1, 2. (a) Fa wan Kresten kan firi te kenki kon na ini en libi di a no ben fruwakti? (Luku a prenki na a bigin fu na artikel.) (b) Soleki fa Psalm 131 e sori, dan sortu fasi kan yepi wi fu abi wan korostu firi?

BAKA DI Lloyd nanga Alexandra dini na Betel moro leki 25 yari, den kisi fu yere taki den no ben o dini moro na Betel. Na ini a bigin den ben e sari. Lloyd taki: „Mi ben firi leki Betel èn a wroko di mi ben e du ben de mi libi. Mi ben frustan fu san ede a kenki kon, ma na ini den wiki nanga den mun baka dati, mi ben abi a firi leki mi no ben bun nofo.” Lloyd taki dati son leisi a ben e firi bun, ma tra leisi baka a ben e sari.

² Ten na ten kenki o kon na ini wi libi di wi no e fruwakti. Te dati e pasa wi kan broko wi ede èn a kan meki wi stress (Odo 12:25). A kan muilek gi wi srefi fu frustan fu san ede sani kenki. Te disi e miti wi, dan san kan yepi wi fu ’kowru wi ati’? (Leisi Psalm 131:1-3.) Wi o luku fa son futuboi fu Yehovah fu a ten di pasa èn fu a ten disi ben man tan abi wan korostu firi aladi a situwâsi fu den kenki.

3. Fa a libi fu Yosef ben kenki?

³ Yosef ben abi sowan 17 yari di den brada fu en seri en leki srafu. Den brada fu en ben dyarusu na en tapu fu di en papa ben lobi en moro den (Gen. 37:2-4, 23-28). Sowan 13 yari langa Yosef pina na ini Egepte. A ben musu wroko leki srafu èn baka dati den poti en na ini strafu-oso. Yosef ben de farawe fu en papa di a ben lobi so te. San yepi en fu no lasi-ati èn fu no kisi bita-ati?

4. (a) San Yosef ben e du di a ben de na ini strafu-oso? (b) Fa Yehovah piki den begi fu Yosef?

⁴ A musu fu de so taki di Yosef ben de na ini strafu-oso, a ben prakseri fa Yehovah ben yepi en (Gen. 39:21; Ps. 105:17-19). Kande a ben e prakseri den dren di Yehovah ben gi en di a ben moro yongu. A kan taki den dren disi gi en a dyaranti taki Yehovah ben de nanga en (Gen. 37:5-11). A no de fu taki dati a ben begi Yehovah furu èn a ben e taigi en fa a ben firi (Ps. 145:18). Yehovah piki den begi fu Yosef. A gi en a dyaranti taki a ben de „nanga en” awinsi san ben e pasa.​—Tori 7:9, 10. *

5. Fa „a freide fu Gado” kan yepi wi fu tan dini Yehovah?

⁵ Awinsi o muilek a situwâsi fu wi de, toku wi kan abi „a freide fu Gado” di kan kibri wi frustan èn di kan meki wi firi korostu. (Leisi Filipisma 4:6, 7.) Te wi abi furu broko-ede, dan „a freide fu Gado” kan gi wi a krakti fu tan dini Yehovah èn fu no gi abra. Meki wi luku wan tu eksempre fu brada nanga sisa di ondrofeni disi.

6, 7. Fu san ede a bun fu aksi Yehovah fu gi wi wan korostu firi? Fruteri wan ondrofenitori.

⁶ Ryan nanga Juliette ben e dini leki spesrutu pionier fu wan pisi ten. Ma di den yere taki den no ben o dini moro leki spesrutu pionier, den firi broko-saka. Ryan taki: „Wantewante wi begi Yehovah. Wi ben sabi taki disi ben de wan okasi fu sori taki wi e frutrow na en tapu. Furu sma na ini a gemeente no ben e dini Yehovah langa ete. Sobun, wi begi Yehovah fu yepi wi fu sori bribi, so taki wi kan de wan bun eksempre gi den.”

⁷ Fa Yehovah piki den begi fu den? Ryan e taki: „Wantewante baka di wi begi, wi no ben e sari moro èn wi no ben e broko wi ede moro. A freide fu Gado ben kibri wi ati nanga wi frustan. Wi kon frustan taki Yehovah kan tan gebroiki wi efu wi abi a yoisti denki.”

8-10. (a) Fa a yeye fu Gado e yepi wi te wi abi broko-ede? (b) Fa Yehovah kan yepi wi te wi e tan du wi diniwroko?

⁸ A yeye fu Gado kan gi wi wan korostu firi, ma a kan meki wi feni Bijbeltekst tu di kan yepi wi fu frustan san moro prenspari. (Leisi Yohanes 14:26, 27.) Luku san pasa nanga Philip nanga Mary, wan trowpaar di dini na Betel pikinmoro 25 yari. Baka di den komoto na Betel, a mama fu Philip nanga a mama fu Mary dede. Boiti dati wan tra famiri fu Philip dede tu. Ala den sani disi pasa na ini fo mun. Now den ben musu sorgu gi Mary en papa di ben kon kensi.

⁹ Philip taki: „Mi ben denki taki sani ben e go bun nanga mi, ma toku wan  sani ben e misi. Na ini wan Waktitoren studie-artikel mi leisi Kolosesma 1:11. A tru taki mi ben e horidoro, ma mi no ben e ’horidoro nanga pasensi èn nanga prisiri’. A tekst disi memre mi taki a no a situwâsi fu mi musu bepaal efu mi o abi prisiri. Ma na a yeye fu Gado kan yepi mi fu abi prisiri na ini mi libi.”

¹⁰ Fu di Philip nanga Mary tan du a diniwroko fu den, meki Yehovah gi den furu blesi. Syatu baka di den komoto na Betel, den ala tu feni Bijbelstudie di ben e go na fesi èn di ben wani studeri moro leki wán leisi na ini a wiki. Mary e taki dati a ben e gi den furu prisiri fu studeri nanga den sma disi. A ben de neleki Yehovah ben e taigi den taki ala sani o go bun.

11, 12. (a) Sortu sani di Yosef du, meki taki Yehovah blesi en? (b) Sortu pai Yosef kisi fu di a horidoro?

¹¹ Te wi libi kenki wantronso, wi kan bigin broko wi ede so te, taki wi e prakseri soso den problema fu wi. Ma Yosef no ben meki taki a sani disi pasa nanga en. Aladi a situwâsi fu en ben kenki, toku a tan du sani di meki taki Yehovah blesi en. Na ini strafu-oso Yosef wroko tranga. A ben e du ala sani di na edeman fu a strafu-oso ben aksi en fu du, neleki fa a ben du di a ben e wroko gi Potifar.​—Gen. 39:21-23.

¹² Wan dei Yosef kisi a frantwortu fu luku tu strafuman di ben abi wan hei posisi fosi na ini na oso fu Kownu. Yosef ben sori switifasi gi den man disi èn dati meki den no ben frede fu fruteri en sortu problema den ben abi. Wan neti den ben kisi wan dren di ben meki den sari èn a tra mamanten den fruteri Yosef a dren (Gen. 40:5-8). Yosef no ben sabi taki na a takimakandra disi ben o meki taki a kon fri bakaten. Aladi a ben musu koti strafu ete tu yari, a ben lusu bakaten èn a srefi dei dati a tron a moro makti man baka a kownu.​—Gen. 41:1, 14-16, 39-41.

13. Awinsi na ini sortu situwâsi wi de, san wi musu du efu wi wani taki Yehovah blesi wi?

¹³ Neleki Yosef, wi libi kan kenki wantronso èn kande wi no man du noti na a situwâsi dati. Ma efu wi tan hori pasensi èn efu wi tan du ala san wi man, dan Yehovah o blesi wi (Ps. 37:5). A tru taki son leisi wi e „bruya”, ma neleki fa na apostel Paulus taki, dan noiti a o de so taki „wi no man feni nowan lusu” gi a problema fu wi (2 Kor. 4:8). Yehovah o de nanga wi spesrutu efu wi e tan du wi diniwroko.

14-16. San a preikiman Filipus du aladi en situwâsi ben kenki?

¹⁴ A preikiman Filipus na wan moi eksempre gi wi, fu di a ben tan poti prakseri na a preikiwroko aladi en situwâsi ben kenki. Na ini Yerusalem, den kiri Stefanus èn baka dati sma bigin frufolgu den Kresten. * Na a ten dati, Filipus ben kisi wan nyun grani èn a ben e du en wroko bun (Tori 6:1-6). Ma fu di sma ben frufolgu den Kresten, meki den ben lowe go na difrenti presi. Filipus no tapu nanga a preikiwroko. Di a go na Samaria, wan foto pe furu sma no ben yere a bun nyunsu ete, a bigin preiki drape.​—Mat. 10:5; Tori 8:1, 5.

¹⁵ Filipus ben de klariklari fu go na iniwan presi pe a yeye fu Gado ben sori en. Dati meki Yehovah ben man gebroiki en fu preiki na presi pe sma no ben yere a bun nyunsu ete. A no ben desko den Samariasma, aladi furu Dyu ben e wisiwasi den. Dati meki den alamala „ben e poti prakseri” na san Filipus ben e taki!​—Tori 8:6-8.

¹⁶ Baka dati a santa yeye tyari Filipus go na Asdod nanga Sesareya, tu foto pe furu trakondre sma ben e tan (Tori 8:39, 40). Sowan 20 yari baka di Filipus bigin preiki na ini Samaria, en situwâsi ben de tra fasi. Now a ben e tan na ini Sesareya èn a ben abi pikin. Aladi en situwâsi kenki, toku a tan preiki a bun nyunsu èn a bakapisi ben de taki Yehovah blesi en nanga en osofamiri.​—Tori 21:8, 9.

17, 18. Te wi e tan poti prakseri na a preikiwroko, dan fa dati kan yepi wi te wi libi kenki?

¹⁷ Furu sma di e du furuten diniwroko, ondrofeni taki te den e tan poti prakseri na a preikiwroko, dan dati e yepi den fu de koloku èn fu no bruya awinsi a libi fu den kenki. Baka di Osborne nanga Polite, wan trowpaar fu Zuid-Afrika komoto fu Betel, den ben denki taki esi-esi den ben o feni wan presi fu tan èn wan wroko di den ben kan du wan tu dei na ini a wiki. Ma Osborne taki: „Wi no feni wroko so gaw leki fa wi ben denki.” En frow Polite e taki: „Dri mun langa wi tan sondro wroko èn wi no ben abi nowan moni. A ben hebi gi wi.”

¹⁸ San yepi Osborne nanga Polite na  ini a muilek situwâsi fu den? Osborne e taki: „Wi tan preiki makandra nanga a gemeente èn dati yepi wi fu no bruya èn fu de koloku. Wi bosroiti taki wi ben o go furu na ini a preikiwroko na presi fu sidon broko wi ede èn a sani dati gi wi furu prisiri. Wi suku wroko na ala sei èn te fu kaba wi feni wroko.”

19-21. (a) San o yepi wi fu tan abi wan korostu firi? (b) Sortu wini wi kan kisi te wi e frutrow tapu Yehovah, awinsi wi situwâsi kenki?

¹⁹ Den eksempre disi e sori taki awinsi wi situwâsi kenki, efu wi e tan du ala sani wi man èn efu wi e tan frutrow tapu Yehovah, wi o abi wan korostu firi. (Leisi Mika 7:7.) Wi o si srefi taki wi o tron moro bun mati fu Yehovah te wi e tan frutrow na en tapu, awinsi wi situwâsi kenki. Polite di wi ben taki fu en, fruteri taki di a komoto fu Betel a leri taki a musu tan frutrow tapu Yehovah, awinsi sani no e go leki fa a wani. A e taki: „Mi kon tron wan moro bun mati fu en.”

²⁰ Mary di wi ben taki fu en kaba, e sorgu en papa ete aladi a e pionier. A e taki: „Mi leri taki te mi abi broko-ede, mi musu sidon rustig, mi musu begi èn mi no musu broko mi ede moro. A moro prenspari sani di mi leri, na taki mi musu libi ala sani gi Yehovah. Na ini a ten di e kon na dati wi o abi fu du tu.”

²¹ Lloyd nanga Alexandra di ben kari na a bigin, e taki dati di a situwâsi fu den kenki den ben musu du muiti fu tan abi wan tranga bribi fu di den kisi tesi di den no ben fruwakti. Ma den e taki dati tesi kan tyari kon na krin efu wi bribi tranga èn efu wi o horidoro na ini muilek situwâsi. Den kon si taki den tron moro bun sma.

22. Te wi e du ala san wi man awinsi na ini sortu situwâsi wi de, dan fu san wi kan de seiker?

²² Na ini a ten disi, wi libi kan kenki. Kande wi kisi wan tra toewijzing na ini na organisâsi, kande wi kon siki noso kande kenki kon na ini wi osofamiri. Awinsi sortu kenki kon, yu kan de seiker taki Yehovah e broko en ede nanga yu èn taki a o yepi yu na a yoisti ten (Hebr. 4:16; 1 Petr. 5:6, 7). Sobun, tan du ala san yu man awinsi na ini sortu situwâsi yu de. Begi yu hemel Tata Yehovah èn libi ala sani na ini en anu. Disi o yepi yu fu abi wan korostu firi awinsi yu libi kenki.