1, 2. Sortu sani tyari bun furu problema kon gi libisma èn suma kon nanga a sani dati?

SON sani di libisma meki, soleki telefon, lampu, wagi nanga ijskasi, meki a libi moro makelek gi wi. Ma tra sani soleki gon, landmijn, sigaret nanga na atoom bom, meki a libi kon moro muilek. Ma wan sani de di owru moro ala den sani disi èn di tyari bun furu problema kon gi libisma. San na dati? Dati na lei! Wan sma e lei te a e taki wan sani di no tru soso fu kori wan trawan. Suma meki a fosi lei? Yesus Krestes taki dati „Didibri” na „a tata fu ala lei”. (Leisi Yohanes 8:44.) O ten a fruteri a fosi lei?

² A du dati wan tu dusun yari pasa na ini a dyari fu Eden. A fosi man nanga uma, Adam nanga Eva, ben e libi wan switi libi na ini a moi paradijs di Yehovah ben meki gi den. Gado ben taigi den taki efu den nyan fu „a bon di nen ’Sabi san bun èn san ogri’”, den ben o dede. Aladi Satan ben sabi disi, toku a gebroiki wan sneki fu taigi Eva: „Unu no o dede kwetikweti.” Dati ben de a fosi lei. Baka dati Satan taki: „Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri.”​—Gen. 2:15-17; 3:1-5.

3. Fu san ede wi kan taki dati Satan abi takru-ati, èn san pasa di a fruteri a fosi lei?

 ³ Satan abi takru-ati. A ben sabi taki efu Eva ben bribi en èn efu a ben nyan fu a froktu a ben o dede, ma toku a fruteri en wan lei. Eva nanga Adam trangayesi Yehovah èn te fu kaba den dede (Gen. 3:6; 5:5). Boiti dati, a sondu fu den meki taki „ala sma e dede”. Fu taki en leti, ’dede e tiri leki kownu. A e tiri srefi den sma di no du a srefi sondu leki Adam’ (Rom. 5:12, 14). Now, na presi taki wi e libi fu têgo soleki fa Gado ben wani, wi e „libi seibitenti yari èn efu wi tranga wi kan libi aititenti yari”. Toku den yari dati lai „soso broko-ede nanga pina” (Ps. 90:10). A sari taki a wán lei di Satan fruteri, tyari so furu problema kon gi libisma!

4. (a) Sortu aksi wi o go luku? (b) Soleki fa Psalm 15:1, 2 e sori, dan suma kan de wan mati fu Yehovah?

⁴ Yesus ben taki dati Didibri „drai baka gi san tru, bika a no lobi san tru”. Te nanga now Satan no kenki. A e tan „kori sma na heri grontapu” nanga den lei fu en (Openb. 12:9). Wi no wani taki Didibri kori wi. Wi no wani meki a srefi fowtu fu Adam nanga Eva. Fu dati ede wi o go luku dri aksi: Fa Satan e kori sma? Fu san ede sma e lei? Fa wi kan sorgu taki wi e taki san tru, so taki wi no pori a matifasi di wi abi nanga Yehovah?​—Leisi Psalm 15:1, 2.

5. Fa Satan e kori sma na ini a ten disi?

⁵ Soleki fa na apostel Paulus ben taki, dan „wi sabi san [Satan] abi na prakseri” (2 Kor. 2:11). Sobun, wi kan sorgu taki a no kisi wi nanga den lei fu en. Wi sabi taki a heri grontapu de na ini a makti fu Satan. A abi den falsi kerki, den politiekman nanga den gridi bisnisman na ini en makti (1 Yoh. 5:19). Dati meki a no e fruwondru wi taki Satan nanga den ogri yeye fu en e meki sma di abi furu makti fruteri „lei” (1 Tim. 4:1, 2). Fu eksempre, son bisnisman e meki reklame fu seri sani di no bun noso fu puru moni na sma anu.

6, 7. (a) Fu san ede a moro ogri srefi te kerki fesiman e fruteri lei? (b) Yu sabi wan tu lei di kerki fesiman e fruteri sma?

⁶ Ma san moro ogri, na te kerki fesiman e fruteri lei. Fu san ede? Fu di efu sma bribi den falsi leri fu den èn den e du sani di Gado no lobi, dan den no o man libi fu têgo (Hos. 4:9). Yesus ben sabi taki den kerki fesiman fu a ten fu en ben e kori sma. Sondro fu frede a taigi den: „Helu fu unu, un leriman fu Wèt nanga Fariseiman, un hoigriman! Bika unu e abra se èn unu e waka lontu heri grontapu fu feni wán sma nomo fu meki a drai en libi. Te a drai en libi, dan unu e meki a tron wan sma di bun fu go na ini Gehena [têgo pori] èn a ogri tu tron moro unu srefi” (Mat. 23:15). Yesus ben taki dati den kerki fesiman dati ben de leki a tata fu den, Didibri di de „wan kiriman”.​—Yoh. 8:44.

⁷ Na ini a ten disi furu kerki de. Sma e kari sonwan fu den fesiman fu den, pastoor, pater noso rabi. Neleki den kerki fesiman fu fosi, den kerki fesiman disi e ’tapu sma fu kon sabi san tru’. Den e bribi leitori na presi fu bribi san skrifi na ini Gado Wortu (Rom. 1:18, 25). Wan tu lei di den e leri sma, na taki ogrisma e bron na ini hel, taki sma di dede e libi go doro, taki sma di dede e gebore baka èn taki Gado feni en bun te sma e libi wan homo sekslibi noso te  homo nanga lesbies trow nanga makandra.

8. Sortu lei den politiekman o fruteri dyonsro, ma fa wi musu si a lei dati?

⁸ Politiekman e fruteri lei fu kori sma tu. Wan fu den moro bigi lei di den politiekman o fruteri dyonsro, na taki „freide de èn ala sani e waka bun”. Ma te den taki a sani disi, „dan wantronso wan pori o kon na den tapu”. Den o wani kori sma fu bribi taki ala sani e go bun, aladi a grontapu e kon moro ogri. Ma wi no musu bribi a lei disi. Wi „sabi heri bun taki a dei fu Yehovah o kon leki wan fufuruman na neti”.​—1 Tes. 5:1-4.

9, 10. (a) Fu san ede sma e lei èn san na a bakapisi? (b) San wi no musu frigiti fu Yehovah?

⁹ Te sma meki wan nyun sani, dan fosi yu denki a e kon pôpi èn den e meki furu fu a sani dati. Na so a de tu nanga lei. Na ini a ten disi, sma e si en leki wan gewoon sani fu panya leitori èn a no soso den heihei man e kori sma. Na ini na artikel „Fu san ede wi e lei”, Y. Bhattacharjee skrifi taki „lei kon tron wan fu den sani di rutu dipi na ini libisma”. Nofo tron sma e lei fu kibri densrefi èn fu no meki sma sabi taki den meki wan fowtu noso taki den du wan ogri. Den e lei tu fu meki moni noso fu kisi son sani. Na artikel e taki moro fara taki son sma no abi trobi fu lei gi „sma di den no sabi, sma na wrokope, mati noso sma di den lobi”.

¹⁰ San e pasa fu di so furu sma e lei? Sma no e frutrow makandra moro èn osofamiri-libi e pori. Prakseri o hati a de te wan masra e kon sabi taki en frow waka gi en èn taki a e pruberi fu kibri a tori. Noso prakseri fa a hebi gi wan frow nanga en pikin te a masra e fon den noso e kosi den te den de na oso, aladi a e du leki a lobi den te den de na mindri tra sma. Ma wi no musu frigiti taki wi no man kibri noti gi Yehovah. A e „si ala sani krin èn nowan sani kibri gi en”.​—Hebr. 4:13.

11. San wi e leri fu a takru eksempre fu Ananias nanga Safira? (Luku a prenki na a bigin fu na artikel.)

¹¹ Na ini Bijbel wi kan leisi fu wan trowpaar di Satan ben gi „deki-ati” fu fruteri wan lei. Ananias nanga Safira ben pruberi fu kori den apostel. Den ben seri wan gron fu den, ma den tyari soso afu fu a moni gi den apostel. Den ben wani meki nen na ini a gemeente. Dati meki den ben du neleki den ben gi bun furu moni, aladi dati no ben de so. Ma Yehovah ben si san den du èn dati meki a strafu den.​—Tori 5:1-10.

12. San o pasa nanga sma di e lei èn fu san ede?

¹² Fa Yehovah e si sma di e lei? Satan nanga ala den sma di e lei neleki en, o kisi pori na ini „a se di e bron nanga faya” (Openb. 20:10; 21:8; Ps. 5:6). Fu san ede? Fu di Yehovah e si sma di e lei na a srefi fasi leki sma di e du afkodrei, sma di e du hurudu nanga kiriman.​—Openb. 22:15.

13. San wi sabi fu Yehovah èn san wi musu du efu wi wani taki a feni wi bun?

¹³ Wi sabi taki Yehovah „a no wan libisma taki a o fruteri lei”. Fu taki en leti, „Gado no man lei kwetikweti” (Num. 23:19; Hebr. 6:18). „Yehovah no lobi . . . sma di e lei” (Odo 6:16, 17). Efu wi wani taki a feni wi bun, dan ala ten wi musu taki san tru. Dati meki wi ’no e lei gi makandra’.​—Kol. 3:9.

14. (a) Na sortu fasi tru Kresten e difrenti fu sma fu falsi kerki? (b) Fruklari Lukas 6:45.

¹⁴ San na wán fasi fa tru Kresten e difrenti fu sma fu falsi kerki? Wi e „taki san tru”. (Leisi Sakaria 8:16, 17.) Paulus ben taki: „Wi e sori taki wi na dinari fu Gado te wi e . . . taki sani di tru” (2 Kor. 6:4, 7). Yesus ben taki: „San furu na ati, na dati mofo e taki” (Luk. 6:45). Sobun, te wan sma ati furu nanga sani di tru, dan ala ten a o taki san tru. Te a e taki nanga sma di a no sabi, sma na wrokope, mati noso sma di a lobi, dan ala ten a o taki san tru. Luku wan tu eksempre fa wi kan sori taki wi e taki san tru ala ten.

15. (a) Fu san ede a no bun fu abi tu fesi? (b) San kan yepi yonguwan fu no meki trawan dwengi den fu du sani di no bun? (Luku a futuwortu.)

¹⁵ Kande yu na wan yonguwan èn yu wani taki tra yonguwan lobi fa yu de. Ma sorgu taki yu no e kon de leki son yonguwan di abi tu fesi. Den yonguwan disi e du neleki den na Kotoigi te den de nanga den famiri noso sma fu a gemeente. Ma te den de nanga tra yonguwan di no e dini Yehovah noso te den de tapu Internet, dan den e tyari densrefi na wan fasi di no fiti. Kande den e taki dotitaki, den e weri krosi di no fiti, den e arki poku di no bun, den e dringi sopi teleki den drungu, den e gebroiki drugs, den e hori kibrikibri nanga wan sma èn den e du tra ogri sani. Den yonguwan disi e lei gi den papa nanga mama, gi den brada nanga sisa èn gi Yehovah (Ps. 26:4, 5). Ma Yehovah sabi te wi e ’gi en grani nanga wi mofo, aladi wi ati de farawe fu en’ (Mark. 7:6). Dati meki a bun fu du san na odo disi e taki: „No dyarusu na tapu sondari, ma tan lespeki Yehovah heri dei.”​—Odo 23:17. *

16. Fa yu kan sorgu taki yu e taki san tru te yu musu piki aksi tapu den formulier fu na organisâsi?

¹⁶ Kande yu wani tron wan gewoon pionier, yu wani dini na Betel noso yu wani du wan tra wroko gi na organisâsi. Te yu o piki den aksi na tapu den formulier, dan yu musu taki san tru. Yu musu taki fa yu gosontu de trutru, efu yu e luku felem noso arki poku di no fiti  èn efu yu e tyari yusrefi na wan fasi di no fiti (Hebr. 13:18). Ma kande yu du wan sani di Yehovah no lobi noso wan sani di e trobi yu konsensi èn yu no go taki nanga den owruman. San yu musu du dan? Go suku yepi na den owruman so taki yu kan dini Yehovah nanga wan krin konsensi.​—Rom. 9:1; Gal. 6:1.

17. San wi musu du te tiriman o poti aksi gi wi di abi fu du nanga wi brada?

¹⁷ Ma san yu musu du efu lanti tapu a wroko na ini yu kondre èn den e aksi yu sani fu wi brada? Yu musu taigi den ala san yu sabi? San Yesus ben du di wan tiriman fu Rome ben poti aksi gi en? Yesus sabi taki Bijbel e taki dati „wan ten de fu tan tiri èn wan ten de fu taki” èn dati meki son leisi a no ben e taki noti (Preik. 3:1, 7; Mat. 27:11-14). Na ini den sortu situwâsi disi wi musu denki bun fosi wi piki, so taki wi no meki ogri miti wi brada.​—Odo 10:19; 11:12.

18. Sortu frantwortu wi abi efu den owruman e aksi wi sani fu wan sma di du wan sondu?

¹⁸ Fa a de efu wan sma na ini a gemeente du wan seryusu sondu èn yu sabi fu a tori? Kande den owruman di musu sorgu taki a gemeente tan krin o aksi yu san yu sabi fu a tori. San yu o du efu a sma na wan bun mati fu yu noso yu famiri? „A sma di abi a gwenti fu taki sani di reti o fruteri san bun” (Odo 12:17; 21:28). Sobun, yu abi a frantwortu fu fruteri den owruman a heri tori, yu no musu fruteri den wan pisi nomo. Den abi a reti fu sabi ala sani so taki den kan sabi san na a moro bun fasi fu yepi a sma di du a sondu fu kon bun baka nanga Yehovah.​—Yak. 5:14, 15.

19. San wi o luku na ini a tra artikel?

¹⁹ A psalm skrifiman David ben taigi Yehovah na ini begi: „Yu e prisiri te mi e taki sani nanga wan krin ati” (Ps. 51:6). David ben sabi taki na den sani di de na ini wan sma ati e meki taki a e taki san tru. Ala ten tru Kresten musu „taki san tru”. Wan tra fasi fa wi kan sori taki wi e difrenti fu den sma fu falsi kerki na te wi e du muiti fu leri trawan den tru tori fu Bijbel. Na ini a tra artikel wi o si fa wi kan du dati.