1-2. (a) San den tiriman fu grontapu o taki heri esi? (b) Sortu prenspari aksi wi o luku?

PRAKSERI fa a o de te den tiriman fu grontapu o taki dati „freide de èn ala sani e waka bun”. Kande den o meki bigi taki den tyari freide kon na grontapu. Den o wani meki wi bribi taki den man lusu ala den problema na grontapu. Ma den no o man du noti fu stop a sani di o pasa baka dati. Fu san ede? Bijbel e taki dati „wantronso wan pori o kon na den tapu . . . Den no o man lowe kwetikweti.”​—1 Tes. 5:3.

² Wi musu kon sabi a piki tapu den prenspari aksi disi: San o pasa na a ten fu a „bigi banawtu”? San Yehovah o fruwakti fu wi na a ten dati? Èn fa wi kan sreka wisrefi fu tan gi yesi na Yehovah na a ten fu a bigi banawtu?​—Mat. 24:21.

3. Soleki fa Openbaring 17:5, 15-18 e sori, dan fa Gado o pori „Babilon a Bigiwan”?

³ Leisi Openbaring 17:5, 15-18. „Babilon a Bigiwan” o kisi pori! Soleki fa wi si kaba, dan den tiriman no o man du noti te a sani disi o pasa. Fu san ede wi kan taki dati? Fu di „na Gado [o] meki den du san en ben abi na  prakseri”. San Yehovah abi na prakseri? A o pori ala den falsi bribi, sosrefi ala den Kresten kerki. Gado o meki den „tin tutu” fu a „redi ogri meti” du san a abi na prakseri. Den tin tutu e prenki ala den regering di e horibaka gi „na ogri meti”. „Na ogri meti” na den Verenigde Naties (Openb. 17:3, 11-13; 18:8). Te den tiriman dati o bigin feti nanga falsi bribi, dan a bigi banawtu o bigin. Na heri grontapu sma o frede srefisrefi te a sani dati o pasa.

4. (a) Fu san ede den tiriman fu grontapu o feni taki den musu pori falsi kerki? (b) San den sma di de fu den kerki disi o du?

⁴ Wi no sabi fu san ede den tiriman fu grontapu o pori Babilon a Bigiwan. Kande den o feni taki na den kerki e meki taki freide no de na grontapu èn taki den e bumui na ini politiek. Noso kande den o feni taki den kerki abi tumusi furu gudu nanga gron (Openb. 18:3, 7). Ma a sori leki a no ala den sma fu den kerki o dede te den tiriman o pori den falsi kerki. Na presi fu dati na den kerki organisâsi o kisi pori. Te den kerki organisâsi kisi pori, dan den memre fu den o frustan taki den fesiman fu den no ben man yepi den. Dati meki den sma disi no o wani abi noti fu du nanga den kerki moro.

5. San Yehovah pramisi fu du na a ten fu a bigi banawtu, èn fu san ede a o du dati?

⁵ Bijbel no e taki o langa a o teki fu pori Babilon a Bigiwan, ma wi sabi taki a no o teki wan langa ten (Openb. 18:10, 21). Yehovah pramisi taki a o „syatu a ten” fu a bigi banawtu so taki „den sma di a kari” no lasi gowe èn a tru bribi no lasi gowe tu (Mark. 13:19, 20). San Yehovah o wani taki wi du, baka te a bigi banawtu bigin?

6. Sortu tra sani wi musu du, efu wi no wani de wan pisi fu Babilon a Bigiwan?

⁶ Na ini a fosi studie-artikel wi ben si taki Yehovah e fruwakti taki den  anbegiman fu en musu komoto na ini den falsi kerki efu den no wani de wan pisi fu Babilon a Bigiwan. Ma moro sani de fanowdu. Wi musu horibaka gi a tru anbegi èn wi musu du san Yehovah e fruwakti fu wi. Meki wi go luku tu fasi fa wi kan du dati.

7. (a) Fa wi kan sori taki wi e hori wisrefi na den wet fu Yehovah? (b) Fa Hebrewsma 10:24, 25 e sori taki a prenspari fu kon makandra na ini a ten disi?

⁷ A fosi sani di wi musu du na taki wi musu hori wisrefi na den wet fu Yehovah. Wi no musu feni a fasi fa den sma fu grontapu e libi bun. Wi no e feni en bun te sma e du hurudu na iniwan fasi. Fu eksempre, wi no e feni bun te tu man noso tu uma e trow nanga makandra, noso te sma e libi wan homolibi (Mat. 19:4, 5; Rom. 1:26, 27). A di fu tu sani na taki wi musu tan kon makandra nanga wi brada nanga sisa fu anbegi Yehovah. Wi e du ala san wi man fu kon makandra, awinsi wi musu du dati na ini Kownukondre zaal, na ini wan sma oso, noso kibrikibri. Awinsi san e pasa, wi no e tapu fu go na den konmakandra. Fu taki en leti wi musu kon makandra ’o moro wi e si a dei e kon krosibei’.​—Leisi Hebrewsma 10:24, 25.

8. Fa a boskopu di wi o preiki o kenki na ini a ten di e kon?

⁸ A kan taki na a ten fu a bigi banawtu a boskopu di wi o preiki o kenki. Nownowde wi e preiki a bun nyunsu fu a Kownukondre èn wi e yepi sma fu tron disipel. Ma a kan taki na a ten dati wi o preiki wan boskopu di o de leki bigi pisi ijs di e fadon komoto fu hemel (Openb. 16:21). Kande wi o fruteri sma taki a no o teki langa fosi a grontapu fu Satan kisi pori. Te a ten dati doro, wi o kon sabi san na a boskopu di wi musu preiki èn fa wi o du dati. Wi o preiki na a srefi fasi leki fa wi ben du dati na ini den moro leki wán hondro yari di pasa? Noso wi o preiki na wan tra fasi? Wi no sabi. Awinsi fa wi o du a preikiwroko, a o de wan grani fu tyari a krutuboskopu fu Yehovah gi den sma!​—Esek. 2:3-5.

9. San den tiriman o wani du te wi o preiki a boskopu fu wi, ma fu sortu sani wi de seiker?

⁹ Te wi o preiki a boskopu fu wi, dan kande den tiriman o pruberi fu tapu wi fu preiki. Neleki fa wi e frutrow tapu Yehovah fu yepi wi fu du a preikiwroko nownow, na so wi o abi fu frutrow na en tapu na a ten dati. Wi kan de seiker taki Yehovah o gi wi krakti fu du a wani fu en.​—Mika 3:8.

10. Te wi luku Lukas 21:25-28, dan fa furu sma o firi na a ten fu a bigi banawtu?

¹⁰ Leisi Lukas 21:25-28. Na a ten fu a bigi banawtu sma no o man bribi san den e si. Ala den sani di den e frutrow na tapu o kisi pori. Den o bruya èn den o frede taki den o dede fu di noiti ete sani ben ogri so na grontapu (Sef. 1:14, 15). Na a ten dati a libi o moro muilek, srefi gi a pipel fu Yehovah. Fu di wi no de wan pisi fu grontapu, meki a kan taki wi o pina tu. Kande a o muilek fu feni son sani di wi abi tranga fanowdu na a ten dati.

11. (a) Fu san ede den tiriman o poti ala den prakseri tapu Yehovah Kotoigi? (b) Fu san ede wi no abi fu frede a bigi banawtu?

¹¹ A kan taki baka wan pisi ten den sma fu den kerki di kisi pori o ati bron taki  den tiriman no pori na organisâsi fu Yehovah Kotoigi. Kande den o prati wan lo ogri boskopu fu wi tapu Internet. Den tiriman fu grontapu nanga Satan, a tiriman fu den, o teige wi fu di na a bribi fu wi wawan no kisi pori. Den o ati bron fu di den no ben man pori ala den bribi na grontapu. Dati meki den o poti ala den prakseri na wi tapu. Te den o du dati, dan den tiriman disi o tron Gok fu Magok. * Den o span anu makandra fu kon feti nanga Yehovah pipel (Esek. 38:2, 14-16). Kande wi e broko wi ede pikinso fu di wi no sabi fa sani o waka na a ten dati. Ma wan sani wi sabi: Wi no abi fu frede a bigi banawtu. Yehovah o taigi wi san wi musu du fu tan na libi (Ps. 34:19). Wi o ’opo tanapu leti-opo èn wi o opo wi ede luku go na loktu’ fu di wi sabi taki a ’frulusu fu wi de krosibei’. *

12. Fa „a koni srafu di de fu frutrow” e yepi wi fu de srekasreka gi den sani di o pasa na ini a ten di e kon?

¹² „A koni srafu di de fu frutrow” e sori wi san o yepi wi fu tan gi yesi na Yehovah na a ten fu a bigi banawtu (Mat. 24:45). Den e du a sani disi na difrenti fasi. Wan fasi fa den du dati na den kongres di wi kisi na ini 2016-2018. Den kongres disi ben taki fu wan tu fasi di wi abi fanowdu, now di a dei fu Yehovah de so krosibei. Meki wi luku san na den fasi disi.

13. San o yepi wi fu tai hori na Yehovah èn fu san ede wi musu du dati now?

¹³ Wi musu tai hori na Gado: A thema fu a kongres fu 2016 ben de „Tai hori na Yehovah!” A kongres disi leri wi taki efu wi abi wan bun matifasi nanga Yehovah, dan wi o tai hori na en. Wi leri tu taki wi kan tron moro bun mati fu Yehovah te wi e begi èn te wi e studeri Bijbel fayafaya. Den sani disi o gi wi a krakti fu pasa den moro hebi tesi. Now di a kaba fu Satan grontapu de krosibei wi o kisi moro tesi. Wi o abi fu sori taki wi e tai hori na Gado èn taki wi e horibaka gi en Kownukondre. A kan taki sma o spotu wi na ini a ten dati tu (2 Petr. 3:3, 4). Den o spotu wi fu di wi no de wan pisi fu a grontapu fu Satan. Wi musu tai hori na Yehovah now, so taki wi man tai hori na en na a ten fu a bigi banawtu.

14. (a) Suma o teki fesi na ini na organisâsi na a ten fu a bigi banawtu? (b) Fu san ede wi musu horibaka gi den brada disi?

¹⁴ Na a ten fu a bigi banawtu tra brada o teki fesi na ini na organisâsi. Den salfuwan di de na grontapu ete o go na hemel fu feti na ini a feti fu Armagedon (Mat. 24:31; Openb. 2:26, 27). Disi wani taki dati den brada fu a Tiri Skin no o de na grontapu moro. Toku a bigi ipi o abi lepi brada ete fu tiri den. Den brada disi di de fu den tra skapu o teki fesi na a ten dati. Te wi o horibaka gi den brada disi èn te wi o gi yesi na den rai di den gi wi, dan wi o sori taki wi e tai hori na Yehovah. Wi musu gi yesi na den efu wi wani tan na libi!

15. San o yepi wi fu horidoro èn fu san ede a prenspari fu du dati now?

 ¹⁵ Wi musu horidoro: A thema fu a kongres fu 2017 ben de „No gi abra!” Na a kongres disi wi leri fa wi kan horidoro te wi e kisi tesi. Wi leri taki wi no musu horidoro soso te sani e go bun. Wi o man horidoro te wi e frutrow tapu Yehovah (Rom. 12:12). Noiti wi musu frigiti san Yesus pramisi wi: „A sma di horidoro te na a kaba, na en o kisi frulusu” (Mat. 24:13). A pramisi disi e leri wi taki awinsi sortu problema wi e kisi wi musu horidoro. Efu wi e horidoro now te wi e kisi tesi, dan wi o abi wan tranga bribi te a bigi banawtu bigin.

16. O ten wan sma abi trutru deki-ati èn san wi musu du fu man sori deki-ati nownow kaba?

¹⁶ Wi musu abi deki-ati: A thema fu a kongres fu 2018 ben de „Abi deki-ati!” Na a kongres disi wi leri taki deki-ati no e kon fu wisrefi. Neleki fa wi musu frutrow tapu Yehovah fu man horidoro, na so wi musu frutrow tapu Yehovah fu abi trutru deki-ati. San o yepi wi fu frutrow moro tapu Yehovah? Wi musu leisi en Wortu ibri dei èn wi musu prakseri fa Yehovah frulusu en pipel na ini a ten di pasa (Ps. 68:20; 2 Petr. 2:9). Te den tiriman fu grontapu o kon feti nanga wi na a ten fu a bigi banawtu, dan a o moro prenspari fu abi deki-ati èn fu frutrow tapu Yehovah (Ps. 112:7, 8; Hebr. 13:6). Efu wi e frutrow tapu Yehovah nownow, dan wi no o frede te Gok o kon feti nanga wi. *

17. Fu san ede wi no abi fu frede Armagedon? (Luku a fowtow tapu a kafti.)

¹⁷ Soleki fa wi ben si na ini na artikel na fesi, dan furu fu wi libi soso na ini den lasti dei. Ma wi abi a howpu tu fu pasa a bigi banawtu libilibi. Na a feti fu Armagedon a grontapu disi o kisi pori. Ma wi no abi fu frede. Fu san ede? Fu di a feti disi na fu Yehovah (Odo 1:33; Esek. 38:18-20; Sak. 14:3). Yehovah poti Yesus  leki edeman fu a legre fu en èn na en o taigi Yesus o ten a kan go feti. Yesus o de makandra nanga den salfuwan di kisi wan opobaka èn nanga dusundusun engel. Den o feti teige Satan, den ogri yeye nanga den legre fu grontapu.​—Dan. 12:1; Openb. 6:2; 17:14.

18. (a) San Yehovah pramisi wi? (b) Soleki fa Openbaring 7:9, 13-17 e sori, dan fu san wi kan de seiker?

¹⁸ Yehovah pramisi wi a sani disi: „Awinsi sortu fetisani sma meki fu feti nanga yu, a no o abi bun bakapisi” (Yes. 54:17). „Wan bigi ipi” fu anbegiman fu Yehovah o „komoto na ini a bigi banawtu” libilibi. Den o tan dini en fu têgo. (Leisi Openbaring 7:9, 13-17.) Bijbel e sori wi krin taki wi o kisi frulusu na ini a ten di e kon! Wi sabi taki „Yehovah e kibri den wan di e tan dini en” (Ps. 31:23). Ala sma di lobi Yehovah èn di e prèise en o breiti te den e si taki Yehovah krin en santa nen.​—Esek. 38:23.

19. Sortu moi howpu wi abi?

¹⁹ Prakseri san ben o skrifi na ini 2 Timoteyus 3:2-5 efu a ben o taki fu den sma di e libi na ini a nyun grontapu pe Satan no de moro. (Luku a faki „ A fasi fa sma o de na ini a nyun grontapu”.) Brada George Gangas di ben de wan memre fu a Tiri Skin ben taki a sani disi: „Grontapu o de wan moi presi te ala sma o anbegi Yehovah! Heri esi yu o abi a grani fu libi na ini a nyun grontapu. Solanga Yehovah de na libi, yu o de na libi tu. Wi o libi fu têgo.” Dati na trutru wan moi howpu!