1, 2. (a) Fa a howpu fu tru Kresten e difrenti fu a howpu di sma fu Satan grontapu abi? (b) Sortu prenspari aksi wi o luku now?

TRU Kresten abi wan moi howpu! Wi alamala, awinsi wi na salfu Kresten noso awinsi wi na „tra skapu”, e howpu fu si fa Yehovah o du san a abi na prakseri èn fa a nen fu en o kon santa (Yoh. 10:16; Mat. 6:9, 10). Disi na a moro moi howpu di wi leki libisma kan abi. Gado pramisi wi tu taki furu sma o libi fu têgo na ini a „nyun grontapu” èn taki trawan o libi na ini a „nyun hemel” (2 Petr. 3:13). Ma solanga a ten dati no doro ete, wi e fruwakti taki Gado o tan yepi en pipel fu kisi wan moro tranga bribi.

² Furu sma na ini a grontapu fu Satan abi wan howpu tu, ma den no sabi efu den o kisi den sani di den e howpu na tapu. Fu eksempre, milyunmilyun sma di e bai lòt e howpu taki den o wini, ma den no de seiker fu dati. Ma wi leki Kresten abi trutru bribi fu di wi de seiker taki den sani di wi e howpu na tapu, o kon tru (Hebr. 11:1). Ma kande yu wani sabi san yu kan du fu de moro seiker taki den sani di yu e howpu, o pasa trutru? Sortu wini yu o kisi te yu abi wan tranga bribi taki yu o kisi den sani di yu e howpu na tapu?

3. Fu san ede wi e bribi taki den pramisi fu Gado o kon tru?

 ³ Bribi a no wan sani di sondusma e kisi te den gebore èn a no e kon fu ensrefi. Na a santa yeye fu Gado e meki taki wan Kresten e kon abi bribi (Gal. 5:22). Bijbel no e taki dati Yehovah abi bribi fanowdu. Fu di Yehovah hei moro ala sma èn a koni moro ala sma, meki noti kan tapu en fu du san a abi na prakseri. Wi hemel Tata de seiker taki den sani di a pramisi o kon tru èn dati meki a e taki: „Den sani disi pasa kaba!” (Leisi Openbaring 21:3-6.) Fu di Yehovah na wan Gado di „wi kan frutrow na en tapu”, meki wi kan bribi taki a e du ala ten san a pramisi.​—Deut. 7:9.

4. Sortu howpu Gado en futuboi fu owruten ben abi?

⁴ Kapitel 11 fu a Bijbel buku Hebrewsma e kari a nen fu 16 man nanga uma di ben abi bribi. A skrifiman fu a buku disi e taki dati fu di den sma disi nanga trawan ben abi wan tranga bribi, meki den ’kisi fu yere taki Gado feni den bun’ (Hebr. 11:39). Den alamala ben e „fruwakti” a „pikin” di Gado ben o seni kon fu masi Satan èn fu du den sani di Yehovah ben abi na prakseri sensi a bigin (Gen. 3:15). Den futuboi disi dede fosi a „pikin”, Yesus Krestes di Gado ben pramisi, opo a pasi gi sma fu kan libi na ini hemel (Gal. 3:16). Ma Yehovah o meki den kon na libi baka dyaso na grontapu leki libisma di no abi sondu.​—Ps. 37:11; Yes. 26:19; Hos. 13:14.

5, 6. Sortu sani Abraham nanga en osofamiri ben e tan prakseri èn fa den ben man tan abi wan tranga bribi? (Luku a prenki na a bigin fu na artikel.)

⁵ Luku san Hebrewsma 11:13 e taki fu sonwan fu den sma di libi fosi Krestes kon na grontapu: „Ala den sma disi dede sondro fu lasi den bribi, aladi den no si fa den pramisi disi kon tru, ma den ben si den fu farawe kaba èn den ben prisiri nanga dati.” Wan fu den sma disi na Abraham. Yu denki taki a ben tan fruwakti a bun libi di a ben o abi te a pramisi „pikin” ben o tiri? Luku san Yesus ben taki fu Abraham di gensman poti wan aksi gi en: „Un tata Abraham ben prisiri srefisrefi fu di a ben fruwakti fu si a dei fu mi. We, a si en trutru èn a ben prisiri” (Yoh. 8:56). Na so a ben de tu nanga Sara, Isak, Yakob èn furu trawan di ben poti ala den prakseri na a Kownukondre di Gado ben o seti fu tiri grontapu.​—Hebr. 11:8-11.

⁶ San yepi Abraham nanga en osofamiri fu tan abi wan tranga bribi? Kande owru futuboi ben e fruteri den sani fu Yehovah noso kande Yehovah ben e taki nanga den nanga yepi fu engel noso fisyun. A kan tu taki den ben e leisi tori fu owruten. A moro prenspari sani na taki den no ben frigiti san den leri, ma den tan prakseri den pramisi fu Gado, den du ala san a ben aksi den èn den denki dipi fu den sani disi. Fu di den man nanga uma disi ben de seiker taki den pramisi fu Gado ben o kon tru, meki den ben de klariklari fu nyan pina èn fu horidoro awinsi sortu tesi ben o miti den. Na so den ben man tan gi yesi na Gado.

7. Sortu sani Yehovah gi wi fu yepi wi fu abi wan tranga bribi èn san wi musu du nanga den sani disi?

⁷ Yehovah gi wi a heri Bijbel fu yepi wi fu tan abi wan tranga bribi. Te wi wani de „koloku” èn wi wani taki sani e „waka bun” gi wi, dan a bun fu leisi Gado Wortu ibri dei solanga wi man du dati (Ps. 1:1-3; leisi Tori fu den apostel 17:11.) Neleki Yehovah en futuboi fu owruten, na so wi musu tan denki dipi fu den pramisi fu  Gado èn wi musu du san a e aksi fu wi. Boiti dati, Yehovah e gebroiki „a koni srafu di de fu frutrow” fu gi wi furu leri (Mat. 24:45). Sobun, te wi e warderi den sani di wi e leri fu Yehovah, dan wi o de leki den owruten futuboi fu en di ben de seiker taki a Kownukondre ben o kon.

8. Fa begi kan tranga a bribi fu wi?

⁸ Begi na wan tra sani di yepi den owruten futuboi fu Gado fu tan abi wan tranga bribi. Te den ben e si fa Gado piki den begi fu den, dan a bribi fu den ben e kon moro tranga (Neh. 1:4, 11; Ps. 34:4, 15, 17; Dan. 9:19-21). Wi srefi kan taigi Yehovah krin sortu broko-ede wi abi fu di wi sabi taki a o arki wi èn taki a o gi wi a krakti fu horidoro nanga prisiri. Wi bribi e kon moro tranga te wi e si fa a e piki den begi fu wi. (Leisi 1 Yohanes 5:14, 15.) Fu di bribi na wan fasi fu a yeye fu Gado, meki wi musu „tan aksi” Gado fu gi wi a yeye disi, soleki fa Yesus leri wi fu du.​—Luk. 11:9, 13.

9. Boiti taki wi musu begi gi wisrefi, gi suma wi musu begi tu?

⁹ Wi no musu begi Gado nomo fu a yepi wi. Ma wi musu taigi en tangi tu fu den „kefalek moi sani” di a du èn di ’furu so te, taki wi no man teri den’ (Ps. 40:5). Den begi fu wi musu sori tu taki wi e „tan prakseri den sma di de na strafu-oso”. Wi musu firi „neleki [wi] de na strafu-oso makandra nanga den”. Boiti dati, wi musu begi gi den brada fu wi na heri grontapu, spesrutu gi „den wan di e teki fesi na [wi] mindri”. Te wi e si fa Yehovah e piki den begi disi, dan dati e naki wi ati!​—Hebr. 13:3, 7.

10. San yepi furu owruten futuboi fu no drai baka gi Gado? Kari wan tu eksempre.

¹⁰ Na Hebrewsma kapitel 11, na apostel Paulus e taki fu den tesi di furu futuboi fu Gado kisi, aladi a no kari den na den nen. Fu eksempre, a e taki fu umasma di ben lasi den manpikin na ini dede, ma di kisi den baka fu di Gado gi den wan opobaka. Na apostel e taki tu fu trawan di ’no ben wani meki sma bai den kon fri fu di den ben wani kisi wan moro betre opobaka’ (Hebr. 11:35). Wi no sabi fu suma Paulus e taki dyaso, ma wi sabi taki sma ben ston man leki Nabot nanga Sakaria kiri, fu di den gi yesi na Gado èn fu di den ben du a wani fu en (1 Kow. 21:3, 15; 2 Kron. 24:20, 21). Danièl nanga den mati fu en ben kisi na okasi fu „kon fri” efu den ben o drai baka gi Gado. Ma den no du dati. Fu di den ben e bribi na ini Gado, meki den ben man „tapu a mofo fu lew” èn den ben man „tapu a krakti fu faya” tu.​—Hebr. 11:33, 34; Dan. 3:16-18, 20, 28; 6:13, 16, 21-23.

11. Sortu tesi son profeiti kisi fu di den ben abi bribi?

¹¹ Fu di profeiti leki Mikaya nanga Yeremia ben abi bribi, meki den ben e ’kisi tesi, sma ben e spotu den èn den trowe den go na ini strafu-oso’. Trawan soleki Elia ben abi fu ’waka lontu na ini sabana èn na tapu bergi. Den ben e libi na ini bergi-olo èn na ini olo na ondro gron.’ Ala den sma disi ben nyan pina fu di den ben e ’fruwakti taki den sani di den ben e howpu, ben o kon tru nomonomo’.​—Hebr. 11:1, 36-38; 1 Kow. 18:13; 22:24-27; Yer. 20:1, 2; 28:10, 11; 32:2.

12. Suma na a moro moi eksempre gi wi èn san yepi en fu horidoro di a kisi tesi?

¹² Baka di Paulus taki fu difrenti man nanga uma di ben abi bribi, a bigin taki fu a moro moi eksempre di wi abi. Dati na wi Masra Yesus Krestes. Hebrewsma 12:2 e taki: „Na fu di a ben sabi taki prisiri ben e wakti en, meki a ben de klariklari fu  dede na a pinapostu sondro fu broko en ede taki a ben o kisi syen. A go sidon na a reti-anusei fu a kownusturu fu Gado.” Iya, wi musu „poti prakseri finifini” na a fasi fa Yesus sori bribi di a kisi den moro hebi tesi. (Leisi Hebrewsma 12:3.) Neleki Yesus, na so den fosi Kresten, soleki a disipel Antipas, weigri fu drai baka gi Gado (Openb. 2:13). Den Kresten disi kisi den pai kaba fu go libi na hemel, aladi den futuboi fu owruten e wakti fu kisi wan opobaka dya na grontapu (Hebr. 11:35). Syatu baka di a Kownukondre seti na ini 1914, ala den salfu futuboi disi di ben e sribi na ini dede, kisi wan opobaka fu go libi leki yeye na ini hemel èn makandra nanga Yesus den o tiri grontapu.​—Openb. 20:4.

13, 14. Sortu tesi Rudolf Graichen kisi èn san yepi en fu horidoro?

¹³ Milyunmilyun futuboi fu Gado na ini a ten disi e teki na eksempre fu Yesus fu di den e tan poti prakseri na san den e howpu èn den no e meki tesi swaki a bribi fu den. Luku na eksempre fu Rudolf Graichen, di gebore na Doisrikondre na ini 1925. A kan memre ete taki fowtow fu Bijbel tori ben e anga na en oso. A e skrifi: „Tapu wan fu den fowtow disi yu ben  kan si wan busidagu nanga wan pikin skapu, wan pikin fu wan bokoboko nanga wan tigri èn wan pikin kaw nanga wan lew. Den alamala ben e libi na ini freide nanga makandra èn wan pikin boi ben e tiri den. . . . Noiti moro mi frigiti den fowtow disi” (Yes. 11:6-9). Aladi den Gestapo-skowtu èn bakaten den Communist tiriman fu Owstu-Doisrikondre frufolgu en omeni yari, toku Rudolf no lasi a howpu di a ben abi fu libi na ini a paradijs.

¹⁴ Tra bigi tesi di Rudolf kisi na taki di en mama ben de na ini a strafuman-kampu fu Ravensbrück, a dede fu di a kisi wan siki di den e kari tifus. Rudolf si tu fa en papa lasi bribi èn fa a teken wan dokumenti pe a taki dati a no ben wani de wan Kotoigi fu Yehovah moro. Baka di den lusu Rudolf, a kisi a grani fu dini leki kring-opziener. Baka dati a kisi a kari fu go na a Gileadskoro èn den seni en leki zendeling go na Chili pe a ben e dini baka leki kring-opziener. Ma a kisi moro tesi. Wán yari baka di a trow nanga wan zendeling sisa di nen Patsy, a beibi fu den di ben de wan meisje, dede. Bakaten en wefi di ben abi 43 yari nomo, kon dede tu. Rudolf pasa ala den tesi disi. Srefi di a ben kon owru èn a ben siki, a ben de wan gewoon pionier èn wan owruman na a ten di na ondrofenitori fu en kon na ini A Waktitoren fu 1 augustus 1997, bladzijde 20-25. ^[1]

15. Kari wan tu eksempre fu Yehovah Kotoigi di ben horidoro nanga prisiri, aladi sma frufolgu den.

¹⁵ Te now ete Yehovah Kotoigi e kisi furu tesi, ma toku den e tan de nanga prisiri. Fu eksempre, hondrohondro brada nanga sisa fu wi de na strafu-oso na Eritrea, Singapore nanga Zuid-Korea, nofo tron fu di den wani du san Yesus taki èn dati meki den no e go na feti (Mat. 26:52). Wan tu fu den na Brada Isaac, Brada Negede nanga Brada Paulos di de na strafu-oso na Eritrea moro leki 20 yari! Den brada disi no kisi na okasi fu trow èn fu sorgu gi den owru papa nanga mama. Toku den tan dini Yehovah, aladi sma pina den hebi. Te yu e luku den fesi tapu a jw.org website fu wi, dan yu e si taki den no lasi howpu èn taki a bribi fu den tranga ete. Srefi den cipier kon kisi lespeki gi den.

16. Fa wan tranga bribi kan yepi yu?

¹⁶ Furu Kotoigi fu Yehovah no kisi den sortu hebi tesi disi. Ma den e kisi tra tesi. Furu fu den e pina fu di den pôti noso fu di feti nanga rampu e pasa na ini a kondre fu den. Trawan teki na eksempre fu Moses nanga den famiri-edeman èn dati meki den no wani kisi biginen na ini a grontapu disi. Den libi ala gudu na baka soso fu kan dini Yehovah. Den e du ala san den man fu no meki grontapu gudu kori den èn fu no libi leki sma di e prakseri densrefi nomo. San yepi den? Den lobi Yehovah èn den abi a tranga bribi taki a o puru ala ogri di e pasa èn taki a o gi den futuboi fu en têgo libi na ini wan nyun grontapu pe soso retidu o de.​—Leisi Psalm 37:5, 7, 9, 29.

17. San yu o du fu tan abi wan tranga bribi èn san wi o luku na ini a tra artikel?

¹⁷ Na ini na artikel disi wi si taki te wi e denki dipi fu den sani di Gado pramisi wi èn te wi abi a gwenti fu begi, dan dati o tranga a bribi fu wi. A bribi disi o yepi wi fu horidoro te wi e kisi tesi èn fu tan fruwakti taki den sani di wi e howpu, o kon tru. Ma na ini a tra artikel wi o si san moro Bijbel e taki fu bribi.