STUDIE-ARTIKEL 38
„Un kon na mi èn mi o gi unu krakti baka”
„Un alamala di musu wroko hebi èn di musu tyari hebi lai, un kon na mi èn mi o gi unu krakti baka.”—MAT. 11:28.
SINGI 17 „Mi wani”
SAN WI O LERI *
1. San Yesus pramisi na Mateyus 11:28-30?
YESUS pramisi wan bigi ipi sma wan moi sani. A taki: „Un kon na mi èn mi o gi unu krakti baka.” (Leisi Mateyus 11:28-30.) Yesus man du san a pramisi? Prakseri fa a yepi wan uma di ben abi wan takru siki.
2. San Yesus du gi wan uma di ben siki?
2 Na uma ben de na ini wan bigi nowtu. A go suku yepi na furu datra èn a ben howpu taki den ben o yepi en. A pina 12 yari langa èn toku a no kisi yepi. A Wet fu Moses ben sori taki na uma disi no ben krin (Lef. 15:25). Ma dan na uma yere taki Yesus ben man dresi sikisma èn dati meki a go suku en. Di a feni en a fasi den franya fu en dyakti èn wantewante a kon betre! Ma Yesus no dresi en nomo, a sori lespeki gi en tu. Di a ben taki nanga en a taki na wan switi fasi èn nanga lespeki. A kari en „mi umapikin”. Wi kan de seiker taki na uma disi ben firi bun èn a kisi krakti baka!—Luk. 8:43-48.
3. Sortu aksi wi o luku?
3 Luku taki na uma srefi meki a muiti fu go na Yesus. Na ini a ten disi wi musu meki muiti tu fu „kon na” Yesus. Ma now Yesus no e du wondru fu dresi den sma di e „kon na” en. Toku a e gi wi a kari: „Un kon na mi èn mi o gi unu krakti baka.” Na ini na artikel disi wi o piki feifi aksi: Fa wi kan „kon na” Yesus? San Yesus ben wani sori wi di a taki: „Teki mi tyatyari na un tapu”? San wi kan leri fu Yesus?
Fu san ede a wroko di a gi wi fu du e gi wi krakti? San wi musu du fu tan kisi krakti na ondro a tyatyari fu Yesus?„KON NA MI”
4-5. San na wan tu fasi fa wi kan „kon na” Yesus?
4 Wan fasi fa wi e „kon na” Yesus na te wi e meki muiti fu kon sabi ala den sani di Yesus taki èn di a du (Luk. 1:1-4). Nowan sma kan du disi gi wi. Wi srefi musu studeri den tori disi. Wi e „kon na” Yesus tu te wi e teki a bosroiti fu dopu èn fu tron wan disipel fu Krestes.
5 Wan tra fasi fa wi kan „kon na” Yesus na te wi e go suku yepi na den owruman fu a gemeente. Yesus „gi a gemeente mansma di abi spesrutu koni”. A poti den man disi fu luku den skapu fu en (Ef. 4:7, 8, 11; Yoh. 21:16; 1 Petr. 5:1-3). Wi srefi musu meki muiti fu suku yepi na den. Wi no kan fruwakti taki den owruman sabi san wi e denki èn san wi abi fanowdu. Luku san wan brada di nen Julian e taki: „Mi ben musu gowe libi Betel fu di mi ben kon siki. Wan fu den mati fu mi taigi mi taki mi kan aksi den owruman fu kon na mi oso fu gi mi deki-ati. Ma mi no ben denki taki mi ben abi en fanowdu. Ma bakaten mi aksi den fu yepi mi. Di den kon luku mi, den gi mi furu deki-ati. Noiti mi o frigiti fa den yepi mi.” Neleki fa Julian ondrofeni, den owruman kan yepi wi tu fu „denki soleki fa Krestes e denki” (1 Kor. 2:16; 1 Petr. 2:21). Disi na wan fu den moro moi sani di den kan du gi wi.
„TEKI MI TYATYARI NA UN TAPU”
6. San Yesus ben wani sori sma nanga den wortu: „Teki mi tyatyari na un tapu”?
6 Di Yesus taki „teki mi tyatyari na un tapu”, dan kande a ben wani sori sma taki den ben musu „gi yesi na en”. Kande a ben wani sori den tu taki den ben musu „kon na ondro a tyatyari nanga en, èn makandra den ben o wroko gi Yehovah”. Awinsi fa a no fa, fu teki a tyatyari na wi tapu, wani taki dati wi o wroko.
7. Soleki fa Mateyus 28:18-20 e sori, dan sortu wroko wi kisi èn fu san wi kan de seiker?
7 Wi e teki a kari fu Yesus te wi e gi wisrefi abra na Yehovah èn te wi e dopu. Yesus e gi ala sma a kari fu kon na en èn noiti a o yagi den wan di wani dini Gado (Yoh. 6:37, 38). Ala den bakaman fu Krestes abi a grani fu du a srefi wroko di Yehovah ben gi Yesus fu du. Wi kan de seiker taki Yesus o de nanga wi ala ten fu yepi wi fu du a wroko dati.—Leisi Mateyus 28:18-20.
„LERI FU MI”
Gi trawan krakti neleki fa Yesus du dati (Luku paragraaf 8-11) *
8-9. Fu san ede sma di ben abi sakafasi ben lobi go na Yesus èn san wi musu aksi wisrefi?
8 Sma di abi sakafasi ben lobi go na Yesus (Mat. 19:13, 14; Luk. 7:37, 38). Fu san ede? Fu di Yesus ben de heri tra fasi leki den Fariseiman. Den kerki fesiman dati no ben lobi den sma èn den ben abi heimemre (Mat. 12:9-14). Ma Yesus ben abi lobi nanga sakafasi. Den Fariseiman ben e suku biginen nanga hei posisi. Ma Yesus ben leri sma fu no suku biginen èn a leri den disipel fu en fu abi sakafasi èn fu dini trawan (Mat. 23:2, 6-11). Den Fariseiman ben e tapu skreki gi den sma (Yoh. 9:13, 22). Ma Yesus ben e du bun gi sma èn a ben taki na wan switi fasi nanga den.
9 San wi kan leri fu Yesus? Aksi yusrefi den sani disi: ’Sma sabi mi leki wan safri-ati sma èn wan sma di abi sakafasi? Mi de
klariklari fu du wroko di sma e si leki lagi wroko? Mi abi switifasi?’10. Fa sma ben feni en fu wroko makandra nanga Yesus?
10 Yesus ben sorgu taki den wan di ben wroko makandra nanga en ben firi bun èn a ben lobi gi den leri (Luk. 10:1, 19-21). A ben e poti aksi gi den fu di a ben wani sabi fa den ben e denki (Mat. 16:13-16). Neleki fa bon di prani na ini fatu gron e gi bun froktu, na so den disipel ben e kisi bun leri fu Yesus èn den ben e du furu bun sani.
Abi switifasi èn meki en makelek gi sma fu kon taki nanga yu
De fayafaya na ini a preikiwroko
Abi sakafasi èn wroko tranga *
11. San wi musu aksi wisrefi?
11 Yu abi wan hei posisi noso bigi frantwortu? Efu dati de so, aksi yusrefi: ’Fa mi e libi nanga sma na wrokope noso na oso? Mi e meki den firi bun? Mi e gi trawan deki-ati fu poti aksi? Mi e arki te den e taki fa den e denki?’ Noiti wi wani de leki den Fariseiman di no ben lobi en te sma ben e poti aksi èn di ben e frufolgu sma di ben denki tra fasi leki den.—Mark. 3:1-6; Yoh. 9:29-34.
„UNU O KISI KRAKTI BAKA”
12-14. Fu san ede a wroko di wi kisi fu Yesus e gi wi krakti?
12 Fu san ede a wroko di wi kisi fu Yesus e gi wi krakti? Furu reide de, ma wi o taki fu wan tu fu den.
13 Wi abi den moro bun fesiman. Aladi Yehovah na a Moro Heiwan, toku a no de leki wan ogri-ati masra di no e sori warderi gi den futuboi fu en. A de nanga tangi gi a wroko di wi e du (Hebr. 6:10). A e gi wi a krakti di wi abi fanowdu fu du a wroko di a gi wi (2 Kor. 4:7; Gal. 6:5). Yesus, wi Kownu, de wan bun eksempre gi wi tu (Yoh. 13:15). Èn den owruman di e luku wi e pruberi fu teki na eksempre fu Yesus, „a gran skapuman” (Hebr. 13:20; 1 Petr. 5:2). Den e sori switifasi, den e gi wi deki-ati èn den e du ala san den man fu gi wi leri èn fu kibri wi.
14 Wi abi den moro bun mati. Na ini na organisâsi fu Yehovah wi abi mati di lobi wi trutru èn wi abi wan wroko di e meki wi de koloku. Nowan tra presi wi kan feni den sani disi. Prakseri a tori disi: Wi abi a grani fu wroko makandra nanga sma di e tyari densrefi na a moro bun fasi èn di no e denki taki den bun moro trawan. Den man du sani bun, ma den no e meki bigi. Den no e wroko makandra nanga wi nomo, ma den e si wi leki den mati. Èn a lobi di den abi gi wi tranga so te, taki den de klariklari fu dede gi wi!
15. Fa wi musu si a wroko di wi e du?
15 Wi abi a moro bun wroko. Wi e yepi sma fu kon sabi Yehovah èn wi e opo den ai gi den lei fu Didibri (Yoh. 8:44). Den lei fu Satan e meki sma lasi howpu. Fu eksempre, a wani taki wi bribi taki Yehovah no o gi wi pardon fu den sondu fu wi èn taki Yehovah no lobi wi. Disi na ogri-ati lei di e meki sma lasi-ati! Te wi e „kon na” Krestes, dan wi e kisi pardon fu den sondu fu wi. Èn Bijbel e sori taki Yehovah abi bigi lobi gi wi (Rom. 8:32, 38, 39). A e gi wi furu prisiri te wi e yepi sma fu frutrow tapu Yehovah èn fu kon abi wan moro bun libi!
SAN WI MUSU DU FU TAN KISI KRAKTI NA ONDRO A TYATYARI FU YESUS?
16. Fa den sani di Yesus e aksi wi fu du, de heri tra fasi leki den tra frantwortu di wi abi?
16 Den sani di Yesus e aksi wi fu du, de heri tra fasi leki den tra frantwortu di wi abi. Fu eksempre, furu sma di e komoto na wroko na a kaba fu a dei e weri èn a
wroko no e gi den prisiri. Ma te wi du wan wroko gi Yehovah nanga Krestes, dan wi e firi koloku trutru. Kande wi weri te wi komoto na wroko èn wi musu meki tranga muiti fu go na den konmakandra. Ma baka a konmakandra wi e firi bun èn wi abi krakti baka. Na a srefi sani e pasa te wi e meki muiti fu du a preikiwroko èn te wi e studeri Bijbel. Te wi e meki muiti fu du den sani disi, dan wi e kisi krakti baka!17. San wi musu frustan èn nanga san wi musu luku bun?
17 Wi musu frustan taki a no ala sma man du a srefi. Dati meki wi musu luku bun fa wi e gebroiki wi ten nanga wi krakti. Fu eksempre, wi kan lasi furu krakti te wi e feti baka gudu. Luku san Yesus taigi wan gudu yonguman di ben aksi en: „San mi musu du fu kisi têgo libi?” A yonguman ben e gi yesi kaba na a Wet fu Moses. A musu fu de so taki a man disi ben de wan bun man, fu di na Evangelietori fu Markus e taki dati Yesus „kon lobi en”. Yesus taigi a yonguman: ’Go seri den sani di yu abi èn kon tron wan bakaman fu mi.’ A yonguman ben wani tron wan bakaman fu Yesus, ma a no ben wani seri den „furu gudu” di a ben abi (Mark. 10:17-22). Dati meki a no teki a kari fu Yesus èn a tan feti baka gudu (Mat. 6:24). San yu ben o du?
18. San wi musu du ten na ten, èn fu san ede?
18 Ten na ten a bun fu ondrosuku san wi e poti na a fosi presi na ini wi libi. Fu san ede? Fu di dati o yepi wi fu no gebroiki wi krakti gi sani di no de prenspari. Luku san wan yonguman di nen Mark e taki: „Furu yari langa mi ben denki taki mi ben poti a wroko fu Yehovah na a fosi presi. Mi ben e pionier, ma mi ben gebroiki furu fu mi ten nanga mi krakti fu meki moni èn fu libi wan switi libi. Mi ben aksi misrefi fu san ede mi no ben de koloku. Ne mi kon si taki mi ben e gebroiki furu fu mi ten nanga mi krakti gi mi eigi tori èn san ben tan abra mi ben gi Yehovah.” Mark kenki a denki fu en èn a fasi fa a ben libi. Disi yepi en fu du moro gi Yehovah. Mark e taki: „Son leisi mi e broko mi ede nanga moni, ma Yehovah nanga Yesus e yepi mi fu poti na anbegi fu Yehovah na a fosi presi na ini mi libi.”
19. Fu san ede wi musu du sani na Yehovah fasi?
19 Den dri sani di wi o luku now o yepi wi fu tan kisi krakti aladi wi de na ondro a tyatyari fu Yesus. A fosi sani na taki wi musu du sani na Yehovah fasi. Wi e du a wroko fu Yehovah èn dati meki wi musu du en na en fasi. Wi na den wrokoman èn Yehovah na wi Masra (Luk. 17:10). Efu wi o pruberi fu du en wroko fa wi wani, dan wi o meki en muilek gi wisrefi. Srefi wan tranga mankaw di abi wan tyatyari na tapu en neki kan kon weri noso kan kisi mankeri te a e pruberi fu go pe a wani, na presi fu go pe a gronman e tyari en go. Ma efu wi e du a wroko fu Yehovah soleki fa en wani, dan wi o man du bigi sani èn wi o man du a wroko awinsi sortu problema e kon na wi pasi. Hori na prakseri taki nowan sma kan tapu Yehovah fu du san a wani!—Rom. 8:31; 1 Yoh. 4:4.
20. Fu san ede wi e du a wroko di Yesus gi wi?
20 A di fu tu sani di kan yepi wi, na te wi e du a wroko di Yesus gi wi fu di wi wani gi Yehovah grani. Na ini a ten fu Yesus son sma di ben e waka na en baka ben abi bigi-ai èn den ben e suku den eigi bun. Ma di den no kisi san den ben wani den Yoh. 6:25-27, 51, 60, 66; Fil. 3:18, 19). Ma den sma di ben lobi Gado nanga den heri ati èn di ben lobi tra sma, ben tan wroko makandra nanga Yesus nanga prisiri den heri libi langa. Den ben abi a howpu fu tiri makandra nanga Krestes na hemel. Wi o de koloku tu te wi e du a wroko fu di wi wani gi Yehovah grani.
no ben de koloku èn den gowe libi a wroko di Yesus ben gi den (21. Soleki fa Mateyus 6:31-33 e sori, dan san wi kan fruwakti fu Yehovah?
21 A di fu dri sani di o yepi wi na fu tan bribi taki Yehovah o yepi wi. Wi bosroiti fu poti a wani fu Gado na a fosi presi na ini wi libi èn fu wroko tranga gi en. Yesus warskow wi taki wi o kisi frufolgu. Ma wi kan fruwakti taki Yehovah o gi wi krakti fu horidoro awinsi sortu tesi wi e kisi. O moro wi e horidoro, o moro wi bribi o kon tranga (Yak. 1:2-4). Wi kan abi a frutrow tu taki Yehovah o sorgu gi wi, taki Yesus o tiri wi èn taki den brada nanga sisa o gi wi deki-ati (leisi Mateyus 6:31-33; Yoh. 10:14; 1 Tes. 5:11). Iya, wi abi ala san wi abi fanowdu fu pasa iniwan tesi!
22. Gi san wi musu de nanga tangi?
22 Na uma di Yesus ben dresi, ben firi bun a srefi dei dati. Ma a ben kan tan kisi krakti fu têgo soso te a ben o tron wan disipel fu Krestes. San yu denki taki na uma du? Efu a teki a bosroiti fu teki a tyatyari fu Yesus na en tapu, dan a kisi a moi grani fu tiri makandra nanga Yesus na hemel! A blesi disi warti moro iniwan sani di a ben o libi na baka. Awinsi wi abi a howpu fu libi fu têgo na hemel noso na grontapu, wi de nanga tangi taki wi teki a kari di Yesus gi wi fu kon na en.
SINGI 13 Krestes, wi eksempre
^ paragraaf 5 Yesus e gi wi a kari fu kon na en. San wi musu du fu kon na en? Na artikel disi o piki na aksi dati. A o memre wi tu fa wi kan kisi krakti te wi e wroko makandra nanga Krestes.
^ paragraaf 60 SAN WI E SI TAPU A PRENKI: Yesus du difrenti sani di gi sma deki-ati.
^ paragraaf 66 SAN WI E SI TAPU DEN PRENKI: Wan brada e du difrenti sani fu gi trawan deki-ati, neleki Yesus.