1, 2. (a) Fa Yehovah de tra fasi leki libisma di abi furu makti? (b) San wi o luku na ini na artikel disi?

NOFO TRON sma di abi furu makti e „basi” trawan èn den e kwinsi den (Mat. 20:25; Preik. 8:9). Ma Yehovah no de so! Aladi en na a Almakti Gado, toku a e hori den firi fu sondusma na prakseri. A e sori switifasi gi den, a e broko en ede nanga den èn a e sorgu gi san den abi fanowdu. „A e hori na prakseri taki na fu doti wi meki” èn dati meki noiti a e aksi wi fu du wan sani di wi no man.​—Ps. 103:13, 14.

² Bijbel abi furu eksempre di e sori taki Yehovah e hori den firi fu den futuboi fu en na prakseri. Wi o luku dri fu den. Wi o luku fa Gado yepi Samuel di a ben musu tyari wan krutuboskopu gi a Granpriester Eli. Wi o si fa a hori pasensi nanga Moses di a ben feni taki a no o man tron fesiman fu den Israelsma. Leki lasti wi o si fa Yehovah hori a situwâsi fu den Israelsma na prakseri di a tyari den komoto na ini Egepte. Te wi o taki fu den eksempre disi, dan luku san den e leri yu fu Yehovah èn fa yu kan gebroiki den sani di yu leri.

3. Sortu aparti sani pasa wan neti nanga a yongu Samuel èn san wi ben kan aksi wisrefi? (Luku a prenki na a bigin fu na artikel.)

³ Samuel bigin „dini Yehovah” na a tabernakel di a ben de wan pikin boi (1 Sam. 3:1). Wan neti di Samuel go sribi wan aparti sani pasa. * (Leisi 1 Samuel 3:2-10.) A yere wan sten e kari en nen. A ben denki taki na a Granpriester Eli èn dati meki a lon go na en, dan a taki: „Iya, mi masra. Yu ben kari mi?” Ma Eli taigi en taki a no kari en. Di a sani disi pasa ete tu leisi, Eli kon frustan taki na Gado ben e kari Samuel. Dati meki a taigi Samuel san a musu du te a sten kari en baka. Samuel arki en. Ma kande wi e aksi wisrefi: ’Fu san ede Yehovah no ben meki Samuel kon sabi wantewante taki na en ben kari en?’ Bijbel no e taki fu san ede. Ma a fasi fa sani waka e sori taki kande Yehovah du dati fu di a ben hori den firi fu a yongu Samuel na prakseri.

4, 5. (a) Fa Samuel ben firi di Yehovah gi en wan boskopu fu tyari gi Eli, èn fa sani waka a tra mamanten? (b) San a tori disi e leri wi fu Yehovah?

⁴ Leisi 1 Samuel 3:11-18. A Wet fu Yehovah ben taki dati pikin ben musu lespeki owrusma, spesrutu efu den ben de edeman (Eks. 22:28; Lef. 19:32). Yu denki taki a ben makelek gi Samuel fu waka go na Eli a tra mamanten èn fu fruteri en taki Gado o strafu en nanga en osofamiri? Kwetikweti! Bijbel e fruteri wi taki Samuel „ben frede fu taigi Eli fu a fisyun di a si”. Ma Gado sori Eli krin taki na en ben e kari Samuel. Dati meki Eli taigi Samuel: „No kibri noti gi mi. Taigi mi ala san a taigi yu.” Samuel „taigi en ala san Gado taki”.

⁵ Eli ben kisi so wan boskopu kaba fu „wan man fu Gado” di Bijbel no e kari a nen fu en. Sobun, a kan taki a boskopu fu Samuel no ben meki a skreki tumusi (1 Sam. 2:27-36). A tori fu Samuel nanga Eli e sori taki Yehovah koni èn taki a e hori den firi fu sma na prakseri.

6. San wi e leri te wi e luku fa Gado yepi a yongu Samuel?

⁶ Yu na wan yonguwan? Efu dati de so, dan a tori fu a yongu Samuel e leri yu taki Yehovah e frustan fa yu e firi èn a sabi sortu tesi yu e kisi. Kande yu e syen èn yu feni en muilek fu preiki gi bigisma noso fu de tra fasi leki furu yonguwan. Yu kan de seiker taki Yehovah wani yepi yu. Sobun, fruteri en ala san de na tapu yu ati (Ps. 62:8). Denki dipi fu Bijbel eksempre, soleki a di fu Samuel. Taki nanga tra Kresten, yonguwan noso owruwan, di ben abi a srefi problema leki yu. Den o fruteri yu fa Yehovah yepi den. A kan taki a ben du dati na wan fasi di den no ben fruwakti srefi.

7, 8. Fa Yehovah sori taki a ben frustan fa Moses e firi?

⁷ Di Moses ben abi 80 yari, Yehovah gi en wan bigi frantwortu. A ben musu frulusu den Israelsma di ben de leki srafu na ini Egepte (Eks. 3:10). Moses ben wroko leki skapuman 40 yari langa na ini Midian. Sobun, a ben skreki di a kisi a frantwortu disi. A taki: „Suma na mi fu go na a kownu èn fu tyari den Israelsma komoto fu Egepte?” Fu gi en deki-ati, Yehovah taigi en: „Mi o de nanga yu” (Eks. 3:11, 12). A pramisi en taki den owru man fu Israel ’ben o arki en  trutru’. Toku Moses taki: „Kon meki wi taki dati . . . den no e arki mi?” (Eks. 3:18; 4:1). Fu taki en leti, Moses no ben wani bribi Yehovah! Ma Yehovah hori pasensi nanga en. Fu no meki Moses tweifri moro, a gi en a makti srefi fu du wondru. Moses na a fosi sma na ini Bijbel di kisi a makti disi.​—Eks. 4:2-9, 21.

⁸ Toku Moses ben feni taki a no ben o man du a wroko. A taigi Yehovah taki a no man taki bun. Dati meki Gado taigi en: „Misrefi o yepi yu te yu o taki, èn mi o taigi yu san yu musu taki.” Moses go du a wroko now? Nôno, a aksi Yehovah fu seni wan tra sma. Ne Yehovah ati bron nanga en, ma toku a sori taki a ben firi gi Moses. A meki Aron go nanga Moses èn Aron ben o taki gi en.​—Eks. 4:10-16.

9. Fa a pasensi nanga a switifasi fu Yehovah, yepi Moses fu de wan bun fesiman?

⁹ San a tori disi e leri wi fu Yehovah? Yehovah na a Almakti Gado, sobun a ben kan dwengi Moses fu du san a taigi en. Ma Yehovah hori pasensi nanga Moses di ben abi sakafasi èn a sori switifasi gi en. A gi en a dyaranti taki a ben o de nanga en. A sani disi ben abi bun bakapisi? Iya, Moses tron wan bun fesiman fu Gado pipel. Èn neleki Yehovah, ensrefi ben e hori den firi fu trawan na prakseri.​—Num. 12:3.

10. Sortu wini wi o kisi te wi e teki na eksempre fu Yehovah?

¹⁰ San a tori disi e leri wi na ini a ten disi? Efu yu na wan masra, wan papa, wan mama, noso wan owruman, dan a no de fu taki dati yu abi moro frantwortu leki trawan. Dati meki a prenspari taki yu e teki na eksempre fu Yehovah. Hori den firi fu trawan na prakseri, sori switifasi gi den èn hori pasensi nanga den (Kol. 3:19-21; 1 Petr. 5:1-3). Te yu e meki muiti fu de leki Yehovah nanga Yesus Krestes, a Moro Bigi Moses, dan a o makelek gi trawan fu kon taki nanga yu  èn yu o man gi den deki-ati (Mat. 11:28, 29). Yu o de wan bun eksempre gi den tu.​—Hebr. 13:7.

11, 12. San Yehovah du fu sorgu taki en pipel no ben frede di den ben komoto na ini Egepte?

¹¹ A kan taki moro leki dri milyun Israelsma ben gowe libi Egepte na ini a yari 1513 Fosi Krestes. Na ini a grupu dati yu ben abi pikin-nengre, owrusma nanga sma di ben siki noso malengri. Sobun, a Fesiman fu so wan bigi grupu ben musu de wan sma di e firi gi trawan èn di lobi den. A fasi fa Yehovah gebroiki Moses fu tiri en pipel, ben sori taki Yehovah ben de so wan Fesiman. A bakapisi ben de taki den Israelsma no ben frede di den ben gowe libi Egepte, a wan-enkri presi di den ben sabi.​—Ps. 78:52, 53.

¹² San Yehovah du fu sorgu taki en pipel no ben frede di den ben e gowe? A ben orga den bun. A ’ben seti den leki wan legre’ di den komoto na Egepte (Eks. 13:18). A fasi fa den Israelsma ben orga, ben meki den si taki na Gado e tiri den. Boiti dati Yehovah „ben e tyari den nanga wan wolku na deiten èn na neti a ben e tyari den nanga a leti fu wan bigi faya” (Ps. 78:14). A sani disi ben e sori den taki Yehovah ben de nanga den. A ben de neleki Yehovah ben taigi den: „No frede. Mi de nanga unu fu tiri unu èn fu kibri unu.” Den ben abi a deki-ati disi fanowdu!

13, 14. (a) San Yehovah du gi den Israelsma na a Redi Se? (b) Fa Yehovah sori taki a ben abi makti moro den Egeptesma?

¹³ Leisi Eksodes 14:19-22. Pruberi fu si yusrefi na ini a situwâsi disi: Yu no abi nowan sei fu go. Na yu fesi yu abi a Redi Se, èn na yu baka yu abi Farao nanga a legre fu en. Now Gado e du wan sani. A e meki a wolku di ben de na fesi a grupu fu yu go na bakasei, so taki den Egeptesma no man kon krosibei fu unu. Den no man si unu tu fu di a wolku e skèin leti soso gi a grupu fu yu. Dan yu e si fa Moses e langa en anu go na a se èn wan tranga winti fu owstusei e dribi a watra èn a se e prati na ini tu. Yu nanga yu famiri, den meti fu unu nanga den tra sma e waka go na tapu a drei gron fu a se. Dan yu e fruwondru te yu e si taki a gron no tokotoko èn a no grati tu. Fu di a drei, meki un kan waka bun na en tapu. Srefi den wan di no man waka esi e doro na abra sei.

¹⁴ Leisi Eksodes 14:23, 26-30. Now Farao di ben abi heimemre e du wan don sani. A e hari kon na unu baka nanga en legre. Ne Moses langa en anu go baka na a se. A leisi disi a watra di ben tanapu leki skotu fadon kon na den tapu leki wan bigi tsunami. Farao nanga a heri legre fu en dede!​—Eks. 15:8-10.

15. San a tori disi e leri yu fu Yehovah?

¹⁵ A tori disi e leri wi taki Yehovah na wan Gado di e orga sani bun (1 Kor. 14:33). A sani disi e gi wi a dyaranti taki ala ten Yehovah o sorgu taki sani waka bun gi wi. Sobun, wi no abi fu frede. Yehovah sori tu taki en na wan bun skapuman di e sorgu gi en pipel. A e kibri den gi den feanti fu den. Disi na wan trowstu gi wi di e libi krosibei fu a kaba fu a grontapu disi.​—Odo 1:33.

16. Sortu deki-ati wi e kisi te wi e luku a fasi fa Yehovah frulusu den Israelsma?

¹⁶ Na ini a ten disi Yehovah e sorgu tu gi a pipel fu en. A e yepi den fu tan abi wan bun matifasi nanga en èn a e kibri den gi den feanti. A o tan du dati srefi  na ini a ten fu a bigi banawtu di no de fara moro (Openb. 7:9, 10). Sobun, awinsi yu yongu noso yu owru, awinsi yu gosontu noso yu siki, yu no abi fu bruya noso frede te a bigi banawtu doro. * Luku san a pipel fu Gado o du na a ten dati. Yesus e taki: „Opo tanapu leti-opo èn opo un ede luku go na loktu, bika a frulusu fu unu de krosibei” (Luk. 21:28). Srefi te Gok o kon feti nanga den, den no o frede. Leki fa wi sabi, dan Gok na ala den kondre di o span anu makandra fu kon feti nanga Gado pipel. A makti fu den o bigi moro a legre fu Farao (Esek. 38:2, 14-16). Fu san ede Gado pipel o tanapu kánkan? Fu di den sabi taki Yehovah no kenki. Den de seiker taki a o frulusu den baka èn taki a o poti prakseri na ibriwan fu den.​—Yes. 26:3, 20.

17. (a) San wi musu du efu wi wani kisi wini fu Bijbel tori di e sori fa Yehovah e sorgu en pipel èn san o de a bakapisi? (b) San wi o luku na ini a tra artikel?

¹⁷ Na ini na artikel disi wi si wan tu eksempre di e sori taki Yehovah e hori den firi fu en pipel na prakseri èn taki a e sorgu den. A e sori switifasi gi den, a de wan lobi-ati fesiman èn a e frulusu den. Te yu e denki dipi fu den tori disi, dan pruberi fu leri wan nyun sani fu Yehovah. Te yu e du dati, dan yu o kon si o furu moi fasi Yehovah abi. Disi o meki taki yu kisi moro lobi gi en èn a bribi fu yu o kon moro tranga. Na ini a tra artikel wi o luku fa wi kan hori den firi fu trawan na prakseri neleki Yehovah. Wi o si fa wi kan du dati na ini na osofamiri, na ini a gemeente èn na ini a preikiwroko.