1. Fa anbegiman fu Gado kisi krakti na ini owruten?

 NOFO TRON te Gado Wortu e taki fu man di e dini Yehovah getrow, dan a e sori taki den ben de tranga deki-ati man. Ma toku den man disi no ben e firi so ala ten. Fu eksempre, son leisi Kownu David no ben e frede noti èn a ben e „tanapu steifi”. Ma tra leisi baka a ben e „bruya srefisrefi” (Ps. 30:7). Aladi Simson ben tranga srefisrefi di Gado en yeye ben e wroko na en tapu, toku a kon si taki efu a no ben kisi krakti fu Gado, a ben o ’kon swaki èn a ben o de neleki ala tra libisma’ (Krut. 14:5, 6; 16:17). Den getrow man disi ben tranga fu di Yehovah ben e gi den krakti.

2. Fu san ede na apostel Paulus ben taki dati a ben tranga te a ben swaki? (2 Korentesma 12:9, 10)

² Na apostel Paulus ben sabi taki en srefi ben abi krakti fanowdu fu Yehovah. (Leisi 2 Korentesma 12:9, 10.) Neleki furu fu wi, Paulus ben e abi problema nanga a gosontu fu en (Gal. 4:13, 14). Ten na ten a ben muilek tu gi en fu du san bun (Rom. 7:18, 19). Èn son leisi a ben e frede san ben o pasa nanga en (2 Kor. 1:8, 9). Ma toku a de so taki di Paulus ben swaki, a kon tranga. Fa a du dati? Yehovah gi Paulus a krakti di a ben abi fanowdu fu horidoro di a ben e kisi tesi.

3. Sortu aksi o kisi piki na ini na artikel disi?

³ Yehovah e pramisi wi taki a o meki wi kon tranga tu (1 Petr. 5:10). Ma wi no kan fruwakti taki wi o kisi krakti sondro taki wi e meki muiti. Fu eksempre, wan wagi e rèi  fu di a motor e drai. Ma wan sma musu trapu a gas fu meki a wagi go na fesi. Na so a de tu taki Yehovah de klariklari fu gi wi a krakti di wi abi fanowdu, ma wi musu du san de fanowdu fu kisi wini fu en. San Yehovah seti so taki wi kan kon tranga? San wi musu du fu man kisi a krakti dati? Wi o kisi piki tapu den aksi dati te wi e luku fa Yehovah ben tranga den dri sma disi na ini Bijbel: A profeiti Yona, Maria di ben de a mama fu Yesus, nanga na apostel Paulus. Wi o luku tu fa Yehovah e tan gi den futuboi fu en na ini a ten disi krakti na a srefi fasi.

4. Fa wi kan kisi krakti fu Yehovah?

⁴ Wan fasi fa wi kan kisi krakti fu Yehovah, na te wi e begi. Te wi du dati, dan Yehovah kan gi wi „a krakti di bigi pasa marki” (2 Kor. 4:7). Wi kan kisi krakti tu te wi e leisi a Wortu fu en èn te wi e denki dipi fu en (Ps. 86:11). A boskopu di Yehovah skrifi gi wi na ini Bijbel „abi krakti” (Hebr. 4:12). Te yu e begi Yehovah èn te yu e leisi a Wortu fu en, dan yu o kisi a krakti di yu abi fanowdu fu horidoro, fu tan abi prisiri, noso fu du wan muilek wroko. Luku fa Yehovah tranga a profeiti Yona.

5. Fu san ede a profeiti Yona ben abi deki-ati fanowdu?

⁵ A profeiti Yona ben abi deki-ati fanowdu. A ben frede fu go pe Yehovah ben seni en èn dati meki a go ini wan boto di ben e go na wan heri tra presi. A sani disi meki taki bijna en nanga den sma na ini a boto lasi den libi. Di den botoman trowe en na ini a se, dan wan bigi fisi swari en. Now Yona ben de en wawan na ini a bere fu a fisi pe a ben dungru pikapika. Fa yu denki taki Yona ben e firi? A ben fruwakti fu dede drape? Yu denki taki a ben aksi ensrefi efu Yehovah ben frigiti en? A no de fu taki dati Yona ben musu fu frede srefisrefi.

6. Soleki fa Yona 2:1, 2, 7 e sori, dan san yepi Yona di a ben de na ini a bere fu a fisi?

⁶ San Yona du fu kisi deki-ati di a ben de en wawan na ini a bere fu a fisi? A begi Yehovah. (Leisi Yona 2:1, 2, 7.) Yona ben trangayesi Yehovah, ma a sori berow èn a ben de seiker taki Yehovah ben o arki a begi fu en. Yona prakseri bun tu fu den tekst di a ben leisi fosi. Fu san ede wi kan taki dati? Fu di a begi fu en na ini Yona kapitel 2 abi den srefi wortu di de fu feni na ini den Psalm. (Luku fu eksempre Yona 2:2, 5 nanga Psalm 69:1; 86:7.) A de krin taki Yona ben sabi den tekst dati bun. Fu di a ben e denki fu den tekst dati di a ben de na ini a bere fu a fisi, meki a ben de seiker taki Yehovah ben o yepi en. Yehovah meki a fisi spiti Yona puru èn bakaten a ben de klariklari fu du a wroko di Yehovah ben taigi en fu du.​—Yona 2:10–3:4.

7-8. San yepi wan brada na ini Taiwan di tesi ben e miti en?

⁷ Na eksempre fu Yona kan yepi wi te tesi e miti wi. Zhiming, b wan brada na ini Taiwan e siki seryusu. Boiti dati, en famiri e gens en na wan ogri-ati fasi fu di a e anbegi Yehovah. Fu di a e begi èn a e studeri, meki a e firi fa Yehovah e tranga en. A e taki: „Son leisi te problema e opo kon, dan mi e broko mi ede so te taki mi no abi a krakti fu studeri.” Ma Zhiming e tan suku yepi na Yehovah. A e taki:  „A fosi sani di mi e du, na taki mi e begi Yehovah. Baka dati, mi e poti mi headphone, dan mi e arki Kownukondre singi. Son leisi, mi e singi den nanga wan safri sten teleki mi de rustig baka. Baka dati mi e bigin studeri.”

⁸ Den sani di Zhiming leri di a studeri yepi en fu horidoro na ini muilek situwâsi. Fu eksempre, baka di a du wan bigi oparâsi, dan wan verpleegster taigi en taki a brudu fu en ben lagi èn taki a ben o abi fu teki brudu. A neti fosi na oparâsi, Zhiming leisi wan ondrofenitori fu wan sisa di ben du a srefi oparâsi. A sisa en brudu ben kon lagi moro di fu en, ma toku a no teki brudu. A sisa disi kon betre baka. Na ondrofenitori disi yepi Zhiming fu tan gi yesi na Yehovah.

9. Efu yu e firi swaki te wan tesi e miti yu, dan san yu kan du? (Luku den prenki.)

⁹ Te yu de na ini wan muilek situwâsi, dan yu e broko yu ede so te taki yu no man begi? Noso yu e firi tumsi swaki fu studeri? No frigiti taki Yehovah e frustan heri bun san e miti yu. Sobun, srefi efu yu e taki wan tu sani nomo na ini a begi fu yu, toku yu kan de seiker taki Yehovah o gi yu soifri san yu abi fanowdu (Ef. 3:20). Efu yu no man leisi èn studeri fu di yu skin e hati yu noso fu di yu e broko yu ede, dan kande yu kan arki na audio fu Bijbel noso fu wan fu den buku fu wi. Kande yu kan arki wan fu den singi fu wi, noso yu kan luku wan felem tapu jw.org. Te yu e begi èn te yu e studeri, dan na so Yehovah e tranga yu.

10. Fa wi Kresten brada nanga sisa e tranga wi?

¹⁰ Yehovah kan gebroiki wi Kresten brada nanga sisa fu tranga wi. Den kan ’trowstu wi trutru’ te tesi e miti wi, noso te wi e meki muiti fu du wan muilek wroko (Kol. 4:10, 11). Wi abi mati fanowdu spesrutu „te nowtu de” (Odo 17:17). Te wi e firi swaki, dan wi Kresten brada nanga sisa kan gi wi a yepi di wi abi fanowdu, den kan trowstu wi, èn den kan gi wi deki-ati fu dini Yehovah getrow. Kow go  luku fa Maria, a mama fu Yesus, kisi deki-ati fu trawan.

11. Fu san ede Maria ben abi krakti fanowdu?

¹¹ Maria ben abi krakti fanowdu fu man du a wani fu Yehovah. Prakseri fa a ben e broko en ede di a kisi wan bigi frantwortu fu na engel Gabrièl. A no ben trow, ma toku a ben o kon de nanga bere. Noiti a ben kweki pikin, ma a ben o abi fu sorgu gi a boi di ben o tron a Mesias. Wan tra sani na taki noiti ete a ben abi seks. Fa ben o taigi Yosef taki a ben de nanga bere? Dati ben musu fu de wan muilek sani fu du.​—Luk. 1:26-33.

12. Soleki fa Lukas 1:39-45 e sori, dan fa Maria kisi a krakti di a ben abi fanowdu?

¹² Fa Maria kisi a krakti di a ben abi fanowdu fu tyari a bigi frantwortu di a ben kisi? A suku yepi na trawan. A aksi Gabrièl fu fruteri en moro fini san a ben o abi fu du (Luk. 1:34). Syatu baka dati, a go te na „a bergikontren” fu Yuda fu go luku en famiri Elisabet. A ben bun taki a go drape. Elisabet prèise Maria èn Yehovah meki a fruteri Maria wan profeititori di ben abi fu du nanga a pikin di ben de na ini en bere. A sani disi gi Maria furu deki-ati. (Leisi Lukas 1:39-45.) Maria taki dati Yehovah „du kefalek bigi sani” (Luk. 1:46-51). Yehovah gebroiki Gabrièl nanga Elisabet fu tranga Maria.

13. San pasa di wan sisa aksi en Kresten brada nanga sisa fu yepi en?

¹³ Neleki Maria, yu kan kisi krakti tu fu den Kresten brada nanga sisa fu yu. Dasuri, wan sisa di e libi na ini Bolifia, ben abi deki-ati fanowdu. Di en papa ben musu go didon na ati-oso fu di a ben e siki seryusu, dan Dasuri ben de klariklari fu sorgu gi en (1 Tim. 5:4). A sani dati no ben makelek ala ten. A e taki: „Furu leisi mi ben e firi leki mi no ben o man moro.” A aksi fu kisi yepi? Na a bigin a no du dati. A e taki: „Mi no ben wani fruferi den brada nanga sisa. Mi ben feni taki na Yehovah ben o gi mi a yepi di mi abi fanowdu. Ma dan mi kon si taki te mi no ben e moksi nanga trawan, dan eigenlijk na mi wawan ben e pruberi fu lusu den problema fu mi” (Odo 18:1). A e taki moro fara: „Mi no man fruteri yu fa den lobi brada nanga sisa gi mi deki-ati. Den tyari nyanyan kon gi mi na ati-oso èn den leisi Bijbeltekst nanga mi fu trowstu mi. Yu e firi bun srefisrefi te yu sabi taki yu no de yu wawan. Wi de na ini a bigi famiri fu Yehovah èn a famiri dati de klariklari fu yepi yu, fu krei nanga yu, èn fu tan horidoro makandra nanga yu.”

14. Fu san ede wi musu teki a yepi di wi e kisi fu den owruman?

¹⁴ Wan fasi fa Yehovah e tranga wi, na taki a e gebroiki den owruman fu gi wi krakti nanga deki-ati (Yes. 32:1, 2). Sobun, te yu e broko yu ede nanga wan sani, dan fruteri den owruman. Te den wani yepi yu, no draidrai fu teki a yepi dati. Yehovah kan gebroiki den owruman disi fu tranga yu.

15. Sortu moi howpu ala Kresten abi?

¹⁵ A Bijbel howpu fu wi kan gi wi deki-ati fu tan dini Yehovah (Rom. 4:3, 18-20). Son Kresten abi a moi howpu fu libi fu têgo na hemel, ma trawan abi a howpu fu libi fu têgo na ini wan moi paradijs na grontapu. A howpu fu wi e tranga wi fu horidoro te tesi e miti wi, fu preiki a bun nyunsu, èn fu dini den brada nanga  sisa fu wi (1 Tes. 1:3). A srefi howpu dati tranga na apostel Paulus.

16. Fu san ede na apostel Paulus ben abi krakti fanowdu?

¹⁶ Paulus ben abi krakti fanowdu. Na ini a brifi di a skrifi gi den Korentesma a teki ensrefi gersi nanga wan tokotoko patu di ben kan broko makelek. A ben kisi „ala sortu hebi tesi”, a ben e „bruya”, sma ben e „frufolgu en”, èn den ben „naki en trowe” (2 Kor. 4:8-10). Paulus ben skrifi den wortu dati na a ten di a ben e teki a di fu dri zendelingwaka fu en. Kande a no ben sabi ete na a ten dati taki moro tesi ben o miti en. Na a kabapisi fu a zendelingwaka dati, ipi-ipi sma kon feti nanga en, skowtu grabu en, bijna a dede na watra, èn den poti en na strafu-oso.

17. Soleki fa 2 Korentesma 4:16-18 e sori, dan san yepi Paulus fu horidoro di tesi miti en?

¹⁷ Paulus tan poti prakseri na a howpu fu en èn na so a kisi krakti fu horidoro. (Leisi 2 Korentesma 4:16-18.) A ben taigi den Korentesma taki srefi efu en skin ben o „kon swaki moro nanga moro”, toku a sani dati no ben o meki a lasi-ati. Paulus tan poti prakseri na a tamara fu en. A howpu di a ben abi fu libi fu têgo na hemel ben de wan „bun bigi blesi di e tan fu têgo”. Paulus ben e warderi a howpu dati so te, taki a ben de klariklari fu pasa iniwan problema soso fu man kisi en pai. Paulus denki dipi fu a howpu dati èn a sani dati meki taki a ben e firi leki a ben e „kisi nyun krakti dei fu dei”.

18. Fa howpu tranga Tihomir nanga en osofamiri?

¹⁸ A howpu di wi abi gi a ten di e kon, tranga Tihomir, wan brada na ini Bulgaria. Wan tu yari pasa, en pikin brada, Zdravko, dede na ini wan aanrijding. Wan heri pisi ten baka dati, Tihomir ben e sari srefisrefi. Fu feni krakti, en nanga en osofamiri e prakseri fa a o de te sma  o kisi wan opobaka. A e taki: „Wi ben e taki pe wi o miti Zdravko, sortu nyanyan wi o bori gi en, suma wi o kari kon na a fosi fesa di wi o hori te a drai kon baka, èn san wi o fruteri en fu den lasti dei.” Tihomir e taki dati di en nanga en famiri tan poti prakseri na a howpu fu den, dan den kisi krakti fu horidoro èn fu wakti a ten te Yehovah o gi a brada fu en wan opobaka.

19. San yu kan du fu tranga a howpu fu yu? (Luku a prenki.)

¹⁹ Fa yu kan tranga a howpu fu yu? Efu yu abi a howpu fu libi fu têgo na grontapu, dan kande yu kan leisi san Bijbel e taki fu a Paradijs èn denki dipi fu den sani dati (Yes. 25:8; 32:16-18). Prakseri fa a libi o de na ini a nyun grontapu. Prakseri suma yu o si drape, sortu geluid yu o yere èn fa yu o firi. Wan sani di kan yepi yu fu prakseri fa a Paradijs o de, na te yu e luku den prenki na ini den buku fu wi, noso te yu e luku video clip fu den singi soleki T’a nyun grontapu kon, Leti na baka uku, noso Yu o si. Efu wi e teki ten fu prakseri a howpu di wi abi fu libi na ini wan nyun grontapu, dan yu o si taki den problema fu wi de ’fu wan syatu pisi ten nomo èn den no hebi’ (2 Kor. 4:17). A howpu di Yehovah gi yu o tranga yu.

20. Fa wi kan kisi krakti srefi te wi swaki?

²⁰ Srefi te wi e firi swaki, „Gado o gi wi krakti” (Ps. 108:13). Yehovah seti sani kaba fu sorgu taki yu kisi a krakti di yu abi fanowdu. Sobun, te yu abi yepi fanowdu fu du wan wroko, fu horidoro te yu e kisi tesi, noso fu tan nanga prisiri, dan begi Yehovah nanga yu heri ati èn studeri a Wortu fu en. Te yu brada nanga sisa wani yepi yu, dan no draidrai fu teki a yepi dati. Abi a gwenti fu prakseri a howpu di yu abi gi a ten di e kon. Te yu e du dati, dan yu o kisi ’ala a krakti di yu abi fanowdu, so taki yu kan horidoro nanga pasensi èn nanga prisiri awinsi san e pasa’.​—Kol. 1:11.