1. Fa 2 Korentesma 3:1-3 e yepi wi fu kon frustan taki a de wan moi grani fu studeri Bijbel nanga wan sma èn fu si taki a teki dopu? (Luku a fowtow na tapu a kafti.)

FA YU feni en te wan Bijbelstudie fu yu gemeente teki dopu? A musu de taki yu breiti srefisrefi (Mat. 28:19). Èn efu yu studeri nanga a nyun disipel disi, dan seiker yu o prisiri te a teki dopu! (1 Tes. 2:19, 20) A sma disi go na fesi èn a teki dopu fu di yu nanga a heri gemeente wroko tranga fu yepi en. Sobun, wi kan taki dati nyun disipel de leki moi ’brifi di e prèise’ den sma di studeri nanga den èn di e prèise a heri a gemeente tu.​—Leisi 2 Korentesma 3:1-3.

2. (a) Na sortu prenspari aksi wi musu poti prakseri, èn fu san ede? (b) San na wan Bijbelstudie? (Luku a futuwortu.)

² A moi fu si taki na ini den fo yari di pasa, wi hori sowan 10.000.000 Bijbelstudie * ibri mun na heri grontapu. Na a srefi pisi ten dati, moro leki 280.000 sma teki dopu leki Yehovah Kotoigi ibri yari èn den tron disipel fu Yesus Krestes. Fa wi kan yepi moro fu den milyunmilyun Bijbelstudie dati fu teki dopu? Yehovah e gi sma okasi ete fu tron Kotoigi fu en. Dati meki wi wani du ala san wi man fu yepi sma fu go na fesi èn fu teki dopu so esi leki a kan. A ten kon syatu now!​—1 Kor. 7:29a; 1 Petr. 4:7.

3. San wi o luku na ini na artikel disi?

 ³ Fu di a prenspari srefisrefi fu meki disipel na ini a ten disi, meki a Tiri Skin aksi den bijkantoro san wi kan du fu sorgu taki moro fu den Bijbelstudie fu wi e go na fesi èn teki dopu. Na ini na artikel disi èn a wan di e kon, wi o luku san wi kan leri fu pionier, zendeling, nanga kring-opziener di abi ondrofeni (Odo 11:14; 15:22). * Den e sori wi san preikiman nanga den studenti fu den kan du fu meki a studie waka moro bun. Na ini na artikel disi wi o luku feifi sani di ibri studenti musu du fu go na fesi èn fu teki dopu.

4. San wi musu hori na prakseri te wi e studeri syatu nanga sma na den mofodoro?

⁴ Furu fu wi brada nanga sisa e studeri Bijbel nanga sma leti na a sma mofodoro. Disi kan meki taki a sma wani sabi moro fu Bijbel. Ma nofo tron den takimakandra disi syatu èn kande den no e hori ibri wiki. Son preikiman e aksi a sma en telefon nomru èn ten na ten den e seni wan app gi a sma fu sori en wan sani fu Bijbel, teleki den man go baka na a sma. Son leisi a sani disi kan go doro wan tu mun langa, sondro taki a Bijbelstudie e go na fesi. Ma yu denki taki wan studenti o go na fesi èn teki dopu efu a no e du moro muiti fu studeri Gado Wortu? Nôno.

5. Fa wi kan gebroiki den agersitori na ini Lukas 14:27-33 fu yepi den Bijbelstudenti fu wi?

⁵ Yesus ben gebroiki wan agersitori fu sori san wan sma musu du efu a wani tron wan disipel fu en. A taki fu wan sma di ben wani bow wan toren èn fu wan kownu di ben wani go feti nanga wan tra kownu. Yesus taki dati a sma di wani bow musu „go sidon fosi fu teri den kostu” fu si efu a o man klari a wroko. A ben taki tu dati a kownu musu „go taki nanga den raiman fu en fosi” fu luku efu a legre fu en o man wini a tra kownu. (Leisi Lukas 14:27-33.) Soleki fa den agersitori e sori, wan sma musu go sidon luku tu san a musu du efu a wani tron wan disipel fu Yesus. Dati meki wi musu gi sma deki-ati fu studeri ibri wiki so taki den kan kon sabi san den musu du. Fa wi kan du dati?

6. San wi kan du fu yepi wi Bijbelstudenti fu go na fesi?

⁶ Pruberi fu hori a takimakandra moro  langa na a sma en mofodoro. Kande yu kan taki fu tu Bijbeltekst na presi fu wán, ibri leisi te yu e go na a sma. Te na ososma feni en bun taki yu e tan moro langa, dan aksi en efu wan presi de pe unu kan sidon fu taki go doro. A piki fu na ososma o sori o prenspari a Bijbelstudie de gi en. Fu yepi a studenti fu go na fesi moro gaw, yu kan aksi en srefi efu a wani studeri tu leisi wan wiki. Ma awinsi wan sma e studeri wán noso tu leisi wan wiki, toku dati no nofo ete.

7. Fa yu kan sreka bun ibri leisi te yu o studeri nanga wan sma?

⁷ Te yu e gi wan sma leri, dan yu musu sreka yusrefi bun ibri leisi te yu o studeri nanga en. Fa yu kan du dati? Yu kan bigin leisi a pisi di yu o studeri nanga a sma èn leisi den Bijbeltekst. Kon sabi san na den moro prenspari penti. Poti prakseri na a nen fu a les noso a kapitel, den edeprakseri, den aksi fu den paragraaf, den tekst di yu musu leisi, den prenki, nanga felem di kan yepi yu fu tyari a tori kon na krin. Hori a studenti na prakseri èn denki dipi fa yu kan tyari den sani kon na krin na wan makriki fasi so taki a kan frustan den èn du san a leri.​—Neh. 8:8; Odo 15:28a.

8. San wi kan aksi Yehovah te wi e begi gi den Bijbelstudenti fu wi, soleki fa Kolosesma 1:9, 10 e sori?

⁸ Wan tra sani di yu kan du te yu e sreka yusrefi, na fu taki nanga Yehovah fu a studenti fu yu èn fu den sani di a abi fanowdu fu go na fesi. Aksi Yehovah fu yepi yu fu gi a sma leri na so wan fasi taki a doro na ati fu en. (Leisi Kolosesma 1:9, 10.) Aksi yusrefi efu wan sani de di a studenti no o man frustan noso di a no o bribi kande. Hori na prakseri taki na yepi yu wani yepi en fu go na fesi èn fu teki dopu.

9. Fa yu kan yepi a studenti fu yu fu sreka ensrefi gi a studie? Fruklari dati.

⁹ Wi e howpu taki te wi e studeri ibri wiki nanga wan sma, dan dati o yepi en fu de nanga tangi gi ala den sani di Yehovah nanga Yesus du gi en èn taki a o wani kon sabi moro (Mat. 5:3, 6). Ma fu man kisi wini fu a studie, a studenti musu poti ala en prakseri na den sani di a e leri.  Dati meki yu musu yepi en fu kon frustan o prenspari a de fu sreka ensrefi gi a studie. Ibri tron te a o studeri, a musu leisi a les na fesi èn a musu prakseri fa a kan du san a e leri. Fa yu kan yepi yu studenti fu sreka ensrefi na fesi? Sreka wan les makandra nanga a studenti fu sori en fa a musu du dati. * Sori en fa a kan feni den piki tapu den aksi èn taigi en taki a o man memre sani moro bun te a e hari strepi na ondro wan tu prenspari wortu. Baka dati, aksi en fu piki den aksi nanga en eigi wortu. Te a e du dati, dan yu o man si efu a frustan bun san a leri. Ma yu kan gi a studenti fu yu deki-ati fu du ete wan sani.

10. (a) Fu san ede a prenspari fu leisi Bijbel ibri dei? (b) San wan studenti musu du fu kisi moro wini fu den sani di a e leisi na ini Bijbel?

¹⁰ Boiti taki yu e studeri ibri wiki nanga a studenti fu yu, a ben o bun te en srefi e du wan tu sani ibri dei. A musu taki nanga Yehovah, ma a no dati wawan, a musu arki en tu. A e arki Gado te a e leisi Bijbel ibri dei (Yos. 1:8; Ps. 1:1-3). Sori en fa a musu gebroiki a „Schema fu leisi Bijbel” di de fu feni tapu jw.org èn di a kan print. * Ma fu yepi a sma kisi moro wini fu den sani di a e leisi na ini Bijbel, yu kan gi en deki-ati fu denki dipi fu den sani di a leri fu Yehovah èn fu a fasi fa a kan gebroiki den sani dati na ini en eigi libi.​—Tori 17:11; Yak. 1:25.

11. Fa yu kan leri yu studenti fu begi na a yoisti fasi èn fu san ede a prenspari taki a kon abi a gwenti fu begi Yehovah?

¹¹ Gi a studenti deki-ati fu begi ibri dei, fu di na a fasi dati a e taki nanga Yehovah. Begi nanga yu heri ati na a bigin èn na a kaba fu a Bijbelstudie èn taki fu a studenti fu yu na ini a begi dati. Te a e arki fa yu e begi, dan a o leri fa fu begi nanga en heri ati èn a o leri tu taki a musu begi Yehovah Gado na ini a nen fu Yesus Krestes (Mat. 6:9; Yoh. 15:16). Te a studenti fu yu e leisi Bijbel ibri dei (na so a e arki Yehovah) èn te a e begi en (na so a e taki nanga Yehovah), dan yu o si fa a e kon moro krosibei na Gado (Yak. 4:8). Efu a studenti fu yu e du den sani disi ibri dei, dan dati o yepi en fu go na fesi so taki a e gi ensrefi abra na Gado èn teki dopu. Ma san moro kan yepi en?

12. Fa yu kan yepi yu studenti fu tron wan mati fu Yehovah?

¹² Wan studenti no musu frustan den sani nomo di a leri fu Bijbel, ma den sani dati musu naki en ati tu. Fu san ede? Fu di dati o meki taki a wani du san a leri. Yesus ben e leri sma furu sani èn sma ben lobi arki en. Ma sma ben tron bakaman fu en fu di den sani di a ben e leri den ben e naki den ati (Luk. 24:15, 27, 32). A studenti fu yu musu kon si Yehovah leki wan trutru sma èn a musu frustan taki Yehovah kan tron en Papa, en Gado, nanga en Mati (Ps. 25:4, 5). Poti prakseri na den moi fasi fu Gado te yu e studeri nanga en (Eks. 34:5, 6; 1 Petr. 5:6, 7). Du disi ibri leisi te yu e studeri, awinsi fu sortu tori yu e taki. Yepi a studenti fu si den moi fasi fu Yehovah, soleki a lobi fu en, a switifasi fu en, nanga a sari-ati fu en. Yesus ben taki dati „a fosi èn a moro bigi komando” na fu „lobi Yehovah yu Gado” (Mat. 22:37, 38). Pruberi fu yepi yu studenti fu kon lobi Yehovah nanga en heri ati.

13. Sori fa yu kan yepi yu studenti fu kon sabi den moi fasi fu Yehovah.

¹³ Te yu e taki nanga yu studenti, dan fruteri en fu san ede yu lobi Yehovah. Disi kan yepi en fu kon frustan taki en srefi musu tron wan mati fu Yehovah èn taki a musu leri fu lobi en (Ps. 73:28). Efu yu e studeri wan pisi na ini wan buku noso efu yu e leisi wan tekst di e taki fu a lobi fu Yehovah, a koni fu en, a retidu fu en, noso a makti fu en, dan fruteri a studenti fu san ede a sani disi e naki yu ati. Taigi en taki disi na wan fu den someni sani di e meki taki yu lobi yu Papa na hemel. Ma ete wan sani de di ibri Bijbelstudenti musu du fu man go na fesi èn teki dopu.

14. Fa Hebrewsma 10:24, 25 kan yepi wan studenti fu go na fesi?

¹⁴ Wi alamala wani taki den studenti fu wi go na fesi èn teki dopu. Wan prenspari fasi fa wi kan yepi den na te wi e gi den deki-ati fu kon na den gemeente konmakandra. Preikiman di abi ondrofeni e taki dati studenti di e kon na den konmakandra wantewante, e go na fesi moro esi (Ps. 111:1). Son preikiman e taigi den studenti fu den taki efu den wani kon frustan Bijbel moro bun, dan den musu kon na den konmakandra. Leisi  Hebrewsma 10:24, 25 nanga yu studenti èn sori en sortu wini a o kisi te a e kon na den konmakandra. Prei a felem San wi e du na ini wan Kownukondre zaal? * gi en. Yepi yu studenti fu kon si taki a prenspari fu go na den konmakandra ibri wiki.

15. Fa wi kan gi wan studenti deki-ati fu kon na den konmakandra ibri wiki?

¹⁵ San yu kan du efu yu studenti no kon na den konmakandra ete noso efu a no e kon ibri wiki? Fruteri en wan moi sani di yu leri na wan fu den konmakandra. A fasi fa yu e fruteri a studenti a tori kan yepi en fu kon si taki den konmakandra e gi yu prisiri èn kande a o wani kon tu. Gi en A Waktitoren noso a Kresten libi nanga preikiwroko Studie-buku di wi e studeri na a konmakandra a wiki dati. Sori en san wi o luku na a tra konmakandra èn aksi en sortuwan fu den tori a lobi. Den sani di a studenti fu yu o si noso yere na a konmakandra fu wi o bun moro iniwan sani di a si noso yere na wan tra kerki (1 Kor. 14:24, 25). A o miti tra sma di de wan bun eksempre èn di kan yepi en fu go na fesi èn fu teki dopu.

16. Fa wi kan yepi wan Bijbelstudenti fu go na fesi èn fu teki dopu? San wi o leri na ini a tra artikel?

¹⁶ Fa wi kan hori Bijbelstudie na so wan fasi taki a studenti e go na fesi èn teki dopu? Te wi e gi a studenti deki-ati fu studeri ibri wiki èn fu sreka ensrefi bun, dan wi e yepi en fu si a studie leki wan prenspari sani. Wi wani gi en deki-ati tu fu begi Yehovah, fu leisi Bijbel ibri dei, èn fu du muiti fu tron wan mati fu en. Wi wani gi a studenti deki-ati tu fu kon na den gemeente konmakandra. (Luku a faki „ Sani di studenti musu du fu man go na fesi èn teki dopu”.) Ma soleki fa a tra artikel o sori, ete feifi sani de di wan preikiman musu du fu yepi en studenti fu go na fesi èn fu teki dopu.