MI GEBORE na ini 1934. Mi papa nanga mama, Fred nanga Edna Molohan, ben de Bijbel Ondrosukuman (Yehovah Kotoigi) 20 yari kaba. Mi breiti taki den leri mi fu lobi Yehovah. Wi ben e libi na ini Parsons, wan pikin foto na a zuid-owstusei fu Kansas. Pikinmoro ala sma na ini wi gemeente ben de salfuwan. Mi osofamiri ben e go doronomo na den konmakandra èn na ini a preikiwroko. Tapu satra bakadina wi ben abi a gwenti fu go du stratiwroko. Son leisi wi ben kon weri, ma ala ten mi papa ben tyari wi go nyan ice cream baka a preikiwroko.

A pikin gemeente fu wi ben abi wan bigi kontren. Wi ben musu preiki na ini wan tu pikin foto èn wi ben e go na den furu gron pe sma ben e prani èn ben e kweki meti. Te wi ben e gi den sma buku, dan den no ben e gi wi moni, ma den ben e gi wi gruntu, eksi (di den ben piki na ini den fowru koi) noso den ben e gi wi libilibi fowru srefi. Mi papa ben poti a bijdrage gi den buku kaba na ini a gemeente. Sobun, wi ben breiti nanga den nyanyan-sani di wi ben e kisi fu den sma.

Mi papa nanga mama ben abi wan gramofon di den ben e gebroiki na ini a preikiwroko. Mi ben pikin tumusi fu gebroiki en, ma mi ben lobi yepi mi papa nanga mama fu prei den lezing fu Brada Rutherford gi den gobaka nanga den Bijbelstudie.

Mi papa ben abi wan Ford di ben meki na ini 1936. A ben poti wan bigi boksu na en tapu èn wi gebroiki en fu preiki a bun nyunsu. Nofo tron wi ben e prei wan tu poku fu hari den sma prakseri èn baka dati wi ben e prei den Bijbel-lezing. Baka dati wi ben e gi den sma di ben wani sabi moro, buku fu leisi.

Di wi ben de na ini a pikin foto Cherryvale, na Kansas, mi papa rèi a wagi go na ini a park fu a foto, pe furu sma ben go koiri te sonde. Ne  skowtu kon èn den taigi en taki a ben kan gebroiki den boksu na tapu a wagi soso na dorosei fu a park. Mi papa rèi a wagi go poti na wan strati krosibei fu a park, pe den sma ben kan yere bun ete san a ben e prei. Na den okasi dati, a ben de wan span sani fu de nanga mi papa nanga mi bigi brada Jerry.

Na ini den yari dati, wi ben e du spesrutu preikiwroko na ini kontren pe furu sma ben e gens wi. Leki fa mi ben taki na a bigin, wi ben e wiki mindrineti èn sondro fu wiki den sma wi ben e poti traktaat noso pikin buku na ondro den doro fu den. Baka dati, wi alamala ben e miti makandra na dorosei fu a foto fu luku efu skowtu no hori nowan fu wi.

Wan tra fasi fa wi ben e du a preikiwroko, na taki wi ben e weri bigi bord di ben abi wan boskopu na tapu èn wi ben e waka na ini a foto. Mi man memre taki wan leisi wan tu brada nanga sisa ben e waka na ini a foto fu wi nanga bord. Na tapu den bord disi ben skrifi: „Kerki na wan kruka bisnis èn a e kori sma.” Den ben bigin na wi oso, dan den waka sowan wán nanga afu kilometer na ini a foto, dan den drai kon baka na wi oso. Koloku taki nowan sma stop den, ma furu sma ben wani sabi moro.

Furu tron mi osofamiri ben e go na Texas gi den kongres. Mi papa ben e wroko gi wan loko bedrijf èn dati meki wi ben no ben abi fu pai te wi ben e teki loko go na den kongres èn te wi ben e go luku famiri. Mi mama en bigi brada, Fred Wismar, nanga en wefi Eulalie ben e libi na ini a foto Temple, na Texas. Mi omu Fred kon sabi a tru bribi na ini den yari baka 1900 di a ben yongu ete. Di a teki dopu, a fruteri den brada nanga sisa fu en, èn mi mama tu, san a leri. Den Kotoigi fu Texas ben sabi mi omu heri bun fu di a ben de kring-opziener. A ben abi switifasi, a ben lobi lafu, a ben de fayafaya na ini na anbegi èn a ben de wan bun eksempre gi mi.

Na ini 1941 wi teki wan loko go na wan bigi kongres na St. Louis, na ini Missouri. Den ben aksi ala yonguwan drape fu kon sidon krosibei fu a podium fu arki a lezing di Brada Rutherford ben o hori. A lezing ben nen: „Pikin fu a Kownu.” Na a kaba fu a lezing ala den 15.000 yonguwan kisi wan moi sani. Brada Rutherford nanga den brada di ben yepi en gi ibriwan fu wi a nyun buku di ben nen Children (Pikin).

Na ini april 1943, wi go na wan kongres na ini a foto Coffeyville, na Kansas. Drape den meki bekènti taki ala gemeente ben o abi wan nyun skoro, a Theokrasia Diniwroko-skoro. Wi kisi wan buku tu di ben abi 52 les di wi ben o gebroiki na a skoro. Moro lati a yari dati mi hori mi fosi lezing leki studenti fu a skoro. A kongres dati ben de wan spesrutuwan gi mi fu di mi nanga wan tu tra sma ben dopu. Wi dopu na ini a kowru watra fu wan watra-olo di ben de na ini wan gron pe sma ben e kweki meti.

Di mi klari skoro na ini 1951, mi ben musu bosroiti san mi ben o du nanga mi libi. Mi brada Jerry ben dini na Betel fu wan pisi ten. Mi ben wani go na Betel tu èn dati meki mi seni mi formulier gi den brada na Brooklyn. Syatu baka dati mi kisi a kari fu go na Betel èn mi bigin dini drape tapu 10 maart 1952. Disi ben de wan heri bun bosroiti fu di a yepi mi fu du moro gi Gado.

Mi ben howpu taki mi ben o wroko na ini a drukkerij pe den e meki tijdschrift nanga tra buku. Ma noiti mi kisi na okasi dati. Na presi fu dati, mi ben musu wroko na ini na eetzaal èn baka dati na ini a kukru. Mi ben lobi a wroko disi èn mi leri furu. Wi ben e wroko na ini shift èn dati meki wi ben abi wan tu yuru fu rostu. Den yuru dati mi ben lobi go na a bibliotheek fu Betel fu studeri. Disi yepi mi fu kon abi wan moro tranga bribi èn fu tron wan moro bun mati fu Yehovah. Dati meki mi ben wani tan dini Yehovah na Betel solanga leki mi man. Jerry gowe fu Betel na ini 1949 èn a trow nanga Patricia, ma den ben e tan krosibei fu Brooklyn. Ala ten den ben e yepi mi èn den gi mi deki-ati na ini den fosi yari di mi ben de na Betel.

Syatu baka di mi doro na Betel, den brada ben e luku sortu brada fu Betel den ben kan gebroiki fu hori lezing. Den brada disi ben o kisi a toewijzing fu go hori Bijbel-lezing na ini ala den gemeente di no ben fara moro leki 320 kilometer fu Brooklyn. Boiti dati den ben o wroko makandra nanga den gemeente na ini a preikiwroko. Mi na wan fu den brada di kisi a moi grani disi. Mi ben e senwe te mi ben e go na den gemeente fu hori lezing. Na a ten dati den lezing ben de wán yuru langa. Nofo tron mi ben teki loko go na den gemeente. Mi man memre heri bun san pasa wan sonde bakadina na ini 1954, di mi teki wan loko go baka na New York. Mi ben musu doro na Betel na mofoneti, ma tranga winti ben e wai èn furu snew ben fadon. A masyin fu a loko ben tapu fu wroko èn dati meki mi doro na New York City tapu munde feifi yuru mamanten. Mi teki wan tra loko go na Brooklyn, dan mi go wroko wantewante na ini a kukru. Mi ben lati pikinso èn mi ben weri fu di mi no sribi heri neti. Awinsi mi ben e kisi den sortu problema disi, toku a ben gi mi furu prisiri fu go luku den gemeente èn fu kon leri sabi furu tra brada nanga sisa.

Den fosi yari di mi ben de na Betel mi ben mag yepi nanga wan fu den programa di ben de fu yere tapu WBBR, a radio station fu wi. Na a ten dati a station ben de na a di fu tu sodro fu a 124 Columbia Heights gebow. Na ini a programa disi wan grupu sma ben e studeri Bijbel ibri wiki èn mi ben de wan fu den sma disi. Brada A. H. Macmillan di ben e wroko na Betel furu yari kaba, ben e teki prati furu na a radio programa disi. Wi ben lobi kari en Brada Mac. A ben de wan bun eksempre gi wi leki yongu brada na Betel fu di a tan dini Yehovah aladi a kisi furu tesi.

Na ini 1958 mi kisi a wroko fu seti sani gi den studenti fu a Gileadskoro. Mi ben musu yepi den fu kisi visum fu go na den kondre pe den ben o dini leki zendeling. Mi ben musu seti sani gi den fu go na den kondre dati. Na a ten dati a ben diri fu frei nanga opolani. Dati meki furu fu den studenti di ben e go na Afrika nanga Asia ben e go nanga bigi sipi di ben e tyari lai go na den kondre dati. Bakaten di a no ben diri moro fu frei nanga opolani, furu fu den studenti ben e frei nanga opolani go na den kondre pe den ben o dini leki zendeling.

Na ini 1960 mi kisi moro wroko. Mi ben musu yuru opolani di ben o tyari brada nanga sisa fu Amerkankondre go na den internationaal kongres di ben o hori na ini Europa na ini 1961. Mi srefi go na wan fu den kongres dati na ini Hamburg, na Doisrikondre. Baka a kongres mi nanga  dri tra brada fu Betel yuru wan wagi, dan wi rèi fu Doisrikondre go na Italiakondre èn wi go luku a bijkantoro na Rome. Baka dati wi go na Fransikondre, wi pasa den Pirinei-bergi, dan wi doro na Spanyorokondre pe lanti ben tapu a wroko fu wi. Wi ben man gi den brada nanga sisa na ini Barcelona wan tu buku di wi ben domru na ini kado papira. Wi ben breiti fu si den! Baka dati wi rèi go na Amsterdam èn fu drape wi teki wan opolani go baka na New York.

Na ini 1962 mi kisi a wroko fu seti sani gi den 583 brada nanga sisa di ben o go na difrenti internationaal kongres di ben o hori na ala sei fu grontapu. Dati ben de a „Têgo bun nyunsu” Kongres fu 1963. Den brada nanga sisa ben o go na kongres na ini Europa, Asia nanga Stille Zuidzee èn baka dati den ben o go na Honolulu, Hawai, èn te fu kaba den ben o go na Pasadena, na ini Kalifornia. Den ben o go koiri tu na Libanon nanga Yordania fu leri moro fu den kondre di kari na ini Bijbel. Na afdeling fu wi ben musu sorgu taki den brada ben sabi sortu opolani den ben musu teki, wi ben e yuru hotel kamra èn wi ben sorgu taki den ben abi visum fu go na den difrenti kondre.

A yari 1963 ben de wan prenspari yari gi mi. Tapu 29 yuni, mi trow nanga Lila Rogers fu Missouri, di ben kon dini na Betel sowan dri yari na fesi. Wan wiki baka di wi trow, mi nanga Lila go miti a grupu di ben o go na den difrenti internationaal kongres. Wi go na Grikikondre, Egepte nanga Libanon. Fu drape wi teki wan opolani go na Yordania di no ben de so fara. Ma lanti ben tapu a wroko fu wi na ini Yordania èn Yehovah Kotoigi no ben kisi visum fu kon na ini a kondre. Sobun, wi no ben sabi san ben o pasa te wi ben doro na ini a kondre. Wi no ben man bribi di wi komoto na ini na opolani èn wi si wan grupu brada nanga sisa di ben wakti wi. Den ben abi wan bigi duku pe ben skrifi: „Wan switikon Yehovah Kotoigi!” A sani disi ben meki wi firi bun trutru. A ben de wan moi sani fu go luku ala den kondre di kari na ini Bijbel. Wi si den presi pe Abraham, Isak nanga Yakob ben libi, pe Yesus nanga den apostel ben e preiki èn pe a Kresten bribi bigin panya go „na den moro farawe presi fu grontapu”.​—Tori 13:47.

Sowan 55 yari kaba Lila e horibaka gi mi te mi e tyari den frantwortu fu mi. Wi go na Spanyorokondre nanga Potogisikondre wan tu leisi di a wroko fu wi ben tapu na ini den kondre dati. Wi ben kan gi den brada nanga sisa deki-ati èn wi ben man tyari buku nanga tra sani di den abi fanowdu. Wi ben kan go luku wan tu brada srefi di ben de na strafu-oso na ini Cádiz, na Spanyorokondre. Mi ben breiti taki mi ben man hori wan lezing fu gi den deki-ati.

Na ini den yari baka 1963, mi ben man seti sani gi brada nanga sisa di ben o go na internationaal kongres na ini Afrika, Australia,  Europa, Hawai, Mindri-Amerika, Nyun Zeeland, Owstu-Asia, Porto Riko, nanga Zuid-Amerika. Mi nanga Lila go na furu moi kongres di noiti wi o frigiti. Wan fu den na a kongres di hori na ini 1989 na Warshaw, na ini Polen. Furu brada nanga sisa fu Rosiakondre ben man go na a bigi kongres dati. A ben de a fosi leisi di den ben man go na wan kongres èn furu fu den koti strafu omeni yari langa fu a bribi fu den ede.

Wan tra moi grani di mi ben abi na taki mi ben kan go na difrenti bijkantoro fu gi a Betel famiri nanga den zendeling deki-ati. A lasti leisi di wi go luku a bijkantoro fu Zuid-Korea, wi ben kan go luku 50 fu den brada fu wi di de na strafu-oso na ini Suwon. Nowan fu den ben krutu fu a situwâsi fu den èn den no ben man wakti fu bigin preiki baka. A bun eksempre fu den brada disi gi mi furu deki-ati!​—Rom. 1:11, 12.

Mi ben man si nanga mi eigi ai fa Yehovah yepi a pipel fu en fu gro na ini den yari di pasa. Di mi dopu na ini 1943 wi ben abi 100.000 preikiman. Ma now wi abi moro leki 8.000.000 sma di e dini Yehovah na ini sowan 240 kondre. A tranga wroko fu den studenti fu a Gileadskoro yepi tu fu meki na organisâsi gro. A gi mi furu prisiri fu wroko makandra nanga furu fu den zendeling disi èn fu yepi den fu doro na a kondre pe den ben musu go dini!

Mi breiti taki di mi ben yongu mi teki a bosroiti fu du moro gi Yehovah èn fu go dini na Betel. Yehovah gi mi furu blesi ala den yari di mi e du a furuten diniwroko. Boiti taki wi lobi a wroko di wi e du na Betel, mi nanga Lila ben abi a grani tu fu preiki makandra nanga difrenti gemeente na ini Brooklyn pe wi meki furu mati.

Mi e tan du mi wroko na Betel ibri dei èn mi breiti taki Lila e yepi mi. Aladi mi abi 84 yari now, mi breiti taki mi kan tan du wroko di e gi mi prisiri. Mi e yepi fu piki brifi di sma e seni kon na a edekantoro, fu seni den brifi disi gowe èn fu kibri den.

A e gi mi furu prisiri fu de na ini na organisâsi fu Yehovah èn fu si a bigi difrenti na mindri sma di e dini en èn sma di no e du dati. Now wi kan frustan den wortu na ini Maleaki 3:18 moro bun: „Unu o man si krin baka suma na wan reti-ati sma èn suma na wan ogri sma, suma e dini Gado èn suma no e dini en.” Ala dei wi e si fa a grontapu fu Satan e kon moro ogri. A lai nanga sma di no abi howpu nanga prisiri na ini a libi. Ma den sma di e dini Yehovah de koloku na ini den muilek ten disi èn den abi wan moi howpu gi a ten di e kon. Na wan moi grani wi abi fu prati a bun nyunsu fu a Kownukondre! (Mat. 24:14) Heri esi, Gado Kownukondre o pori na ogri grontapu disi èn a o seti a nyun grontapu pe wi o kisi ala den sani di Gado pramisi wi. Wi no man wakti a dei dati! Na a ten dati ala sma na grontapu o de gosontu èn den o libi fu têgo.