1. Fu san ede wi no musu teki a denki abra fu den sma na grontapu?

FU SAN EDE a kan muilek fu du san wi leri na ini Gado Wortu? Wan reide na taki wi musu abi sakafasi fu du san bun èn a no ala ten a makelek fu sori sakafasi. Na ini den „lasti dei” disi furu sma ’lobi densrefi nomo, den lobi moni, den lobi dyaf, den abi heimemre’ èn ’den no man dwengi densrefi’ (2 Tim. 3:1-3). Wi sabi taki a no bun fu abi den fasi disi, ma son leisi a kan gersi leki sani e go bun nanga den sma di abi den fasi disi (Ps. 37:1; 73:3). Kande wi e aksi wisrefi: ’Fu san ede mi musu meki muiti fu suku a bun fu tra sma? Efu mi e tyari misrefi „leki a moro lagiwan”, dan sma o abi lespeki gi mi?’ (Luk. 9:48) Wi no musu teki a denki abra fu den sma na grontapu di e denki densrefi nomo. Efu wi du dati, wi o pori a matifasi di wi abi nanga wi brada nanga sisa èn sma no o man si taki wi na tru Kresten. Ma te wi e studeri den bun eksempre fu sma na ini Bijbel èn te wi e du muiti fu de leki den, dan wi o kisi furu wini.

2. San wi kan leri fu futuboi fu Gado na ini Bijbel?

 ² Efu wi wani teki na eksempre fu futuboi fu Gado na ini Bijbel, dan wi musu kon sabi san yepi den fu tron Gado mati. Fu san ede Gado ben feni den bun èn fa den kisi krakti fu du a wani fu en? Te wi e leisi fu den na ini Bijbel èn te wi e denki dipi fu na eksempre fu den, dan wi bribi o kon moro tranga.

3, 4. (a) Fa Yehovah e gi wi leri? (b) Fu san ede wi kan taki dati a no nofo fu sabi sani fu Bijbel?

³ Yehovah e gi wi san wi abi fanowdu fu kan abi wan tranga bribi. A e gi wi leri nanga rai nanga yepi fu Bijbel, den buku fu wi, wi website, JW Broadcasting, den gemeente konmakandra nanga den bigi konmakandra. Ma na ini Yohanes 4:34 Yesus sori wi taki a no nofo fu sabi sani fu Bijbel. San wi musu du moro? Yesus taki: „Mi nyanyan na fu du a wani fu a sma di seni mi kon èn fu klari a wroko fu en.”

⁴ Yesus ben taki dati te a e du a wani fu Gado, dan dati de leki nyanyan gi en. Fa so? Te wi e nyan gosontu nyanyan, dan dati bun gi a skin èn a e meki wi firi bun. Na so a de tu taki te wi e du a wani fu Gado, dan wi bribi e kon moro tranga. Fu eksempre, omeni leisi yu go na wan preikiwroko konmakandra aladi yu no ben firi so switi? Ma fa yu ben firi baka di yu du a preikiwroko? Yu no ben firi moro bun?

5. Sortu blesi wi o kisi te wi e sori taki wi koni?

⁵ Te wi e du a wani fu Yehovah, dan wi e sori taki wi koni (Yak. 3:13). Wi e kisi furu blesi te wi e sori taki wi koni. Bijbel e taki: „Koni warti moro koraal-ston èn nowan tra sani di e gi yu prisiri, kan kon de a srefi leki koni. . . . Gi den sma di e grabu en hori, a de wan bon di e gi libi. Koloku fu den sma di e tan hori en steifi” (Odo 3:13-18). Yesus taki: „Efu unu sabi den sani disi, dan koloku fu unu te unu e du den” (Yoh. 13:17). Den disipel ben o de koloku efu den ben o tan du san Yesus leri den. Den tan gi yesi na den leri fu Yesus èn den teki na eksempre fu en. Den no du dati fu wan syatu pisi ten nomo, ma den du dati den heri libi langa.

6. Fu san ede wi musu tan du san wi leri?

⁶ Na ini a ten disi a prenspari tu fu tan du san wi leri. Fu eksempre, kande wan man di e meki wagi abi wrokosani fu du en wroko èn a sabi sani fu wagi. Ma den sani disi o yepi en fu du en wroko bun soso efu a e gebroiki den. Kande a abi furu ondrofeni, ma efu a stop nanga a wroko fu wan langa pisi ten, a no o man du en bun moro. Na so a de tu nanga wi. Di wi kon sabi den tru leri fu Bijbel, dan wi ben de koloku fu di wi ben du san wi leri. Ma efu wi wani tan de koloku, dan ibri dei wi musu tan du san Yehovah leri wi.

7. San wi kan leri fu den reti-ati futuboi fu Yehovah na ini owruten?

⁷ Na ini na artikel disi wi o taki fu wan tu situwâsi pe a kan muilek gi wi fu sori sakafasi. Wi o luku fa reti-ati futuboi fu Yehovah na ini owruten tan sori sakafasi na ini den situwâsi disi. Fu man kisi wini fu den tori disi, dan wi no musu leisi den nomo, ma wi musu denki dipi fu  den èn wi musu luku fa wi kan fiti den na ini wi libi.

8, 9. San Tori fu den apostel 14:8-15 e leri wi fu na apostel Paulus? (Luku a prenki na a bigin fu na artikel.)

⁸ Gado wani taki „ala sortu sma musu kisi frulusu èn taki den musu kon sabi a tru leri finifini” (1 Tim. 2:4). Fa wi e si den sma di no sabi den tru leri fu Bijbel ete? Na apostel Paulus ben e preiki gi den Dyu di ben sabi Yehovah kaba. Ma a ben preiki tu gi sma di ben e anbegi falsi gado. Paulus ben abi fu sori sakafasi te a ben e preiki gi den sma dati. Luku san miti en wan leisi.

⁹ A fosi leisi di Paulus ben go preiki leki zendeling, den sma fu Listra ben si en nanga Barnabas leki den gado fu den. Den ben kari den Seus nanga Hermes. A sani disi ben meki taki Paulus nanga Barnabas bigin denki taki den kefalek? Den ben breiti taki disi leisi den ben de na ini wan foto pe sma no ben frufolgu den? Den ben denki taki disi ben o meki en moro makelek gi tra sma fu yere a bun nyunsu? Nôno! Wantewante den priti den krosi, den lon go na mindri den sma èn den bari: „Un man, fu san ede unu e du den sani disi? Wi na libisma tu di abi den srefi swakifasi leki unu.”​—Tori 14:8-15.

10. Fu san ede Paulus nanga Barnabas no ben denki taki den ben bun moro den sma fu Listra?

¹⁰ Paulus nanga Barnabas no ben abi a srefi anbegi leki den sma fu Listra. Ma den ben wani sori den taki den na sondusma tu di abi swakifasi. A tru taki na Gado ben seni Paulus nanga Barnabas fu go preiki leki zendeling (Tori 13:2). Den ben salfu nanga santa yeye èn den ben abi wan moi howpu. Ma toku Paulus nanga Barnabas no ben denki taki den ben bun moro den sma fu Listra. Den ben sabi taki efu den sma dati ben gi yesi na a bun nyunsu, den ben o kisi a srefi howpu fu libi na hemel.

11. Te wi e preiki, dan fa wi kan sori sakafasi neleki Paulus?

¹¹ Fa wi kan sori sakafasi neleki Paulus? Na a fosi presi, wi no musu denki taki wi prenspari moro tra sma fu di wi kisi son grani noso fu di Yehovah yepi wi fu du wan moi wroko. Wi musu aksi wisrefi: ’Fa mi e si den sma di mi e preiki gi den? Mi e desko son sma?’ A moi fu si taki Yehovah Kotoigi na heri grontapu e meki muiti fu suku sma na ini a kontren fu den di wani arki a bun nyunsu. Son Kotoigi e meki muiti srefi fu leri a tongo nanga den gwenti fu sma di trawan e si leki lagi sma. Ma noiti den e denki taki den bun moro den sma disi. Na presi fu dati, den e pruberi fu frustan fa ibri sma e denki so taki den kan doro den ati nanga a Kownukondre boskopu.

12. Fa Epafras sori taki a ben e broko en ede nanga trawan?

¹² Wan tra fasi fa wi kan sori sakafasi na te wi e begi gi wi brada nanga sisa di abi a srefi bribi leki wi (2 Petr. 1:1). Na dati Epafras ben du. A nen fu en kari na ini Bijbel dri leisi nomo na ini den brifi fu Paulus. Di Paulus ben de leki strafuman na ini wan oso na ini Rome, a skrifi den Kresten di ben e libi  na ini Kolose taki ’ala ten Epafras ben e begi fayafaya gi den’ (Kol. 4:12). Epafras ben sabi den brada nanga sisa bun èn a ben e broko en ede nanga den. Aladi a ben ’de na strafu-oso nanga Paulus’, toku a no ben e denki en eigi problema nomo (Fileim. 23). A ben poti prakseri na den broko-ede fu tra sma èn a du wan sani fu yepi den. Epafras begi gi den brada nanga sisa fu en èn a ben kari den na den nen srefi. Wi kan du a srefi sani. Den sortu begi disi kan du furu.​—2 Kor. 1:11; Yak. 5:16.

13. Fa yu kan teki na eksempre fu Epafras te yu e begi?

¹³ Prakseri gi suma yu kan begi. A bun fu kari den nen fu den sma disi te yu e begi gi den. Yu kan begi gi brada nanga sisa na ini yu gemeente noso gi osofamiri di abi furu broko-ede. Kande den sma disi musu teki muilek bosroiti noso den e kisi fu du nanga tesi. Furu brada nanga sisa e begi gi den wan di de na strafu-oso èn di nen kari na jw.org nanga JW Broadcasting. Yu kan begi tu gi den wan di lasi wan lobiwan na ini dede, den wan di kisi fu du nanga rampu noso feti nanga den wan di e libi na ini wan kondre di abi ekonomia problema. A de krin taki furu brada nanga sisa abi problema èn wi musu begi gi den. Te wi e begi gi den, dan wi e sori taki wi no e prakseri wi eigi broko-ede nomo, ma wi e denki tra sma tu (Fil. 2:4). Yehovah e arki den begi disi.

14. Fa Yehovah e sori taki a de klariklari fu arki wi?

¹⁴ Wan tra fasi fa wi kan sori sakafasi, na te wi e arki bun te tra sma e taki. Yakobus 1:19 e taki dati wi musu „de gaw fu yere”. Yehovah na a moro bun eksempre gi wi na ini a tori disi (Gen. 18:32; Yos. 10:14). Luku san wi kan leri fu a takimakandra di skrifi na Eksodes 32:11-14. (Leisi en.) Aladi Yehovah no ben abi a rai fu Moses fanowdu, toku a gi en na okasi fu taki fa a ben e firi. Furu sma no ben o abi a pasensi fu arki wan sma di meki fowtu èn den no ben o teki a rai fu en. Ma nanga pasensi Yehovah e arki den begi fu ala sma di e bribi na ini en.

15. Fa wi kan arki trawan neleki fa Yehovah e du dati?

¹⁵ Ibriwan fu wi musu aksi ensrefi: ’Efu Yehovah kan saka ensrefi fu arki sma neleki fa a ben arki Abraham, Rakel, Moses, Yosua, Manowa, Elia nanga Heskia, dan mi no musu du a srefi? Mi e arki mi brada nanga sisa? Efu a fiti, mi e du san den e aksi fu mi? Wan sma de na ini a gemeente noso na ini mi osofamiri di abi mi fanowdu nownowde? San mi o du? Mi o teki a ten fu arki en?’​—Gen. 30:6; Krut. 13:9; 1 Kow. 17:22; 2 Kron. 30:20.

16. San Kownu David du di Simei kosi en?

¹⁶ Sakafasi e yepi wi tu fu hori wisrefi te sma e du ogri nanga wi (Ef. 4:2). Wan moi eksempre skrifi na 2 Samuel 16:5-13. (Leisi en.) Simei, wan famiriman fu Kownu Saul, ben kosi David nanga den futuboi fu en èn a ben e fringi ston na den tapu. David ben kan du wan sani nanga Simei, ma a hori ensrefi. San yepi David fu du dati? Psalm kapitel dri kan yepi wi fu sabi dati.

17. San yepi David fu hori ensrefi èn fa wi kan teki na eksempre fu en?

 ¹⁷ David skrifi Psalm kapitel dri di a „ben e lowe gi en manpikin Absalom”. Vers 1 nanga 2 e taki fu a srefi tori di skrifi na ini 2 Samuel kapitel 16. Psalm 3:4 e taki san yepi David fu hori ensrefi. Drape skrifi: „Nanga wan tranga sten mi o bari kari Yehovah èn komoto fu a santa bergi fu en, a o piki mi.” Wi srefi kan begi te sma e du ogri nanga wi. Dan Yehovah o gi wi en santa yeye èn dati o yepi wi fu horidoro. A muilek gi yu fu hori yusrefi na ini son situwâsi noso fu gi sma pardon te den du wan hati sani nanga yu? Yu abi a bribi taki Yehovah e si san e miti yu èn taki a o blesi a muiti di yu e du?

18. Sortu wini wi o kisi efu wi e tan du san wi e leri?

¹⁸ Te wi e du san wi leri, dan wi e sori taki wi koni èn Yehovah o blesi wi. Odo 4:7 e taki dati „koni na a moro prenspari sani”. Awinsi wan sma sabi sani, toku dati no wani taki dati a koni. Na den bosroiti di a o teki o sori efu a koni trutru. Wi kan taki dati srefi mira koni, fu di den e tyari nyanyan kon na wán na ini dreiten (Odo 30:24, 25). Krestes abi furu koni tu. Dati meki ala ten a e du san en Papa feni bun (1 Kor. 1:24; Yoh. 8:29). Wi no musu sabi nomo san bun, ma wi musu abi sakafasi tu fu du san wi leri. Te wi e du dati, dan Gado o blesi wi. (Leisi Mateyus 7:21-23.) Sobun, tan du muiti fu sori sakafasi. Te yu e du dati, dan yu o yepi trawan na ini a gemeente fu abi sakafasi tu. Wi sabi taki a no ala ten a makelek fu du san wi leri. A e teki ten èn wi musu abi pasensi. Ma te wi e du dati, dan wi e sori taki wi abi sakafasi. Dati o meki wi de koloku now èn fu têgo.