1-2. San na a moro bun fasi fa wi kan leisi èn studeri Bijbel? Gi wan eksempre.

 KOW taki dati yu wani bai wan oso. San yu ben o wani si fosi yu bai na oso? Yu ben o wani si soso wan fowtow fu a fesisei fu na oso? A no de fu taki dati yu ben o wani si na oso so taki yu kan waka lontu en, yu ben o wani go inisei fu luku ala den kamra, èn fu luku ala sani fu na oso finifini. Kande yu ben o wani si a bouwtekening srefi. Awinsi fa a no fa, yu ben o wani si ala sani fu na oso di yu wani bai.

² Wi kan du wan srefi sortu sani te wi e leisi èn studeri Bijbel. Wan Bijbel sabiman taki dati Bijbel de leki „wan bigi hei gebow di abi wan steifi fondamenti”. Sobun, fa wi kan kon sabi finifini san skrifi na ini Bijbel? Efu yu e leisi Bijbel esi-esi, dan yu o kon sabi soso „den moro makriki sani fu den santa boskopu fu Gado” (Hebr. 5:12). Ma neleki fa yu ben o luku ala sani finifini na ini na oso fu sabi fa a de, na so yu musu ondrosuku Bijbel finifini tu fu frustan en moro krin. Wan moi fasi fa yu kan studeri Bijbel, na te yu e kon sabi fa den difrenti sani na ini abi fu du nanga makandra. Pruberi fu frustan san yu e bribi èn fu san ede yu e bribi taki den sani disi tru.

3. San na apostel Paulus ben taigi den Kresten brada nanga sisa fu en fu du, èn fu san ede? (Efeisesma 3:14-19)

³ Fu man frustan Gado Wortu finifini, wi musu kon sabi den dipi tru tori fu Bijbel. Na apostel Paulus ben gi den Kresten brada nanga sisa fu en deki-ati fu studeri Gado Wortu fayafaya so taki den ben kan „frustan finifini san na a bradi nanga a langa nanga a hei nanga a dipi” fu den  tru tori fu Gado. (Leisi Efeisesma 3:14-19.) Na dati wi musu du tu. Kow go luku fa wi kan ondrosuku Gado Wortu finifini so taki wi kan frustan en moro bun.

4. Fa wi kan tron moro bun mati fu Yehovah? Gi wan tu eksempre.

⁴ Wi leki Kresten no wani frustan soso den makriki sani fu Bijbel. Wi wani kon sabi „srefi den dipi sani fu Gado” èn wi kan du dati nanga yepi fu a santa yeye (1 Kor. 2:9, 10). Efu yu wani tron wan moro bun mati fu Yehovah, dan kande yu kan studeri wan spesrutu penti finifini. Fu eksempre, yu kan ondrosuku fa a sori lobi gi den futuboi fu en na ini owruten èn fa dati e sori taki a lobi yu tu. Yu kan studeri fa Yehovah seti sani so taki den Israelsma ben kan anbegi en èn yu kan agersi dati nanga den sani di a seti na ini a ten disi so taki yu kan anbegi en. Noso kande yu kan studeri den profeititori finifini di kon tru na a ten fu Yesus en libi nanga en diniwroko na grontapu.

5. Sortu tori yu ben o wani studeri finifini gi yusrefi?

⁵ Son sma di lobi fu ondrosuku Bijbel finifini, ben taki fu wan tu sani di den ben o wani studeri moro dipi. Wan tu fu den sani di den kari skrifi na ini a faki „ Sani di yu kan studeri”. Yu o lobi fu studeri den tori dati te yu e gebroiki a buku Ondrosuku Bijbel moro fini​—Gi Yehovah Kotoigi. Te yu e studeri Bijbel finifini, dan dati kan tranga yu bribi èn „yu o kon leri sabi Gado” (Odo 2:4, 5). Kow go luku wan tu dipi tru tori fu Bijbel di wi kan ondrosuku moro fini.

6. (a) Fu san ede noti no kan tapu Yehovah fu du san a abi na prakseri? (b) Fu san ede wi kan taki dati den sani di Yehovah abi na prakseri gi libisma nanga grontapu na fu „ala ten”?

⁶ Fu eksempre, kow luku san Bijbel e taki fu den sani di Gado abi na prakseri fu du. Noti no kan tapu Yehovah fu du san a abi na prakseri. Fu san ede? Fu di  te a bosroiti fu du wan sani, dan a no abi wán fasi nomo fa a kan du dati. Na presi fu dati, a kan fiti ensrefi èn a kan du sani na difrenti fasi fu meki a wani fu en kon tru. Awinsi fa a no fa, a abi bun bakapisi ala ten fu di a „sreka ala sani so taki a kan du san a abi na prakseri” (Odo 16:4). Bijbel e taki tu dati den sani di Gado abi na prakseri fu du na fu „ala ten” (Ef. 3:11). Dati de so fu di a meki wan heri pisi ten pasa fosi a du den sani di a abi na prakseri fu du. Boiti dati, te a du den sani dati, dan den o tan fu ala ten. San Yehovah abi na prakseri fu du èn sortu sani a du tra fasi so taki a prakseri fu en kon tru?

7. Baka di den fosi tu libisma trangayesi Yehovah, dan fa Yehovah kenki a fasi fa a ben o du san a abi na prakseri? (Mateyus 25:34)

⁷ Gado ben taigi den fosi tu libisma san a ben abi na prakseri fu du gi den. Den ben musu ’meki pikin èn kon furu, teleki den kon lai na grontapu èn den ben musu basi ala sani na grontapu’ (Gen. 1:28). Di Adam nanga Eva trangayesi Gado, libisma kisi sondu ma dati no tapu Yehovah fu du san a ben abi na prakseri. A bosroiti fu du sani tra fasi. Wantewante a bosroiti fu seti wan Kownukondre na hemel di ben o du san a ben abi na prakseri sensi a bigin gi libisma nanga grontapu. (Leisi Mateyus 25:34.) Na wan ten di a ben feni bun, Yehovah seni en fosi gebore Manpikin kon na grontapu fu leri sma fu a Kownukondre èn fu gi en libi fu frulusu wi fu sondu nanga dede. Bakaten Yesus opo baka go na hemel fu tiri leki Kownu fu Gado Kownukondre. Ma Gado ben abi na prakseri fu du moro sani ete.

8. (a) San na a moro prenspari boskopu na ini Bijbel? (b) Soleki fa Efeisesma 1:8-11 e sori, dan san Yehovah abi na prakseri gi den futuboi fu en na hemel èn na grontapu? (Luku a prenki tapu a kafti.)

⁸ A moro prenspari boskopu na ini Bijbel, na taki Yehovah o krin en nen te a o meki a Kownukondre fu en di abi Krestes leki Kownu du den sani di a abi na prakseri gi grontapu. Nowan sma man kenki den sani di Yehovah abi na prakseri fu du. A pramisi wi taki a o du den sani dati seiker (Yes. 46:10, 11; Hebr. 6:17, 18). Te fu kaba, grontapu o tron wan paradijs pe den reti-ati bakapikin fu Adam nanga Eva o libi. Den no o abi sondu moro èn den o libi fu têgo (Ps. 22:26). San moro prenspari, na taki Yehovah abi na prakseri fu du wan moro bigi sani. A o meki taki ala den futuboi fu en na hemel èn na grontapu libi na ini wánfasi. Na a ten dati ala libisani o de klariklari fu gi yesi na Yehovah, a Tiriman fu den. (Leisi Efeisesma 1:8-11). A no e naki yu ati fu si fa Yehovah o du den sani di a abi na prakseri fu du?

9. Te wi e leisi Bijbel, dan san wi e kon sabi fu a ten di e kon?

⁹ Prakseri a profeititori di Yehovah ben taki na ini a dyari fu Eden, soleki fa a skrifi na Genesis 3:15. b A profeititori disi abi fu du nanga den sani di o meki a prakseri fu en kon tru. Ma den sani dati ben o pasa dusundusun yari baka dati. Wan fu den sani di ben o pasa, na taki wan fu den bakapikin fu Abraham ben o tron a Krestes (Gen. 22:15-18). Te fu kaba, na ini a yari 33, Satan gi Yesus  mankeri na en bakafutu, soleki fa Gado Wortu ben taki (Tori 3:13-15). Ma a o teki moro leki 1000 yari ete, fosi a lasti pisi fu a profeititori di e taki dati a bakapikin o masi na ede fu Satan, kon tru (Openb. 20:7-10). Èn Bijbel e sori moro krin san o pasa te Yehovah o tyari wan kaba kon na a feantifasi na mindri a sistema fu Satan nanga na organisâsi fu En.

10. (a) Sortu sani o pasa heri esi? (b) Fa wi kan sreka wi frustan nanga wi ati? (Luku a futuwortu.)

¹⁰ Prakseri den span sani disi di skrifi na ini Bijbel. A fosi sani, na taki den kondre o taki: „Freide de èn ala sani e waka bun!” (1 Tes. 5:2, 3) „Wantronso” a bigi banawtu o bigin te den kondre o feti nanga falsi bribi (Openb. 17:16). Baka dati, a kan taki sma o si „a Manpikin fu libisma e kon na tapu den wolku fu hemel nanga krakti èn nanga bigi glori” (Mat. 24:30). Yesus o krutu libisma èn a o prati den skapu fu den bokoboko (Mat. 25:31-33, 46). Na a ten dati, Satan o gens Yehovah ete. Fu di a e tegu gi a pipel fu Gado, meki a o sorgu taki wan grupu fu kondre di Bijbel e kari Gok fu a kondre Magok o kon feti nanga den getrow anbegiman fu Yehovah (Esek. 38:2, 10, 11). Na a ten fu a bigi banawtu, den salfuwan di de ete na grontapu o kisi wan opobaka na hemel fu go feti makandra nanga Krestes nanga den legre fu en na ini a feti fu Armagedon. Dati o de a lasti pisi fu a bigi banawtu c (Mat. 24:31; Openb. 16:14, 16). Dan a Dusun Yari Tiri fu Krestes o bigin na heri grontapu.​—Openb. 20:6.

11. San a têgo libi di Gado o gi wi wani taki gi yu? (Luku a prenki.)

¹¹ Now, pruberi fu prakseri fa a libi o de baka den 1000 yari dati. Bijbel e taki dati wi Mekiman ’poti têgo ten srefi na ini wi ati’ (Preik. 3:11). Prakseri san dati wani taki gi a matifasi di yu abi nanga Yehovah. A buku Kon krosibei na  Yehovah, bladzijde 319 e taki a moi sani disi: „Baka te wi libi wan hondro, wan dusun, wan milyun, noso wan milyard yari, dan wi o sabi moro fu Yehovah Gado leki san wi sabi now. Toku wi no sa frigiti taki bun furu moi sani de ete di wi kan leri fu en. . . . Têgo libi sa de wan tumusi moi èn warti sani gi wi. A sa de wan ten pe wi o du furu difrenti sani; a moro moi sani fu a libi disi sa de taki wi sa tan kon moro krosibei na Yehovah.” Ma sortu tra sani wi kan ondrosuku aladi wi e tan studeri Gado Wortu teleki a ten dati doro?

12. Fa wi kan luku go te na ini hemel? Gi wan eksempre.

¹² Gado Wortu e sori wi pikinso fa sani de na hemel pe Yehovah de (Yes. 33:5). Bijbel e fruteri span sani fu Yehovah èn fu a pisi fu en organisâsi di de na hemel (Yes. 6:1-4; Dan. 7:9, 10; Openb. 4:1-6). Fu eksempre, wi kan leisi fu den kefalek sani di Esekièl ben si di ’hemel opo, èn a kisi wan fisyun fu Gado’.​—Esek. 1:1.

13. Fa yu e denki fu den sani di Yesus e du leki Kownu nanga Granpriester na hemel, soleki fa Hebrewsma 4:14-16 e sori?

¹³ Prakseri tu san Yesus e du gi wi na hemel leki wi Kownu èn wi lobi-ati Granpriester. Nanga yepi fu a Granpriester disi wi kan kon na fesi „a kownusturu fu Gado di e sori wi bun-ati” èn begi en fu abi sari-ati nanga wi èn fu yepi wi „na a yoisti ten”. (Hebrewsma 4:14-16.) Noiti wi musu meki wan dei pasa sondro fu prakseri den sani di Yehovah nanga Yesus du gi wi na ini a ten di pasa èn nownowde. A lobi di den abi gi wi musu naki wi ati èn a musu gi wi deki-ati fu dini Yehovah fayafaya.​—2 Kor. 5:14, 15.

14. San na wan fu den moro bun fasi fa wi kan sori taki wi de nanga tangi gi san Yehovah nanga Yesus du gi wi? (Luku den prenki.)

 ¹⁴ Wan fu den moro bun fasi fa wi kan sori taki wi de nanga tangi gi den sani di Gado nanga en Manpikin du gi wi, na te wi e meki muiti fu yepi tra sma fu tron Kotoigi fu Yehovah èn disipel fu Yesus (Mat. 28:19, 20). Na dati na apostel Paulus du fu di a ben de nanga tangi gi san Gado nanga Krestes du gi en. A ben sabi taki Yehovah wani taki „ala sortu sma musu kisi frulusu èn taki den musu kon sabi a tru leri finifini” (1 Tim. 2:3, 4). A ben e wroko tranga na ini a diniwroko fu en fu yepi so furu sma leki a man. ’Iya, a du ala san ben de fanowdu fu frulusu sma, awinsi na wan tu nomo.’​—1 Kor. 9:22, 23.

15. San o meki wi firi koloku, soleki fa Psalm 1:2 e sori?

¹⁵ A skrifiman fu a fosi Psalm ben taki dati wan sma di de koloku èn di abi bun bakapisi, na wan sma di „lobi a wèt fu Yehovah” èn „dei nanga neti a e leisi a wèt fu Gado nanga wan safri sten” (Ps. 1:1-3). A Bijbel vertaler Joseph Rotherham ben taki wan sani fu den tekst disi na ini a buku fu en di nen Studies in the Psalms. A ben taki dati wan sma musu „prisiri so te fu kisi rai fu Gado taki a e suku a rai, a e studeri en, èn a e teki en ten fu denki dipi fu en”. A ben taki tu dati „efu wan dei pasa èn wan sma no leisi Bijbel, dan a lasi a dei dati”. Te yu e poti prakseri na ala den prenspari finifini tori na ini Bijbel èn te yu e si san den abi fu du nanga makandra, dan yu o prisiri te yu e studeri Bijbel. A e gi prisiri trutru te wi e ondrosuku a langa, a hei, nanga a dipi fu den sani di abi fu du nanga Gado Wortu.

16. San wi o luku na ini a tra artikel?

¹⁶ Den moi tru tori di Yehovah e leri wi na ini en Wortu no muilek tumsi fu frustan. Na ini a tra artikel wi o luku wan fu den dipi tru tori dati. Wi o luku a bigi agersi tempel fu Yehovah di Paulus ben taki fu en na ini a brifi di a ben skrifi gi den Hebrew Kresten. Wi o prisiri trutru te wi o studeri a tori dati.