1. San Yehovah kan du fu meki a wani fu en pasa?

YEHOVAH kan tron iniwan sani di de fanowdu fu du san a abi na prakseri. Fu eksempre, Yehovah kan tron wan Leriman, wan Papa di e trowstu wi èn wan sma di e fruteri sma bun nyunsu. Disi na wan tu fu den furu sani di Yehovah man du (Yes. 48:17; 2 Kor. 7:6; Gal. 3:8). Ma furu tron a e gebroiki libisma fu du a wani fu en (Mat. 24:14; 28:19, 20; 2 Kor. 1:3, 4). Yehovah kan gi wi a koni nanga a krakti tu di wi abi fanowdu fu du a wani fu en. Soleki fa son sabiman e taki, dan a nen fu Yehovah e sori taki a man du ala den sani disi.

2. (a) Fu san ede son sma e aksi densrefi efu Yehovah man gebroiki den? (b) San wi o luku na ini na artikel disi?

² Wi alamala wani wroko gi Yehovah, ma kande son sma e aksi densrefi efu Yehovah man gebroiki den. Fu san ede den e denki so? Fu di den kon owru, fu di a situwâsi fu den kenki noso fu di den feni taki den no koni nofo. Ma yu abi sma tu di feni taki den e du nofo kaba èn taki a no de fanowdu fu du moro. Na ini na artikel disi wi o luku fa Yehovah kan gi ibriwan fu wi san wi abi fanowdu fu wroko gi en. Baka dati wi o luku fa Yehovah gi man nanga uma na ini Bijbel a firi nanga a krakti fu du a wani fu en. Wi o luku tu san wi musu du efu wi wani taki Yehovah gebroiki wi.

3. Te wi e luku san Filipisma 2:13 e taki, dan fa Yehovah kan gi wi a firi fu du san wi abi na prakseri?

³ Leisi Filipisma 2:13. * Yehovah kan gi wi a firi fu wroko gi en. Fa a kan du dati? Kande wi yere taki wan sma na ini a gemeente abi yepi fanowdu noso kande wan wroko musu du na ini a gemeente. Kande den owruman e leisi wan brifi fu a bijkantoro pe den e fruteri wi taki yepi de fanowdu na wan tra presi. Wi ben kan aksi wisrefi: ’Fa mi kan yepi?’ Noso kande den brada aksi wi fu du wan muilek wroko, ma wi feni taki wi no o man du a wroko bun. A kan tu taki wi e leisi wan pisi na ini Gado Wortu èn wi e aksi wisrefi: ’Fa mi kan gebroiki a tekst disi fu yepi tra sma?’ Yehovah noiti o dwengi wi fu du sani. Ma te a e si taki wi e prakseri fa wi kan yepi, dan a kan gi wi a firi fu du wan sani.

4. Fa Yehovah kan gi wi a krakti fu du a wani fu en?

⁴ Yehovah kan gi wi a krakti tu fu du a wani fu en (Yes. 40:29). Kande wi man du son sani kaba, ma Yehovah kan gi wi en santa yeye di kan yepi wi fu du sani moro bun (Eks. 35:30-35). Yehovah en organisâsi kan leri wi fu du wan wroko. Efu yu feni taki yu no man du wan wroko bun, dan aksi wan sma fu yepi yu. Boiti dati, yu no abi fu frede fu aksi wi hemel Papa fu gi yu „a krakti di bigi pasa marki” (2 Kor. 4:7; Luk. 11:13). Bijbel abi furu eksempre fu man nanga uma di Yehovah gi a firi nanga a krakti fu du a wani fu en. Te wi o luku wan tu fu den eksempre disi, dan prakseri fa Yehovah kan gebroiki yu na a srefi fasi.

5. Te wi e luku fa Yehovah gebroiki Moses fu frulusu en pipel èn o ten a du dati, dan san wi e leri?

⁵ Yehovah ben meki Moses frulusu den Israelsma. Ma o ten Yehovah gebroiki en? A de so taki Yehovah gebroiki Moses baka di a „kon sabi ala den koni fu den Egeptesma”? (Tori 7:22-25) Nôno. Yehovah gebroiki Moses baka di a leri en fu abi sakafasi èn fu no ati bron esi (Tori 7:30, 34-36). Yehovah gi Moses a deki-ati tu fu taki nanga a moro makti man fu Egepte (Eks. 9:13-19). Te wi e luku fa Yehovah gebroiki Moses èn o ten a du dati, dan san wi e leri? Wi e leri taki Yehovah e gebroiki den wan di e pruberi fu abi den srefi fasi leki en èn di abi a frutrow taki a o gi den krakti.​—Fil. 4:13.

6. San wi e leri fu a fasi fa Yehovah gebroiki Barsilai fu yepi Kownu David?

⁶ Hondrohondro yari bakaten, Yehovah gebroiki Barsilai fu yepi Kownu David. David nanga den sma di ben de nanga en ben e lowe gi Absalom, a manpikin fu David. Den no ben abi noti fu nyan, den ben weri èn watra ben kiri den. Barsilai di ben owru kaba, nanga wan tu tra man tyari nyanyan nanga tra sani gi den, aladi den ben kan lasi den libi. Aladi Barsilai ben owru kaba, toku a no ben denki taki Yehovah no ben man gebroiki en moro. A gebroiki den sani di a ben abi fu yepi den futuboi fu Gado di ben de na nowtu (2 Sam. 17:27-29). San wi kan leri fu a tori disi? Awinsi wi owru, Yehovah kan gebroiki wi fu yepi tra brada nanga sisa di de na nowtu, awinsi den  e libi na ini wi eigi kondre noso na ini wan tra kondre (Odo 3:27, 28; 19:17). Kande wisrefi no man yepi den, ma wi kan gi bijdrage fu horibaka gi a wroko di e du na heri grontapu. Na so fasi den brada kan abi moni fu yepi den wan di kisi fu du nanga wan rampu.​—2 Kor. 8:14, 15; 9:11.

7. Fa Yehovah gebroiki Simeon èn fu san ede disi e gi wi deki-ati?

⁷ Yehovah ben pramisi Simeon, wan owru man na ini Yerusalem, taki a ben o si a Mesias fosi a dede. A no de fu taki dati a pramisi disi gi Simeon furu deki-ati, fu di a ben e wakti a Mesias furu yari kaba. Yehovah blesi Simeon fu di a ben abi bribi èn fu di a horidoro. Wan dei „a yeye” meki a kon na ini a tempel. Drape a si a beibi Yesus, èn Yehovah meki Simeon taki wan profeititori fu a beibi disi di ben o tron a Krestes (Luk. 2:25-35). A kan taki Simeon dede fosi Yesus bigin nanga a diniwroko fu en na grontapu. Ma a ben de nanga tangi gi a grani di a ben kisi. Na ini a ten di e kon a o kisi moro blesi srefi! Na ini a nyun grontapu a reti-ati man disi o si fa Kownu Yesus o blesi ala sma na grontapu (Gen. 22:18). Wi kan de nanga tangi tu gi iniwan grani di Yehovah e gi wi.

8. Fa Yehovah kan gebroiki wi neleki fa a ben gebroiki Barnabas?

⁸ Na ini a ten fu den apostel yu ben abi wan man di ben nen Yosef èn di ben lobi fu gi sma sani. Yehovah ben man gebroiki a man disi fu yepi trawan (Tori 4:36, 37). Fu di Yosef ben lobi trowstu tra sma, meki den apostel kari en Barnabas, san wani taki „Manpikin fu Trowstu”. Fu eksempre, baka di Saulus tron wan bribiman, furu brada ben frede fu go taki nanga en fu di den ben sabi taki a ben frufolgu den brada nanga sisa fosi. Ma Barnabas sori switifasi gi Saulus èn a yepi en. A no de fu taki dati Saulus ben breiti nanga a yepi disi (Tori 9:21, 26-28). Bakaten den owruman na ini Yerusalem ben si taki den brada nanga sisa fu Antiokia na ini Siria ben abi deki-ati fanowdu. Suma den seni go drape? Barnabas! Dati ben de wan bun bosroiti. Bijbel e taki dati Barnabas „bigin gi den alamala deki-ati fu tan dini Masra nanga den heri ati” (Tori 11:22-24). Na ini a ten disi Yehovah kan gebroiki wi tu fu trowstu wi Kresten brada nanga sisa. A kan gebroiki wi fu trowstu wan sma di e sari fu di wan sma di a lobi dede. Noso a kan meki wi go luku noso bel wan sma di siki noso di e firi brokosaka. Wi kan taki wan sani fu gi so wan sma deki-ati baka. Yu o meki Yehovah gebroiki yu neleki fa a ben gebroiki Barnabas?​—1 Tes. 5:14.

9. San wi e leri fu a fasi fa Yehovah yepi wan brada di nen Vasily fu tron wan bun owruman?

⁹ Yehovah yepi wan brada di nen Vasily fu tron wan bun owruman. Di Vasily tron owruman, a ben abi 26 yari. A ben frede taki a no ben abi nofo ondrofeni fu yepi a gemeente, spesrutu den brada nanga sisa di abi problema. Ma a leri furu fu lepi owruman èn a leri furu tu di a go na a Kownukondre Diniwroko-skoro. Vasily meki tranga muiti fu go na fesi. Fu eksempre, a skrifi wan tu sani di a ben wani du. Ibri leisi te a ben man du wan fu den sani dati, a ben kisi moro deki-ati. Now a e taki: „Den sani di mi ben frede fosi, e gi mi furu prisiri now. Te Yehovah e yepi mi fu feni a yoisti Bijbeltekst fu  trowstu wan brada noso sisa fu a gemeente, dan dati e meki mi firi bun.” Brada, efu unu e gi Yehovah na okasi fu gebroiki unu neleki Vasily, dan a o yepi unu fu tyari moro frantwortu na ini a gemeente.

10. San Abigayil du èn san wi kan leri fu na eksempre fu en?

¹⁰ David nanga den sma di ben e horibaka gi en ben e lowe gi Kownu Saul èn den ben abi yepi fanowdu. Den man fu David ben aksi Nabal, wan Israel man di ben gudu, fu gi den pikinso nyanyan. Den ben du disi fu di den ben kibri den skapu fu Nabal na ini a sabana. Ma Nabal no ben wani gi den noti. A sani disi meki David ati bron so te, taki a ben wani kiri Nabal nanga ala mansma na ini en oso (1 Sam. 25:3-13, 22). Ma Abigayil, a moi wefi fu Nabal, ben koni èn a ben abi sakafasi. A teki deki-ati, dan a go begi David fu no poti ensrefi na brudu-paiman. Na wan lespeki fasi a taigi en fu libi ala sani gi Yehovah. Den sani di Abigayil taki èn di a du ben naki David ati. David ben frustan taki na Yehovah ben seni Abigayil (1 Sam. 25:23-28, 32-34). Den moi fasi di Abigayil ben abi ben meki taki Yehovah ben man gebroiki en. Na ini a ten disi Yehovah kan gebroiki lepi sisa di abi sakafasi fu tranga den eigi osofamiri èn fu gi tra sma na ini a gemeente deki-ati.​—Odo 24:3; Tit. 2:3-5.

11. San den umapikin fu Salum du èn suma na ini a ten disi e teki na eksempre fu den?

¹¹ Hondrohondro yari baka dati Yehovah gebroiki den umapikin fu Salum fu yepi bow den skotu fu Yerusalem (Neh. 2:20; 3:12). Aladi den papa ben de wan edeman fu a pipel, toku den uma disi ben de klariklari fu du a muilek wroko disi. Boiti dati, den yepi nanga a wroko disi aladi feanti ben wani tapu a wroko (Neh. 4:15-18). Den uma disi ben de heri tra fasi leki den heihei man fu Tekowa di no ben wani saka densrefi fu du a wroko di den ben kisi (Neh. 3:5). Prakseri fa den umapikin fu Salum ben breiti di a wroko ben kaba na ini 52 dei nomo! (Neh. 6:15) Na ini a ten disi sisa de klariklari fu du wan spesrutu wroko gi Gado. Den e yepi nanga bow-wroko gi na organisâsi fu Yehovah èn den e yepi sorgu den presi disi tu. Wi abi den sisa disi fanowdu di de fayafaya èn di sabi du a wroko bun.

12. Fa Yehovah kan gebroiki wi neleki fa a gebroiki Tabita?

¹² Wan tra moi eksempre, na a uma Tabita di ben ’du furu bun sani èn di ben meki furu sani gi den pôti sma’. A ben e du bun spesrutu gi uma di masra ben dede kaba (Tori 9:36). Fu di a ben lobi gi sani èn fu di a ben abi switifasi, meki furu sma ben e sari di a dede. Ma den sma disi ben breiti srefisrefi di na apostel Petrus gi en wan opobaka (Tori 9:39-41). San wi e leri fu Tabita? Awinsi wi yongu noso owru, awinsi wi na mansma noso umasma, wi alamala kan yepi wi brada nanga sisa di de na nowtu.​—Hebr. 13:16.

13. Fa Yehovah gebroiki Ruth, wan sisa di ben syensyen, èn san a sisa disi taki?

¹³ Wan sisa di nen Ruth ben wani tron zendeling, ma a ben syensyen. Di a ben yongu a ben lobi go oso fu oso fu prati traktaat. A taki: „Mi ben lobi du a wroko disi.” Ma a ben muilek gi en fu taki nanga  sma èn fu fruteri den fu Gado Kownukondre. Aladi Ruth ben syensyen, toku a tron wan gewoon pionier di a ben abi 18 yari. Na ini 1946 a go na a Waktitoren Bijbelskoro Gilead èn bakaten a go dini na Hawai nanga Yapan. Yehovah gebroiki en fu preiki a bun nyunsu fayafaya na ini den kondre dati. Baka di Ruth du a preikiwroko bijna 80 yari a taki: „Yehovah gi mi furu krakti. A yepi mi fu no syensyen moro. Mi abi a tranga bribi taki Yehovah kan gebroiki iniwan sma di e frutrow na en tapu.”

14. Soleki fa Kolosesma 1:29 e sori, dan san wi musu du efu wi wani taki Yehovah gebroiki wi?

¹⁴ Sensi owruten Yehovah gebroiki den futuboi fu en fu du furu difrenti sani. Fa a o gebroiki yu? Efu yu de klariklari fu wroko tranga, dan Yehovah kan meki yu du iniwan sani. (Leisi Kolosesma 1:29.) Efu yu e meki Yehovah gebroiki yu, dan a kan yepi yu fu tron wan fayafaya preikiman, wan bun leriman, wan sma di sabi trowstu trawan, wan bun wrokoman noso wan bun mati. A kan meki yu tron iniwan sani di de fanowdu fu du a wani fu en.

15. Soleki fa 1 Timoteyus 4:12, 15 e sori, dan san yongu brada kan begi Yehovah?

¹⁵ Fa a de nanga den yongu brada na ini a gemeente? Fayafaya brada de fanowdu fu dini leki dinari ini a diniwroko. Na ini furu gemeente moro owruman de leki dinari. San unu leki yongu brada kan du fu kisi na angri fu du moro na ini a gemeente? Son brada e taki: „Mi na wan preikiman kaba, sobun mi no abi fu du moro.” Efu na so yu e firi, dan begi Yehovah fu yepi yu fu kisi na angri fu tron wan dinari ini a diniwroko èn fu gi yu a krakti fu dini en fayafaya (Preik. 12:1). Wi abi yu yepi fanowdu!​—Leisi 1 Timoteyus 4:12, 15.

16. San wi musu aksi Yehovah èn fu san ede?

¹⁶ Yehovah kan meki yu tron iniwan sani di de fanowdu fu du a wani fu en. Sobun, aksi en fu gi yu na angri fu du a wroko fu en, èn aksi en tu fu gi yu a krakti di yu abi fanowdu. Awinsi yu yongu noso owru, gebroiki yu ten, yu krakti nanga den sani di yu abi fu gi Yehovah glori (Preik. 9:10). Te yu kisi a moi okasi fu du moro gi Yehovah, dan no de gaw fu taki dati yu no o du en fu di yu e frede taki yu no man du a wroko. A de wan bigi grani fu du iniwan sani fu gi glori na wi lobi-ati Papa!