1. Fa a pipel fu Gado e sori taki den lobi makandra?

A PIPEL fu Gado na wan bigi famiri. Awinsi pe fu grontapu wi e libi, wi e sori lobi gi makandra (1 Yoh. 4:16, 21). Son leisi wi e du wan bigi sani gi wan brada noso sisa, ma nofo tron na den pikinpikin sani di wi e du e sori taki wi lobi den. Fu eksempre, wi kan taki wan sani fu gi den deki-ati noso wi kan du wan sani fu sori switifasi gi den. Te wi e libi so nanga wi brada nanga sisa, dan wi e „teki na eksempre fu Gado leki lobi pikin”.​—Ef. 5:1.

2. Fa Yesus sori taki a lobi sma neleki en Papa?

² Yesus lobi sma neleki en Papa. A ben taki: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka . . . . bika mi abi safri-ati nanga sakafasi” (Mat. 11:28, 29). Te wi e „yepi den mofinawan” neleki fa Yesus ben du dati, dan wi hemel Tata o prisiri nanga wi èn wi o de koloku (Ps. 41:1). Meki wi go luku fa wi kan sori taki wi e hori den  firi fu trawan na prakseri na ini na osofamiri, na ini a gemeente èn na ini a preikiwroko.

3. Fa wan masra kan sori taki a e hori den firi fu en frow na prakseri? (Luku a prenki na a bigin fu na artikel.)

³ Wan masra musu de wan bun eksempre gi en osofamiri. A musu sori taki a e broko en ede nanga den (Ef. 5:25; 6:4). Fu eksempre, Bijbel e taki dati masra musu libi nanga den frow na wan fasi di e sori taki den e „frustan den bun” (1 Petr. 3:7). Wan man nanga wan uma e difrenti furu. Wan masra di e frustan en frow e hori disi na prakseri èn a no e denki taki a bun moro en frow (Gen. 2:18). A e hori den firi fu en frow na prakseri èn a e sori lespeki gi en. Luku san wan sisa fu Kanada e taki fu en masra: „Te mi e taigi en fa mi e firi, dan noiti a e spotu mi èn a no e taigi mi taki mi no musu firi so. A e arki mi bun. Èn te a e yepi mi fu kenki mi denki, dan a e du dati na wan switi fasi.”

4. Fa wan masra kan sori taki a e hori den firi fu en frow na prakseri te a de nanga tra umasma?

⁴ Wan masra di e hori den firi fu en frow na prakseri e luku bun fa a e tyari ensrefi te a de nanga tra umasma. Noiti a o taki noso du wan sani di kan gi tra umasma a firi taki a e suku den. A no e du dati tu tapu sociaal media èn a no e luku sani tapu Internet di no fiti (Yob 31:1). Iya, fu di a lobi en frow, a lobi Yehovah èn fu di a no lobi san ogri kwetikweti, meki a no e du nowan sani di ben o pori a trowlibi fu en.​—Leisi Psalm 19:14; 97:10.

5. Fa wan frow kan sori taki a e frustan en masra?

⁵ Te wan masra e teki na eksempre fu Yesus Krestes, na edeman fu en, dan en frow o man sori „bigi lespeki” gi en (Ef. 5:22-25, 33). Wan frow di e lespeki en masra o pruberi tu fu frustan en masra. Te en masra abi furu fu du na ini a gemeente noso te a e broko en ede nanga wan sani, dan a o hori pasensi nanga en. Wan masra na ini Ingrisikondre e taki: „Son leisi mi frow kan si taki wan sani e trobi mi, dan a e du san Odo 20:5 e taki. A e wakti a yoisti ten fu kon sabi san na a problema èn efu na wan sani di a mag sabi, dan mi e fruteri en.”

6. Fa wi alamala kan yepi pikin fu sori switifasi gi trawan èn sortu wini dati o tyari kon gi den?

⁶ Te wan man nanga en frow e sori switifasi nanga lespeki gi makandra, dan den pikin o si dati. Boiti dati, papa nanga mama abi a frantwortu fu leri den pikin fu sori lespeki gi trawan èn fu sori switifasi gi den. Fu eksempre, den kan leri den pikin fu no lon na ini a Kownukondre zaal. Noso te den kon makandra nanga trawan fu meki prisiri èn den musu tanapu na ini wan rij fu teki nyanyan, dan den kan taigi den pikin fu meki den bigisma fosi teki nyanyan. A no de fu taki dati ala sma na ini a gemeente kan yepi papa nanga mama. Fu eksempre, efu wan pikin hori a doro opo gi wi, dan wi kan prèise en gi dati. Disi o meki a pikin firi bun, èn a o leri taki „wan sma sa de moro koloku te a e gi sani, leki te a e kisi sani”.​—Tori 20:35.

7. Fa Yesus hori den firi fu wan dofuman na prakseri èn san wi kan leri fu en?

⁷ Wan leisi di Yesus ben de na ini a kontren fu Dekapolis, sma ’tyari wan man kon na en di ben dofu èn di no ben man taki bun’ (Mark. 7:31-35). Yesus no dresi a man na fesi ala sma, ma a „tyari en go na seisei”. Fu san ede? Kande a man ben  e syen fu di a ben dofu. A kan taki Yesus si dati èn dati meki a tyari en go na wan sei fu dresi en. A no de fu taki dati wi no man du wondru. Ma wi kan prakseri san wi kan du fu sori switifasi gi wi brada nanga sisa èn fa wi kan hori den firi fu den na prakseri. Na apostel Paulus ben skrifi: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko” (Hebr. 10:24). Yesus ben frustan fa a dofuman ben firi èn dati meki a sori switifasi gi en. Wi kan teki na eksempre fu en.

8, 9. Fa wi kan yepi den owruwan nanga den sikiwan? Gi wan tu eksempre.

⁸ Yepi den owruwan nanga den sikiwan. Awinsi wi man du furu na ini a gemeente, toku a moro prenspari sani na taki wi e sori lobi gi makandra (Yoh. 13:34, 35). Lobi o meki taki wi du ala san wi man fu yepi den owruwan nanga den sikiwan fu kon na den konmakandra èn fu preiki a bun nyunsu, awinsi den no man du furu (Mat. 13:23). Michael di de na ini wan rolsturu e warderi a yepi di a e kisi fu en famiri èn fu brada nanga sisa fu a preikiwroko grupu fu en. A e taki: „Fu di den brada nanga sisa e yepi mi, meki mi man go na bijna ala den konmakandra èn mi kan go doronomo na ini a preikiwroko. Mi lobi preiki na presi pe furu sma e waka pasa.”

⁹ Furu bijkantoro abi owru brada nanga sisa di no de so gosontu moro. Den opziener fu den bijkantoro disi e yepi den brada nanga sisa disi. Den seti sani gi den so taki den kan preiki nanga yepi fu telefon èn so taki den kan skrifi brifi gi sma. Bill di abi 86 yari èn di e skrifi brifi gi sma di e tan na farawe presi, e taki: „Wi breiti taki wi kan skrifi brifi.” Nancy di abi pikinmoro 90 yari, e taki: „Mi no e skrifi brifi soso fu lai na ini envelop. Mi e si en leki preikiwroko. Sma musu yere den tru leri fu Bijbel!” Ethel di gebore na ini 1921, e taki: „Ala dei mi abi pen. Son leisi a muilek gi mi srefi fu weri mi krosi.” Toku a sisa disi lobi preiki nanga yepi fu telefon èn a abi wan tu gobaka. Barbara di abi 85 yari e taki: „Fu di mi gosontu no de so bun, meki a muilek gi mi fu go na ini a preikiwroko ibri wiki. Ma mi kan bel sma fu preiki gi den. Yehovah, grantangi gi disi!” Na ini pikinmoro wán yari, wan grupu owru brada nanga sisa fu wan bijkantoro preiki 1228 yuru, den skrifi 6265 brifi, den bel moro leki 2000 leisi fu preiki gi sma èn den prati 6315 buku nanga tijdschrift. A no de fu taki dati Yehovah breiti nanga a muiti di den lobi brada nanga sisa disi e du!​—Odo 27:11.

10. Fa wi kan sorgu taki wi brada nanga sisa kisi wini fu den konmakandra?

¹⁰ Hori trawan na prakseri te yu de na den konmakandra. Wi wani taki ala brada nanga sisa kisi wini fu den konmakandra èn dati meki wi no wani denki wisrefi nomo. San wi kan du? Wi musu abi a gwenti fu kon biten na den konmakandra, so taki wi no puru a prakseri fu trawan na a konmakandra. Son leisi a kan taki wi e kon lati fu di wan sani pasa di wi no ben fruwakti. Ma efu wi abi a gwenti fu kon lati, dan wi musu tyari kenki kon so taki wi kan sori lobi gi wi brada nanga sisa. No frigiti tu taki na Yehovah nanga en Manpikin kari wi kon na den konmakandra (Mat. 18:20). Te wi e kon biten, dan wi e sori lespeki gi den!

11. Fu san ede brada di abi wan prati na den konmakandra musu fiti a rai fu 1 Korentesma 14:40?

¹¹ Wi kan sori tu taki wi e prakseri wi brada nanga sisa te wi e fiti a rai disi: „Meki ala sani pasa na wan fasi di fiti èn soleki fa sani seti” (1 Kor. 14:40). Brada  di abi wan prati na den konmakandra e gi yesi na a rai disi te den no e pasa a ten di den kisi. Na so den e sori switifasi gi a brada di abi wan prati baka den èn gi a heri gemeente. Son brada nanga sisa e tan fara, trawan musu go teki bus fu go na oso èn sonwan abi trowpatna di no de Kotoigi èn di o atibron efu den kon tumusi lati na oso.

12. Fu san ede wi musu ’abi furu lespeki nanga lobi’ gi den owruman di e wroko tranga? (Luku a faki „ Sori lespeki gi den brada di e teki fesi”.)

¹² Wi musu abi furu lespeki gi owruman di e wroko tranga na ini a gemeente èn di e teki fesi fayafaya na ini a preikiwroko. (Leisi 1 Tesalonikasma 5:12, 13.) Wi de seiker taki yu e warderi a wroko fu den owruman. Sobun, wroko makandra nanga den èn horibaka gi den fu di „den e luku unu leki sma di o abi fu gi Gado frantwortu fu san den e du”.​—Hebr. 13:7, 17.

13. San wi kan leri fu na eksempre fu Yesus?

¹³ Na ini wan profeititori, Yesaya ben skrifi fu Yesus: „A no o masi wan warimbo di broko èn a no o kiri wan faya di e suku fu dede” (Yes. 42:3). Fu di Yesus ben lobi sma, meki a ben e firi gi den. Son sma ben lasi-ati so te taki den ben de leki „wan warimbo di broko” noso leki „wan faya di e suku fu dede”. Yesus ben e firi gi den sma disi èn dati meki a ben sori switifasi gi den èn a ben abi pasensi nanga den. Srefi pikin-nengre ben lobi kon na Yesus (Mark. 10:14). A tru taki wi no abi a koni di Yesus ben abi èn wi no man gi leri leki en. Ma wi kan sori switifasi gi den  sma na ini wi kontren èn wi musu du dati. Sobun, wi musu luku fa wi e taki nanga den, o ten wi e go na den èn o langa wi e taki nanga den.

14. Fu san ede wi musu luku bun fa wi e taki nanga sma?

¹⁴ Fa wi musu taki nanga sma? Na ini a ten disi milyunmilyun sma ’e pina èn den e waka bruyabruya’ fu di kruka bisnisman, politiekman nanga kerki fesiman e pina den (Mat. 9:36). Disi meki taki furu sma no e frutrow trawan moro èn den no abi howpu. Dati meki wi musu gebroiki wortu di e meki sma firi bun èn den musu man yere na wi sten taki wi e broko wi ede nanga den. Furu sma no e arki a bun nyunsu fu di wi sabi a Bijbel bun, ma fu di wi e taki na wan switifasi èn fu di wi e sori lespeki gi den.

15. Fa wi kan sori switifasi nanga lespeki te wi e preiki gi sma?

¹⁵ Furu fasi de fa wi kan sori taki wi e lespeki den sma di wi e miti na ini a preikiwroko. Wi sabi taki a bun fu poti aksi te wi e gi sma leri. Ma toku wi musu sorgu taki wi e sori switifasi nanga lespeki te wi e poti aksi gi sma. Wan pionier kon si taki furu sma na ini a kontren fu en e syensyen. Dati meki a no e poti aksi gi den di o meki den firi wan fasi. A no e poti wan aksi efu a sabi taki den no sabi a piki. Fu eksempre, a no e aksi den sani soleki: ’Yu sabi a nen fu Gado?’ noso ’Yu sabi san na Gado Kownukondre?’ Na presi fu dati a e taki: „Mi leri na ini Bijbel taki Gado abi wan nen. Mi kan sori yu a nen dati?” A no de fu taki dati sma e difrenti èn a no ala kulturu de a srefi. Sobun, wi no o man preiki a srefi fasi na ala presi. Ma toku ala ten wi musu sori switifasi nanga lespeki. Fu man du dati wi musu sabi den sma na ini wi kontren bun.

16, 17. Te wi e hori den sma na prakseri, dan fa dati o yepi wi fu sabi (a) o ten wi musu go na den oso? (b) o langa wi musu taki nanga den?

¹⁶ O ten wi musu go na sma oso? Te wi e go preiki oso fu oso, wi musu hori na prakseri taki den sma no e fruwakti wi. Dati meki a prenspari taki wi e go na wan ten di bun gi den èn pe den o man taki nanga wi (Mat. 7:12). Den sma na ini yu kontren gwenti sribi moro langa te satra nanga sonde? Efu dati de so, dan kande yu kan bigin du stratiwroko fosi yu go na den. Kande yu kan wroko nanga a preikiwroko wagi, noso kande yu kan tyari wan tu gobaka na sma di yu sabi taki den wiki kaba.

¹⁷ O langa wi musu taki nanga den sma? Nofo tron sma abi furu fu du, sobun, a bun fu no hori a takimakandra tumusi langa, spesrutu a fosi leisi te yu miti a sma. A moro bun fu taki syatu nanga sma leki fu taki tumusi langa (1 Kor. 9:20-23). Te sma e si taki wi e frustan taki den abi furu fu du, dan den o wani taki nanga wi te wi go na den baka. Iya, efu wi e sori den moi fasi fu wan Kresten na ini a preikiwroko, dan wi kan taki trutru taki wi e „wroko makandra nanga Gado”. Kande Yehovah o gi wi a grani srefi fu yepi wan sma fu kon sabi a tru anbegi.​—1 Kor. 3:6, 7, 9.

18. Sortu blesi wi o kisi te wi e hori den firi fu trawan na prakseri?

¹⁸ Sobun meki wi du ala san wi man fu hori den firi fu trawan na prakseri na ini na osofamiri, na ini a gemeente èn na ini a preikiwroko. Te wi e du dati, dan wi o kisi furu blesi now èn na ini a ten di e kon. Psalm 41:1, 2 e taki: „Koloku fu a sma di e yepi den mofinawan. Yehovah o frulusu en te problema miti en. . . . Sma na grontapu o taki dati a de wan koloku sma.”