1. Fa a situwâsi fu na apostel Yohanes ben de na a pisi ten fu a yari 95?

NA A pisi ten fu a yari 95, na apostel Yohanes ben de na ini wan muilek situwâsi. A ben owru, a ben de leki wan strafuman na tapu na èilanti Patmos èn a kan taki en ben de a lasti apostel di ben de na libi (Openb. 1:9). A ben sabi taki gensman ben kori den brada nanga sisa na ini den gemeente èn taki den ben e tyari pratifasi kon na den mindri. A ben gersi leki tru Kresten no ben o de moro.​—Yud. 4; Openb. 2:15, 20; 3:1, 17.

2. Soleki fa Openbaring 7:9-14 e sori, dan sortu moi fisyun Yohanes ben kisi? (Luku a fowtow tapu a kafti.)

² Di Yohanes ben de na ini a muilek situwâsi dati, Gado gi en wan moi fisyun di ben sori en san ben o pasa na ini a ten di e kon. Na ini a fisyun wan engel e taigi fo tra engel fu hori den winti di o tyari pori kon na a ten fu a bigi banawtu, so taki den srafu fu Gado ben kan kisi wan marki na den fesi-ede (Openb. 7:1-3). A grupu dati na den 144.000 sma di o tiri makandra nanga Yesus na hemel (Luk. 12:32; Openb. 7:4). Baka dati Yohanes si wan tra grupu di bigi srefisrefi. A e taki: „Baka dati mi si wan bigi ipi sma di nowan sma ben man teri. Den ben komoto na ala kondre, lo, pipel, nanga tongo. Den ben e tanapu na fesi a kownusturu èn na fesi a Pikin Skapu.” (Leisi Openbaring 7:9-14.) Prakseri fa Yohanes ben breiti di a kon sabi taki na ini a ten di e kon bun furu sma ben o dini Gado na a fasi di a feni bun!

3. (a) Fu san ede a fisyun fu Yohanes kan tranga wi bribi? (b) San wi o leri na ini na artikel disi?

³ Wi kan de seiker taki a fisyun dati tranga a bribi fu Yohanes. A musu tranga wi bribi tu fu di a fisyun e kon tru na ini a ten disi. Na ini a ten disi milyunmilyun sma bigin dini Yehovah. Den abi a howpu fu pasa a bigi banawtu èn  fu libi fu têgo na grontapu. Na ini na artikel disi wi o leri fa Yehovah yepi en pipel moro leki 80 yari pasa fu kon frustan suma na a bigi ipi. Baka dati wi o poti prakseri na tu sani di abi fu du nanga a bigi ipi: (1) Wi o si o bigi a de èn (2) wi o si taki den sma fu a bigi ipi komoto fu difrenti kondre. Den sani disi o tranga a bribi fu ala sma di abi a howpu fu de fu a grupu disi.

4. Sortu tru tori fu Bijbel den Kresten kerki no e frustan èn fa den Bijbel Ondrosukuman ben de tra fasi?

⁴ Den Kresten kerki no e leri sma taki libisma di e gi yesi na Gado o libi fu têgo na grontapu, soleki fa Bijbel e leri (2 Kor. 4:3, 4). Na ini a ten disi furu fu den kerki dati e leri taki ala bun sma o go na hemel baka te den dede. Ma a pikin grupu Bijbel Ondrosukuman di ben tyari A Waktitoren kon na doro, ben e si sani tra fasi. Den ben frustan taki Gado ben o seti a Paradijs baka na grontapu èn taki milyunmilyun sma di e gi yesi na Gado no ben o libi na ini hemel, ma dyaso na grontapu. Ma den no ben frustan krin suma na den sma disi di ben o libi na grontapu.​—Mat. 6:10.

5. San den Bijbel Ondrosukuman ben frustan fu den 144.000 sma?

⁵ Den Bijbel Ondrosukuman ben frustan tu taki son sma ben o „bai puru fu grontapu” fu tiri makandra nanga Yesus na hemel (Openb. 14:3). A grupu dati na 144.000 Kresten di gi densrefi abra na Gado èn di dini en fayafaya dyaso na grontapu. Ma san den ben denki fu a bigi ipi?

6. San den Bijbel Ondrosukuman ben denki fu a bigi ipi?

⁶ Na ini a fisyun Yohanes ben si taki a bigi ipi „ben e tanapu na fesi a kownusturu èn na fesi a Pikin Skapu” (Openb. 7:9). A vers disi ben meki den Bijbel Ondrosukuman denki taki a bigi ipi ben o libi na hemel, neleki den 144.000 sma. Efu den 144.000 sma nanga a bigi ipi ben o libi na hemel, dan fa den tu grupu disi ben difrenti fu makandra? Den Bijbel Ondrosukuman ben denki taki a bigi ipi ben de Kresten di no du ala san Gado ben aksi fu den di den ben de na grontapu. Aladi den sma disi ben e libi wan krin libi, toku sonwan fu den ben tan memre fu den falsi Kresten kerki. Den Bijbel Ondrosukuman ben denki taki den sma disi no ben e dini Gado fayafaya nofo fu kan tiri makandra nanga Yesus. Fu di den sma fu a bigi ipi no ben abi nofo lobi gi Gado, meki den ben o tanapu na fesi a kownusturu. Den no ben o sidon na tapu kownusturu.

7. (a) Soleki fa den Bijbel Ondrosukuman ben e bribi, dan suma ben o libi na grontapu na a ten fu a Dusun Yari Tiri fu Krestes? (b) San den ben e bribi fu den reti-ati man di ben e dini Gado na ini owruten?

⁷ Ma suma ben o libi na grontapu? Den Bijbel Ondrosukuman ben e bribi taki baka te den 144.000 sma nanga a bigi ipi go na hemel, milyunmilyun tra sma ben o kisi a grani fu libi na grontapu èn den ben o kisi den blesi fu a Dusun Yari Tiri fu Krestes. Den Bijbel Ondrosukuman no ben denki taki den milyunmilyun sma dati ben o dini Yehovah fosi a Dusun Yari Tiri fu Krestes bigin. Na presi fu dati den ben denki taki a grupu disi ben o kisi leri fu Yehovah na a ten fu a Dusun Yari Tiri fu Krestes. Baka dati den sma di ben o gi yesi na den wet fu Yehovah ben o kisi a blesi fu libi fu têgo na grontapu èn den  wan di ben o trangayesi Gado ben o kisi pori. Den Bijbel Ondrosukuman ben bribi tu taki sonwan fu den sma di ben o de „tiriman” na grontapu na a ten dati èn den reti-ati man di dede fosi Krestes ben de na grontapu, ben o kisi a grani tu fu go na hemel, baka a Dusun Yari Tiri fu Krestes.​—Ps. 45:16.

8. Soleki fa den Bijbel Ondrosukuman ben e bribi, dan sortu dri grupu ben de?

⁸ Sobun, den Bijbel Ondrosukuman ben bribi taki dri grupu ben de: (1) Den 144.000 sma di ben o tiri makandra nanga Yesus na ini hemel. (2) A bigi ipi Kresten di no ben dini Gado fayafaya èn di ben o tanapu na fesi a kownusturu fu Yesus na hemel. (3) Milyunmilyun sma di ben o kisi leri fu Yehovah na grontapu na a ten fu a Dusun Yari Tiri fu Krestes. * Ma bakaten Yehovah yepi den fu frustan a tori disi moro krin.​—Odo 4:18.

9. (a) Fu san ede wi kan taki dati a bigi ipi e tanapu „na fesi a kownusturu èn na fesi a Pikin Skapu”? (b) Fu san ede a fasi fa wi e frustan Openbaring 7:9 now, e kruderi nanga Bijbel?

⁹ Na ini 1935 Yehovah Kotoigi kon frustan moro krin suma na a bigi ipi di Yohanes si na ini wan fisyun. Den kon frustan taki a bigi ipi no abi fu de na ini hemel fu tanapu „na fesi a kownusturu èn na fesi a Pikin Skapu”. Na presi fu dati, den e tanapu na fesi a kownusturu na wan agersifasi. Aladi a bigi ipi o de na grontapu, den kan tanapu „na fesi a kownusturu” fu di den e bribi taki Yehovah na a Moro Hei Tiriman èn fu di den e gi yesi na en (Yes. 66:1). Den kan tanapu „na fesi a Pikin Skapu” fu di den e bribi na ini a frulusu-ofrandi fu Yesus. Na ini Mateyus 25:31, 32 wi e leisi tu taki den o tyari „ala pipel”, sosrefi den ogriwan ’kon na fesi’ Yesus di e sidon na tapu en kownusturu. A de krin taki den pipel disi no de na hemel, ma na grontapu. Disi e yepi wi si fu san ede den brada e frustan a tori disi tra fasi now. Wi e frustan now fu san ede Bijbel no e taki dati a bigi ipi o go na hemel. Na wán grupu nomo kisi a pramisi fu libi fu têgo na hemel, dati na den 144.000 sma di o „tiri grontapu leki kownu” makandra nanga Yesus.​—Openb. 5:10.

10. Fu san ede den sma fu a bigi ipi musu kisi leri fu Yehovah fosi a Dusun Yari Tiri fu Krestes bigin?

¹⁰ Sensi 1935 Yehovah Kotoigi kon frustan taki a bigi ipi na ini a fisyun fu Yohanes na Kresten di e gi yesi na Gado èn di abi a howpu fu libi fu têgo na grontapu. Fu man pasa a bigi banawtu, a bigi ipi disi ben o abi fu kisi leri fu Yehovah fosi a Dusun Yari Tiri fu Krestes bigin. Den musu abi wan tranga bribi fu man „lowe gi ala den sani di musu pasa” fosi a Dusun Yari Tiri bigin.​—Luk. 21:34-36.

11. Fu san ede son Bijbel Ondrosukuman ben e denki taki son sma ben o go na hemel baka a Dusun Yari Tiri?

¹¹ Ma fa a de nanga a denki taki son sma di tan gi yesi na Gado ben o go na hemel baka a Dusun Yari Tiri fu Krestes? Son sma ben aksi densrefi fu san ede den man fu owruten di ben e dini Gado nanga den heri ati ben o libi na grontapu, ma Kresten di no du ala san Gado ben aksi den ben o libi na hemel. Na Ingrisitongo Waktitoren fu 15 februari 1913 ben taki dati kande son fayafaya anbegiman fu Yehovah na grontapu ben o go na hemel baka a Dusun Yari Tiri. A denki disi no ben  bun, ma den ben e denki so fu di den ben bribi taki (1) a bigi ipi ben o go na hemel, èn (2) a bigi ipi na Kresten di no ben e du ala san Gado aksi fu den.

12-13. San den salfuwan nanga a bigi ipi sabi fu den blesi di den o kisi?

¹² Ma soleki fa wi si, dan sensi 1935 Yehovah Kotoigi ben frustan krin taki den sma di o tan na libi baka Armagedon, na a bigi ipi di Yohanes si na ini wan fisyun. Den o „komoto na ini a bigi banawtu” dyaso na grontapu èn den o „tan taki nanga wan tranga sten: ’Tangi fu wi Gado di e sidon na tapu a kownusturu èn tangi fu a Pikin Skapu, meki wi kisi frulusu’” (Openb. 7:10, 14). Den ben frustan tu taki den reti-ati man fu owruten no ben o go na hemel. Bijbel e sori taki den wan di o go na hemel e kisi „wan moro betre sani” leki den reti-ati man dati (Hebr. 11:40). Fu di den brada kon frustan sani moro bun, meki den bigin du moro muiti fu suku den sma di abi a howpu fu libi fu têgo na grontapu èn fu yepi den fu dini Yehovah.

¹³ Den sma fu a bigi ipi breiti nanga a howpu di den abi. Den e frustan taki na Yehovah e bosroiti suma o dini en na hemel èn suma o dini en na grontapu. Den salfuwan nanga a bigi ipi sabi taki den no e frudini den blesi di den o kisi. Ma den o kisi den blesi disi soso fu di Yehovah seni Yesus Krestes kon fu dede gi wi.​—Rom. 3:24.

14. Fu san ede furu sma ben aksi densrefi fa a profeititori di e taki fu a bigi ipi ben o kon tru?

¹⁴ Baka di a pipel fu Yehovah frustan sani moro krin na ini 1935, furu sma ben e aksi densrefi fa den sma di abi a howpu fu libi na grontapu ben o tron wan bigi ipi. Fu eksempre, Ronald Parkin ben abi 12 yari di den brada kon frustan suma na a bigi ipi. A taki: „Na a ten dati sowan 56.000 preikiman ben de na heri grontapu èn furu fu den ben de salfuwan. Sobun, den sma fu a bigi ipi no ben furu.”

15. Fa Yehovah tyari a bigi ipi kon wán?

¹⁵ Na ini den yari baka dati den brada seni zendeling go na furu kondre èn moro nanga moro sma tron Yehovah Kotoigi. Na ini 1968 den bigin studeri Bijbel nanga sma nanga a buku „A waarheid di e tyari yu go na têgo libi”. Fu di a buku ben e fruklari den leri fu Bijbel na wan makelek fasi, meki moro nanga moro sma kon dini Yehovah. Na ini fo yari moro leki  500.000 nyun disipel dopu. Na ini den kondre fu Latijns-Amerika èn na ini tra kondre a Lomsu Kerki ben lasi makti. Boiti dati, na ini Owstu-Europa nanga son kondre na ini Afrika lanti ben gi wi primisi baka fu du a preikiwroko. Dati meki milyunmilyun sma dopu tu na ini den kondre dati (Yes. 60:22). Na ini den lasti yari di pasa, na organisâsi fu Yehovah meki furu tra sani di wi kan gebroiki fu yepi sma fu kon sabi moro fu Bijbel. A de krin taki Yehovah tyari a bigi ipi kon na wán. Now moro leki aiti milyun sma de na ini a grupu disi.

16. Pe den sma fu a bigi ipi ben o komoto?

¹⁶ Di Yohanes skrifi a fisyun fu en, a taki dati a bigi ipi ben o komoto na „ala kondre, lo, pipel, nanga tongo”. A profeiti Sakaria ben skrifi tu taki so wan sani ben o pasa. A skrifi: „Na a ten dati a o pasa so trutru, taki tin man o komoto na mindri ala den pipel di e taki difrenti tongo èn den o grabu wan Dyu hori na en krosi, dan den o taki: ’Wi wani go nanga unu, bika wi yere taki Gado de nanga unu.’”​—Sak. 8:23.

17. Fa Yehovah Kotoigi e yepi sma fu ala kondre èn sma di e taki difrenti tongo?

 ¹⁷ Yehovah Kotoigi ben frustan taki efu sma fu ala tongo ben musu tyari kon na wán, dan a bun nyunsu ben musu preiki na ini furu tongo tu. Wi e vertaal buku di e taki fu Bijbel moro leki 130 yari kaba. Ma na ini a ten disi wi e vertaal buku na ini moro leki 900 tongo. Noiti ete so wan wroko du. A de krin taki Yehovah e du wan wondru na ini a ten disi. A e tyari wan bigi ipi sma fu difrenti kondre kon na wán. Fu di Bijbel nanga buku di e leri sma fu Bijbel de na ini so furu tongo, meki a grupu disi e dini Yehovah na ini wánfasi, aladi den de na ala sei fu grontapu. Boiti dati, sma sabi taki Yehovah Kotoigi e preiki fayafaya èn den lobi makandra trutru. Ala den sani disi e tranga wi bribi!​—Mat. 24:14; Yoh. 13:35.

18. (a) Soleki fa Yesaya 46:10, 11 e sori, dan fu san ede a no e fruwondru wi taki Yehovah meki a profeititori fu a bigi ipi kon tru? (b) Fu san ede den wan di abi a howpu fu libi na grontapu no e sari taki den no man go na hemel?

¹⁸ A profeititori fu a bigi ipi e gi wi furu deki-ati! A no e fruwondru wi taki Yehovah meki a profeititori disi kon tru na wan kefalek moi fasi. (Leisi Yesaya 46:10, 11.) Den sma fu a bigi ipi breiti nanga a howpu di Yehovah gi den. A no e hati den taki Gado no salfu den nanga santa yeye èn taki den no o tiri makandra nanga Yesus na ini hemel. Na ini Bijbel wi e leisi fu furu man nanga uma di ben abi wan tranga bribi èn di ben kisi a santa yeye fu Gado. Ma toku den no de wan fu den 144.000 sma. Yohanes a Dopuman na wan fu den sma disi (Mat. 11:11). David na wan fu den sma disi tu (Tori 2:34). Den man disi nanga furu trawan o kisi wan opobaka fu libi na ini a paradijs na grontapu. Den alamala makandra nanga a bigi ipi o abi na okasi fu sori taki den e gi yesi na Yehovah, a Moro Hei Tiriman.

19. Efu wi e frustan a fisyun di Yohanes si fu a bigi ipi, dan san wi o du?

¹⁹ Disi na a fosi leisi taki Gado tyari milyunmilyun sma fu difrenti kondre kon na wán fu anbegi en. Awinsi wi abi a howpu fu libi na hemel noso na grontapu, wi musu yepi so furu sma leki wi man fu kon na ini a bigi ipi fu „tra skapu” (Yoh. 10:16). Heri esi Yehovah o tyari a bigi banawtu kon di o pori den regering nanga den kerki di pina libisma. Den sma fu a bigi ipi o abi a bigi grani fu dini Yehovah fu têgo na grontapu!​—Openb. 7:14.