1, 2. Nanga sortu sani futuboi fu Yehovah musu feti?

SENSI a ten fu a fosi reti-ati man Abel teleki a ten fu wi, futuboi fu Gado ben abi fu feti gi a bribi fu den. Na apostel Paulus ben skrifi den Hebrew Kresten taki fu di den ben feti fu kisi den blesi fu Yehovah, meki den ben pina èn furu tesi ben miti den (Hebr. 10:32-34). Paulus ben agersi a feti di wan Kresten musu feti, nanga a muiti di Griki sportman ben musu meki te den ben e strei lon, te den ben e worstel noso te den ben e bòks (Hebr. 12:1, 4). Na ini a ten disi wi musu lon wan streilon fu kisi libi. Ini a streilon disi wi e miti feanti di wani puru wi prakseri noso naki wi puru na pasi so taki wi no e prisiri moro fu lon gi a pai di wi o kisi.

² A moro bigi feanti di wi musu feti nanga en, na Satan nanga en ogri grontapu (Ef. 6:12). A prenspari fu luku bun nanga den sani fu a grontapu disi di tranga „leki wan fortresi”. Wan tu fu den sani disi na den fowtu denki fu libisma  nanga takru gwenti soleki hurudu, smoko, dringi sopi pasa marki noso gebroiki drugs. Boiti dati, wi musu tan feti nanga den sondu firi fu wi so taki wi no e lasi-ati.​—2 Kor. 10:3-6; Kol. 3:5-9.

3. Fa Yehovah e leri wi fu feti nanga wi feanti?

³ Yu denki taki wi o man feti nanga den bigi feanti disi? Iya, ma wi musu feti tranga. Paulus ben teki na eksempre fu wan sma di e bòks fu sori san ensrefi ben musu du. A ben taki: „Mi e naki kofu na so wan fasi taki mi no e naki winti” (1 Kor. 9:26). Neleki fa wan bòksman musu naki kofu na so wan fasi taki a kan wini a strei, na so wi musu feti nanga den feanti fu wi. Ma Yehovah e sori wi fa wi musu feti èn a e yepi wi tu. A e gi wi bun rai na ini en Wortu èn a e gebroiki buku, tijdschrift, alawiki konmakandra, bigi konmakandra nanga kongres fu yepi wi na ini a feti disi. Yu e du den sani di a e leri yu? Efu yu no e du den, dan a o gersi leki yu „e naki winti”. Yu no o man feti bun nanga yu feanti.

4. San wi musu du fu no meki ogri wini wi?

⁴ Wi feanti kan du wan sani nanga wi te wi no e fruwakti dati noso te den e si taki wi swaki. Dati meki wi musu de na ai ala ten. Bijbel e warskow wi: „No meki ogri wini yu, ma tan du bun fu kan wini na ogri” (Rom. 12:21). Den wortu „no meki ogri wini yu”, e sori taki wi man du wan sani fu wini ogri. Sobun, te wi e tan feti, dan wi o wini a strei. Ma efu wi no de na ai èn wi no e feti moro, dan Satan, en ogri grontapu nanga a sondu skin fu wi o wini. Noiti yu musu meki Satan tapu skreki gi yu so taki yu e gi abra!​—1 Petr. 5:9.

5. (a) San kan yepi wi fu tan feti so taki wi kan kisi blesi fu Gado? (b) Fu sortu sma na ini Bijbel wi o taki?

⁵ Efu wi wani wini a feti, dan wi no musu frigiti fu san ede wi de na ini a strei. Yehovah o feni wi bun èn a o blesi wi te wi e tan poti prakseri na san skrifi na Hebrewsma 11:6: „A sma di e anbegi Gado musu bribi taki a de trutru èn taki a e pai den wan di e suku en fayafaya.” A Griki wortu di vertaal nanga ’suku fayafaya’, wani taki dati wan sma e meki furu muiti fu du wan sani (Tori 15:17). Bijbel abi moi eksempre fu man nanga uma di ben e du furu muiti fu kisi blesi fu Yehovah. Yakob, Rakel, Yosef nanga Paulus miti sani di ben hebi gi den èn di ben meki den firi brokosaka. Toku den no gi abra èn den kisi furu blesi. Fa wi kan teki na eksempre fu den fo sma disi di wini a strei fu den?

6. San yepi Yakob fu no gi abra na ini a feti èn fu kisi blesi? (Luku a prenki na a bigin fu na artikel.)

⁶ Fu di a famiri-edeman Yakob ben lobi Yehovah, meki a tan feti èn a no gi abra. A ben lobi den sani di abi fu du nanga Yehovah èn a ben e bribi taki Yehovah ben o blesi den bakapikin fu en soleki fa a ben pramisi (Gen. 28:3, 4). Dati meki wi kan frustan fu san ede Yakob ben e du ala san a man fu kisi blesi fu Gado aladi a ben abi pikinmoro 100 yari. A feti srefi nanga wan engel di ben teki wan libisma skin. (Leisi Genesis 32:24-28.) Yu denki taki na fu di Yakob ben tranga so meki a ben man feti nanga wan tranga engel? Nôno! Ma a ben poti na en ede taki a  ben o tan feti èn noiti a ben o gi abra. Dati meki Gado blesi en. A gi en wan nen di fiti en. A kari en „Israel”, san wani taki „a sma di feti nanga Gado” noso „Gado e feti”. Yakob kisi a bigi blesi di wi alamala wani. Wi wani taki Yehovah feni wi bun èn taki a e blesi wi.

7. (a) Na ini sortu muilek situwâsi Rakel ben de? (b) San yepi en fu tan feti, so taki a kisi blesi te fu kaba?

⁷ Yakob en lobi wefi Rakel ben e angri fu si tu fa Yehovah ben o du san a pramisi en masra. Ma a ben de na ini wan muilek situwâsi. A no ben man meki pikin. Na a ten fu en, a ben de wan bigi syen te wan uma no ben man kisi pikin. Fa Rakel feni a krakti fu horidoro èn fu no lasi-ati, aladi a ben de na ini wan situwâsi pe ensrefi no ben man du notinoti? We, noiti a lasi howpu. A tan begi fayafaya èn Yehovah yere a begi fu en. Bakaten Yehovah blesi en èn a kisi pikin. Wi kan frustan fu san ede wan leisi Rakel bari taki: „Nanga bun furu muiti mi feti . . . Ma now mi wini!”​—Gen. 30:8, 20-24.

8. (a) Sortu hebi tesi Yosef kisi omeni yari langa? (b) San wi kan leri fu a moi eksempre fu Yosef?

⁸ Wi de seiker taki na a moi eksempre fu Yakob nanga Rakel yepi Yosef, a manpikin fu den, fu tanapu kánkan di a kisi tesi. Di Yosef ben abi 17 yari, en heri libi kon kenki. Fu di den brada fu en ben e dyarusu na en tapu, meki den seri en leki srafu. Bakaten a ben musu koti strafu na ini Egepte omeni yari, aladi a no ben du noti (Gen. 37:23-28; 39:7-9, 20, 21). Ma Yosef no lasi-ati. A no hori den brada fu en na ati èn a no suku fu pai den ogri fu ogri. Ma a tan prakseri a matifasi di a ben abi nanga Yehovah. Dati ben de a moro prenspari sani gi en (Lef. 19:18; Rom. 12:17-21). A tori fu Yosef kan yepi wi tu. Fu eksempre, kande a libi fu wi no e go bun now noso kande sani no ben makriki gi wi di wi ben yongu. Toku wi musu tan feti èn wi no musu gi abra. Wi kan de seiker taki efu wi du dati, Yehovah o blesi wi.​—Leisi Genesis 39:21-23.

9. Fa na eksempre fu Yakob, Rakel nanga Yosef kan yepi wi fu tan feti fu kisi den blesi fu Yehovah?

⁹ Kande yu de na ini wan situwâsi di de wan tesi gi yu. A kan taki sma e du ogri nanga yu, taki den e krutu yu noso taki den e spotu yu. Noso kande wan sma e dyarusu èn dati meki a e taki sani fu yu di no tru. Ma no lasi-ati! Memre san yepi Yakob, Rakel nanga Yosef fu tan dini Yehovah nanga prisiri. Gado gi den krakti èn a blesi den fu di den ben e warderi ala sani di ben abi fu du nanga en. Den tan feti èn den du ala san den aksi Yehovah na ini begi. Wi e libi na ini den lasti dei fu a grontapu disi. Sobun, wi no musu lasi a howpu di wi abi taki wan moro bun ten o kon. Yu o meki muiti fu kisi a blesi fu Yehovah? Yu o feti fu en?

10, 11. (a) Fu san ede wi musu feti fu kisi blesi fu Gado? (b) San o yepi wi fu teki bun bosroiti èn fu wini a feti?

¹⁰ Fu san ede wi musu feti fu kisi blesi fu Gado? Fu di wi na sondusma. Furu fu wi musu feti nanga den sondu firi fu wi. Son brada nanga sisa musu feti fu tan du a preikiwroko, awinsi sma no wani arki. Noso kande yu musu  meki muiti fu no gi abra, awinsi a gosontu fu yu no bun noso yu e sari fu di yu de yu wawan. Boiti dati, yu abi sma di musu meki muiti fu gi trawan pardon te den du wan hati sani nanga den. Awinsi o langa wi e dini Yehovah, wi alamala musu feti nanga sani di kan tapu wi fu dini a Gado di e pai den reti-ati sma.

¹¹ Wi sabi taki a no makriki fu teki bun bosroiti èn fu du san wi leki Kresten musu du, spesrutu te na ati fu wi e kori wi fu du sani di no bun (Yer. 17:9). Efu yu si taki disi e pasa nanga yu, dan begi Gado fu gi yu en santa yeye. A yeye fu Gado nanga begi kan gi yu a krakti fu du san bun so taki Yehovah kan blesi yu. Ma du san yu e aksi na ini begi. Pruberi fu leisi Bijbel ibri dei èn meki ten fu studeri nanga yusrefi. Hori na Osofamiri Anbegi ibri wiki tu.​—Leisi Psalm 119:32.

12, 13. San yepi tu Kresten fu feti nanga takru lostu?

¹² Furu eksempre de di e sori fa Gado Wortu, en santa yeye, nanga den buku fu wi yepi Kresten fu feti nanga sondu firi. Wan yongu brada ben leisi wan artikel na ini na Ontwaakt! fu 8 december 2003. Na artikel disi nen „Hoe kunnen we verkeerde verlangens weerstaan?” A brada disi e taki: „Mi e feti fu no denki sani di no bun. Di mi leisi taki furu sma musu feti nanga takru lostu  èn taki a no makriki gi den, mi ben firi taki mi no de mi wawan. Mi abi furu brada nanga sisa di e feti a srefi feti.” A yongu brada disi kisi wini tu fu na artikel „Alternatieve leefstijlen​—Keurt God ze goed?”, di ben de na ini na Ontwaakt! fu 8 oktober 2003. Di a leisi na artikel, a kon si taki son sma abi a firi taki a feti fu den na ’wan maka na ini a skin’ (2 Kor. 12:7). Ma den e tan feti fu libi wan krin libi fu di den sabi taki wan moi ten o kon. A brada disi e taki: „Now mi kon si taki ibri dei mi man meki muiti fu du san bun. Mi breiti taki Yehovah e gebroiki en organisâsi fu yepi wi ibri dei fu no gi abra na ini na ogri grontapu disi.”

¹³ Luku a tori fu wan sisa na Amerkankondre. A skrifi: „Mi wani taigi unu tangi fu di ibri leisi unu e gi wi san wi abi fanowdu na a yoisti ten. Furu leisi mi abi a firi taki na gi mi den artikel skrifi. Na omeni yari kaba mi e feti nanga wan sani di Yehovah no lobi. Son leisi mi wani gi abra. Mi sabi taki Yehovah abi sari-ati èn taki a de klariklari fu gi sma pardon. Ma mi e firi leki a no o yepi mi, fu di mi sabi taki dipi na ini mi ati mi lobi a sani disi ete. A feti di mi musu feti abi krakti tapu ala sani di mi e du. . . . Baka di mi leisi na artikel ’Yu abi „wan ati di sabi” Yehovah?’ na ini A Waktitoren fu 15 maart 2013, mi firi trutru taki Yehovah wani yepi mi.”

14. (a) Fa Paulus ben e si a feti di a ben musu feti? (b) San kan yepi wi fu feti nanga den swakifasi fu wi?

¹⁴ Leisi Romesma 7:21-25. Paulus srefi ben sabi taki a no makriki fu feti nanga takru firi noso nanga swakifasi. Ma a ben sabi taki a ben kan wini a feti disi te a e begi Yehovah, te a e frutrow na en tapu èn te a e sori bribi na ini a frulusu-ofrandi fu Yesus. Fa a de nanga wi? Wi srefi kan wini a strei te wi e feti nanga den swakifasi fu wi. San wi musu du? Wi musu teki na eksempre fu Paulus, wi musu frutrow tapu Yehovah na presi fu frutrow tapu wi eigi krakti èn wi musu sori bribi na ini a lusu-paiman.

15. Fa begi kan yepi wi fu tan dini Gado èn fu tan feti te wi e kisi tesi?

¹⁵ Son leisi Gado e gi wi na okasi fu sori o seryusu wan tori de gi wi. Fu eksempre, kande wi noso wan famiri fu wi siki seryusu, noso kande wan sma du wan hati sani nanga wi. Fa wi kan sori taki wi e frutrow tapu Yehovah nanga wi heri ati? Wi musu begi en fu gi wi a krakti fu tan dini en, fu no lasi wi prisiri èn fu tan de wan mati fu en (Fil. 4:13). Na eksempre fu furu sma na ini a ten fu Paulus èn na ini a ten disi e sori taki begi kan meki wi kisi krakti baka èn a kan gi wi a deki-ati fu tan feti.

16, 17. San yu o tan du na ini a feti di wi e feti?

¹⁶ Didibri ben o breiti te wi ben o gi abra na ini a feti fu wi. Teki a bosroiti fu „tan du sani di bun” (1 Tes. 5:21). Yu kan de seiker taki yu o wini a feti di wi e feti nanga Satan, nanga en ogri grontapu èn nanga iniwan sondu firi fu wi. Yu o man wini te yu e frutrow taki Gado man gi yu krakti èn taki a o yepi yu.​—2 Kor. 4:7-9; Gal. 6:9.

¹⁷ Sobun, awinsi san e pasa, tan feti, no gi abra! Yu kan abi a bribi taki Yehovah o ’blesi yu so te, taki yu no o mankeri nowan sani’.​—Mal. 3:10.