na ini a furuten diniwroko. Di mi ben abi 19 yari mi ben abi a grani fu go dini na Betel èn Anne kon na Betel tu baka di wi trow na ini 1982.

Anne: Wi ben lobi Betel, ma ala ten wi ben wani libi èn preiki ini wan kondre pe moro preikiman ben de fanowdu. Na Betel, wi ben e wroko makandra nanga sma di ben de zendeling fosi èn a bun eksempre fu den meki taki wi ben wani tron zendeling tu. Ibri neti wi begi spesrutu gi a sani disi èn wi du dati dri yari langa. Dati meki wi ben breiti srefsrefi di wi kisi a kari na ini 1985 fu go na a di fu 79 klas fu Gilead. Wi ben musu go dini na Liberia, na West-Afrika.

Paul: Wi teki a fosi plane di ben mag go baka na Liberia. Sma ben e frede srefsrefi èn den no ben mag go na strati ete te neti. Sma ben e frede so te taki efu wan oto ben e meki bari wantronso, dan den alamala ben e bruya èn den ben e lon gwe. Fu no bruya, dan mi nanga Anne ben e leisi pisi fu den Psalm ibri neti. Ma wi ben lobi a toewijzing fu wi trutru. Anne ben e go preiki ibri dei, èn mi ben de  na Betel e wroko makandra nanga John Charuk. Mi leri bun furu fu en fu di a ben e libi wan heri pisi ten na ini Liberia èn a ben sabi den problema nanga situwâsi fu den brada nanga sisa drape heri bun.

Anne: Fu san ede a no teki langa fosi wi kon lobi a toewijzing fu wi na ini Liberia? Na fu wi brada nanga sisa ede. Den ben abi swit’fasi èn de ben de getrow. Wi ben e si den leki wi famiri. Den gi wi bun rai èn den tranga a bribi fu wi. A preikiwroko drape ben switi srefsrefi. Den ososma no ben lobi te wi ben e gwe tumsi esi. Sma ben gwenti taki fu Bijbel na strati. Na gewoon wi ben kan go teki prati na den takimakandra dati. Wi ben abi so furu Bijbelstudie taki a ben muilek fu studeri nanga den alamala. Ma wi ben lobi a wroko.

Paul: Fo yari langa a situwâsi na ini a kondre ben rustig. Ma na ini 1989, wan ogr’ati feti bigin. Den sma di ben opo densrefi teige a regering, teki a kontren lontu Betel abra tapu 2 yuli 1990. Dri mun langa wi no ben man taki nanga sma dorosei fu a kondre. Wi no ben man taki nanga wi famiri srefi noso nanga den brada fu na edekantoro. Na ala presi ogri ben e psa, bruya ben de na ala sei, n’nyan no ben de fu feni, èn sma ben e verkracht umasma. Ala nanga ala den problema disi tan 14 yari langa na ini a kondre.

Anne: Sma fu son lo ben e feti nanga sma fu tra lo èn den ben e kiri makandra. Den fetman di ben de fu feni na ala sei ben abi furu fetsani na den skin, èn den ben e weri krosi di ben e frede sma. Sonwan fu den no ben abi probleem fu kiri sma. Gi den a ben de neleki te den ben e „srakti fowru”. Furu dedeskin ben de fu si na den presi pe den srudati ben e hori wakti. Sonwan fu den presi dati ben de krosbei fu a bijkantoro. Den fetman kiri getrow Kotoigi èn sosrefi fo fu den zendeling di wi ben lobi srefsrefi.

Aladi den brada nanga sisa fu wi ben kan lasi den libi, tòg den kibri tra Kotoigi di ben de fu den lo di den fetman ben e onti fu kiri. Den zendeling nanga den sma na Betel ben e du a srefi. Na Betel, son Kotoigi di ben musu lowe ben e sribi na a ondrosei pisi fu a Betel-oso èn trawan ben e tan nanga wi na ini wi kamra na tapsei. Wi ben e prati a kamra fu wi nanga wan famiri fu seibi sma.

Paul: Ibri dei den fetman ben e pruberi fu kon na ini Betel fu luku efu wi ben e kibri sma drape. Ibri leisi te dati ben e psa, tu fu unu ben e go na a portu fu Betel fu go taki nanga den fetman èn tu trawan ben e luku na wan fensre fu si san ben e psa. Efu den tu sma na a portu ben e hori den anu na den fesi, dan problema no ben de. Ma efu den ben e poti den anu na den baka, dan dati ben wani taki dati den fetman ben e du muilek. Te den tu sma di ben e luku na a fensre ben e si disi, dan den ben e kibri den mati fu wi es’esi.

 Anne: Wan dei, den brada no ben man tapu pasi gi wan grupu faya-ati fetman fu kon na ini Betel. Mi nanga wan sisa sroto unsrefi na ini wan was’oso. Wi ben abi wan kasi drape di ben abi wan pisi pe yu ben kan kibri sani sondro taki sma ben o man si dati te den ben o opo a kasi. A sisa kwinsi ensrefi go na ini a pisi disi. Baka dati, den fetman kon na tapsei nanga den bigi gon fu den. Den naki tranga tapu a doro fu a was’oso. Fu di Paul no ben wani taki den kon na ini a was’oso, meki a taigi den: „Mi frow de na insei”. Di mi tapu a pisi fu a kasi pe a sisa ben e kibri, dan a sani dati meki pkinso b’bari, èn a teki pkinso ten tu fu poti ala sani baka tapu en presi na ini a kasi. Mi ben de seiker taki den fetman ben o aksi densrefi san mi ben e du. A sani disi meki taki mi heri skin bigin beifi. Efu mi ben o opo a doro dan den ben o si dati. Dati meki mi begi Yehovah na ini mi ati fu yepi mi. Ne mi opo a doro èn mi ben man taki den man odi sondro fu beifi. Wan fu den pusu mi go na wan sei èn a waka go langalanga na a kasi. A opo en èn a bigin trubu ala sani na ini a kasi. A no ben man bribi taki a no feni noti. Baka dati en nanga den trawan di ben de nanga en go suku na ini den tra kamra èn na ini a sodrokamra. Ma srefi drape den no feni noti.

Paul: Nofo tron wi no ben abi noti fu nyan te m’manten, ma a deitekst takimakandra fu Betel ben de leki n’nyan gi wi. Wi alamala ben sabi taki te wi ben e leisi èn studeri Bijbel, dan wi ben o kisi krakti fu psa a dei.

Nofo tron a ben e psa na a yoisti ten taki Yehovah gi wi san wi ben abi fanowdu, èn a yepi wi fu no frede tumsi.

O moro a situwâsi na ini a kondre ben e kon ogri, o moro a waarheid ben e gi wi krakti. Ibri tron baka, den brada nanga sisa fu wi ben e lowe fu man kibri den libi, ma den ben e tan abi wan tranga bribi èn den no ben e bruya. Sonwan fu den ben taki dati a muilek ten dati ben e „sreka den gi a bigi banawtu”. Dek’ati owruman nanga yongu brada ben e du ala san den man fu yepi den brada nanga sisa fu den. Brada nanga sisa di ben lowe go na tra kontren ben e yepi makandra èn den tan preiki na ini den kontren dati. Den ben gebroiki den sani di den ben man feni na ini a busi fu meki kampu di wi ben e gebroiki leki Kownukondre zaal fu hori konmakandra. Na ini a muilek ten dati, den konmakandra ben gi den brada nanga sisa dek’ati èn a preikiwroko ben e yepi den fu hordoro. Te wi ben e prati n’nyan, krosi, nanga tra sani gi den brada nanga sisa, dan furu fu den ben e aksi fu kisi wan preikiwroko tas na presi fu aksi fu kisi krosi. A sani dati naki wi ati trutru. Furu sma di ben si èn ben ondrofeni furu ogri sani na ini a feti, ben wani yere a bun nyunsu. Den no ben man bribi taki den Kotoigi ben de so koloku èn taki den ben abi so furu lobi gi makandra. Den ben de leki leti na ini a dungru (Mat. 5:14-16). Fu di den brada nanga sisa fu wi ben de so fayafaya, meki srefi sonwan fu den moro ogr’ati fetman tron wi brada.

Paul: Son leisi wi ben musu gwe libi a kondre. Dri leisi wi ben musu gwe fu wan syatu pisi ten èn tu leisi wi gwe fu wan heri yari. Wan zendeling sisa ben ferklari heri bun fa wi ben e firi di wi ben musu gwe. A taki: „Na ini Gilead den leri wi fu lobi den brada nanga sisa di e tan na den presi pe wi ben o go dini, èn na dati wi du tu. Dati meki wi ati ben e priti di wi ben musu libi den brada nanga sisa fu wi na baka na ini a muilek situwâsi di ben de na ini a kondre.” Ma wi breiti taki di wi ben e tan na ini den kondre krosbei, wi ben man horbaka gi a preikiwroko na ini Liberia.

Anne: Na ini mei 1996, fo fu wi gwe na ini wan wagi di ben de fu Betel. Wi ben abi prenspari papira na wi di ben abi fu du nanga a wroko na ini Liberia. Wi ben wani rèi go na wan presi na a tra sei fu a foto pe a ben moro veilig. A presi disi ben de 16 kilometer moro fara. Na a momenti dati wan feti bigin na ini a kontren fu wi. Faya’ati fetman sutu gon go na loktu èn den stop a wagi fu wi. Den meki dri fu wi saka, èn den rèi gwe nanga a wagi aladi Paul ben de ete na ini. Wi no ben sabi srefsrefi san fu du. Ne wantronso, wi si Paul e waka kon miti wi. En ede ben e brudu. Wi ben denki taki den ben sutu en, ma wi kon si taki dati no kan fu di a no ben o man waka. Wan fu den fetman ben naki en di den ben e pusu en kmoto na ini a wagi. Wi ben breiti taki a no ben kisi hebi mankeri.

Wan srudati-wagi di ben de krosbei ben de fu rei gwe èn a ben lai nanga sma di ben e frede. Wi besroiti fu go na ini a wagi, ma fu di presi no ben de fu sdon moro, meki wi ben musu tnapu èn wi ben musu grabu hori. A sma di ben e rèi a wagi ben e rèi so tranga taki bijna wi frei go na dorosei. Wi begi en fu stop, ma a ben frede tumsi. Mi no sabi fa wi ben man hordoro, ma di wi doro pe wi ben musu go, wi heri skin ben e beifi fu di wi ben frede so te.

Paul: Di wi luku den doti krosi di ben priti na wi skin, dan wi no ben man bribi taki wi ben de na libi ete. Krosbei fu wi yu ben abi wan brokobroko helikopter di ben lai kugru-olo. A ben o tyari wi go na Sièra Leon a dei baka dati. Wi ben de nanga tangi taki wi ben de na libi, ma wi ben e broko wi ede trutru nanga den Kresten brada nanga sisa fu wi.

Anne: Wi doro bun na Betel na ini Freetown, Sièra Leon, èn den brada sorgu bun gi wi. Ma wan sani psa di mi no ben ferwakti. Wantronso mi bigin memre den ogri sani di ben psa na ini Liberia. Ibri dei mi ben e frede taki wan ogri sani ben o psa èn mi no ben man denki krin. A ben gersi leki mi no ben sabi pe mi ben de. Te neti mi ben gwenti wiki fu di mi ben e frede taki ogri ben o miti wi. Mi heri skin ben nati nanga sweti èn mi ben e beifi. Mi ben e feti fu bro. Paul ben e brasa mi hori èn a ben e begi nanga mi. Wi ben e singi Kownukondre singi teleki mi no ben e beifi moro. Mi ben e firi leki mi ben e law èn taki mi no ben o man dini moro leki zendeling.

Noiti mi o fergiti san psa baka dati. A srefi wiki dati wi kisi tu tijdschrift. Wan fu den ben de na Ontwaakt! fu 8 yuni 1996. A ben abi na artikel „Omgaan met paniekaanvallen”. (San fu du te yu e frede tumsi.) Now mi e ferstan san ben e psa nanga mi. A tra tijdschrift ben de A Waktitoren fu 1 mei 1996, di ben abi na artikel „Pe den e feni a tranga foe den?” A Waktitoren ben abi wan fowtow fu wan vlinder di ben abi wan broko frei. Na artikel ben e sori taki neleki fa wan vlinder kan tan nyan èn kan tan frei aladi wan frei fu en broko, na so Yehovah kan yepi wi fu tan horbaka gi trawan, awinsi wi e firi leki wi swaki. Yehovah gebroiki den artikel disi fu gi mi a krakti di mi ben abi fanowdu èn a du dati na a yoisti ten (Mat. 24:45). Mi suku moro fu den sortu artikel disi èn mi poti den na ini wan map. Den yepi mi furu. Baka wan pisi ten mi no ben e memre den ogri sani moro di ben psa.

Paul: Ibri leisi te wi ben e drai go baka na Liberia, wi ben breiti so te. Na a kba fu 2004, wi ben e dini drape bijna 20 yari. A feti ben kon na wan kba. Na organisâsi ben e seti sani fu du wan tu bow-wroko na a bijkantoro. Ma wantronso den brada aksi wi fu go na wan nyun toewijzing.

Disi ben de wan bigi tesi gi wi. Wi ben lobi den brada nanga sisa na ini Liberia so te. Den ben kon de leki famiri gi wi èn wi no ben wani libi den. Ma wi ben si kba wan leisi fa Yehovah blesi wi di wi  gwe libi wi famiri fu go na Gilead. Dati meki wi teki a toewijzing disi. Now wi ben o go dini na ini Gana, wan kondre krosbei.

Anne: Wi krei furu di wi gwe libi Liberia. A ferwondru wi di Frank, wan koni owru brada, taigi wi: „No tan prakseri wi!” Baka dati a taki: „Wi sabi taki unu no o fergiti wi ma unu musu poti un heri ati na ini a nyun toewijzing fu unu. Na Yehovah gi unu a toewijzing disi, dus sorgu bun gi den brada nanga sisa drape.” A sani di a brada dati taki yepi wi fu meki nyun mati na ini wan kondre pe wan tu sma nomo ben sabi wi èn pe ala sani ben nyun gi wi.

Paul: Ma heri esi wi kon lobi den brada nanga sisa fu wi na ini Gana. Kotoigi ben lai drape! Wi leri furu fu den nyun mati fu wi di ben e tai hori na Yehovah èn di ben abi wan tranga bribi. Ma baka di wi ben dini 13 yari na ini Gana, dan ete wan sani psa di wi no ben ferwakti. Den brada aksi wi fu go dini na ini Kenia, na a bijkantoro fu Owstu-Afrika. Aladi wi ben e misi den mati di wi ben meki na ini den kondre pe wi ben dini fosi, tòg wi meki nyun mati es’esi na ini Kenia. Èn neleki fa a ben de na ini Gana nanga Liberia, na so wroko lai tu na ini Kenia.

Anne: Na ini den yari di psa, mi ben de na ini situwâsi di ben muilek en son leisi mi ben e frede srefsrefi. Te wi e libi na ini kontren pe ogri kan miti wi èn te muilek situwâsi e miti wi, dan wi kan kon siki èn wi kan frede. Wi no kan ferwakti taki Yehovah o kibri wi gi den sani disi. Srefi now te mi e yere gon e sutu, dan mi heri bere e drai. Ma mi leri fu kisi wini fu ala den sani di Yehovah seti fu gi wi krakti, èn wan fu den seti dati na wi brada nanga sisa. Mi si tu taki te wi abi a gwenti fu studeri, fu begi, èn fu go na den konmakandra èn na ini a preikiwroko, dan dati e yepi wi fu hordoro na ini a toewijzing fu wi.

Paul: Son leisi sma e aksi wi: „Un lobi a toewijzing fu unu?” Wan kondre kan moi, ma problema kan opo kon tu di e meki en muilek gi wi fu tan drape. Sobun, san wi lobi moro a kondre? Na den lobi brada nanga sisa fu wi, fu di den na wi famiri. Awansi wi alamala kmoto fu difrenti famiri nanga kondre, tòg wi e denki a srefi fu Yehovah èn wi alamala lobi en. Wi ben prakseri taki den ben seni wi go drape fu tranga den sma disi, ma fu taki en leti, na den tranga wi.

Ibri leisi te wi e go na wan tra toewijzing, wi e si wan wondru fu Yehovah. Dati na den brada nanga sisa fu wi di de na ala sei. Solanga wi de fu wan gemeente, wi abi famiri èn wan presi pe wi kan firi veilig. Wi de seiker taki efu wi e tan fertrow tapu Yehovah, a o gi wi krakti fu hordoro awinsi san e psa.​—Fil. 4:13.