Aksi fu leisiman
Den Israelsma ben abi tra sani fu nyan na ini a gran sabana, boiti mana nanga tokoro-fowru?
Na ini den 40 yari di den Israelsma ben de na ini a sabana, mana ben de a moro prenspari nyanyan fu den (Eks. 16:35). Yehovah ben gi den Israelsma tokoro-fowru tu na tu okasi (Eks. 16:12, 13; Num. 11:31). Ma den Israelsma ben abi wan tu tra sani fu nyan.
Son leisi Yehovah ben e tyari a pipel fu en go na „wan tanpresi” pe den ben kan feni watra fu dringi nanga sani fu nyan (Num. 10:33). Wan fu den presi dati ben de Elim, „pe twarfu watra-olo nanga seibitenti palmbon ben de” (Eks. 15:27). A musu de so taki den palmbon disi ben de dadelbon. Wan buku e taki dati a dadelbon di „e gro na furu difrenti presi, . . . na a moro prenspari bon na ini a gran sabana di e gi milyunmilyun sma nyanyan, oli, èn a de leki wan kowrupe gi den”.—Plants of the Bible.
A kan tu taki den Israelsma ben stop na a bigi kowrupe di sma sabi tide leki Feiran èn di de wan pisi fu a Lagipresi Feiran. a A lagipresi disi, „langa 130 kilometer èn a de wan fu den moro langa, moro moi, èn moro pôpi lagipresi na ini Sinai”, na so wan buku e taki (Discovering the World of the Bible). A buku e taki tu dati efu wan sma ben o bigin waka pe a lagipresi e miti a se èn a e waka sowan 45 kilometer, dan a o doro a Feiran kowrupe. A presi disi hei 610 meter moro leki a se èn a langa sowan 4,8 kilometer. A lai nanga palmbon èn a moi so te taki sma e teki en gersi nanga a dyari fu Eden. Dusundusun yari langa sma e go drape fu di a presi abi bun furu dadelbon.
Dadelbon na ini a Feiran kowrupe
Di den Israelsma ben gwe libi Egepte, dan den tyari blon nanga den, sosrefi baki fu masi blon, èn kande tarwe nanga oli. A no de fu taki dati den sani disi no ben o tan langa. A pipel tyari sosrefi „bun furu skapu nanga kaw” (Eks. 12:34-39). Fu di furu grasi no ben e gron na ini a sabana, meki a kan taki bun furu fu den meti disi dede. Kande a pipel nyan sonwan fu den meti disi tu. Ma a kan tu taki den gi den meti disi leki ofrandi, srefi gi falsi gado (Tori 7:39-43). Ma toku a de so taki den Israelsma ben e kweki skapu nanga kaw. Wi kan si dati te wi e luku san Yehovah ben taigi a pipel fu en di den ben trangayesi en. A ben taki: „Fotenti yari langa den manpikin fu unu o wakawaka lontu leki skapuman na ini a sabana” (Num. 14:33). Dati meki a kan taki den ben abi merki èn son leisi meti sosrefi. Ma dati no ben nofo fu hori sowan dri milyun sma na libi 40 langa. b
Pe den meti ben e feni nyanyan nanga watra? c Na a ten dati, a kan taki moro alen ben e fadon èn a kan taki moro bon nanga grasi ben e gro na ini a sabana. Inzicht in de Schrift, Deel 1, e taki dati 3500 yari pasa, „moro watra ben de na ini a kontren pe den Israelsma ben de. Wi sabi disi fu di bun furu drei èn dipi lagipresi de drape di ben de liba fosi.” Toku sma no ben gwenti tan na ini a gran sabana èn a presi disi ben e meki sma frede (Deut. 8:14-16). Efu Yehovah no ben du wondru fu gi den Israelsma watra, dan a pipel disi nanga den meti fu den ben o dede.—Eks. 15:22-25; 17:1-6; Num. 20:2, 11.
Moses taigi den Israelsma taki Yehovah ben gi den mana fu ’leri den taki sma no e libi fu brede wawan, ma fu ibri wortu di Yehovah mofo taki’.—Deut. 8:3.
a Bijbel e taki fu tu okasi pe den Israelsma tyari meti leki ofrandi gi Yehovah na ini a gran sabana. A fosi okasi ben de na a ten di den seti a priestergrupu, èn a di fu okasi ben de na a Paskafesa. Ala den tu okasi disi ben de na ini 1512 Fosi Krestes, dati na wán yari baka di den Israelsma gwe libi Egepte.—Lef. 8:14–9:24; Num. 9:1-5.
b Na a kaba fu den 40 yari na ini a gran sabana, den Israelsma ben teki dusundusun skapu fu den feanti fu den di den ben wini na ini feti (Num. 31:32-34). Toku den tan nyan mana teleki den go na ini a Pramisi Kondre.—Yos. 5:10-12.
c Bijbel no e taki efu den meti ben e nyan mana, fu di Gado ben taigi a pipel taki ibri sma ben musu piki pikinso fu en, so furu leki san a ben o man nyan. A no ben taki noti fu den meti.—Eks. 16:15, 16.
