STUDIE-ARTIKEL 43
SINGI 90 Gi makandra deki-ati
San kan yepi yu te a fasi fa yu e denki e meki yu firi brokosaka?
„Ondrosuku ala sani fu luku efu den tru.”—1 TES. 5:21.
SAN WI O LERI
Na ini a artikel disi wi o luku san wi kan du fu sorgu taki den tweifri di wi abi no e tapu wi fu dini Yehovah fayafaya.
1-2. (a) San na wan tu sani di den futuboi fu Yehovah ben kan aksi densrefi? (b) San wi o luku na ini a artikel disi?
WI ALAMALA e tweifri a son leisi, awinsi wi yongu noso owru. Fu eksempre, wan yongu Kotoigi ben kan aksi ensrefi efu Yehovah e broko en ede trutru nanga en. Fu di a e denki so, meki a no de seiker efu a musu dopu. Noso luku na eksempre disi fu wan brada: Di a ben yongu, a ben teki a besroiti fu poti a wani fu Yehovah na a fosi presi na ini en libi, na presi fu du wan wroko pe a ben kan meki furu moni. Fu di a no abi nofo moni now fu sorgu gi en osofamiri, meki a kan taki a e aksi ensrefi efu a ben teki a yoisti besroiti di a ben yongu. Noso prakseri wan owru sisa di no abi so furu krakti moro. A e firi brokosaka fu di a no man du den sani moro di a ben gwenti du. Oiti yu aksi yusrefi: ’Yehovah e broko en ede nanga mi? Den besroiti di mi teki fu du moro gi Yehovah ben de den yoisti besroiti? Yehovah kan gebroiki mi ete?’
2 Efu wi no e meki muiti fu feni piki tapu den aksi disi, dan wi bribi kan kon swaki èn wi kan tapu fu anbegi Yehovah. Na ini a artikel disi wi o poti prakseri na Bijbel gronprakseri di kan yepi wi te wi e tweifri (1) efu Yehovah e broko en ede nanga wi, (2) efu den besroiti di wi ben teki ben bun (3) efu Yehovah man gebroiki wi ete.
SAN KAN YEPI WI TE WI E TWEIFRI?
3. San wi kan du te wi e tweifri?
3 Te wi e tweifri, dan a prenspari taki wi e suku rai na ini Bijbel. Te wi e du dati, dan wi o kisi krakti, wi o abi wan moro bun matifasi nanga Yehovah, èn wi o man „tanapu kánkan na ini a bribi”.—1 Kor. 16:13.
4. Fa wi kan „ondrosuku ala sani fu luku efu den tru”? (1 Tesalonikasma 5:21)
4 Leisi 1 Tesalonikasma 5:21. A tekst disi e gi wi dek’ati fu „ondrosuku ala sani fu luku efu den tru”. Fa wi kan du disi? Wi kan ondrosuku efu den sani di wi e bribi na tru tori. Efu wi e tweifri fu wan sani, dan wi musu luku san Bijbel e taki fu a sani dati. Fu eksempre, luku a tori fu a yonguwan di e aksi ensrefi efu Gado e broko en ede trutru nanga en. A musu tan nanga a denki dati? Nôno, na presi fu dati a musu „ondrosuku ala sani fu luku efu den tru”. A musu kon sabi fa Yehovah e si en trutru.
5. Fa wi kan feni piki tapu den aksi fu wi?
5 Te wi e leisi Gado Wortu, dan a de neleki wi e yere fa Yehovah e taki nanga wi. Ma wi musu du moro efu wi wani kisi piki tapu den aksi fu wi. Wi musu feni den Bijbeltekst di o piki den aksi di wi abi. Wi kan ondrosuku den sani dati moro fini na ini den buku fu wi (Odo 2:3-6). Te wi e ondrosuku sani moro fini, dan wi kan begi Yehovah fu yepi wi fu feni piki tapu den aksi fu wi. Baka dati wi kan luku sortu gronprakseri nanga rai o yepi wi na ini a situwâsi fu wi. Wan tra sani di kan yepi wi, na te wi e poti prakseri na den tori fu sma na ini Bijbel di ben de na ini wan srefi sortu situwâsi leki a di fu wi.
6. Fa den konmakandra e yepi wi fu no tweifri moro?
6 Wan tra fasi fa Yehovah e taki nanga wi, na te wi e studeri Bijbel na den konmakandra. Efu wi e go na den konmakandra ibri wiki, dan a kan taki son sani di wi e yere na ini wan lezing, noso kande a piki di wan sma e gi, na soifri san wi ben abi fanowdu fu no tweifri moro (Odo 27:17). Meki wi go luku now san wi kan du fu kisi piki tapu spesrutu aksi di wi kan abi.
TE YU E TWEIFRI EFU YEHOVAH E BROKO EN EDE NANGA YU
7. San son sma ben kan aksi densrefi?
7 Oiti yu aksi yusrefi: ’Yehovah e poti prakseri na mi trutru?’ Efu yu e firi leki yu no warti noti, dan yu ben kan denki taki noiti yu o man tron wan mati fu a Mekiman fu hemel nanga grontapu. A kan taki Kownu David ben e denki so tu. A no ben man bribi taki Yehovah ben e broko en ede srefi nanga libisma. Dati meki a taki: „Tye Yehovah, san na libisma taki yu e luku den? San na den pkin fu libisma taki yu e poti prakseri na den?” (Ps. 144:3) Pe yu kan feni piki tapu na aksi disi?
8. San Yehovah e si na ini libisma, soleki fa 1 Samuel 16:6, 7, 10-12 e sori?
8 Bijbel e sori wi taki Yehovah e si den wan di trawan e wiswasi. Fu eksempre, Yehovah ben seni Samuel go na a oso fu Isai fu salfu wan fu den manpkin fu en leki kownu fu Israel. Isai kari seibi fu den manpkin fu en kon fu miti Samuel, ma a no seni kari David, a moro yongu manpkin fu en. b Ma tòg Yehovah teki David fu tron kownu. (Leisi 1 Samuel 16:6, 7, 10-12.) Yehovah ben si na ati fu David. A ben sabi taki a yonguman disi ben lobi en trutru.
9. Fu san ede yu kan de seiker taki Yehovah e broko en ede nanga yu? (Luku a prenki.)
9 Prakseri fa Yehovah sori yu kba taki a e broko en ede nanga yu. A e gi yu rai di fiti gi a situwâsi fu yu (Ps. 32:8). A no ben o man du dati efu a no ben sabi yu bun, a no so? (Ps. 139:1) Te yu e fiti den rai di Yehovah e gi yu èn te yu e si fa dati e yepi yu, dan yu no o tweifri moro efu Yehovah e broko en ede nanga yu (1 Kron. 28:9; Tori 17:26, 27). Yehovah e si a muiti di yu e meki. A e si na ati fu yu èn a wani de yu mati (Yer. 17:10). A o breiti srefsrefi efu yu wani de en mati tu.—1 Yoh. 4:19.
„Efu yu suku [Yehovah], a o meki yu feni en.” —1 Kron. 28:9 (Luku paragraaf 9) c
TE YU E TWEIFRI EFU DEN BESROITI DI YU BEN TEKI BEN BUN
10. Te wi e prakseri den besroiti di wi teki na ini a ten di psa, dan san wi ben kan aksi wisrefi?
10 Te son sma kon moro owru, dan den ben kan aksi densrefi efu den besroiti di den ben teki na ini den libi ben bun. Kande den gwe libi wan bun wroko di ben e pai bun, noso kande den besroiti fu no bigin wan bisnis so taki den ben o man du moro gi Yehovah. Ma now baka omeni yari, a kan taki den e prakseri sma di no ben teki den srefi besroiti leki den. Den e si taki den sma dati abi furu moni èn taki den e libi wan switi libi. Disi kan meki taki den e bigin aksi densrefi: ’Den besroiti di mi ben teki fu man du moro gi Yehovah ben de bun besroiti? Noso mi ben kan abi wan moro bun libi now efu mi ben tan du mi grontapu wroko?
11. Fu san ede a skrifiman fu Psalm 73 ben e firi brokosaka?
11 Efu yu e aksi yusrefi den srefi sani disi, dan luku fa a skrifiman fu Psalm 73 ben e firi. A man disi ben e si taki sma di no ben e anbegi Yehovah ben abi wan gosontu libi, den ben gudu, èn den no ben abi problema (Ps. 73:3-5, 12). Fu di a ben gersi leki a libi fu den ben e waka heri bun, meki a bigin denki taki na fu soso a ben e anbegi Yehovah. Bijbel e taki dati „heri dei a sani disi ben e moro [en]” (Ps. 73:13, 14). San yepi en fu no firi brokosaka moro?
12. San yepi a skrifiman fu no firi brokosaka moro, soleki fa Psalm 73:16-18 e sori?
12 Leisi Psalm 73:16-18. A psalm skrifiman go na a santa presi fu Yehovah. Drape a ben man denki krin. A kon si taki awinsi a ben gersi leki son sma ben abi wan switi libi, tòg den no ben abi wan howpu gi a ten di e kon. Fu di a ben sabi disi, meki a no ben e firi brokosaka moro èn a ben de seiker taki a besroiti di a ben teki fu dini Yehovah, ben de a moro bun besroiti. A sani disi gi en dek’ati fu tan dini Yehovah.—Ps. 73:23-28.
13. San yu kan du efu yu feni taki den besroiti di yu ben teki na ini a ten di psa no ben bun? (Luku a prenki.)
13 Neleki a psalm skrifiman, yu kan du wan sani tu fu no firi brokosaka moro. San yu kan du? Prakseri den bun sani di yu abi, prakseri fa Yehovah e blesi yu, èn hori na prakseri taki Yehovah no e blesi den sma di no e dini en. Furu sma di no e dini Yehovah, e si wan bun wroko nanga wan switi libi leki den moro prenspari sani, fu di den no abi wan howpu gi a ten di e kon. Ma Yehovah pramisi yu taki a o gi yu moro blesi leki san yu ben kan denki (Ps. 145:16). Prakseri a sani disi tu: Yu no man sabi seiker fa yu libi ben o de tide efu yu ben teki tra besroiti. Ma wán sani de seiker: Te yu e teki besroiti fu di yu lobi Gado nanga tra sma, dan ala ten yu o abi den sani di o meki yu de koloku trutru.
Tan prakseri den someni bun sani di Yehovah o gi yu na ini a ten di e kon (Luku paragraaf 13) d
TE YU E TWEIFRI EFU YEHOVAH MAN GEBROIKI YU ETE
14. San na a situwâsi fu son sma èn san den ben kan aksi densrefi?
14 Son futuboi fu Yehovah no man du so furu moro leki san den ben wani fu di den kon owru, den e siki, noso den abi wan mankeri. Den sma disi ben kan denki taki Yehovah no e broko en ede nanga den. Kande den e aksi densrefi: ’Yehovah man gebroiki mi ete?’
15. San a skrifiman fu Psalm 71 ben sabi seiker?
15 A skrifiman fu Psalm 71 ben e broko en ede tu fu di a ben kon swaki. A begi Gado: „No gwe libi mi te mi e kon swaki” (Ps. 71:9, 18). Ma aladi a ben e broko en ede, tòg a ben de seiker taki efu a ben e tan dini en Gado, Yehovah, getrow, dan a ben o tiri en èn a ben o yepi en. A psalm skrifiman ben leri taki Yehovah lobi te sma e du ala san den man fu dini en, awinsi a no makelek gi den.—Ps. 37:23-25.
16. Fa Yehovah e gebroiki den owruwan? (Psalm 92:12-15)
16 Efu yu na wan sma di kon owru, dan prakseri fa Yehovah e si yu. A kan yepi yu fu dini en na wan getrow fasi awinsi yu e siki noso awinsi yu kon owru. (Leisi Psalm 92:12-15.) No tan poti prakseri na san yu no man du moro, ma poti prakseri na san yu man du. Fu eksempre, fu di yu e dini Yehovah getrow èn fu di yu e poti prakseri na trawan, meki yu kan tranga a bribi fu yu brada nanga sisa. Yu kan ferteri den fa Yehovah yepi yu someni yari langa èn yu kan taigi den tu sortu sani yu e ferwakti taki Gado o du na ini a ten di e kon. Boiti dati, noiti no denki taki den begi fu yu no krakti nofo fu yepi trawan (1 Petr. 3:12). Awansi san na a situwâsi fu wi, wi alamala kan du wan sani gi Yehovah èn gi trawan.
17. Fu san ede wi no musu teki wisrefi gersi nanga trawan?
17 Efu yu e firi brokosaka fu di yu no man du so furu moro gi Yehovah, dan yu kan de seiker taki Yehovah breiti nanga iniwan sani di yu man du gi en. Kande yu e teki yusrefi gersi nanga trawan. No du dati. Fu san ede? Fu di Yehovah no e teki a wan sma gersi nanga a trawan (Gal. 6:4) Fu eksempre, Maria ben gi Yesus diri switismeri-oli leki kado (Yoh. 12:3-5) Ma a pôti uma di masra ben dede ben gi tu pkin sensi leki bijdrage na ini a tempel. Den pkin sensi disi no ben warti furu (Luk. 21:1-4) Tòg Yesus no ben teki den tu uma disi gersi nanga makandra. A ben si taki Maria nanga a pôti uma disi ben abi bribi. Yesus ben sori krin taki a ben e denki leki en P’pa. Sobun, yu kan de seiker taki Yehovah e si ala san yu e du gi en. A e si taki yu abi bribi èn taki yu lobi en. Den sani dati prenspari gi en, awinsi yu feni taki den no warti furu.
18. San o yepi wi fu no tweifri moro? (Luku a faki „ A Wortu fu Yehovah kan yepi yu fu no tweifri moro”.)
18 Wi alamala e tweifri son leisi. Ma soleki fa wi si, Bijbel kan yepi wi fu no tweifri moro. Sobun, te yu e du ala san yu man fu feni piki tapu den aksi di yu abi, dan yu no o tweifri moro. A de krin taki Yehovah e poti prakseri na yu. A e warderi a muiti di yu e meki fu dini en èn a o blesi yu seiker. Yu kan abi a fertrow taki Yehovah lobi ala den getrow futuboi fu en èn taki a e broko en ede nanga den.
SINGI 111 Den sani di e meki wi prisiri
a SAN A WORTU DISI WANI TAKI: Na artikel disi e taki fu tweifri di kan meki taki wi e bigin aksi wisrefi efu wi warti gi Yehovah noso efu den besroiti di wi teki na ini a ten di psa ben bun. Disi a no den sortu tweifri di sma abi fu di den no e bribi na ini Yehovah èn na ini den sani di a pramisi.
b Bijbel no e taki krin omeni yari David ben abi di Yehovah teki en fu tron kownu, ma a kan taki a ben yongu ete.—Luku A Waktitoren fu 1 september 2011, blz. 29, par. 2.
