1-2. Suma kan du wan hati sani nanga wi? Ferklari dati.

 YESUS ben ferteri wan agersitori fu wan uma di masra ben dede kba. Na uma disi ben e tan aksi wan krutuman fu yepi en fu di wan sma no ben e libi bun nanga en. A no de fu taki dati den disipel fu Yesus ben man ferstan fa na uma dati ben e firi fu di na a ten dati, a ben e psa furu taki sma no ben e libi bun nanga trawan (Luk. 18:1-5). Wi kan ferstan tu fa na uma disi ben e firi, fu di wi alamala ondrofeni wan leisi taki sma no libi bun nanga wi.

² Furu sma na ini a ten disi e denki takru fu trawan, den no abi swit’fasi, èn den gridi. Dati meki wi kan ferwakti taki sma o du hati sani tu nanga wi (Preik. 5:8). Ma san kan hati moro, na te wan brada noso wan sisa e du wan hati sani nanga wi. A no de fu taki dati tra fasi leki den sma di e ferfolgu wi noso di e gens wi, wi Kresten brada nanga sisa no wani du sani di e hati wi. Tòg disi e psa son leisi fu di den na sondu sma. Wi kan leri furu fu Yesus te wi e luku san a ben du te ogri-ati gensman ben e du ogri nanga en. Efu wi kan abi pasensi nanga gensman di e du ogri nanga wi, dan a no de fu taki dati wi musu abi moro pasensi nanga wi Kresten brada nanga sisa. Fa Yehovah e firi te wan brada, wan sisa, noso wan tra sma e du wan hati sani nanga wi? A e broko en ede nanga san e miti wi?

3. Fa wi du sabi taki Yehovah e broko en ede nanga den futuboi fu en te trawan e du hati sani nanga den?

³ Yehovah wani taki sma libi bun nanga wi èn a e si te sma e du hati sani nanga wi. „Yehovah lobi te sani e waka  na wan reti fasi” (Ps. 37:28). Yesus e pramisi wi taki Yehovah o „sorgu taki den [futuboi fu en] o kisi reti esi-esi” na a reti ten (Luk. 18:7, 8). Èn heri esi a o tyari wan kba kon na ala pina èn a o sorgu taki noiti moro sma du ogri nanga wi.​—Ps. 72:1, 2.

4. Fa Yehovah e yepi wi na ini a ten disi?

⁴ Wi musu wakti teleki Yehovah lusu ala problema. Ma nownow kba a e yepi wi te trawan no e libi bun nanga wi (2 Petr. 3:13). A e leri wi fu no du don sani. Wán fasi fa a e du disi, na taki a e sori wi na ini Bijbel san en Manpkin ben e du te sma ben e du ogri nanga en. Èn na ini Bijbel a e gi wi rai tu fu sori wi san wi kan du te sma no e libi bun nanga wi.

LUKU BUN SAN YU E DU TE SMA E DU HATI SANI NANGA YU

5. Fu san ede wi musu luku bun san wi e du te sma e du ogri nanga wi?

⁵ Te sma e du ogri nanga wi, dan dati kan hati wi trutru èn a kan meki wi firi brokosaka (Preik. 7:7). Getrow futuboi fu Gado, soleki Yob nanga Habakuk, ben e firi so tu (Yob 6:2, 3; Hab. 1:1-3). A tru taki wi alamala kan firi so. Ma tòg wi musu luku bun taki wi no e du wan don sani.

6. San na eksempre fu Absalom e leri wi? (Luku a prenki.)

⁶ Te wan sma du wan ogri nanga wi noso nanga wan sma di wi lobi, dan kande wi o wani pai a sma baka. Ma dati kan tyari moro problema kon. Prakseri a tori fu Absalom, a manpkin fu Kownu David. A ben atibron so te di en afu-brada Amnon, dwengi Tamar, a sisa fu den, fu abi seks nanga en. Soleki fa a Wet fu Moses ben e sori, dan Amnon ben musu dede fu a sani di a du (Lef. 20:17). Aladi wi kan ferstan taki Absalom ben atibron, tòg a no ben abi a reti fu kiri Amnon.​—2 Sam. 13:20-23, 28, 29.

7. Fa a psalm skrifiman ben e denki di a si sortu ogri sma ben e du?

⁷ Te a gersi leki sma no e kisi strafu gi den ogri di den du, dan wi ben kan denki taki na las’ten fu du san reti. Wan futuboi fu Yehovah ben si taki ogrisma ben e pina bun sma, èn a ben gersi leki den ogrisma ben e libi wan switi libi. A ben taki: „Na so a libi fu den ogrisma de kba. Noiti den abi brok’ede” (Ps. 73:12). A ben mandi tu fu di sma no ben e du san reti èn a ben  feni taki na las’ten fu anbegi Yehovah. A ben taki tu: „Mi ben pruberi fu ferstan a sani disi, ma a ben muilek gi mi” (Ps. 73:14, 16). A ben sori san ben bijna ben miti en. A ben taki: „Ma mi, bijna mi kmoto na a reti pasi. Bijna mi grati fadon” (Ps. 73:2). Wan srefi sortu sani ben psa nanga wan brada di wi o kari Alberto.

8. San wan brada du di trawan du wan hati sani nanga en?

⁸ Wan tu brada ben taki dati Alberto ben f’furu moni fu a gemeente, aladi dati no ben de so. A sani disi meki taki Alberto lasi den grani fu en èn furu sma na ini a gemeente lasi lespeki gi en di den kon sabi fu a tori. Alberto e taki: „Mi ben abi bit’ati, mi ben e mandi, èn a sani di psa ben hati mi.” Alberto ben e atibron so te, taki a tapu fu go na den konmakandra, èn feifi yari langa a no preiki moro. Na ondrofenitori disi e sori san kan psa te wi e kisi bit’ati fu di sma du wan hati sani nanga wi.

TEKI NA EKSEMPRE FU YESUS TE SMA DU WAN HATI SANI NANGA YU

9. Sortu ogri sma ben du nanga Yesus? (Luku a prenki.)

⁹ Wi kan leri fu Yesus te wi e luku san a du di sma ben du ogri nanga en. Furu sma no ben e libi bun nanga en, sosrefi  en famiri. Den famiriman fu en di no ben de na bribi ben taki dati a ben lasi en ferstan, den kerki fesiman ben taki dati a ben e wroko nanga ogri yeye, èn den srudati fu Rome spotu en, den fon en, èn den kiri en te fu kba (Mark. 3:21, 22; 14:55; 15:16-20, 35-37). Aladi sma ben e du den sani disi nanga en, tòg Yesus noiti no pai ogri fu ogri. San wi kan leri fu na eksempre fu en?

10. San Yesus du di sma ben e du ogri nanga en? (1 Petrus 2:21-23)

¹⁰ Leisi 1 Petrus 2:21-23. a Na eksempre fu Yesus e leri wi san wi musu du te sma e du ogri nanga wi. Yesus ben sabi o ten a ben musu tan pî èn o ten a ben musu taki (Mat. 26:62-64). Son leisi te sma ben e ferteri lei fu en, dan a no ben e taki noti (Mat. 11:19). Te a ben e taki wan sani, dan a no ben e kosi sma èn a no ben e taigi den taki a ben o pai den baka gi a sani di den ben du nanga en. Ala ten a ben e dwengi ensrefi fu di a ben e „tan saka ensrefi na ondro a sma di e krutu sani na wan reti fasi”. Yesus ben sabi taki Yehovah ben e si san sma ben e du nanga en. A ben abi a fertrow taki Yehovah ben o tyari wan kba kon na ala den ogri di sma e du èn taki a ben o du dati na a yoisti ten.

11. Na sortu fasi wi kan dwengi wisrefi te wi e taki? (Luku den prenki.)

¹¹ Wi kan de leki Yesus te wi e luku bun san wi e taki te trawan e du hati sani nanga wi. Son leisi a no de fanowdu fu taki noso fu du wan sani, fu di a sani di a sma du nanga wi no seryusu so. Noso wi kan  besroiti fu no taki noti so taki a situwâsi no e kon moro ogri (Preik. 3:7; Yak. 1:19, 20). Tra leisi baka, a kan de fanowdu taki wi e opo taki gi wan sma fu di trawan no e libi bun nanga en, noso kande a de fanowdu taki wi e opo taki gi a bribi fu wi (Tori 6:1, 2). Te wi e taki, dan wi musu du dati na wan lespeki fasi èn wi musu taki rustig.​—1 Petr. 3:15. b

12. Fa wi e sori taki wi e ’saka wisrefi na ondro a sma di e krutu sani na wan reti fasi’?

¹² Wan tra fasi fa wi kan teki na eksempre fu Yesus, na te wi e ’saka wisrefi na ondro a sma di e krutu sani na wan reti fasi’. Te trawan e krutu wi, noso te den no e libi bun nanga wi, dan wi kan abi a fertrow taki Yehovah sabi san psa. Wi sabi taki Yehovah o seti sani kon bun baka, èn a sani dati e yepi wi fu no atibron te sma no e libi bun nanga wi. Te wi e fertrow tapu Yehovah èn te wi e wakti na en tapu fu lusu ala problema, dan wi no o tan nanga atibron èn wi no o kisi bit’ati. Te wi e tan nanga atibron, dan dati kan meki taki wi du wan sani di no bun, wi kan lasi prisiri, èn a matifasi di wi abi nanga Yehovah kan pori.​—Ps. 37:8.

13. San kan yepi wi fu no lasi pasensi te sma no e libi bun nanga wi?

¹³ A no de fu taki wi no o man du ala sani soifri soleki fa Yesus ben du dati. Son leisi wi kan taki noso du wan sani di kan hati wi bakaten (Yak. 3:2). Èn son leisi den sani di sma du nanga wi kan abi krakti na wi tapu wi heri libi langa. Efu na so a de nanga yu, dan yu kan de seiker taki Yehovah sabi san e miti yu. Èn Yesus sabi fa yu e firi fu di sma ben du ogri nanga en tu (Hebr. 4:15, 16). Boiti taki wi kan leri fu a moi eksempre fu Yesus, Yehovah e gi wi bun rai tu di kan yepi wi te sma no e libi bun nanga wi. Wi o poti prakseri na tu vers fu a buku Romesma di kan yepi wi.

„LIBI EN MEKI GADO PURU ATIBRON NA EN TAPU”

14. San a wani taki fu „ libi en meki Gado puru atibron na en tapu”? (Romesma 12:19)

¹⁴ Leisi Romesma 12:19. Na apostel Paulus ben gi Kresten a rai fu „libi en meki Gado puru atibron na [sma] tapu”. Wi e du dati te wi e meki Yehovah besroiti o ten a o meki sani kon reti baka, èn na sortu fasi a o du dati. Baka di sma ben du wan hati sani nanga wan brada di nen John, a brada disi taki: „Mi ben musu dwengi misrefi fu no du wan don sani, ma a no ben makelek. Romesma 12:19 yepi mi fu wakti tapu Yehovah.”

15. Fu san ede a moro bun fu wakti tapu Yehovah fu lusu wan problema?

¹⁵ A bun te wi e wakti tapu Yehovah fu lusu wan problema. Te wi e du dati, dan wi no o kisi ed’ati fu di wi srefi pruberi fu lusu a problema. Yehovah wani yepi wi. Eigenlijk a e taigi wi: ’Libi a sani gi mi, mi o lusu a problema.’ Efu wi e bribi taki Yehovah o pai den sma baka di ben du wan hati sani nanga wi, dan wi no o tan nanga atibron, fu di wi sabi taki Gado o du san reti. Na dati yepi John di wi ben kari kba. A ben taki: „Efu mi e wakti tapu Yehovah fu lusu a problema fu mi, dan sani o waka moro bun leki te mi srefi e pruberi fu lusu a problema.”

„TAN DU BUN FU KAN WINI NA OGRI”

16-17. Fa begi kan yepi wi fu „tan du bun fu kan wini na ogri”? (Romesma 12:21)

¹⁶ Leisi Romesma 12:21. Paulus ben  gi den Kresten a rai tu fu „tan du bun fu kan wini na ogri”. Na ini a prenspari taki di Yesus ben hori tapu wan bergi, a ben taigi den arkiman: „Tan lobi un feanti èn tan begi gi den sma di e frufolgu unu” (Mat. 5:44). Dati na soifri san Yesus ben du. Kande wi prakseri fa Yesus pina di den srudati fu Rome spikri en na wan postu. Den ogr’ati sani di den ben du nanga Yesus, meki taki a pina hebi. Wi no man ferstan srefi o hebi a pina.

¹⁷ Aladi Yesus ben pina so hebi, tòg a tan sori lobi èn a tan gi yesi na Yehovah. A no aksi en P’pa fu strafu den srudati, ma na presi fu dati a begi: „Mi Tata, gi den pardon, bika den no sabi san den e du” (Luk. 23:34). Te wi e begi gi den sma di e du hati sani nanga wi, dan dati o yepi wi fu hori wisrefi èn fu no atibron so. A kan yepi wi srefi fu no denki takru moro fu den sma disi.

18. Fa begi yepi Alberto nanga John di sma du wan hati sani nanga den?

¹⁸ Begi yepi den tu brada di kari na ini a artikel disi. Alberto e taki: „Mi begi gi den brada di du wan hati sani nanga mi. Mi aksi Yehovah difrenti leisi fu yepi mi fu no tan nanga atibron.” A moi fu si taki Alberto e dini Yehovah getrow baka. John e taki: „Mi begi furu leisi gi a brada di du wan hati sani nanga mi. Yehovah yepi mi fu no tan atibron tapu mi brada èn fu no krutu en moro. Yehovah yepi mi tu fu kon abi wan korostu firi.”

19. San wi musu tan du te na a kba fu a grontapu disi? (1 Petrus 3:8, 9)

¹⁹ Wi no sabi sortu hati sani sma o du nanga wi fosi na ogri sistema disi kon na wan kba. Awinsi san e miti wi, noiti wi musu tapu fu begi Yehovah fu yepi wi. Boiti dati, wi musu tan du muiti fu tyari wisrefi neleki fa Yesus ben e tyari ensrefi di sma ben e du ogri nanga en. Èn wi musu tan fiti den rai na ini Gado Wortu. Te wi e du dati, dan wi kan de seiker taki Yehovah o blesi wi.​—Leisi 1 Petrus 3:8, 9.