NA HERI grontapu owruman lobi den frantwortu di den abi na ini Yehovah organisâsi. Den de wan bigi blesi gi wi alamala! Ma no so langa pasa wan kenki kon. Den aksi owru brada di e dini leki owruman fu meki moro yongu owruman tyari den bigi frantwortu fu den. Meki wi go luku wan tu eksempre.

A nyun seti na taki brada di doro 70 yari kaba, no e dini moro leki kring-opziener noso leki leriman fu den skoro fu na organisâsi. Boiti dati, owruman di doro 80 yari e meki moro yongu owruman dini leki fesiman fu a Bijkantoro Komte noso leki fesiman fu den owruman fu a gemeente. Fa den owru brada disi ben feni den kenki disi? Den sori taki den wani tan horibaka gi Yehovah nanga en organisâsi!

Ken, di dini leki fesiman fu a Bijkantoro Komte pikinmoro 49 yari langa, e taki: „Mi ben feni taki a ben de wan heri bun bosroiti. Fu taki en leti, a srefi mamanten di mi kisi a boskopu, mi ben begi Yehovah fu poti wan  moro yongu brada leki fesiman.” Owru brada na heri grontapu ben abi a srefi denki leki Ken. Ma den brada disi ben lobi a wroko fu den. Dati meki wi kan frustan taki gi sonwan fu den a no ben makelek.

Esperandio, di ben de fesiman fu den owruman fu en gemeente, taki: „Mi ben sari pikinso. Ma mi ben abi moro ten fanowdu fu sorgu gi misrefi fu di a gosontu fu mi ben go na baka.” Toku Esperandio tan wroko gi Yehovah èn a de wan bigi blesi gi a gemeente fu en.

Fa a de nanga brada di ben e dini fosi leki kring-opziener furu yari langa? Allan, di dini leki kring-opziener 38 yari langa, taki: „Mi no ben man bribi di mi yere a tori.” Toku a si taki a bun fu leri moro yongu brada a wroko. Allan e tan wroko tranga gi Yehovah.

Russell, di dini leki kring-opziener nanga leriman fu den skoro fu na organisâsi 40 yari langa, taki dati na ini a bigin en nanga en wefi ben sari. A taki: „Wi ben lobi a grani di wi ben abi srefisrefi èn wi ben feni taki wi ben abi a krakti ete fu go doro.” Russell nanga en wefi e gebroiki den sani di den leri èn na ondrofeni di den abi fu yepi a gemeente fu den. Den brada nanga sisa fu a gemeente breiti nanga den.

Awinsi yu no abi den srefi firi leki den brada disi, toku wan tori na ini 2 Samuel kan yepi yu fu frustan fa den e firi.

Prakseri san ben pasa di Absalom, a manpikin fu Kownu David, ben wani teki a makti abra. David lowe fu Yerusalem go na Mahanayim, na a owstusei fu Yordan-liba. Drape David nanga den sma di ben de nanga en ben abi nyanyan nanga tra sani fanowdu. Yu sabi ete san pasa baka dati?

Dri man fu a kontren dati tyari bedi, nyanyan nanga tra sani gi den. Barsilai ben de wan fu den man dati (2 Sam. 17:27-29). Di Absalom nanga den man fu en lasi a feti, David ben kan drai go baka na Yerusalem. Barsilai tyari en go te na Yordan-liba. David begi en fu kon nanga en na Yerusalem. Barsilai ben „gudu srefisrefi”, èn a no ben abi a nyanyan fu David fanowdu, toku David aksi en fu kon nyan nanga en (2 Sam. 19:31-33). Ma a sori leki David ben wani taki Barsilai ben musu kon nanga en na Yerusalem, fu di Barsilai ben kan gi en bun rai èn fu di a ben abi furu ondrofeni. A no de fu taki dati a ben o de wan moi grani fu libi èn fu wroko na ini kownu-oso!

Ma Barsilai ben abi sakafasi. A ben sabi san a ben man du èn san a no ben man du. Dati meki a taigi David taki a ben abi 80 yari kaba. A taki tu: „Mi o man si san bun, noso san ogri?” Fu san ede a taki dati? Barsilai ben owru kaba, sobun, a ben musu fu  abi furu koni. A ben kan gi David bun rai, neleki fa den „owru man” ben gi Kownu Rehabeyam bun rai bakaten (1 Kow. 12:6, 7; Ps. 92:12-14; Odo 16:31). Sobun, di Barsilai taki dati a no man si san bun noso san ogri, dan kande a ben wani sori David taki a no ben man du so furu moro fu di a ben kon owru. A ben taki tu dati a no ben man tesi èn yere bun moro (Preik. 12:4, 5). Dati meki Barsilai gi David deki-ati fu tyari Kimham go na Yerusalem. A kan taki Kimham ben de Barsilai manpikin.​—2 Sam. 19:35-40.

Barsilai no teki a frantwortu di David ben wani gi en, fu di a ben owru kaba èn a ben sabi taki a no ben o man du a wroko. A nyun seti di wi taki fu en na a bigin e sori taki na organisâsi e hori den owru brada na prakseri fu di den de na ini wan srefi situwâsi leki Barsilai. Ma na ini a ten disi, a seti disi no e tyari wini kon gi wán brada nomo, ma gi den owruman na heri grontapu di dini furu yari langa.

Den owru brada disi di abi sakafasi frustan taki fu di Yehovah en organisâsi e gro, dan a bun fu leri moro yongu brada fu tyari den frantwortu di den ben tyari furu yari langa. Furu fu den owru brada disi leri den yonguwan fa den musu du a wroko, neleki fa Barsilai ben du dati kande nanga en manpikin èn neleki fa Paulus ben du dati nanga Timoteyus (1 Kor. 4:17; Fil. 2:20-22). Now den yongu brada disi na „mansma di abi spesrutu koni” èn den kan yepi a gemeente fu kon moro tranga.​—Ef. 4:8-12; luku sosrefi Numeri 11:16, 17, 29.

Na heri grontapu, furu brada di no e tyari son frantwortu moro, abi na okasi now fu du tra wroko na ini Yehovah organisâsi.

Marco, di ben de wan kring-opziener 19 yari langa, e taki: „Son sisa na ini a gemeente abi masra di no de Kotoigi. Now mi abi moro ten fu poti prakseri na den man disi.”

Geraldo, di du a kring-wroko 28 yari langa, taki: „Wan sani di wi e pruberi fu du now, na taki wi wani yepi den brada nanga sisa di no e preiki moro èn di no e kon na den konmakandra. Wi wani studeri Bijbel nanga moro sma tu.” Geraldo taki dati now en nanga en wefi e studeri Bijbel nanga 15 sma. A taki tu dati furu brada nanga sisa di no e preiki moro, bigin kon na den konmakandra baka.

Allan di wi ben kari na a bigin, e taki: „Now wi abi moro ten fu preiki na difrenti fasi. Wi e preiki na presi pe furu sma de, wi e preiki na bisnis kontren èn wi e preiki gi den birtisma fu wi. Tu fu den birtisma fu wi kon na a Kownukondre zaal kaba.”

Efu yu na wan fu den owru brada di kisi wan tra frantwortu na ini Yehovah en organisâsi, dan wan tra moi fasi de fa yu kan wroko gi Yehovah. Yu kan leri tra yongu brada na ini a gemeente san yu sabi. Russell, di wi ben kari kaba, e taki: „Yehovah e gi moro yongu brada leri èn a e gi den moro frantwortu. Den yongu brada disi sabi du den wroko bun. Den e meki muiti fu gi bun leri èn fu go luku den brada nanga sisa!”​—Luku a faki „ Yepi yongu brada fu tyari moro frantwortu”.

Efu yu no e tyari den bigi frantwortu di yu ben abi fosi, dan no lasi-ati. Yu yepi furu sma kaba nanga a wroko di yu du èn yu kan tan du dati. Yu kan de seiker taki te nanga now den brada nanga sisa lobi yu.

San moro prenspari, na taki Yehovah „no o frigiti a wroko di unu du nanga a lobi di unu sori gi a nen fu en, fu di unu ben dini den santawan èn unu e tan dini den te now  ete” (Hebr. 6:10). A tekst disi e sori wi alamala taki Yehovah no e luku nomo san wi du na ini a ten di pasa. Yehovah lobi yu èn dati meki a no o frigiti den sani di yu du gi en kaba èn den sani di yu e tan du gi en!

Ma kande yu a no wan fu den owru brada di ben abi bigi frantwortu. Toku yu kan leri wan sani fu na artikel disi. San na dati?

Efu yu sabi wan lepi owru brada di ben tyari bigi frantwortu fosi, dan yu kan leri furu fu en. Suku rai na en. Aksi en fa yu kan du yu wroko moro bun. Èn luku fa a brada disi di abi furu ondrofeni, e tyari en frantwortu.

Efu yu na wan owru brada di e du wan tra wroko now, noso efu yu na wan brada noso sisa di kan leri furu fu den owru brada disi, dan hori na prakseri taki Yehovah e warderi a wroko fu den sma di dini en furu yari langa èn di e tan dini en te now ete.