1, 2. (a) Sortu prenspari frantwortu Salomo ben kisi? (b) Fu san ede David ben e broko en ede nanga Salomo?

SALOMO ben kisi a frantwortu fu teki fesi na ini wan tumusi prenspari bow-wroko. A ben musu bow a tempel na ini Yerusalem. A tempel ben musu de ’wan tumusi aparti oso. A ben musu moi moro iniwan oso di de fu feni na den tra kondre.’ San moro prenspari, na taki a tempel ben o de na „oso fu Yehovah, a tru Gado”. Yehovah ben poti Salomo fu tiri a wroko disi.​—1 Kron. 22:1, 5, 9-11.

² Kownu David ben de seiker taki Gado ben o horibaka gi a wroko, ma Salomo ben ’yongu ete èn a no ben abi ondrofeni’. A ben o teki a frantwortu na en tapu fu bow a tempel? A ben o feni taki a ben yongu tumusi èn taki a no ben abi ondrofeni? Efu Salomo ben wani abi bun bakapisi, dan a ben o abi fu teki deki-ati èn bigin nanga a wroko.

3. San Salomo leri fu en papa?

³ A musu de so taki Salomo en papa David leri en fu abi deki-ati. Di David ben yongu, a feti nanga ogri meti di ben e teki den  skapu fu en papa tyari gowe (1 Sam. 17:34, 35). A sori furu deki-ati tu di a feti nanga wan bigiskin srudati di no ben e frede nowan sma. Iya, Gado yepi David fu kiri Goliat nanga yepi fu wan-enkri grati ston.​—1 Sam. 17:45, 49, 50.

4. Fu san ede Salomo ben musu sori deki-ati?

⁴ Dati meki wi kan frustan taki bakaten, David gi Salomo a rai fu teki deki-ati èn fu bow a tempel! (Leisi 1 Kroniki 28:20.) Salomo no ben musu frede taki a no ben o man du a wroko bun. Na presi fu dati, a ben musu teki deki-ati fu du en, fu di a ben o moro ogri efu a tempel no ben o bow srefisrefi.

5. Fu san ede wi abi deki-ati fanowdu?

⁵ Neleki Salomo, wi abi yepi fu Yehovah fanowdu fu man sori deki-ati èn fu man du a wroko di a gi wi. Dati meki a bun te wi e poti prakseri na wan tu sma fu owruten di ben abi deki-ati. Baka dati, wi kan prakseri fa wi kan sori deki-ati fu du a wroko di wi musu du.

6. San na wan moi sani di yu kan leri fu Yosef?

⁶ Prakseri fa Yosef ben sori deki-ati di a wefi fu Potifar ben wani dwengi en fu du hurudu. Yosef ben musu fu sabi taki ogri ben kan miti en efu a ben weigri fu du san na uma disi ben aksi fu en. Ma toku Yosef sori deki-ati èn a weigri fu didon nanga a wefi fu Potifar.​—Gen. 39:10, 12.

7. Fruteri fa Rakab sori deki-ati. (Luku a prenki na a bigin fu na artikel.)

⁷ Ete wan sma di ben sori deki-ati, na Rakab. Di wan tu man fu Israel ben kon kibrikibri na ini Yerikow, dan den go na en oso. Efu Rakab ben frede fu kisi problema, dan a ben kan yagi den man disi gowe. Ma fu di a ben e frutrow tapu Yehovah, meki a sori deki-ati èn a kibri den tu man disi. A yepi den tu fu lowe sondro taki sma kisi den (Yos. 2:4, 5, 9, 12-16). Rakab ben bribi taki Yehovah na a tru Gado èn a ben abi a frutrow taki a ben o gi den Israelsma a kondre. A no ben frede gi sma, noso gi a kownu fu Yerikow nanga den futuboi fu en, èn dati meki a du sani di meki taki en nanga en famiri tan na libi.​—Yos. 6:22, 23.

8. Fa a deki-ati di Yesus sori yepi den apostel fu en?

⁸ Den reti-ati apostel fu Yesus na wan moi eksempre tu gi wi fu di den ben sori deki-ati. Den ben si fa Yesus sori deki-ati (Mat. 8:28-32; Yoh. 2:13-17; 18:3-5). Na a sani dati yepi den fu sori deki-ati tu. Di den Saduseiman gens den apostel, dan den no tapu fu gi sma leri na ini a nen fu Yesus.​—Tori 5:17, 18, 27-29.

9. Fa 2 Timoteyus 1:7 e yepi wi fu kon sabi fa wi kan sori trutru deki-ati?

⁹ Yosef, Rakab, Yesus, nanga den apostel ben de nomonomo fu du san bun. A deki-ati di den ben abi no ben e kon fu di den ben e frutrow tumusi furu tapu densrefi, ma fu di den ben e frutrow tapu Yehovah. Wi srefi abi deki-ati fanowdu son leisi. Te dati de so dan wi no musu frutrow tapu wisrefi, ma wi musu frutrow tapu Yehovah. (Leisi 2 Timoteyus 1:7.) Meki wi go luku tu situwâsi pe wi musu sori deki-ati: na ini wi osofamiri èn na ini a gemeente.

10. Fu san ede Kresten yonguwan abi deki-ati fanowdu?

¹⁰ Furu situwâsi e miti Kresten yonguwan pe den musu sori deki-ati fu man dini Yehovah. Den kan teki leri fu na eksempre fu Salomo. A ben sori deki-ati di a teki koni bosroiti fu man bow a tempel. A tru taki Kresten yonguwan kan kisi rai fu den papa nanga mama, èn a no de fu taki dati a sani dati prenspari srefisrefi. Ma toku yonguwan srefi musu teki son prenspari bosroiti (Odo 27:11). Den abi deki-ati fanowdu te  den musu bosroiti suma den o teki leti mati, sortu prisiriten den o abi, fa den o tan libi wan krin libi, èn o ten den o teki dopu. Den musu abi deki-ati fu di den e kakafutu gi Satan di e spotu Gado.

11, 12. (a) Fa Moses ben sori taki a ben abi deki-ati? (b) San yonguwan kan leri fu Moses?

¹¹ Wan prenspari bosroiti di yonguwan musu teki, abi fu du nanga san den o du nanga den libi. Na ini son kondre, sma e dwengi yonguwan fu teki heiskoro èn fu suku wan wroko pe den kan meki furu moni. Èn na ini tra kondre pe na ekonomia no e drai so bun, son yonguwan ben kan feni taki den abi a frantwortu fu yepi sorgu gi den famiri. Efu yu de na ini wan fu den situwâsi disi, dan luku na eksempre fu Moses. Fu di na umapikin fu Farao ben kweki Moses, meki a ben kan suku fu kisi biginen noso fu abi wan gudu libi. A ben musu fu de so taki a kweki papa nanga mama fu en, den leriman, nanga den raiman fu kownu ben e dwengi en fu feti baka den sani dati. Prakseri fa Moses ben e firi! Ma Moses sori deki-ati èn a bosroiti fu dini Yehovah. Di a gowe libi den gudu fu Egepte, dan a poti ala en frutrow tapu Yehovah (Hebr. 11:24-26). A sani disi meki taki Yehovah blesi Moses, èn a no de fu taki dati a o kisi moro blesi na ini a ten di e kon.

¹² Te yonguwan na ini a ten disi e suku fu go na fesi na ini na anbegi fu Yehovah èn te den e poti Kownukondre afersi na a fosi presi na ini den libi, dan Yehovah o blesi den tu. A o sorgu gi den te den kon bigi, èn a o yepi den tu fu sorgu gi den eigi osofamiri. Na ini a fosi yarihondro, a yonguman Timoteyus ben e poti na anbegi na a fosi presi na ini en libi, èn yu kan du dati tu. *​—Leisi Filipisma 2:19-22.

13. Fu san ede wan sisa ben musu abi deki-ati fu man du den sani di a ben abi na prakseri fu du?

¹³ Wan Kresten sisa na ini Alabama, na Amerkankondre ben musu teki deki-ati fu man poti na anbegi na a fosi presi na ini en libi. A e skrifi: „Di mi ben e gro kon bigi, dan mi ben e syensyen. Mi ben e frede fu taki nanga sma na ini a Kownukondre zaal, èn a ben moro muilek fu naki na a doro fu sma di mi no ben sabi srefisrefi.” Nanga yepi fu en papa nanga mama èn fu trawan na ini a gemeente, a yongu Kresten sisa disi ben man tron wan gewoon pionier. A e taki: „A grontapu fu Satan e gi sma deki-ati fu teki heiskoro, fu suku biginen, fu meki moni èn fu abi wan lo sani. Ma nofo tron sani no e waka soleki fa sma e fruwakti èn disi e tyari soso sari nanga broko-ede kon. Ma fu di mi e dini Yehovah, meki mi de koloku trutru èn mi de tevrede tu.”

14. Na ini sortu situwâsi Kresten papa nanga mama musu sori deki-ati?

¹⁴ Kresten papa nanga mama abi deki-ati fanowdu tu. Fu eksempre, kande a wroko basi fu yu e aksi yu fu wroko moro lati tapu dei di yu ben o hori yu Osofamiri Anbegi, te yu ben o go na ini a preikiwroko, noso na den Kresten konmakandra. Yu abi deki-ati fanowdu fu man weigri fu du den sani dati, so taki yu kan de wan bun eksempre gi den pikin fu yu. Noso kande wan tu papa nanga mama na ini a gemeente e gi pasi taki den pikin fu den e du sani di yu no wani taki den pikin fu yu e du. Kande den papa nanga mama dati e aksi yu fu san ede yu pikin no mag teki prati na den sani dati. Yu o teki deki-ati fu sori den na wan lespeki fasi fu san ede yu no wani dati?

15. Fa Psalm 37:25 nanga Hebrewsma 13:5 e yepi papa nanga mama?

¹⁵ Wi e sori deki-ati te wi e yepi wi pikin fu du moro na ini na anbegi. Fu eksempre, son papa nanga mama e tweifri fu gi den pikin  fu den deki-ati fu go pionier, fu go dini pe moro preikiman de fanowdu, fu go na Betel, noso fu yepi nanga bow-wroko fu na organisâsi. Kande den papa nanga mama e frede taki den pikin fu den no o man sorgu gi den te den kon owru. Ma koni papa nanga mama e sori deki-ati èn den e frutrow tapu den sani di Yehovah pramisi. (Leisi Psalm 37:25; Hebrewsma 13:5.) Papa nanga mama di e sori deki-ati na a fasi dati, kan yepi den pikin fu den fu du a srefi.​—1 Sam. 1:27, 28; 2 Tim. 3:14, 15.

16. Fa son papa nanga mama yepi den pikin fu den fu poti a tru anbegi na a fosi presi na ini den libi? Sortu wini a sani disi tyari kon?

¹⁶ Wan trowpaar na ini Amerkankondre yepi den pikin fu den fu poti a tru anbegi na a fosi presi na ini den libi. A masra e fruteri: „Fosi den pikin fu wi ben man waka èn fosi den ben man taki, wi ben e fruteri den kaba fa a switi fu pionier èn fu du diniwroko na ini a gemeente. Now den srefi e du muiti fu tron pionier. Fu di den e tan du muiti fu go na fesi na ini a tru anbegi meki den man kakafutu gi den tesi fu Satan en grontapu èn den man poti prakseri na den moro prenspari sani.” Wan brada di abi tu pikin ben skrifi: „Furu papa nanga mama e meki ala muiti èn den e pai furu moni fu yepi den pikin fu den fu tron pôpi sportman, fu du sani di den lobi, èn fu teki heiskoro. A moro bun fu gebroiki yu ten nanga yu moni fu yepi den pikin fu yu fu du sani di o yepi den fu tron mati fu Yehovah. A e gi prisiri trutru te wi e si taki den pikin fu wi e poti a tru anbegi na a fosi presi na ini den libi èn te wi kan kisi wini tu fu den blesi dati.” Yu kan de seiker taki Gado o blesi papa nanga mama di e yepi den pikin fu go na fesi na ini a tru anbegi.

17. Gi wan tu eksempre di e sori fa sma e sori deki-ati na ini a gemeente.

¹⁷ A de fanowdu tu fu sori deki-ati na ini a gemeente. Fu eksempre, owruman musu sori deki-ati te den musu krutu spesrutu afersi noso te den musu yepi sma di e siki seryusu. Son owruman e go na strafu-oso fu go yepi strafuman di wani kon sabi Gado.  Fa a de nanga sisa di no trow? Now furu okasi de gi den sisa disi fu du moro na ini na anbegi. Den kan pionier, den kan froisi go na presi pe moro preikiman de fanowdu, den kan yepi fu du bow-wroko, noso den kan gi den nen fu go na a Skoro gi Kownukondre preikiman. Sonwan fu den e kisi a grani srefi fu go na Gileadskoro.

18. Fa den moro owru sisa kan sori deki-ati?

¹⁸ Den moro owru sisa de wan blesi gi a gemeente. A no de fu taki dati wi lobi den sisa disi! Kande sonwan fu den no man du so furu moro na ini a diniwroko leki fosi, ma den kan sori deki-ati ete èn du a wroko di Yehovah gi den. (Leisi Titus 2:3-5.) Fu eksempre, wan owru sisa o abi deki-ati fanowdu efu a musu gi wan yongu sisa rai fu weri krosi di fiti. A no o bari a sisa fu di a e weri spesrutu krosi, ma a kan gi a yongu sisa deki-ati fu hori na prakseri taki den krosi di a e weri kan meki trawan naki futu (1 Tim. 2:9, 10). Te den e sori lobi gi trawan na a fasi dati, dan dati kan tranga a gemeente.

19. (a) Fa dopu brada kan sori deki-ati? (b) Fa Filipisma 2:13 nanga 4:13 e yepi brada fu kon abi deki-ati?

¹⁹ Dopu brada musu sori deki-ati tu fu man du a wroko fu Yehovah. Te den no e frede fu teki frantwortu na den tapu, dan den o de wan blesi gi a gemeente (1 Tim. 3:1). Ma kande son brada e tweifri fu teki moro frantwortu na den tapu. Kande wan brada ben meki wan tu fowtu na ini en libi, èn now a feni taki a no warti fu tron wan dinari ini a diniwroko noso wan owruman. Noso kande wan tra brada feni taki a no o man du wan wroko bun. Efu na so yu e firi, dan Yehovah kan yepi yu fu kon abi deki-ati. (Leisi Filipisma 2:13; 4:13.) Hori na prakseri taki wan ten ben de di Moses ben e firi taki a no ben bun nofo fu teki wan frantwortu na en tapu (Eks. 3:11). Toku Yehovah yepi en, èn te fu kaba, Moses kisi nofo deki-ati fu man du a wroko. Wan dopu brada kan kon abi deki-ati tu te a e begi Gado nanga en heri ati fu yepi en èn te a e leisi Bijbel ibri dei. Te a e denki dipi fu tori fu sma di ben abi deki-ati, dan dati o yepi en tu. A kan aksi den owruman nanga sakafasi fu sori en fa a kan go na fesi, so taki a kan yepi fu du iniwan wroko di de fu du. Wi e gi ala dopu brada a rai fu sori deki-ati èn fu wroko tranga gi a gemeente!

20, 21. (a) Sortu dyaranti David ben gi Salomo? (b) Fu sortu sani wi kan de seiker?

²⁰ Kownu David ben memre Salomo taki Yehovah ben o de nanga en teleki a kaba bow a tempel (1 Kron. 28:20). Fu di Salomo tan prakseri san en papa ben taigi en, meki a bow a tempel aladi a ben yongu ete èn aladi a no ben abi ondrofeni. A sori furu deki-ati, a bigin nanga a wroko, èn Yehovah yepi en fu klari a bigi tempel na ini seibi nanga afu yari.

²¹ Neleki fa Yehovah yepi Salomo, na so a kan yepi wi tu fu sori deki-ati èn fu du a wroko di a gi wi. Wi kan sori deki-ati na ini wi osofamiri èn na ini a gemeente (Yes. 41:10, 13). Te wi e sori deki-ati na ini na anbegi, dan wi kan de seiker taki Yehovah o blesi wi now èn na ini a ten di e kon. Dati meki wi musu „abi deki-ati . . . èn du a wroko fayafaya”.