DEN sma di e ondrosuku a weer kon si taki wan bigi draiwinti o kon na wan foto pe furu sma e tan. Fu di lanti no wani taki sma lasi den libi, meki den e du ala san den man fu warskow den biten.

Na ini a ten disi Yehovah e warskow ala sma na grontapu gi wan moro bigi rampu. Fa a e du dati? Fu san ede wi kan taki dati a e gi sma nofo ten fu gi yesi na a warskow fu en? Fu piki den aksi disi, wi o taki fosi fa Yehovah warskow sma na ini a ten di pasa.

Na ini Bijbel ten Yehovah warskow den sma di ben trangayesi en, taki a o strafu den. Furu leisi Yehovah ben agersi a strafu disi nanga „bigi winti” (Odo 10:25; Yer. 30:23). Ala ten Yehovah warskow sma na fesi, a sori den san den ben musu du fu gi yesi na en èn a gi den nofo ten fu tyari kenki kon (2 Kow. 17:12-15; Neh. 9:29, 30). A ben e seni den anbegiman fu en fu warskow sma gi a strafu di den ben o kisi èn fu gi den deki-ati fu tyari kenki kon esi-esi.​—Amos 3:7.

Noa ben de wan fu den sma di Gado ben gebroiki fu warskow trawan. Furu yari langa a warskow den sma gi a bigi Frudu di ben o kon na heri grontapu. Den sma disi ben e libi wan morsu libi èn den ben e du furu ogri (Gen. 6:9-13, 17). Noa sori den san den ben musu du fu kan tan na libi. A ben preiki so furu taki Bijbel e kari en „wan preikiman fu retidu”.​—2 Petr. 2:5.

Aladi Noa du so furu muiti, toku den sma no gi yesi na a warskow fu Gado. Den sori taki den no ben abi bribi srefisrefi. Dati meki di a Frudu kon „a wai den alamala puru” (Mat. 24:39; Hebr. 11:7). Den sma disi no ben kan taki dati Gado no ben warskow den.

Son leisi Yehovah ben e warskow sma syatu fosi a strafu den. Toku a ben sorgu taki den sma dati ben abi nofo ten fu tyari kenki kon. Di Yehovah ben o tyari den Tin Rampu kon na ini Egepte, a ben warskow den sma na fesi. Fu eksempre, fosi Yehovah tyari a di fu seibi rampu kon, a ben seni Moses nanga Aron fu warskow Farao nanga den futuboi fu en. Yehovah ben taki dati a tra dei a ben o meki pisipisi ijs fadon komoto fu hemel leki wan bun hebi alen. A de so taki Gado gi den sma nofo ten fu kibri gi a rampu disi? Bijbel e taki: „Esi-esi den dinari fu a kownu di ben e bribi san Yehovah taki, meki den futuboi nanga den meti fu den go kibri na ondro daki. Ma den sma di no ben poti prakseri na san Yehovah taki, libi den futuboi nanga den meti fu den na ini den gron” (Eks. 9:18-21). Soleki fa a tekst e sori, dan a rampu no miti den sma di du wan sani esi-esi. A de krin taki Yehovah ben gi den sma nofo ten.

Yehovah ben warskow Farao nanga den futuboi fu en syatu fosi a tyari a di fu tin rampu kon. Ma den no gi yesi na a warskow (Eks. 4:22, 23). Dati meki den fosi manpikin fu den dede. Dati ben de wan sari sani! (Eks. 11:4-10; 12:29) Den ben abi nofo ten fu gi yesi na a warskow disi? Iya! Moses ben taigi den Israelsma wantewante taki a di fu tin rampu ben o kon èn a sori den san den ben musu du fu kibri den osofamiri gi a rampu disi (Eks. 12:21-28). Soleki fa a sori, dan sowan dri milyun Israelsma, Egeptesma nanga „furu sma fu tra  kondre” gi yesi na Yehovah èn den gowe libi Egepte.​—Eks. 12:38.

Den eksempre disi e sori taki ala ten Yehovah sorgu taki sma kisi nofo ten fu gi yesi na den warskow fu en (Deut. 32:4). Fu san ede Gado e du dati? Na apostel Petrus taki dati Yehovah „no wani taki wan sma lasi libi. A wani taki ala sma musu kisi na okasi fu sori berow” (2 Petr. 3:9). Iya, Gado ben e broko en ede nanga den sma. A ben wani taki den sori berow èn taki den tyari kenki kon, so taki den no kisi strafu.​—Yes. 48:17, 18; Rom. 2:4.

Na ini a ten disi Yehovah e warskow sma na heri grontapu gi wan bigi rampu di o kon èn a prenspari taki ala sma gi yesi na a warskow dati. Di Yesus ben de na grontapu a ben warskow sma taki wan „bigi banawtu” ben o kon di ben o pori a grontapu disi (Mat. 24:21). A fruteri den disipel fu en wan profeititori di ben sori den finifini san ben o pasa èn san den ben o ondrofeni fosi a „bigi banawtu” doro. Wi e si taki den sani di Yesus taki e pasa na heri grontapu now.​—Mat. 24:3-12; Luk. 21:10-13.

Fu dati ede Yehovah e gi ala sma a deki-ati now fu dini en èn fu gi yesi na en. A wani taki den sma di e gi yesi na en abi wan moro bun libi now èn taki den libi na ini a nyun grontapu pe retidu o de (2 Petr. 3:13). Fu yepi sma fu kisi bribi na ini den pramisi fu en, Yehovah e meki den anbegiman fu en preiki wan boskopu di kan yepi sma fu kisi frulusu. Dati na a bun nyunsu fu a Kownukondre. Yesus ben taki dati ’a bun nyunsu disi ben o preiki gi sma na heri grontapu, so taki sma fu ala kondre kan yere dati’ (Mat. 24:14). Gado orga den tru anbegiman fu en fu preiki a boskopu disi na ini sowan 240 kondre. Yehovah wani taki so furu sma leki a kan gi yesi na a warskow disi, so taki den kan tan na libi te a o pori a grontapu disi.​—Sef. 1:14, 15; 2:2, 3.

Sobun, wi si taki ala ten Yehovah e gi sma nofo ten fu gi yesi na den warskow fu en. Ma a sani di wi musu aksi wisrefi na disi: Sma o gi yesi na a warskow fu Gado now di ten de ete? Meki wi leki boskopuman fu Gado tan yepi so furu sma leki wi man fu kisi frulusu te a grontapu disi o kisi pori.