1. Fu san ede so furu sma e bruya?

DUSUNDUSUN Kresten kerki de di e taki dati den e anbegi Gado na a fasi fa a wani. Dati meki wi kan frustan fu san ede so furu sma e bruya! Den e aksi densrefi: „Na wán tru bribi nomo de, noso a de so taki Gado feni ala bribi bun?” Wi sabi seiker taki den sani di wi e leri sma na a waarheid èn taki Yehovah Kotoigi na ini a ten disi e anbegi Gado soleki fa a wani? Fa wi kan de seiker fu dati? Meki wi go luku wan tu buweisi.

2. Fu san ede na apostel Paulus ben de seiker taki a ben abi a tru bribi? (1 Tesalonikasma 1:5)

² Na apostel Paulus ben de seiker taki a ben abi a tru bribi. (Leisi 1 Tesalonikasma 1:5.) A no ben e bribi a sani dati soso fu di na anbegi fu en ben meki a firi bun. Paulus ben e studeri Gado Wortu fayafaya. A ben e bribi taki „na Gado srefi ben meki sma skrifi ala den sani di de na ini Gado Buku” (2 Tim. 3:16). Den sani di a ben leri fu Gado Buku ben sori en krin taki Yesus na a Mesias di Gado ben pramisi. Na a sani dati den Dyu kerki fesiman no ben wani bribi. Den hoigriman dati ben taki dati den ben e teki presi gi Gado, ma den sani di den ben e du no ben e sori dati (Tit. 1:16). Paulus no ben de leki den man dati. A no ben e pikipiki san a ben wani bribi fu Gado Wortu èn san a no ben wani bribi. A ben de klariklari fu du èn fu leri sma „ala sani di Gado wani libisma fu du”.​—Tori 20:27.

3. A de so taki wi musu kisi piki tapu ala den aksi fu wi, fosi wi kan de seiker taki wi abi a tru bribi? (Luku sosrefi a faki „ Den prakseri fu Yehovah èn den sani di a du ’furu so te, taki wi no man teri den’”.)

³ Son sma feni taki a tru bribi musu man piki ibri aksi di  den abi, srefi te a abi fu du nanga sani di Bijbel no e taki fu en. Ma a bun fu denki so? Luku na eksempre fu Paulus. A ben gi den Kresten brada nanga sisa fu en deki-ati fu „ondrosuku ala sani fu luku efu den tru”. Ma a ben taigi den tu taki furu sani ben de di a no ben e frustan (1 Tes. 5:21). A ben skrifi: „Wi no sabi ala sani di de fu sabi.” A ben taki tu: „Wi e luku na ini wan spikri pe wi no man si sani krin” (1 Kor. 13:9, 12). Paulus no ben e frustan ala sani, neleki fa wi no e frustan ala sani. Ma Paulus ben man frustan san Yehovah abi na prakseri. Den sani di a ben sabi ben nofo gi en kaba fu de seiker taki a abi a tru bribi!

4. Fa wi kan de seiker taki wi feni a tru bribi, èn sortu sani di abi fu du nanga tru Kresten wi o luku?

⁴ Wan sani di o yepi wi fu de seiker taki wi feni a tru bribi, na te wi e luku efu Yehovah Kotoigi na ini a ten disi e anbegi Yehovah na a fasi fa Yesus ben du dati. Na ini na artikel disi wi o si taki tru Kresten (1) e weigri fu anbegi tra sani noso tra sma, (2) e lespeki a nen fu Yehovah, (3) lobi san tru, èn (4) lobi makandra trutru.

5. San na a yoisti fasi fu anbegi Gado soleki fa Yesus leri wi, èn fa wi kan du san a leri wi?

⁵ Fu di Yesus ben lobi Gado nanga en heri ati, meki a ben e anbegi Yehovah wawan. Dati ben de so, di a ben de na hemel èn di a ben de na grontapu (Luk. 4:8). A ben leri den disipel fu en fu du dati tu. Noiti Yesus noso den disipel fu en gebroiki popki noso tra sani na ini na anbegi fu den. Fu di Gado na wan yeye, meki nowan sani di libisma man meki kan doro a glori  fu en! (Yes. 46:5) Ma fa a de te sma e meki popki fu sma di den e si leki santawan èn te den e begi den fu yepi den? A di fu tu fu den Tin Komando fu Yehovah e taki: „Un no musu meki wan popki di gersi wan sani di de na hemel, [noso] na grontapu . . . . Un no musu boigi gi den” (Eks. 20:4, 5). Den sma di wani taki Gado feni den bun e frustan taki a no wani taki den e anbegi popki.

6. Na sortu fasi Yehovah Kotoigi e anbegi Gado na ini a ten disi?

⁶ Historia sabiman kon si taki den fosi Kresten ben e anbegi Gado wawan. Fu eksempre, wan buku e taki dati den fosi Kresten ben o si en leki wan bigi ogri efu popki ben de na den presi pe den ben e anbegi Gado (History of the Christian Church). Na ini a ten disi, Yehovah Kotoigi e teki na eksempre fu den fosi Kresten. Wi no e begi popki fu santawan noso engel fu yepi wi. Srefi nanga Yesus wi no e du dati. Boiti dati, wi no e taki a fraga odi èn wi no e du nowan sani di ben o sori taki wi e anbegi a kondre fu wi. Awinsi san e pasa, wi wani du a sani disi di Yesus ben taki: „Na Yehovah yu Gado, yu musu anbegi.”​—Mat. 4:10.

7. Fa Yehovah Kotoigi e difrenti fu tra kerki?

⁷ Na ini a ten disi furu sma lobi fu arki pôpi kerki fesiman. Den lobi den kerki fesiman disi so te, taki a gersi leki den e anbegi den. Furu sma e go na den kerki fu den, den e bai buku fu den èn den e gi furu moni fu horibaka gi den noso den sani di den e du. Son sma e bribi iniwan sani di den kerki fesiman disi e taki. Den sma disi breiti so te fu si den kerki fesiman fu den, taki a gersi leki na Yesus srefi den si! Ma tru anbegiman fu Yehovah no e waka baka libisma. Aladi wi e lespeki den wan di e teki fesi, toku wi e bribi a sani disi di Yesus ben leri wi: „Un alamala na brada” (Mat. 23:8-10). Wi no e anbegi libisma, awinsi na kerki fesiman noso tiriman fu a kondre. Èn wi no e horibaka gi den sani di den wani du, fu di wi no e bumui na ini den afersi fu grontapu. Te a abi fu du nanga den sani disi, wi de tra fasi leki den someni kerkigrupu di e kari densrefi Kresten.​—Yoh.18:36.

8. Fa wi du sabi taki Yehovah wani taki wi gi en nen glori èn taki wi e meki ala sma kon sabi a nen dati?

⁸ Wan leisi Yesus ben begi: „Mi Tata, gi yu nen glori.” Yehovah srefi piki a begi dati nanga wan tranga sten komoto fu hemel èn a pramisi taki a ben o gi en nen glori (Yoh.12:28). Di Yesus ben e du en wroko dyaso na grontapu, dan ala ten a ben e gi en Papa nen glori (Yoh.17:26). Dati meki wi kan frustan taki tru Kresten e si en leki wan grani fu gebroiki a nen fu Gado èn fu meki ala sma kon sabi a nen dati.

9. Fa den fosi Kresten sori taki den ben e lespeki a nen fu Gado?

⁹ Na ini a ten fu den fosi Kresten, syatu baka di a Kresten gemeente ben seti, dan Yehovah „bigin poti prakseri na den sma di no de Dyu, fu puru wan pipel na den mindri di musu tyari en nen” (Tori 15:14). Den fosi Kresten dati ben breiti taki den ben man gebroiki Gado nen èn taki den ben man meki tra sma kon sabi a nen dati. Den ben e gebroiki a nen dati furu na ini a preikiwroko èn na ini den sani di den ben e skrifi. * Na so den  sori taki den ben de a wan-enkri pipel di ben e fruteri sma fu Gado nen.​—Tori 2:14, 21.

10. Fu san ede wi kan taki na Yehovah Kotoigi wawan e meki sma kon sabi a nen fu Yehovah?

¹⁰ A tru taki na Yehovah Kotoigi wawan e fruteri sma fu a nen fu Yehovah? Kow go luku fu san ede wi kan taki dati. Na ini a ten disi furu kerki fesiman du ala san den man fu no meki sma sabi Gado nen. Den puru a nen na ini den Bijbel fu den èn son leisi den tapu sma fu gebroiki a nen dati na ini den kerki fu den. * A de krin taki na Yehovah Kotoigi wawan abi bigi lespeki gi a nen fu Gado. Nowan tra kerkigrupu e meki so furu muiti fu meki sma na ala sei fu grontapu kon sabi a nen fu Gado. Iya, wi e du ala san wi man fu sori taki wi na Kotoigi fu Yehovah trutru (Yes. 43:10-12). Wi meki moro leki 240 milyun fu a Nyun-Grontapuvertaling di abi a nen fu Yehovah na den presi pe tra Bijbel vertaler ben puru en. Èn wi e meki buku nanga tra sani na ini moro leki 1000 tongo pe a nen fu Yehovah de fu feni.

11. Fa den fosi Kresten sori taki den ben lobi san tru?

¹¹ Yesus ben lobi ala den tru tori di abi fu du nanga Gado èn den sani di Gado o du. A fasi fa Yesus ben e libi ben sori taki  a ben e bribi den sani disi èn a ben e fruteri tra sma fu den tu (Yoh. 18:37). Neleki Yesus, den tru bakaman fu en ben lobi den tori disi nanga den heri ati tu (Yoh. 4:23, 24). Dati meki den ben e weigri fu hori densrefi na kerkileri, gwenti, nanga denki di no ben e kruderi nanga den tru tori disi (Kol. 2:8). A heri fasi fa den ben e libi ben e sori taki den ben e bribi den sani disi. Na apostel Petrus ben kari a Kresten bribi „a tru leri” (2 Petr. 2:2). Na ini a ten disi tru Kresten „e gi yesi na a tru leri” èn den „e tan du san den leri”. Sobun, ala san den e bribi èn a heri fasi fa den e libi de leki fa a Wortu fu Yehovah e sori.​—3 Yoh. 3, 4.

12. San a Tiri Skin e du te den kon si taki den musu tyari kenki kon na ini a fasi fa wi e frustan sani, èn fu san ede den e du dati?

¹² Gado pipel na ini a ten disi no e taki dati den e frustan ala sani na ini Bijbel krin ala ten. Son leisi den no ben fruklari wan sani na ini Bijbel bun, noso den no ben orga sani na ini a gemeente na a yoisti fasi. Ma a sani dati no musu fruwondru wi. Bijbel e sori krin taki safrisafri a pipel fu Gado ben o kon frustan den tru leri fu Bijbel moro bun (Kol. 1:9, 10). Yehovah e tyari den tru leri fu Bijbel kon na krin safrisafri èn wi musu wakti nanga pasensi teleki wi kan frustan den tru leri dati moro bun (Odo 4:18). Te a Tiri Skin kon si taki wi musu kenki a fasi fa wi e frustan wan sani noso fa wi e du wan sani, dan den no e draidrai fu tyari kenki kon. Furu Kresten kerkigrupu e tyari kenki kon fu meki den sma na ini den gemeente fu den noso den sma na ini a grontapu disi firi moro bun. Ma den kenki di na organisâsi fu Yehovah e tyari kon, na fu yepi wi fu kon moro krosibei na Gado èn fu anbegi Gado soleki fa Yesus leri wi (Yak. 4:4). A no fu di sma e denki tra fasi now meki wi e tyari kenki kon. Wi e du dati fu di wi kon frustan son sani na ini Bijbel moro bun. Wi lobi den tru leri fu Gado.​—1 Tes. 2:3, 4.

13. San na a moro prenspari fasi di tru Kresten abi èn fa Yehovah Kotoigi na ini a ten disi e sori taki den abi a fasi disi?

¹³ Den fosi Kresten ben abi furu bun fasi, ma sma ben sabi den moro furu leki sma di lobi makandra. Yesus ben taki: „Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Na ini a ten disi, Yehovah Kotoigi na heri grontapu e sori trutru lobi gi makandra èn den de leki wán bigi famiri. Nowan tra organisâsi de pe sma e libi so nanga makandra aladi den de fu tra kondre, tra ras noso tra kulturu. Te wi de na den alawiki konmakandra, den kring konmakandra nanga den kongres fu wi, dan wi e si krin taki wi lobi makandra trutru. A sani disi e meki taki wi de seiker taki Yehovah feni wi anbegi bun.

14. Te yu e luku Kolosesma 3:12-14, dan san na wan prenspari fasi fa wi kan sori trutru lobi gi makandra?

¹⁴ Bijbel e taigi wi taki wi musu ’lobi makandra nanga wi heri ati’ (1 Petr. 4:8). Wan fasi fa wi kan sori so wan lobi, na te wi e gi makandra pardon èn te wi e libi bun nanga makandra, aladi wi e meki fowtu. Wi e du muiti tu fu sori switifasi gi ala sma na ini a gemeente èn fu yepi den awinsi den ben du wi wan hati sani wan leisi. (Leisi Kolosesma 3:12-14.) Te wi e sori lobi na a fasi disi, dan ala sma e si taki wi na trutru Kresten.

15. San na ete wan fasi fa na anbegi fu wi de a srefi leki a di fu den fosi Kresten?

¹⁵ Tra fasi de tu fa na anbegi fu wi de a srefi leki na anbegi fu den fosi Kresten. Fu eksempre, den gemeente fu wi seti na a srefi fasi leki fa den apostel ben seti den gemeente na a ten dati. Na ini a ten disi, wi srefi abi kring-owruman, gemeente owruman, nanga dinari ini a diniwroko (Fil. 1:1; Tit. 1:5). Neleki den fosi Kresten, wi e hori wisrefi na den wet fu Yehovah di abi fu du nanga seks, a trowlibi nanga brudu. Boiti dati, wi e kibri a gemeente gi sma di no wani hori densrefi na den wet fu Gado.​—Tori 15:28, 29; 1 Kor. 5:11-13; 6:9, 10; Hebr. 13:4.

16. San wi e leri fu Efeisesma 4:4-6?

¹⁶ Yesus ben taki dati furu sma ben o taki dati den na disipel fu en, ma a no ala sma ben o de trutru disipel fu en (Mat. 7:21-23). Bijbel ben taki dati na ini den lasti dei ’a ben o gersi leki furu sma ben o dini Gado fayafaya, ma a libi fu den ben o sori taki dati no de so’ (2 Tim. 3:1, 5). Toku Bijbel e taigi wi krin taki „wán bribi” nomo de di Gado feni bun.​—Leisi Efeisesma 4:4-6.

17. Suma na ini a ten disi abi a tru bribi èn e waka baka Yesus?

¹⁷ Wi si difrenti buweisi. Wi luku fa Yesus leri sma fu anbegi Gado èn wi luku fa den fosi Kresten ben e anbegi Gado. Sobun, suma abi a tru bribi na ini a ten disi? A wan-enkri piki tapu na aksi disi na: Yehovah Kotoigi. Wi abi a bigi grani fu de Kotoigi fu Yehovah èn wi sabi den tru tori di abi fu du nanga Yehovah èn san a o du! Meki a de so taki wi tan du muiti fu tan na ini a tru bribi ala ten.