1. Na sortu fasi Yehovah meki Moses kon sabi suma na en, èn fu san ede a sani disi prenspari?

WÁN LEISI, Gado meki Moses kon sabi san na en nen èn sortu fasi a abi. Den fosi fasi di a kari ben de sari-ati nanga switifasi. (Leisi Eksodes 34:5-7.) Yehovah ben kan taki fu a makti nanga a koni fu en. Ma fu di Moses ben wani sabi seiker taki Yehovah ben o horibaka gi en, meki Yehovah kari den fasi di e sori taki a de klariklari fu yepi den futuboi fu en (Eks. 33:13). A no e gi yu deki-ati fu si taki Gado kari den moi fasi disi fosi den trawan di a abi? Na ini na artikel disi wi o luku san a wani taki fu firi sari gi trawan. Te wi abi a fasi disi, dan wi e sori taki wi sabi taki wan trawan e pina noso taki a abi problema èn wi wani du wan sani fu yepi a sma dati.

2, 3. (a) San e sori taki libisma man firi sari gi trawan? (b) Fu san ede a bun fu kon sabi san Bijbel e taki fu a firi di libisma e firi gi trawan?

² Gado meki libisma leki fa ensrefi de. Sobun, fu di Yehovah abi sari-ati, meki libisma e firi sari tu gi trawan. Srefi sma di no sabi a tru Gado abi a fasi disi (Gen. 1:27). Bijbel abi furu tori di e sori fa sma ben e firi sari gi trawan. Memre a tori fu den tu huru-uma di ben kon na fesi Salomo. Ibriwan fu den  uma disi ben feni taki den na a mama fu a srefi pikin. Sobun, Salomo bosroiti taki a beibi ben musu koti na tu, èn na so a kon na krin suma ben de a mama trutru. Fu di na uma dati ben e firi gi a pikin meki a ben de klariklari fu libi a pikin gi a tra uma (1 Kow. 3:23-27). Noso memre na umapikin fu Farao di kibri a libi fu Moses di a ben de wan beibi ete. Aladi a ben si taki a beibi ben de wan pikin fu den Hebrewsma èn taki a no ben mag hori en na libi, toku „a firi sari gi en”. A bosroiti fu kweki Moses leki en eigi pikin.​—Eks. 2:5, 6.

³ Fu san ede wi musu leri fu firi sari gi trawan? Fu di Bijbel e gi wi deki-ati fu de leki Yehovah (Ef. 5:1). Ma aladi Gado meki libisma na so wan fasi taki den kan firi sari gi trawan, toku nofo tron wi e denki wisrefi nomo fu di wi na sondu bakapikin fu Adam. Son leisi a no makriki fu sabi efu wi musu yepi trawan noso efu wi musu poti prakseri na wi eigi afersi. Son sma musu feti nanga a sani disi doronomo. San kan yepi yu poti prakseri na trawan èn fu sori taki yu e firi gi den? A fosi sani di yu kan du, na fu ondrosuku fa Yehovah sori taki a abi sari-ati nanga trawan èn fa trawan sori a fasi dati. A di fu tu sani, na taki yu musu luku fa yu kan teki na eksempre fu Gado èn fa dati kan tyari wini kon gi yu.

4. (a) Fu san ede Yehovah ben seni engel go na Sodom? (b) San wi e leri fu a tori fu Lot nanga den umapikin fu en?

⁴ Bijbel abi furu tori di e sori fa Yehovah ben abi sari-ati nanga sma. Prakseri san Gado ben du gi Lot. A reti-ati man dati „ben abi furu broko-ede”, fu di den sma fu Sodom nanga Gomora, ben e du ogri sondro fu syen. Dati meki wi kan frustan fu san ede Gado bosroiti taki den sma disi musu dede (2 Petr. 2:7, 8). Gado seni engel fu frulusu Lot. Den gi en nanga en osofamiri deki-ati fu lowe gowe libi den foto dati di ben o kisi pori. Bijbel e taki: „Di Lot ben e tan draidrai, den [engel] grabu Lot, en wefi, nanga den tu umapikin fu en hori na den anu, fu di Yehovah ben abi sari-ati nanga en. Dan den tyari den go na dorosei fu a foto” (Gen. 19:16). Na eksempre disi no e sori taki Yehovah sabi heri bun sortu problema e miti a reti-ati pipel fu en son leisi?​—Yes. 63:7-9; Yak. 5:11; 2 Petr. 2:9.

5. Fa Gado Wortu e leri wi fu firi gi trawan, soleki fa wi kan leisi dati na 1 Yohanes 3:17?

⁵ Boiti taki Yehovah e sori sari-ati, a leri a pipel fu en taki a prenspari fu sori sari-ati tu gi trawan. Prakseri a wet disi di Yehovah ben gi Israel. Te wan sma ben leni moni na wan trawan, dan a sma di ben leni en a moni ben kan teki a krosi fu en leki panti. (Leisi Eksodes 22:26, 27.) Efu a sma di ben e leni wan trawan moni no ben abi sari-ati, dan a ben kan hori a krosi fu a sma dati, so taki a sma no ben abi noti fu tapu en skin te neti. Ma Yehovah ben leri a pipel fu en fu no libi so nanga trawan. A pipel fu en ben musu firi gi trawan. San wi e leri fu a wet disi? Noiti no du leki yu no e si taki yu Kresten brada nanga sisa abi yepi fanowdu. Efu wi man du wan sani fu yepi wi brada nanga sisa di e pina, dan wi musu du dati tu.​—Kol. 3:12; Yak. 2:15, 16; leisi 1 Yohanes 3:17.

6. San wi e leri te wi e luku fa Yehovah tan sori sari-ati gi den Israelsma?

⁶ Srefi di a pipel Israel ben sondu teige Yehovah, a ben firi sari gi den. Bijbel e taki: „Ibri tron baka Yehovah, a Gado fu den afo fu den Israelsma, seni den boskopuman fu en fu warskow den, fu di a  ben abi sari-ati nanga en pipel èn fu di a no ben wani pori na oso fu en” (2 Kron. 36:15). Neleki Yehovah wi musu firi sari tu gi sma di no sabi en ete, ma di kan drai den libi èn tron mati fu en. Yehovah no wani taki nowan sma kisi pori te a o krutu a grontapu disi na ini a ten di e kon (2 Petr. 3:9). Sobun, meki wi gebroiki a ten di de ete fu preiki a boskopu fu Gado gi sma èn fu yepi den fu kisi wini fu a sari-ati fu en.

7, 8. Fu san ede wan famiri ben e bribi taki Yehovah sori sari-ati gi den?

⁷ Na ini a ten disi, furu sma ondrofeni fa Yehovah sori sari-ati gi den. Prakseri san pasa nanga a famiri fu wan boi di wi sa kari Milan èn di ben abi 12 yari. A ben de na ini den yari syatu baka 1990, di den difrenti pipel na ini Bosnia ben e feti nanga makandra. Milan, en brada, en papa nanga mama, nanga wan tu tra Kotoigi ben de na ini wan bus di ben tyari den fu Bosnia go na Serfia. Den ben e go na a kongres pe a papa nanga mama fu Milan ben o dopu. Ma di den ben musu rèi go na ini Serfia, dan den srudati puru Milan nanga en famiri na ini a bus fu di den ben de fu wan tra kulturu. Ma den tra brada nanga sisa ben mag rèi go doro. Baka di den srudati hori a famiri tu dei, dan na ofsiri di ben e teki fesi bel aksi na edeman fu en san a ben musu du nanga den. Na ofsiri ben tanapu leti na fesi na osofamiri, sobun den alamala ben kan yere san na edeman taki. A taki: „Tyari den gowe, dan yu sutu den kiri!”

⁸ Di na ofsiri ben e taki nanga den man fu en, dan tu sma di na osofamiri no ben sabi, waka kon na den fu taigi den taki den na Yehovah Kotoigi tu. Den tra Kotoigi na ini a bus ben fruteri den san ben pasa. Fu di den srudati no ben luku den papira fu pikin, meki den tu brada taigi Milan nanga en brada fu go sidon na ini na oto fu den so taki den ben kan rèi go na ini Serfia. Baka dati, den taigi a papa nanga mama fu den boi fu waka na bakasei fu a skowtu-post èn fu miti den na a tra sei. Milan no ben sabi efu a ben musu lafu noso krei di den man taigi en a sani disi. En papa nanga mama aksi den brada: „Un denki taki den man o libi wi meki wi waka gowe?” Ma di den ben e waka gowe a ben gersi leki den srudati no ben si den srefi. Milan nanga en brada miti nanga den papa nanga mama di den ben de kaba na ini Serfia. Den rèi go doro na a kongres èn den ben de seiker taki Yehovah ben yere den begi fu den. Soleki fa wi e si na ini Bijbel, dan a no ala ten Yehovah e du wan sani fu kibri den futuboi fu en (Tori 7:58-60). Ma toku Milan e taki: „Gi mi a ben de neleki den engel ben breni den srudati èn wi ben bribi taki na Yehovah kibri wi.”​—Ps. 97:10.

9. San Yesus du di a si a situwâsi fu a pipel di ben e waka na en baka? (Luku a prenki na a bigin fu na artikel.)

⁹ Wi kan leri wan sani tu fu Yesus. Yesus ben firi sari gi den ipi-ipi sma di a ben miti fu di „sma ben e pina den èn den ben e waka bruyabruya leki skapu di no abi skapuman”. San a du di a si a situwâsi fu den? „A bigin leri den furu sani.” (Mat. 9:36; leisi Markus 6:34.) Yesus ben de heri tra fasi leki den Fariseiman di no ben prakseri srefisrefi fu yepi a pipel (Mat. 12:9-14; 23:4; Yoh. 7:49). Yu de leki Yesus? Yu e angri tu fu yepi sma fu kon sabi Yehovah?

10, 11. A fiti ala ten fu sori sari-ati gi trawan? Fruklari dati.

¹⁰ Ma dati no wani taki dati wi musu abi sari-ati gi sma na ini ibri situwâsi. Na ini den Bijbel eksempre di wi luku, a ben fiti taki Gado ben sori sari-ati gi den sma  dati. Ma luku na eksempre fu Kownu Saul. Saul ben denki taki a ben sori sari-ati gi Kownu Agak fu Amalèk, ma fu taki en leti a ben trangayesi Yehovah. A no ben kiri a kownu disi aladi a ben de wan feanti fu a pipel fu Gado èn a no ben kiri ala den meti fu den Amalèksma tu. Dati meki Yehovah no ben feni en bun moro leki kownu fu Israel (1 Sam. 15:3, 9, 15). A no de fu taki dati Yehovah na wan reti-ati Krutuman. A sabi san de na ini sma ati èn a sabi o ten a no fiti fu abi sari-ati nanga wan sma (Sari 2:17; Esek. 5:11). A ten e kon te Yehovah o strafu ala den sma di e weigri fu gi yesi na en (2 Tes. 1:6-10). Na a ten dati a no o abi sari-ati nanga den sma di a e si leki ogrisma. Te a o strafu den sma disi, dan na so a o sori taki a abi sari-ati nanga den reti-ati sma, di a o hori na libi.

¹¹ A no wi abi a frantwortu fu bosroiti suma musu kisi pori noso suma musu tan na libi. Na presi fu dati wi musu du ala san wi man now fu yepi sma. San na wan tu sani di wi kan du fu sori taki wi abi sari-ati nanga trawan? Meki wi go luku wan tu sani di wi kan du.

12. Fa yu kan sori taki yu abi sari-ati nanga trawan?

¹² Yepi sma nanga aladei sani. Efu wi wani de leki Yesus, dan wi musu abi sari-ati nanga trawan èn nanga wi Kresten brada nanga sisa (Yoh. 13:34, 35; 1 Petr. 3:8). Fu sori sari-ati wani taki „fu pina nanga trawan”. Wan sma di abi sari-ati nanga trawan e pruberi fu yepi sma di de na nowtu. Suku okasi fu yepi trawan! Fu eksempre, yu kan yepi wan sma nanga wan wroko di a musu du, noso yu kan du boskopu gi en?​—Mat. 7:12.

13. San a pipel fu Gado gwenti du baka te rampu pasa?

¹³ Yepi sma te rampu miti den. Furu brada nanga sisa ben de klariklari fu yepi sma di ben pina fu di rampu ben miti den. Yehovah Kotoigi gwenti yepi sma di de na ini den sortu situwâsi dati (1 Petr. 2:17). Wan sisa fu Yapan ben e libi na ini wan kontren di kisi hebi pori di a gronseki nanga a tsunami pasa na ini 2011. Di a si a muiti di furu brada nanga sisa fu tra presi  fu Yapan èn fu dorosei kondre du fu seti sani kon bun baka, dan dati gi en „furu deki-ati nanga trowstu”. A sisa e taki: „Den sani di mi ondrofeni yepi mi fu kon si taki Yehovah e broko en ede nanga wi. Èn den Kresten brada nanga sisa e broko den ede nanga makandra. Boiti dati, furu brada nanga sisa na grontapu e begi gi wi.”

14. Fa yu kan yepi den sikiwan nanga den owruwan?

¹⁴ Yepi den sikiwan nanga den owruwan. Te wi e si taki sma e pina fu di den siki noso owru, dan a bun fu sori taki wi e firi gi den. Wi e angri gi a ten te wan kaba o kon na siki nanga owrudei. Dati meki wi e begi taki Gado Kownukondre kon. Ma teleki a ten dati doro wi e du san wi man fu yepi sma di de na nowtu. Luku san wan skrifiman ben skrifi fu na owru mama fu en di ben abi a siki fu Alzheimer. Wan dei a doti en krosi fu di a no ben man yepi. Di a ben e pruberi fu krin ensrefi, dan tu sma kon schel na a doro fu en. Den sma disi ben de Kotoigi di ben gwenti kon luku na uma disi. Den sisa aksi en efu den ben kan du wan sani fu yepi en. Na uma piki: „Mi e syen fu taki en, ma mi abi yepi fanowdu, iya.” Den tu sisa yepi en fu weri tra krosi. Ne den meki te gi en meki a dringi èn den tan fu taki tori nanga en wan pisi ten. A manpikin fu na uma disi ben de nanga tangi. A skrifi: „Mi abi furu lespeki gi den Kotoigi disi. Den e du san den e leri.” Yu e firi tu gi den sikiwan nanga den owruwan? Yu e du ala san yu man fu yepi den?​—Fil. 2:3, 4.

15. Sortu moi okasi a preikiwroko e gi wi?

¹⁵ Yepi sma fu kon sabi Yehovah. Te wi e si fa sma abi problema nanga broko-ede, dan wi wani yepi den. A moro bun fasi fu du dati na fu yepi den fu kon sabi Gado èn fu leri den san a Kownukondre fu en o du gi libisma. Wi kan yepi den tu fu si fu san ede a bun fu hori wisrefi na den wet fu Yehovah (Yes. 48:17, 18). A preikiwroko na wan moi fasi fa wi kan gi grani na Yehovah èn fa wi kan sori taki wi e firi gi trawan. Yu denki taki yu kan du moro na ini a diniwroko?​—1 Tim. 2:3, 4.

16. Sortu wini wi o kisi te wi abi sari-ati nanga trawan?

¹⁶ Datra kon si taki te sma e sori sari-ati gi trawan, dan den no e siki so makriki, den e firi moro bun, èn den man feni en moro bun nanga trawan. Te yu e yepi sma di de na nowtu, yu o de moro koloku, yu o denki bun fu sani, yu no o firi leki yu wawan de èn yu no o broko yu ede so furu. Iya, yu o kisi wini te yu abi sari-ati nanga trawan (Ef. 4:31, 32). Kresten di e meki muiti fu yepi trawan abi wan bun konsensi, fu di den sabi taki den e du san Gado wani. Te yu de so, dan yu e tron wan moro bun papa noso mama, wan moro bun trowpatna èn wan moro bun mati. Nofo tron a de so taki sma di de gaw fu sori sari-ati gi trawan, e kisi yepi moro makriki te den abi dati fanowdu.​—Leisi Mateyus 5:7; Lukas 6:38.

17. Fu san ede yu wani sori sari-ati gi trawan?

¹⁷ Ma yu no musu abi sari-ati nanga trawan soso fu di yu sabi taki a o tyari wini kon gi yu. Yu musu sori sari-ati gi trawan fu di yu wani teki na eksempre fu Yehovah, a Gado di e leri wi fa fu sori lobi nanga sari-ati (Odo 14:31). Yehovah na a moro bun sma di kan leri wi fa wi kan sori sari-ati. Meki wi du ala san wi man fu sori sari-ati gi trawan neleki fa Yehovah e du dati. Te wi e du dati dan wi o kon moro krosibei na wi brada nanga sisa èn wi o man feni en moro bun nanga den sma na wi lontu.​—Gal. 6:10; 1 Yoh. 4:16.