1. Fu san ede wi musu anbegi Yehovah wawan?

WI MUSU anbegi Yehovah wawan fu di na en meki wi èn na en gi wi libi (Openb. 4:11). Ma wi musu luku bun nanga wan sani. Awinsi wi lobi Yehovah èn awinsi wi e lespeki en, tra sani kan kon de so prenspari gi wi, taki wi no lobi Yehovah moro nanga wi heri ati. Wi musu kon frustan fa dati kan pasa. Ma fosi wi taki fu dati, wi o luku fosi san a wani taki fu anbegi Yehovah wawan.

2. Eksodes 34:14 e taki dati wi musu anbegi Yehovah wawan. San dati wani taki?

² Bijbel e sori taki te wi abi bigi lobi gi Yehovah, dan wi o anbegi en wawan. Sobun, wi no o lobi nowan sani noso nowan sma moro Yehovah.​—Leisi Eksodes 34:14.

3. Fu san ede wi abi bun reide fu lobi Yehovah?

³ Wi abi bun reide fu lobi Yehovah. Wi e anbegi en fu di wi kon sabi en. Wi kon lobi den moi fasi fu en. Wi kon sabi san a lobi èn san a no lobi èn wi leri fu denki neleki en. Wi e frustan san a o du gi libisma èn wi e horibaka gi en. Wi e si en leki wan bigi grani taki a teki wi leki en mati (Ps. 25:14). Ala sani di wi e leri fu wi Mekiman e meki taki wi e kon moro krosibei na en.​—Yak. 4:8.

4. (a) San Satan e gebroiki fu meki a lobi di wi abi gi Yehovah kon moro swaki? (b) San wi o luku na ini na artikel disi?

⁴ Satan na a tiriman fu grontapu. A grontapu fu en e gi wi deki-ati fu lobi grontapu sani èn fu du san a sondu skin wani (Ef. 2:1-3; 1 Yoh. 5:19). Satan wani taki wi lobi tra sani moro Yehovah. Wi o luku tu sani di Satan e gebroiki fu du disi. A fosi sani na taki a wani taki wi feti baka gudu. A di fu tu sani na taki a wani taki wi luku noso arki sani di no bun.

5. Fu san ede wi musu luku bun taki wi no kon lobi moni?

⁵ Wi alamala wani nofo nyanyan, bun krosi fu weri nanga wan bun presi fu tan. Ma wi musu luku bun taki wi no kon lobi moni. Furu sma na ini a grontapu fu Satan „lobi moni” nanga den moi sani di den kan bai nanga moni (2 Tim. 3:2). Yesus ben sabi taki a sani disi ben kan pasa tu nanga den disipel fu en. Dati meki a taki: „Nowan sma kan dini tu masra leki srafu. Bika a o teige a wan masra èn lobi a trawan, noso a o horibaka gi a wan èn wisiwasi a trawan. Unu no kan dini Gado èn dini Gudu na a srefi ten” (Mat. 6:24). Wan sma di e dini Yehovah, ma di e gebroiki furu fu en ten nanga krakti fu kon gudu, e pruberi fu dini tu masra. So wan sma no e anbegi Yehovah wawan.

6. San wi kan leri fu a rai di Yesus gi a gemeente na ini Laodisea?

⁶ Den Kresten na ini a gemeente fu Laodisea ben e meki bigi taki den ben gudu. Den ben taki: „Mi na wan guduman, mi abi wan lo gudu kaba èn mi no abi notinoti fanowdu.” Ma Yehovah nanga Yesus ben si den tra fasi. Yesus ben taigi den: „Yu no sabi taki yu na wan mofina sma, taki sma e firi sari gi yu, taki yu pôti, taki yu breni èn taki yu de nanga sososkin.” Yesus no gi den rai fu di den ben gudu, ma fu di a lobi di den ben abi gi gudu ben pori den matifasi nanga Yehovah (Openb. 3:14-17). Efu wi e si taki wi abi a firi fu feti baka gudu, dan wi musu kenki wi denki wantewante (1 Tim. 6:7, 8). Efu wi no e du dati, dan wi o bigin lobi tra sani tu boiti Yehovah èn a no o breiti nanga na anbegi fu wi. Yehovah „wani taki sma anbegi en wawan”  (Deut. 4:24). Ma fa moni kan kon tron wan prenspari sani gi wi?

7-9. San wi e leri fu na ondrofenitori fu wan owruman di nen David?

⁷ Luku na eksempre fu David, wan owruman di e libi na ini Amerkankondre. David e taki dati a ben e wroko tranga na wrokope. A ben kisi wan moro hei posisi na ini a bedrijf èn a ben kisi moro moni tu. Boiti dati, sma ben si en leki wan fu den moro bun sma di ben e du a wroko na ini a kondre. David e taki: „Na a ten dati mi ben denki taki den sani disi ben de blesi fu Yehovah.” Ma na so a ben de trutru?

⁸ David bigin si taki a wroko fu en ben e pori en matifasi nanga Yehovah. A e taki: „Te mi ben de na den konmakandra èn na ini a preikiwroko mi ben e denki soso den problema na wroko. Mi ben e meki furu moni, ma mi ben kisi furu stress èn mi ben abi problema na ini mi trowlibi.”

⁹ David ben frustan taki a ben musu bosroiti san moro prenspari gi en. A e taki: „Mi teki a bosroiti fu kenki mi situwâsi.” David no ben wani wroko so furu moro, èn dati meki a go taigi en basi san a ben wani du. San ben de a bakapisi? David lasi en wroko! San a du dan? A e taki: „A tra dei mi gi mi nen fu dini leki yepipionier.” Fu man sorgu densrefi, David nanga en frow ben e krin oso gi sma. Baka wan pisi ten a go du a gewoon pionierwroko èn te fu kaba en frow bigin pionier makandra nanga en. A trowpaar disi bosroiti fu du wroko di furu sma e si leki lagi wroko. Ma gi den a no ben prenspari sortu wroko den ben e du. Aladi den no e meki so furu moni leki fosi  moro, toku a moni e tapu den kostu fu den ibri mun. Den poti Yehovah na a fosi presi na ini den libi èn den si nanga den eigi ai taki Yehovah e sorgu gi den wan di e poti a Kownukondre na a fosi presi na ini den libi.​—Mat. 6:31-33.

10. Fa wi kan kibri wi ati?

¹⁰ Awinsi wi abi furu moni noso awinsi wi no abi furu, wi musu kibri wi ati. Fa wi kan du dati? Wi no musu kon lobi moni. Wi no musu meki a wroko fu wi kon moro prenspari leki na anbegi fu Yehovah. Fa yu kan kon sabi efu dati e pasa nanga yu? Yu kan aksi yusrefi den sani disi: ’A e pasa furu taki mi e denki mi wroko te mi de na den konmakandra noso te mi de na ini a preikiwroko? Mi e broko mi ede furu taki mi no o abi nofo moni na ini a ten di e kon? Mi nanga mi trowpatna e kisi trobi fu moni nanga tra sani di wi e bai? Mi ben o de klariklari fu du wroko di sma e si leki lagi wroko, efu dati ben o gi mi na okasi fu du moro gi Yehovah?’ (1 Tim. 6:9-12) Te wi e prakseri den aksi disi, dan wi no musu frigiti taki Yehovah lobi wi èn taki a pramisi den sma di lobi en nanga den heri ati, a sani disi: „Mi no o libi yu kwetikweti èn noiti mi o gowe fu yu.” Dati meki na apostel Paulus ben skrifi: „No meki a fasi fa unu e libi sori taki unu lobi moni.”​—Hebr. 13:5, 6.

11. Sortu krakti felem nanga poku kan abi tapu sma?

¹¹ Yehovah wani taki wi prisiri fu a libi èn a e feni en bun te wi e du sani di e gi wi prisiri. Fu taki en leti, Gado Wortu e taki dati ’a moro bun sani di wan libisma kan du, na fu nyan, dringi èn prisiri nanga a tranga wroko fu en’ (Preik. 2:24). Wan sani di sma lobi du na fu luku felem noso arki poku. Ma furu fu den felem nanga poku na ini a grontapu disi kan pori wi denki. Den e meki taki sma no e tyari densrefi na wan krin fasi moro èn den e gi sma deki-ati fu feni sani bun di Gado Wortu e krutu. Den kan meki wi lobi sani srefi di Gado no lobi.

12. Soleki fa 1 Korentesma 10:21, 22 e sori, dan fu san ede wi musu luku bun sortu felem wi e luku èn sortu poku wi e arki?

¹² Wi wani dini Yehovah wawan èn dati meki wi no kan nyan na „a tafra fu Yehovah” èn na „a tafra fu ogri yeye”. (Leisi  1 Korentesma 10:21, 22.) Te wi e nyan nanga wan sma, dan furu tron dati e sori taki wi nanga a sma dati na mati. Efu wi e luku felem noso arki poku di e gi wi deki-ati fu lobi ogri, afkodrei, hurudu noso fu du san a sondu skin wani, dan na wan agersifasi wi e nyan sani di den feanti fu Gado sreka. Disi kan pori wi denki èn a kan pori wi matifasi nanga Yehovah.

13-14. Soleki fa wi e leri fu Yakobus 1:14, 15, dan fu san ede wi musu luku bun sortu felem wi e luku noso sortu poku wi e arki? Gi wan agersitori.

¹³ Fu san ede wi kan taki dati felem nanga poku de leki trutru nyanyan? Te wi e nyan, dan na wi e bosroiti san wi e poti na ini wi mofo. Ma te wi swari a nyanyan kaba, dan wi no man du noti moro nanga a nyanyan, a skin srefi o teki san a abi fanowdu. Wi no man bosroiti moro san wi skin o du nanga a nyanyan. Te wi e nyan bun nyanyan, dan wi o de gosontu, ma te wi e nyan sani di no de gosontu, dan wi o kon siki. Ma a sani disi no e pasa wantewante. Baka wan pisi ten wi o si taki wi kon moro gosontu noso taki wi kon siki.

¹⁴ Na so a de tu nanga den sani di wi e luku noso arki. Wi srefi e bosroiti san wi e luku èn san wi e arki. Baka dati den sani di wi luku noso arki o bigin abi krakti tapu wi denki nanga wi firi. Te wi e luku noso arki sani di fiti, dan dati kan bun gi wi, ma te wi e luku noso arki sani di no bun, dan dati kan pori wi denki. (Leisi Yakobus 1:14, 15.) Kande wi no man si wantewante sortu takru bakapisi a kan abi na wi tapu te wi e luku noso arki sani di no fiti. Ma te fu kaba a o de krin fu si. Dati meki Bijbel e taki: „No kori unsrefi: Gado no e meki sma spotu en. Bika san wan sma e sai, na dati a sa koti tu. A sma di e sai nanga sondu na prakseri, sa koti dede fu di a e du san a sondu skin wani” (Gal. 6:7, 8). Dati meki a prenspari gi wi fu no luku noso arki sani di e gi wi deki-ati fu lobi sani di Yehovah no lobi kwetikweti!​—Ps. 97:10.

15. Sortu moi kado Yehovah gi wi?

¹⁵ Furu anbegiman fu Yehovah lobi luku JW Broadcasting^®, wi telefisi station tapu Internet. Wan sisa di nen Marilyn e taki: „JW Broadcasting yepi mi fu de moro koloku. Mi kan luku ala sani tapu JW Broadcasting fu di ala sani bun gi mi. Te mi e firi leki mi wawan de noso te mi lasi-ati, dan mi e luku wan moi lezing noso wan deitekst takimakandra di e gi mi deki-ati. Dati e yepi mi fu kon moro krosibei na Yehovah èn na a organisâsi fu en. JW Broadcasting kenki mi heri libi.” Yu e kisi wini fu a moi kado disi fu Yehovah? Tapu JW Broadcasting wi kan feni wan nyun programa ibri mun. Ma wi kan feni furu tra felem, poku nanga tra sani di wi kan luku o ten wi wani. Ala den sani disi e gi wi deki-ati.

16-17. Fu san ede wi musu luku bun o furu ten wi e gebroiki fu luku felem èn san kan yepi wi?

¹⁶ Wi no musu luku bun nomo nanga san wi e luku noso arki, ma wi musu luku bun tu o furu ten wi e gebroiki gi den sani dati. Efu wi no e du dati, dan wi kan gebroiki moro ten gi den sani disi leki gi na anbegi fu Yehovah. Furu sma feni en muilek fu no gebroiki so furu ten fu luku felem noso arki poku. Wan sisa di nen Abigail èn di abi 18 yari e taki: „Te mi wroko tranga heri dei, dan mi e luku telefisi fu relaks pikinso. Ma efu mi no luku bun, mi kan sidon luku telefisi omeni  yuru langa.” Wan yongu brada di nen Samuel e taki: „Son leisi mi e luku furu syatu felem tapu Internet. Mi e bigin nanga wán, èn fosi mi kisi misrefi mi sidon luku felem dri noso fo yuru langa.”

¹⁷ Fa yu kan sorgu taki yu no e gebroiki furu ten gi felem nanga poku? A fosi sani di yu musu du na fu luku o furu ten yu e gebroiki gi den sani disi. Luku fa yu e gebroiki yu ten na ini wan wiki. Skrifi na tapu wan kalender o furu ten yu e gebroiki fu luku telefisi, fu go tapu Internet èn fu prei game na tapu yu telefon. Efu yu si taki yu e gebroiki furu ten gi den sani disi, dan pruberi fu meki wan schema. Poti ten na wan sei gi den moro prenspari sani èn baka dati bosroiti o furu ten yu o gebroiki fu luku felem noso prei game. Aksi Yehovah tu fu yepi yu fu hori yusrefi na a schema di yu meki. Na so fasi yu o abi ten nanga krakti fu studeri Bijbel, fu du na Osofamiri Anbegi, fu go na den konmakandra, fu du a preikiwroko èn fu studeri Bijbel nanga sma. Te yu e poti Yehovah na a fosi presi, dan yu no o abi konsensi fonfon fu di yu no o gebroiki furu ten fu luku felem èn fu prei game.

18-19. Fa wi kan sori taki wi e anbegi Yehovah wawan?

¹⁸ Baka di na apostel Petrus ben skrifi fu a kaba fu a grontapu fu Satan èn fu a nyun grontapu di o kon, a taki: „Un lobiwan, now di unu e fruwakti den sani disi, du ala muiti fu meki Gado si unu te fu kaba leki sma di de sondro flaka, sondro fowtu èn di e libi na ini freide” (2 Petr. 3:14). Te wi e gi yesi na a rai dati èn te wi e du ala san wi man fu libi soleki fa Yehovah wani èn fu dini en na a fasi di a feni bun, dan wi e sori taki wi e anbegi Yehovah wawan.

¹⁹ Satan nanga a grontapu fu en o tan meki muiti fu kori wi fu poti tra sani na a fosi presi na ini wi libi, na presi fu Yehovah (Luk. 4:13). Ma wi no musu meki nowan tra sani teki a presi fu Yehovah. Wi musu du ala san wi man fu tan anbegi Yehovah wawan, fu di na en wawan abi reti na tapu na anbegi fu wi!