A yari dati, na organisâsi tyari wan tu kenki kon di meki taki a wánfasi na mindri den Bijbel Ondrosukuman kon moro tranga. Na ini na Ingrisitongo Waktitoren sma ben kan leisi fa den Bijbel Ondrosukuman disi ben e tyari wan Bijbeltekst kon na krin di den ben studeri na a „Begi nanga prèise konmakandra” di den ben e hori ibri wiki. Boiti dati, den Bijbel Ondrosukuman ben meki wan kalender di ben e sori sortu Bijbeltekst den ben o studeri ibri wiki na a konmakandra. Gi ibri dei a kalender ben sori wan singi di den ben kan singi te den srefi ben e studeri noso te den ben e studeri nanga den osofamiri.

Na den konmakandra fu den, den Bijbel Ondrosukuman ben e fruteri wan ondrofeni di den ben abi na ini a preikiwroko, den ben kan gi Gado tangi gi san a du gi den, den ben kan singi wan singi, noso den ben kan taki wan begi srefi. Eva Barney ben dopu na ini 1923 di a ben abi 15 yari. A e taki: „Mi sabi ete taki efu yu ben gi piki na a konmakandra, dan yu ben musu opo tanapu èn yu ben musu bigin taki wan sani soleki: ’Mi wani taki Masra tangi gi ala den bun sani di a du gi mi.’” Son brada ben lobi fu taki wan sani na a konmakandra disi. Sisa Barney e taki moro fara: „Lobi Brada Godwin di ben owru kaba, ben abi so furu sani fu taki Masra tangi. Ma te en wefi ben e si taki a brada di ben e teki fesi no ben man wakti moro, dan a ben e hari en masra na en dyakti. Na so en masra ben e tapu fu taki èn a ben e sidon baka.”

Wán leisi wan mun, ibri gemeente ben e hori wan spesrutu „Begi nanga prèise konmakandra”. Na Ingrisitongo Waktitoren fu 1 april 1923 e taki fu a konmakandra disi: „Afu fu a konmakandra na gi piki nanga ondrofenitori di abi fu du nanga a preikiwroko èn fu gi den preikiman deki-ati. . . . Wi e bribi taki den konmakandra disi o meki taki a wánfasi na mindri den brada nanga sisa o kon moro tranga.”

Charles Martin, ben de wan gemeente preikiman fu Vancouver, Kanada di ben abi 19 yari. A ben kisi furu wini fu den konmakandra disi. Furu yari baka dati a ben taki: „Na den konmakandra dati mi leri san fu taki na ini a preikiwroko. Boiti dati, sma ben gwenti fruteri wan sani di den ben ondrofeni na ini na oso-fu-oso preikiwroko. Na so mi ben kan sabi san fu taki na ini a preikiwroko èn fa mi ben o piki sma di ben abi wan tra denki fu sani.”

A wánfasi fu den brada kon moro tranga fu di den ben abi spesrutu dei fu go preiki. Na Ingrisitongo Waktitoren fu 1 april 1923 ben taki: „Tudewroko 1 mei 1923, ala gemeente o go na ini a preikiwroko so taki wi kan wroko leki wán man. Baka dati, ibri fosi tudewroko fu a mun o de wan preikiwroko dei gi ala gemeente. Ibri sma fu ibri gemeente musu teki prati na a wroko disi.”

Srefi yongu Bijbel Ondrosukuman ben e teki prati na a wroko. Hazel Burford di ben abi 16 yari nomo na a ten dati e taki: „A Bulletin ben abi demo di wi ben kan leri na ede (den demo disi ben de leki den eksempre fa fu hori wan takimakandra). a Mi nanga mi granpapa ben e teki prati fayafaya na ala den sani di a gemeente ben e du.” Ma Sisa Burford ben kisi gens fu wan sma di a no ben fruwakti taki a ben o gens en. A e taki: „Wan owru brada no ben feni en bun kwetikweti taki mi ben e preiki gi sma. Na a ten dati, son sma no ben e frustan taki ala Bijbel Ondrosukuman, sosrefi yonguman nanga yongu uma ben musu yepi fu prèise wi Gran Mekiman” (Ps. 148:12, 13). Ma Sisa Burford tan preiki. Bakaten a go na a di fu tu klas fu a Gileadskoro èn a dini leki zendeling na ini Panama. Te fu kaba den brada kon frustan taki yonguwan ben musu teki prati tu na a preikiwroko.

Den kongres yepi tu fu meki a wánfasi na mindri den brada nanga sisa kon moro tranga. Na furu fu den kongres disi preikiwroko dei ben e hori. Fu eksempre, na a kongres na ini Winnipeg, Kanada, ala sma di ben de drape kisi a kari fu go preiki na ini a foto dati tapu 31 maart. Den brada nanga sisa miti furu sma na a spesrutu preikiwroko dei disi èn den ben abi bun bakapisi. Tapu 5 augustus, sowan 7000 sma go na wan tra kongres na ini Winnipeg. Na a ten dati, noiti ete so furu sma ben de na wan kongres na ini Kanada.

Na ini 1923, a moro prenspari kongres fu a pipel fu Yehovah ben hori tapu 18-26 augustus, na ini Los Angeles, Kalifornia. Den wiki na fesi,  koranti meki reklame gi a kongres disi èn den Bijbel Ondrosukuman prati moro leki 500.000 traktaat. Den ben skrifi sani tapu bord di den ben fasi na den loko nanga den wagi.

Tapu satra 25 augustus, Brada Rutherford hori a lezing „Skapu nanga bokoboko”, èn na ini a lezing dati a sori krin taki den „skapu” na den reti-ati sma di o libi na ini wan paradijs na grontapu. A hori wan tra lezing tu èn a taki fu wan prenspari bosroiti di ben nen „A warskow”. A prenspari bosroiti disi ben e krutu den kerki fu Krestenhèit èn a gi reti-ati sma deki-ati fu komoto na ini „Babilon a Bigiwan” (Openb. 18:2, 4). Bakaten, fayafaya Bijbel Ondrosukuman na heri grontapu ben o wroko makandra leki wán man fu prati milyunmilyun kopi fu a prenspari bosroiti disi.

A lasti dei fu a kongres, moro leki 30.000 sma arki Brada Rutherford di a hori a lezing „Ala pipel e hari go na Armagedon, ma milyunmilyun sma di e libi now, noiti no sa dede”. Fu di den Bijbel Ondrosukuman ben e fruwakti taki bun furu sma ben o kon arki a lezing disi, meki den yuru a Los Angeles Coliseum, wan bigi hal di no ben bow so langa ete. Fu di den brada ben wani sorgu taki furu sma yere a lezing, meki den gebroiki a geluid-sistema fu a stadion, èn dati ben de wan nyun sani na a ten dati. Furu tra sma yere a lezing na radio.

Na ini 1923, a ben de krin taki a preikiwroko ben e go na fesi na ini Afrika, Europa, India, nanga Zuid-Afrika. Na ini India, Brada A. J. Joseph ben e sorgu en wefi nanga den siksi pikin fu den, ma a ben yepi tu fu druk buku na ini Hinditongo, Tamiltongo, Telugutongo, nanga Urdutongo.

Na ini Sièra Leon, Bijbel Ondrosukuman Alfred Joseph nanga Leonard Blackman skrifi go na a edekantoro na ini Brooklyn, New York fu suku yepi. Tapu 14 april 1923, den kisi a yepi disi. Alfred e fruteri: „Satra neti latilati, wan sma bel mi sondro taki mi ben fruwakti dati.” A yere fa wan krakti sten aksi en: „Na yu na a sma di skrifi a Waktitoren Genootschap fu seni preikiman kon gi yu?” Alfred piki: „Iya.” A sten taki: „We, den seni mi kon.” A sten disi ben de fu Brada Brown. Na a dei dati a ben doro. A ben komoto fu den Karibis èilanti makandra nanga en frow Antonia nanga den yongu meisje fu den di nen Louise nanga Lucy. Den brada no ben abi fu wakti langa fu miti a famiri disi.

 Alfred e taki moro fara: „A tra mamanten, mi nanga Leonard ben e studeri di wi si wan hipsi man na a doro. A ben de William R. Brown. A ben de so fayafaya gi a waarheid taki a ben wani hori wan lezing a dei baka dati.” A no teki tu mun srefi di Brada Brown prati ala den buku di a ben tyari kon nanga en. Heri esi a kisi ete 5000 buku èn fosi yu denki moro buku ben de fanowdu. Ma sma no ben sabi Brada Brown leki wan man di ben e seri buku. Na ini ala den yari di a ben e dini Yehovah fayafaya, a tan poti prakseri na Bijbel na ini den lezing fu en èn na so sma bigin kari en Bible Brown.

Na ini Doisrikondre, den brada bosroiti fu froisi fu a bijkantoro na ini Barmen, fu di a ben pikin tumusi. Boiti dati, den ben yere taki a legre fu Fransikondre ben o broko kon na ini a foto dati. Den Bijbel Ondrosukuman feni wan gebow na ini Magdeburg di ben o fiti fu druk buku. Tapu 19 yuni, den brada teki ala den sani fu a drukkerij nanga den tra sani na ini a bijkantoro, dan den froisi go na a nyun Betel na ini Magdeburg. A srefi dei baka dati di den seni boskopu gi na edekantoro taki den ben kba froisi, koranti meki bekènti taki Fransikondre ben teki a foto Barmen abra. Den brada taki Yehovah tangi taki a ben kibri den èn taki a ben yepi den fu froisi.

Na ini Brasyonkondre, George Young, di ben e go na difrenti kondre fu preiki a bun nyunsu, opo wan nyun bijkantoro èn a bigin tyari A Waktitoren kon na doro na ini Potogisitongo. Na ini wan tu mun nomo, a prati moro leki 7000 buku. Sarah Ferguson ben breiti srefisrefi di Brada Young kon luku en nanga en pikin. A ben e leisi na Ingrisitongo Waktitoren sensi 1899, ma noiti a ben man teki dopu. Wan tu mun baka dati, Sisa Ferguson nanga den fo pikin fu en ben man dopu te fu kaba.

Na a kaba fu a yari, na Ingrisitongo Waktitoren fu 15 december 1923, ben taki fa den kenki na den konmakandra, na a preikiwroko, èn na den kongres ben abi krakti tapu den Bijbel Ondrosukuman. A ben taki: „A de krin fu si taki a bribi fu den gemeente tranga. Meki wi sreka wisrefi gi moro wroko èn meki wi tan dini Gado fayafaya èn nanga prisiri na ini 1924.”

A yari baka dati ben de wan moi yari tu gi den Bijbel Ondrosukuman. Omeni mun langa den brada na Betel ben e sreka wan pisi gron na Staten Èilanti, di ben de krosibei fu na edekantoro fu den na ini Brooklyn. Na ini 1924 den brada kaba bow drape èn den nyun gebow dati yepi fu meki a wánfasi fu den brada nanga sisa kon moro tranga. Boiti dati, den prati a bun nyunsu na difrenti nyun fasi.