STUDIE-ARTIKEL 37
Saka yusrefi na ondro Yehovah
„Wi no musu de klariklari fu saka wisrefi na ondro a Tata moro ete?”—HEBR. 12:9.
SINGI 9 Yehovah na wi Kownu!
SAN WI O LERI *
1. Fu san ede wi musu saka wisrefi na ondro Yehovah?
WI MUSU saka wisrefi * na ondro Yehovah fu di en na wi Mekiman. A abi a reti fu poti wet gi wi (Openb. 4:11). Ma wan tra reide fu san ede wi e gi yesi na en, na taki en na a moro bun Tiriman. Na ini ala den yari di pasa, furu libisma tiri tra libisma. Ma te wi e luku fa Yehovah e tiri, dan a de krin taki Yehovah na a moro koni Tiriman. A lobi wi trutru, a abi sari-ati èn a e firi gi wi.—Eks. 34:6; Rom. 16:27; 1 Yoh. 4:8.
2. Soleki fa Hebrewsma 12:9-11 e sori, dan fu san ede wi wani saka wisrefi na ondro Yehovah?
2 Yehovah wani taki wi musu gi yesi na en fu di wi lobi en èn fu di wi e si en leki wi Papa di lobi wi. A no wani taki wi saka wisrefi na en ondro soso fu di wi e frede en. Na ini a brifi di Paulus skrifi gi den Hebrewsma, a taki dati ’wi musu de klariklari fu saka wisrefi na ondro a Tata’ fu di a e gi wi leri so taki „sani kan go bun nanga wi”.—Leisi Hebrewsma 12:9-11.
3. (a) Fa wi e sori taki wi e saka wisrefi na ondro Yehovah? (b) San wi o luku na ini na artikel disi?
3 Wi e saka wisrefi na ondro Yehovah te wi e du muiti fu gi yesi na en ala ten èn te wi no e frutrow na tapu wisrefi (Odo 3:5). A o moro makelek gi wi fu saka wisrefi na ondro Yehovah te wi e kon sabi den moi fasi di a abi èn den fasi disi de fu si na ini ala san a e du (Ps. 145:9). O moro wi e kon sabi Yehovah, o moro wi o kon lobi en. Èn te wi lobi Yehovah wi no o abi ala sortu wet fanowdu fu sori wi san wi mag du èn san wi no mag du. Wi o du muiti fu lobi den sani di a lobi èn fu no lobi den sani di a no lobi (Ps. 97:10). Ma son leisi a no makelek fu gi yesi na Yehovah. Na ini na artikel disi wi o si fu san ede dati de so. Wi o si tu san owruman kan leri fu Granman Nehemia, san papa kan leri fu Kownu David èn san mama kan leri fu Maria, a mama fu Yesus.
FU SAN EDE A NO MAKELEK FU SAKA WISREFI NA ONDRO YEHOVAH?
4-5. Soleki fa Romesma 7:21-23 e sori, dan fu san ede a no makelek ala ten fu saka wisrefi na ondro Yehovah?
4 Wan reide fu san ede a kan muilek gi wi fu saka wisrefi na ondro Yehovah, na taki wi abi sondu. Dati meki wi e kisi a firi son leisi fu opo wisrefi teige trawan. Di Adam nanga Eva opo densrefi teige Gado èn di den nyan a froktu di den no ben mag nyan, den bosroiti gi densrefi san bun èn san no bun (Gen. 3:22). Te now ete furu sma no e du a wani fu Yehovah, ma den e bosroiti gi densrefi san bun èn san no bun.
5 Srefi den sma di sabi Yehovah èn di lobi en kan feni en muilek son leisi fu saka densrefi na en ondro. Na dati na apostel Paulus ben ondrofeni tu. (Leisi Romesma 7:21-23.) Neleki Paulus, wi wani du san Yehovah feni bun. Ma wi musu tan feti nanga a firi fu du sani di no bun.
6-7. San na wan tra reide fu san ede a kan muilek gi wi fu saka wisrefi na ondro Yehovah? Gi wan eksempre.
6 Wan tra reide fu san ede a kan muilek fu saka wisrefi na ondro Yehovah, na taki sondro fu wi sabi, wi teki a denki abra fu den sma di kweki wi noso fu den sma na ini a kondre fu wi. Furu sma no e denki soleki fa Yehovah e denki. Dati meki wi musu tan meki muiti fu no denki neleki den sma dati. Luku wan eksempre.
7 Na son presi sma e dwengi yonguwan fu meki furu moni. Na dati wan sisa di nen Mary * ondrofeni. Fosi a kon sabi Yehovah, a go na wan fu den moro bun skoro na ini a kondre fu en. A famiri fu Mary ben dwengi en fu suku wan wroko pe a ben kan meki furu moni èn di ben o meki taki sma lespeki en. Mary ben wani dati tu. Ma baka di a kon sabi Yehovah èn a kon lobi en, a ben wani du wan tra sani nanga en libi. Ma toku a no ben makelek gi en. A taki: „Son leisi mi e kisi na okasi fu du wan wroko pe mi kan meki furu moni, ma mi sabi taki a o tapu mi fu dini Yehovah leki fa mi wani. A fasi fa mi kweki e meki en muilek gi mi fu no teki den sortu wroko disi. Mi musu begi Yehovah fu gi mi a krakti fu no teki wroko di kan tapu mi fu du ala san mi man gi en.”—Mat. 6:24.
8. San wi o luku now?
8 Soleki fa wi leri, dan a bun gi wi te wi e saka wisrefi na ondro Yehovah. Ma owruman di musu teki fesi na ini a gemeente èn papa nanga mama di musu kweki den pikin fu den abi wan tra reide fu san ede den musu saka densrefi na ondro Yehovah. Den o man tyari a frantwortu fu den moro bun èn trawan o kisi wini fu dati. Meki wi luku wan tu eksempre na ini Bijbel di o leri den fa den kan tyari a frantwortu fu den soleki fa Yehovah wani.
SAN OWRUMAN KAN LERI FU NEHEMIA?
Owruman e yepi nanga a wroko di musu du na a Kownukondre zaal, neleki fa Nehemia ben yepi fu bow Yerusalem baka (Luku paragraaf 9-11) *
9. Sortu problema Nehemia kisi?
9 Yehovah gi owruman a prenspari 1 Petr. 5:2). Owruman kan leri furu fu a fasi fa Nehemia ben e libi nanga a pipel fu Yehovah. Leki granman fu Yuda, Nehemia ben abi furu makti (Neh. 1:11; 2:7, 8; 5:14). Meki wi luku wan tu fu den problema di Nehemia kisi. A ben yere taki den Israelsma ben e du sani na ini a tempel di den no ben mag du èn taki den no ben gi den Leifisma bijdrage soleki fa Yehovah ben taigi den. Boiti dati, den Dyu no ben hori a Sabat èn sonwan fu den man ben trow nanga uma fu tra kondre di no ben anbegi Yehovah. Granman Nehemia ben o abi fu du wan sani fu lusu den problema disi.—Neh. 13:4-30.
frantwortu fu sorgu a pipel fu en (10. Fa Nehemia yepi a pipel fu du san Yehovah wani?
10 Nehemia no gebroiki en makti fu dwengi a pipel fu du san Yehovah wani. Na presi fu dati a begi Yehovah fayafaya fu yepi en èn a leri a pipel a Wet fu Yehovah (Neh. 1:4-10; 13:1-3). Nanga sakafasi a wroko makandra nanga a pipel èn a yepi den srefi fu bow den skotu fu Yerusalem.—Neh. 4:15.
11. Soleki fa 1 Tesalonikasma 2:7, 8 e sori, dan fa owruman musu libi nanga den brada nanga sisa fu a gemeente?
11 Kande owruman no e kisi den srefi problema di Nehemia ben abi, ma den kan leri wan tu moi sani fu en. Fu eksempre, den e wroko tranga fu yepi den brada nanga sisa. Èn den no feni taki den bun moro trawan fu di den na owruman. Na presi fu dati, den e sori switifasi gi den brada nanga sisa fu a gemeente. (Leisi 1 Tesalonikasma 2:7, 8.) Fu di den abi sakafasi èn fu di den lobi trawan trutru, meki den e taki nanga den na wan switi fasi. Andrew, wan owruman di abi furu ondrofeni, e taki: „Mi si taki den brada nanga sisa lobi en te owruman abi switifasi. Disi e gi a gemeente deki-ati fu wroko makandra nanga den owruman.” Tony, di de owruman wan langa pisi ten kaba, e taki: „Mi e pruberi fu fiti a rai fu Filipisma 2:3 èn ala ten mi e pruberi fu si trawan moro hei leki mi. Disi e yepi mi fu no dwengi trawan fu du san mi wani.”
12. Fu san ede a prenspari taki owruman abi sakafasi?
12 Owruman musu abi sakafasi neleki Yehovah. Aladi Yehovah na a Moro Hei Tiriman fu hemel nanga grontapu, toku a e „saka ensrefi” fu opo „a mofinawan puru na doti” (Ps. 18:35; 113:6, 7). Fu taki en leti, Yehovah no lobi sma di abi bigifasi.—Odo 16:5.
13. Fu san ede wan owruman musu „basi en tongo”?
13 Wan fasi fa wan owruman kan sori taki a e saka ensrefi na ondro Yehovah, na te a e „basi en tongo”. Efu a no du dati, a kan taki grofu nanga wan sma di no e sori lespeki gi en (Yak. 1:26; Gal. 5:14, 15). Andrew, di wi kari kaba e taki: „Son leisi mi ben feni taki wan brada noso sisa no sori lespeki gi mi leki owruman, èn dati meki mi ben wani taki grofu nanga en. Ma mi prakseri a bun eksempre fu man na ini Bijbel di ben e dini Yehovah èn dati yepi mi fu si o prenspari a de fu abi sakafasi.” Owruman e sori taki den e saka densrefi na ondro Yehovah te den e taki na wan switi fasi nanga den sma na ini a gemeente, sosrefi nanga den tra owruman.—Kol. 4:6.
SAN PAPA KAN LERI FU KOWNU DAVID?
14. Sortu frantwortu Yehovah gi papa èn san a e fruwakti fu den?
14 Yehovah poti papa leki edeman fu na osofamiri èn Gado wani taki den e gi den pikin leri èn taki den gi den piri-ai te dati de fanowdu (1 Kor. 11:3; Ef. 6:4). Ma wan papa no kan du ala san a wani. Fu di na Yehovah seti na osofamiri, meki wan papa musu gi Yehovah frantwortu fu a fasi fa a e libi nanga en osofamiri (Ef. 3:14, 15). Papa e sori taki den e saka densrefi na ondro Yehovah te den e tyari a frantwortu fu den soleki fa Yehovah wani. Den kan leri furu te den e studeri a libi fu Kownu David.
A fasi fa wan papa e begi musu sori en osofamiri taki a abi sakafasi (Luku paragraaf 15-16) *
15. Fu san ede Kownu David na wan bun eksempre gi papa?
15 Yehovah no ben poti David leki edeman fu en osofamiri wawan, ma sosrefi fu a heri pipel Israel. Leki kownu, David ben abi furu makti. Son leisi a gebroiki a makti dati na wan fasi di no bun èn a meki seryusu fowtu (2 Sam. 11:14, 15). Ma a saka ensrefi na ondro Yehovah di a kisi piri-ai. Di a ben e begi, a ben taigi Yehovah fa a ben e firi (Ps. 51:1-4). Boiti dati, a ben abi sakafasi èn a teki a bun rai di a ben kisi fu mansma nanga umasma (1 Sam. 19:11, 12; 25:32, 33). David leri fu den fowtu di a ben meki èn a ben poti na anbegi fu Yehovah na a fosi presi na ini en libi.
16. San papa kan leri fu David?
16 Luku wan tu sani di papa kan leri fu Kownu David: No gebroiki a makti di Yehovah gi yu leki edeman na wan fowtu fasi. No frede fu taki dati yu meki wan fowtu èn teki a Bijbel rai di trawan e gi yu. Efu yu e du dati, dan yu osofamiri o lespeki yu fu di yu abi sakafasi. Te yu e begi nanga yu osofamiri, dan taigi Yehovah san de na tapu yu ati. Meki yu osofamiri yere taki yu e suku yepi na Yehovah. Èn san moro prenspari, poti na anbegi fu Yehovah na a fosi presi na ini yu libi (Deut. 6:6-9). A bun eksempre fu yu na wan fu den moro moi kado di yu kan gi yu osofamiri.
SAN MAMA KAN LERI FU MARIA?
17. Sortu frantwortu Yehovah gi mama?
17 Yehovah gi mama wan prenspari frantwortu na ini na osofamiri èn den musu gi den pikin leri tu (Odo 6:20). Fu taki en leti, den sani di wan mama e taki èn e du kan abi krakti tapu den pikin fu en den heri libi langa (Odo 22:6). Luku san mama kan leri fu Maria, a mama fu Yesus.
18-19. San mama kan leri fu na eksempre fu Maria?
18 Maria ben sabi Gado Wortu bun. A ben abi furu lespeki gi Yehovah èn a ben abi wan bun matifasi nanga en. A ben de klariklari fu du san Yehovah ben aksi fu en, aladi dati ben o meki taki en heri libi kenki.—Luk. 1:35-38, 46-55.
Efu wan mama weri, dan a musu du tranga muiti fu sori lobi gi en osofamiri (Luku paragraaf 19) *
19 Mama, unu kan de leki Maria. Fa so? Neleki Maria yu kan abi wan bun matifasi nanga Yehovah te yu e studeri Bijbel èn te yu e begi. Wan tra sani na taki yu musu de klariklari fu tyari kenki kon na ini yu libi so taki Yehovah feni yu bun. Fu eksempre, kande yu papa nanga mama ben atibron esi èn den ben taki grofu nanga den pikin fu den. A sani disi kan meki taki yu e denki taki na so yu srefi musu kweki yu pikin. Aladi yu sabi now fa Yehovah wani taki yu musu kweki yu pikin, toku a kan muilek gi yu fu no atibron nanga yu pikin èn fu abi pasensi nanga den. Disi kan de so spesrutu te yu weri èn te den e trangayesi yu (Ef. 4:31). Te yu e firi so, dan a prenspari taki yu aksi Yehovah fu yepi yu. Wan mama di nen Lydia e taki: „Son leisi, mi ben musu begi furu fu no taki grofu nanga a boi fu mi te a ben trangayesi. Te mi ben bigin taki, dan mi ben stop èn mi ben begi ini misrefi fu Yehovah yepi mi. Begi e yepi mi fu no atibron tumusi.”—Ps. 37:5.
20. Sortu problema son mama abi, èn san kan yepi den?
20 Son mama e feni en muilek fu sori lobi gi den pikin fu den (Tit. 2:3, 4). Furu fu den mama disi kweki na ini osofamiri pe den papa nanga mama no ben sori lobi gi den. Efu na so yu kweki, dan yu no abi fu meki a srefi fowtu leki yu papa nanga mama. Wan mama di e saka ensrefi na ondro Yehovah musu leri fu sori lobi gi en pikin. A kan muilek gi en fu kenki a fasi fa a e denki, fa a e firi èn fa a e tyari ensrefi. Ma a kan du en. Te a e du disi, dan en nanga en osofamiri o de moro koloku.
TAN SAKA YUSREFI NA ONDRO YEHOVAH
21-22. Te wi e luku Yesaya 65:13, 14, dan sortu wini wi e kisi te wi e saka wisrefi na ondro Yehovah?
21 Kownu David ben sabi taki a ben o tyari wini kon gi en te a ben saka ensrefi na ondro Yehovah. A ben skrifi: „Den sani di Yehovah e taigi wi fu du, de reti. Den e meki na ati prisiri. Den komando fu Yehovah bun. Den e meki na ai brenki. Den de leki warskow gi yu eigi futuboi. Te a e gi yesi na den, dan a e kisi furu blesi” (Ps. 19:8, 11). Na ini a ten disi wi kan si a difrenti na mindri den wan di e saka densrefi na ondro Yehovah èn den wan di e trangayesi en. Den wan di e saka densrefi na ondro Yehovah e „bari fu prisiri fu di den abi wan bun ati”.—Leisi Yesaya 65:13, 14.
22 Te owruman, papa, nanga mama e saka densrefi na ondro Yehovah, dan den o abi wan moro bun libi, den osofamiri o de moro koloku èn wánfasi o de na ini a gemeente. Ma san moro prenspari na taki den o prisiri Yehovah ati (Odo 27:11). Nowan tra sani de di o gi wi moro prisiri!
SINGI 123 Saka yusrefi na ondro Gado tiri
^ paragraaf 5 Na ini na artikel disi wi o luku fu san ede wi musu saka wisrefi na ondro Yehovah. Wi o luku tu fa owruman, papa, nanga mama musu tyari a frantwortu di Yehovah gi den èn san den kan leri fu na eksempre fu Granman Nehemia, Kownu David nanga Maria, a mama fu Yesus.
^ paragraaf 1 SAN DEN WORTU DISI WANI TAKI: Son sma no lobi den wortu saka yusrefi fu di tra sma e dwengi den fu du san den e taki. Ma a pipel fu Gado wani gi yesi na en èn dati meki den no e si en leki wan problema fu saka densrefi na Gado ondro.
^ paragraaf 7 Wi kenki wan tu fu den nen na ini na artikel disi.
^ paragraaf 62 SAN WI E SI TAPU DEN PRENKI: Wan owruman e wroko makandra nanga en boi fu sorgu gi a Kownukondre zaal, neleki fa Nehemia ben yepi fu bow den skotu fu Yerusalem.
^ paragraaf 64 SAN WI E SI TAPU A PRENKI: Wan papa e begi makandra nanga en osofamiri.
^ paragraaf 66 SAN WI E SI TAPU A PRENKI: Wan boi prei game omeni yuru langa, na presi taki a du en skorowroko nanga en osowroko. En mama komoto na wroko èn a weri. A e piri-ai gi en boi, ma a no e taki grofu nanga en èn a no e rigeri.