Den ben seti wan nyun organisâsi tu di ben nen a Volkenbond. A Volkenbond ben musu „sorgu taki den kondre wroko nanga makandra so taki freide de èn ala sani waka bun na heri grontapu”. Furu fu den Kresten kerki ben horibaka gi a Volkenbond. Wan organisâsi fu difrenti Kresten kerki na ini Amerkankondre ben taki dati a Volkenbond ben de „a politiek organisâsi di e teki presi gi Gado Kownukondre na grontapu”. A kerki organisâsi disi ben seni wan tu fesiman fu den go na a konmakandra di hori na Parijs, fu sori taki den ben e horibaka gi a Volkenbond. Wan fu den fesiman disi taki dati a konmakandra dati „o tyari bigi kenki kon na grontapu”.

Wan bigi kenki ben o kon trutru, ma a no den man disi ben o tyari a kenki disi. Na ini 1919 Yehovah gi en pipel krakti fu preiki gi moro sma. Ma fosi a ben kan du disi, bigi kenki ben musu kon na ini na organisâsi fu den Bijbel Ondrosukuman.

Tapu satra 4 yanuari 1919 den brada ben o stem fu luku suma den ben o poti leki den driktoro fu a Watch Tower Bible and Tract Society, soleki fa den ben e du dati ala yari. Na a ten dati Joseph F. Rutherford di ben de presidenti fu na organisâsi ben de na strafu-oso na Atlanta, Georgia, na ini Amerkankondre makandra nanga seibi tra brada di ben e teki fesi tu. Lanti ben poti den na strafu-oso aladi den no ben du nowan ogri. Den brada ben musu bosroiti efu den ben o poti den brada di ben de na strafu-oso baka leki driktoro fu na organisâsi, noso efu den ben o poti tra brada.

Brada Rutherford di ben de na strafu-oso ben e broko en ede nanga san ben o pasa nanga na organisâsi. A ben sabi taki son brada ben wani poti wan tra sma leki presidenti. Fu di a ben sabi a sani disi meki a  ben skrifi wan brifi gi den sma di ben o de na a konmakandra. Na ini a brifi Rutherford taki dati den kan poti Evander J. Coward leki presidenti. A ben taki dati Brada Coward ben de wan sma di „no e bruya esi”, di „abi sakafasi” èn di „e dini Gado fayafaya”. Ma furu brada ben wani taki den skoifi a konmakandra nanga siksi mun. Den afkati fu den brada di ben de na strafu-oso ben wani dati tu. Son brada no ben agri nanga a bosroiti dati èn den ati ben bron.

Ma Brada Richard H. Barber di ben de na a konmakandra dati, taki dati wan brada taki wan sani di ben o yepi den lusu a problema. A brada ben taki: „Mi a no wan afkati. Ma mi sabi taki Gado lobi sma di e tai hori na en. Wan fasi fa wi kan sori taki wi e tai hori na Gado, na efu wi poti Brada Rutherford baka leki presidenti.”​—Ps. 18:25.

Brada A. H. Macmillan di ben de na strafu-oso tu ben fruteri san ben pasa a tra dei. Brada Rutherford naki na a muur fu en cel, dan a taki: „Langa yu anu kon na doro.” Dan Brada Rutherford gi en wan telegram. Di Macmillan si a telegram a ben frustan wantewante san a ben wani taki. Na ini a telegram ben skrifi taki den ben teki ala den brada baka leki driktoro èn taki Brada Joseph Rutherford nanga William Van Amburgh ben o tan teki fesi na ini na organisâsi. Sobun Brada Rutherford ben o tan presidenti fu na organisâsi.

Di den aiti brada disi ben de na strafu-oso, den Bijbel Ondrosukuman bigin aksi sma fu teken wan papira pe den ben e aksi a regering fu lusu den brada disi. Den ben abi furu deki-ati fanowdu fu du so wan sani. Toku moro leki 700.000 sma teken a papira disi. Tapu dridewroko 26 maart 1919, fosi den tyari a papira go na lanti, den lusu Brada Rutherford nanga ala den tra brada.

Di Brada Rutherford miti nanga den tra brada nanga sisa, a taki: „Mi de seiker taki a sani disi di pasa e sreka wi gi moro muilek ten di o kon. . . . A feti fu unu no ben de fu puru den brada fu unu na strafu-oso. Wan tra sani de di moro prenspari. . . . A feti fu unu na fu meki Yehovah kisi glori, èn den wan di du disi kisi moi blesi.”

A fasi fa sani waka na a krutu-afersi fu den brada disi ben sori taki Yehovah ben tiri a wroko. Tapu 14 mei 1919 a krutubangi taki dati a strafu fu den brada no ben e teri moro fu di den no ben krutu na afersi fu den na wan reti fasi. Den no lusu den brada nomo, ma den krin den nen tu, so taki lanti no si den moro leki ogriman. Dati meki Brada Rutherford * ben kan tan wroko leki afkati gi a pipel fu Yehovah na fesi a Grankrutu  fu Amerkankondre. A du a wroko dati furu leisi, baka di a komoto na strafu-oso.

Brada Macmillan ben taki: „Wi no ben o sidon e du noti. Wi no ben o sidon wakti nomo teleki Masra tyari wi go na hemel. Wi ben frustan taki wi ben musu du wan sani fu kon sabi san Masra wani taki wi du.”

Ma den brada na a edekantoro no ben man go doro nanga a wroko di den ben du omeni yari kaba. Fu san ede? Di den brada ben de na strafu-oso sma ben pori ala den drukplaat di den ben gebroiki fu druk buku. Dati meki sonwan fu den brada nanga sisa ben lasi-ati èn den ben aksi densrefi efu a preikiwroko ben musu du ete.

Sma ben de ete di ben wani yere a Kownukondre boskopu di den Bijbel Ondrosukuman ben preiki? Brada Rutherford bosroiti fu hori wan lezing fu kon sabi disi. Den ben o kari sma fu kon arki a lezing. Brada Macmillan ben taki: „Efu nowan sma ben kon na a konmakandra dati, dan wi ben sabi taki wi no ben abi fu preiki moro.”

Tapu sonde 4 mei 1919 Brada Rutherford hori a lezing na ini Los Angeles, na Kalifornia aladi a ben siki hebi. A lezing ben nen „Howpu gi sma di e bruya”. Sowan 3500 sma kon na a lezing èn den ben musu seni hondrohondro sma gowe baka fu di presi no ben de. A tra dei 1500 sma kon arki a lezing. Now den brada ben sabi taki sma ben de ete di ben wani yere a boskopu.

A sani di den brada du baka dati kenki a fasi fa Yehovah Kotoigi bigin du a preikiwroko èn te nanga now wi e du en na a fasi dati.

A Waktitoren fu 1 augustus 1919 ben taki dati bigin fu september wan kongres ben o hori na Cedar Point, Ohio. Clarence  B. Beaty, wan yongu Bijbel Ondrosukuman fu Missouri e taki: „Ala sma ben wani go na a kongres dati.” Moro leki 6000 brada nanga sisa go na a kongres. Den brada no ben fruwakti taki so furu sma ben o kon. San ben meki taki a kongres ben moro span, na taki moro leki 200 sma dopu na ini wan liba di ben de krosibei.

Tapu 5 september 1919, tapu a di fu feifi dei fu a kongres, Brada Rutherford hori a lezing di nen „Gi ala wrokoman”. Na ini a lezing a taki dati den meki wan nyun tijdschrift di nen „A Gowtu Ten”. * A tijdschrift disi ben o taki fu prenspari sani di e pasa na grontapu èn a ben o sori san Bijbel e taki fu den sani dati.

Ala Bijbel Ondrosukuman kisi a deki-ati fu preiki nanga deki-ati nanga a nyun tijdschrift disi. Wan brifi di ben sori fa a wroko ben musu orga, ben taki: „Meki ibri sma di dopu hori na prakseri taki a de wan bigi grani fu du a preikiwroko èn fu teki na okasi now fu preiki so furu leki a man.” Furu sma bigin du a preikiwroko! Na ini december fayafaya Kownukondre preikiman feni moro leki 50.000 sma di gi den nen fu kisi a nyun tijdschrift.

Na a kaba fu 1919 a pipel fu Yehovah ben orga bun èn den ben du a wroko fayafaya. Boiti dati, wan tu prenspari profeititori di e taki fu den lasti dei ben kon tru. Soleki fa Maleaki 3:1-4 ben sori, dan Yehovah ben krin a pipel fu en. Den ben komoto na ini katibo na „Babilon a Bigiwan” èn Yesus ben poti „a koni srafu di de fu frutrow” (Openb. 18:2, 4; Mat. 24:45). * Now den Bijbel Ondrosukuman ben de klariklari fu du a wroko di Yehovah ben gi den fu du.