1. Fa Yehovah e denki fu sma di abi sakafasi?

YEHOVAH lobi sma di abi sakafasi. Soso den wan di abi trutru sakafasi kan tron bun mati fu en. Ma „a no wani sabi noti fu den sma di abi bigimemre” (Ps. 138:6). Wi alamala wani prisiri Yehovah èn wi wani taki a lobi wi. Dati meki a bun fu abi sakafasi.

2. San wi o luku na ini na artikel disi?

² Na ini na artikel disi wi o piki den dri aksi disi: (1) San na sakafasi? (2) Fu san ede wi musu leri fu abi sakafasi? (3) Sortu situwâsi kan meki en muilek gi wi fu sori sakafasi? Wi o si taki te wi e leri fu abi sakafasi, dan Yehovah o prisiri nanga wi èn wi o kisi furu wini tu.​—Odo 27:11; Yes. 48:17.

3. San na sakafasi?

³ Sma di abi sakafasi no abi bigifasi èn den e si trawan moro hei leki densrefi. Bijbel e sori taki wan sma di abi sakafasi sabi taki Yehovah bigi omeni tron moro en èn a sabi tu taki a no hei moro tra sma. Wan sma di abi sakafasi sabi taki tra sma de di man du sani moro bun leki en.​—Fil. 2:3, 4.

4-5. Son leisi a kan gersi leki wan sma abi sakafasi, ma fu san ede dati no abi fu de so?

⁴ Son leisi a gersi leki wan sma abi sakafasi, ma dati no abi fu de so. Kande a e syensyen noso a no e taki furu. Noso kande a abi lespeki fu di na dati a leri fu en papa nanga  mama. Ma a kan taki dipi na ini en ati a sma disi abi heimemre. Te fu kaba a o kon na krin fa a de trutru.​—Luk. 6:45.

⁵ Ma yu abi sma tu di no e frede fu taki fa den e denki èn den sabi taki den man du son sani bun. Ma dati no wani taki dati den abi heimemre (Yoh. 1:46, 47). Toku den sma disi musu luku bun taki den no e frutrow tumusi furu tapu densrefi. Sobun, awinsi wi e syen noso wi no e syen, wi alamala musu meki tranga muiti fu kon abi trutru sakafasi.

6. San 1 Korentesma 15:10 e leri wi fu na apostel Paulus?

⁶ Luku na eksempre fu na apostel Paulus. Yehovah gebroiki en fu seti nyun gemeente na ini furu foto. Kande a preiki na ini moro foto leki ala den tra apostel fu Yesus Krestes. Toku Paulus no ben denki taki a ben bun moro den tra apostel. Nanga sakafasi a taki: „Mi na a moro pikinwan fu den apostel èn mi no warti fu den kari mi wan apostel, bika mi ben frufolgu a gemeente fu Gado” (1 Kor. 15:9). Baka dati Paulus taki dati a ben abi wan bun matifasi nanga Yehovah soso fu di Yehovah sori en bun-ati. A no ben abi wan bun matifasi nanga Yehovah fu di a ben prenspari so noso fu di a ben du furu na ini a preikiwroko. (Leisi 1 Korentesma 15:10.) Paulus na wan bun eksempre gi wi fu di a ben abi trutru sakafasi. Di a skrifi a brifi gi den Kresten na ini Korente, a no ben meki bigi, aladi son sma na ini a gemeente ben e krutu en.​—2 Kor. 10:10.

7. Fa wan brada di ben abi furu frantwortu sori taki a ben abi sakafasi?

⁷ Furu sma di e dini Yehovah kisi deki-ati fu na ondrofenitori fu Brada Karl F.  Klein di ben de wan memre fu a Tiri Skin. Na ini na ondrofenitori fu en Brada Klein no ben syen fu taki sortu swakifasi a ben abi èn sortu problema a ben kisi na ini en libi. Fu eksempre, na ini 1922 a go preiki oso fu oso fu a fosi leisi. A ben muilek gi en so te, taki tu yari langa a no go preiki moro. Bakaten di a ben dini na Betel, wan brada gi en rai èn wan pisi ten en ati ben bron nanga a brada. Wan tra sani di miti en na taki a ben abi so furu stress, taki wan heri pisi ten a no ben man wroko. Ma a kon betre baka. Brada Klein kisi furu moi grani tu. Prakseri o furu sakafasi a brada disi ben musu abi fu man taki fri fu den swakifasi fu en! Furu brada nanga sisa lobi a moi ondrofenitori fu Brada Klein. *

8. Fa 1 Petrus 5:6 e sori taki Yehovah e prisiri nanga sma di abi sakafasi?

⁸ A moro prenspari reide fu san ede wi musu abi sakafasi, na taki wi wani prisiri Yehovah. Na dati na apostel Petrus ben tyari kon na krin. (Leisi 1 Petrus 5:6.) A buku ’Kon, èn tron wan bakaman fu mi’ e taki disi fu den wortu fu Petrus: „Heimemre de leki vergif. A abi takru bakapisi te wan sma abi heimemre. Srefi efu wan sma abi a koni fu man du furu sani, ma a abi heimemre, Gado no man gebroiki en kwetikweti. Ma na a tra sei, Yehovah kan gebroiki wan sma di abi sakafasi, srefi efu trawan no e si en leki wan prenspari sma. . . . A Gado fu wi, o blesi yu te yu e sori sakafasi.” * Iya, wi e prisiri Yehovah ati te wi e sori sakafasi. Dati na a moro bun sani di wi kan du!​—Odo 23:15.

9. Fu san ede sma o lobi moksi nanga wi te wi abi sakafasi?

⁹ Boiti taki wi e prisiri Yehovah, wi e kisi furu wini tu te wi e leri fu abi sakafasi. Te wi abi sakafasi, dan sma o wani de wi mati. Fu san ede dati de so? Prakseri nanga sortu sma yu lobi moksi (Mat. 7:12). Furu fu wi no lobi moksi nanga sma di wani taki trawan musu du san den e taki ala ten èn di no e arki te tra sma e taki. Ma wi lobi en te wi brada nanga sisa ’e firi gi tra sma, te den lobi den brada fu den, te den de klariklari fu sori sari-ati  gi trawan èn te den abi sakafasi’ (1 Petr. 3:8). Neleki fa yu lobi sma di abi sakafasi, na so sma o lobi yu te yu abi sakafasi.

10. Fu san ede wi no o brokosaka tumusi te wi abi sakafasi?

¹⁰ Te wi abi sakafasi, dan wi no o brokosaka tumusi te wi e kisi problema na ini a libi. A no ala ten sani e pasa na wan reti fasi. Kownu Salomo di ben abi furu koni ben taki: „Mi si futuboi e rèi asi, ma mi si granman tu di e waka nanga futu neleki futuboi” (Preik. 10:7). Son leisi sma di man du sani bun, no e kisi grani fu trawan. Ma tra sma di no man du son sani bun, e kisi furu grani. Salomo ben frustan taki wi musu teki a libi leki fa a de, na presi taki wi e tan sari te sani no e go leki fa wi wani (Preik. 6:9). Efu wi abi sakafasi, dan wi no o sari tumusi te a libi no e go.

11. Fu san ede wi musu abi sakafasi te wi e kisi rai?

¹¹ Ala dei wi e kisi okasi fu sori sakafasi. Luku wan tu situwâsi. Te wi e kisi rai. Wi musu hori na prakseri taki te wan sma meki a muiti fu kon gi wi rai, dan a fowtu di wi meki bigi moro leki san wi denki. Nofo tron te wi e kisi rai, wi e feni taki wi no abi a rai fanowdu. Kande wi e krutu a sma di gi a rai noso wi no lobi a fasi fa a sma taki nanga wi. Ma efu wi abi sakafasi, dan wi o meki muiti fu teki a rai di a sma gi wi.

12. Soleki fa Odo 27:5, 6 e sori, dan fu san ede wi musu de nanga tangi te wan sma e gi wi rai? Gi wan eksempre.

¹² Wan sma di abi sakafasi o de nanga tangi te a e kisi rai. Luku wan eksempre: Kon meki wi taki dati yu de na wan gemeente konmakandra. Baka te yu taki nanga wan tu brada nanga sisa, wan sma e hari yu kon na wan sei, dan a e taigi yu taki nyanyan de na yu tifi. Yu o syen pikinso, ma yu ben o breiti taki a taigi yu, a no so? Fu taki en leti, yu ben o aksi yusrefi fu san ede wan sma no taigi yu moro esi! Na so a de tu taki wi musu abi sakafasi te wan brada noso sisa e gi wi rai èn wi musu de nanga tangi tu taki a du dati. Wi no e si so wan sma leki wi feanti, ma leki wi mati.​—Leisi Odo 27:5, 6; Gal. 4:16.

13. Fa wi kan sori taki wi abi sakafasi te tra sma e kisi grani na ini a gemeente?

¹³ Te tra sma e kisi grani na ini a gemeente. Wan owruman di nen Jason taki:  „Te mi e si taki trawan e kisi grani, dan son leisi mi e aksi misrefi fu san ede mi no kisi a grani.” Oiti yu firi so? A no fowtu taki yu wani du moro gi Yehovah (1 Tim. 3:1). Ma wi musu luku bun fa wi e denki. Efu wi no e luku bun, dan wi kan kisi heimemre. Fu eksempre, wan brada kan feni taki en na a wan-enkri sma di man du wan spesrutu wroko na ini a gemeente. Noso wan sisa kan denki: ’Mi masra ben o man du a wroko disi moro bun leki a brada disi!’ Ma efu wi abi sakafasi trutru, wi no o denki so.

14. Fa Moses ben feni en di tra sma ben kisi grani èn san wi kan leri fu en?

¹⁴ Wi kan leri furu te wi e luku san Moses du di tra sma ben kisi grani. Moses ben si a frantwortu di a ben abi fu tiri den Israelsma, leki wan bigi grani. Ma fa a ben feni en di Yehovah meki tra sma tiri a pipel makandra nanga en? Moses no ben dyarusu (Num. 11:24-29). A sori sakafasi tu di a meki tra sma yepi en fu koti krutu gi a pipel (Eks. 18:13-24). Disi ben de wan bigi yepi gi den Israelsma fu di den no ben abi fu wakti so langa fosi wan sma krutu a tori fu den. Sobun, a ben moro prenspari gi Moses fu yepi sma, leki fu abi furu grani. Dati na wan bun eksempre gi wi! Hori na prakseri taki efu wi wani taki Yehovah gebroiki wi, dan wi no musu man du wan wroko bun nomo. San moro prenspari gi en, na taki wi abi sakafasi. Bijbel e taki: „Yehovah hei èn toku a e si den wan di abi sakafasi.”​—Ps. 138:6.

15. Fa a situwâsi fu furu brada nanga sisa kenki?

¹⁵ Te a situwâsi fu wi kenki. Na ini den yari di pasa furu brada nanga sisa di dini Yehovah furu yari langa kisi wan tra toewijzing. Fu eksempre, na ini 2014 na organisâsi bosroiti taki brada no ben o dini  moro leki distrikt-opziener. Sobun, den brada disi nanga den wefi fu den ben kisi wan tra wroko. Na ini a srefi yari dati, na organisâsi bosroiti tu taki brada di ben abi 70 yari no o dini moro leki kring-opziener. Èn brada di abi 80 yari noso di moro owru no ben o dini moro leki fesiman fu den owruman na ini a gemeente. Boiti dati, na ini den yari di pasa furu brada nanga sisa ben musu komoto na Betel èn den go dini leki pionier. Trawan ben musu komoto na ini a toewijzing fu den fu di den kon siki, fu di wan famiri fu den ben abi yepi fanowdu, noso fu tra reide ede.

16. Fa den brada nanga sisa fu wi sori taki den abi sakafasi di a situwâsi fu den kenki?

¹⁶ Den brada nanga sisa disi ben abi en muilek na ini a nyun situwâsi fu den. Den ben lobi a wroko di den ben e du fosi, èn furu fu den ben e du a wroko dati omeni yari langa. Sonwan fu den ben e sari wan heri pisi ten. Ma bakaten den ben man fiti densrefi na a nyun situwâsi fu den. San yepi den? A moro prenspari sani di yepi den na taki den lobi Yehovah. Den sabi taki den gi densrefi abra na Gado. Den no pramisi Yehovah taki den o dini en soso te den o du wan spesrutu wroko noso te den abi grani (Kol. 3:23). Fu di den abi sakafasi, meki den breiti taki den kan dini Yehovah awinsi sortu wroko den kisi. Den e ’trowe ala den hebi na en tapu’ bika den sabi taki a e broko en ede nanga den.​—1 Petr. 5:6, 7.

17. Fu san ede wi breiti taki Gado Wortu e gi wi deki-ati fu abi sakafasi?

¹⁷ Wi breiti taki Bijbel e gi wi deki-ati fu abi sakafasi. Te wi e leri fu abi sakafasi, dan tra sma o lobi moksi nanga wi èn wi o kisi wini tu. Wi no o brokosaka tumusi te wi e kisi problema na ini a libi. Èn san moro prenspari, wi o kon moro krosibei na wi hemel Papa. Wi breiti srefisrefi taki „a Moro Heiwan” lobi den anbegiman fu en di abi sakafasi!​—Yes. 57:15.