1. O ten a kan muilek fu dini Yehovah?

O TEN a ben o moro muilek gi yu fu dini Yehovah: Te yu abi problema, noso te sani e go bun? Te wi e kisi tesi, dan wantewante wi e suku yepi na Yehovah. Ma san wi e du te ala sani e waka bun? Wi e frigiti son leisi o prenspari a de fu dini Gado? Yehovah ben warskow den Israelsma fu no meki a sani dati pasa nanga den.​—Deut. 6:10-12.

2. Sortu bun eksempre Kownu Asa ben gi?

² Kownu Asa ben de wan bun eksempre fu wan sma di gebroiki en ten bun èn di ben frutrow na tapu Yehovah nanga en heri ati. A no ben e dini Yehovah na ini muilek ten nomo, ma sosrefi te sani ben e go bun. Sensi di Asa ben yongu, a ben e „dini Yehovah nanga en heri ati (1 Kow. 15:14). Wan fasi fa Asa sori taki a ben e dini Yehovah nanga heri ati, na taki a puru falsi anbegi na ini Yuda. Bijbel e taki dati „a puru den altari pe sma ben e go anbegi den gado fu den trakondre sma. Boiti dati, a broko den hei presi puru pe sma ben e anbegi falsi gado. A broko den santa pilari puru èn a koti den santa postu trowe” (2 Kron. 14:3, 5). Asa puru srefi en granmama Maka leki umakownu na ini a kondre. Fu san ede?  Fu di Maka ben gi sma deki-ati fu anbegi wan falsi gado.​—1 Kow. 15:11-13.

3. San wi o luku na ini na artikel disi?

³ Ma Asa no puru falsi anbegi nomo. A ben gi sma deki-ati tu fu bigin baka nanga a tru anbegi. Na so a yepi den sma fu a kownukondre Yuda fu drai kon baka na Yehovah. Dati meki Yehovah sorgu taki sani ben e waka bun gi Asa nanga den Israelsma. Di Asa ben e tiri, dan „feti no ben de ini a kondre” tin yari langa (2 Kron. 14:1, 4, 6). Na ini na artikel disi wi o luku fa Asa gebroiki en ten di sani ben e waka bun. Baka dati wi o luku na eksempre fu den fosi Kresten di ben de neleki Asa, fu di den ben gebroiki den ten na wan koni fasi di sani ben e go bun. Leki lasti wi o piki na aksi disi: Efu yu e libi na ini wan kondre pe sma no e tapu yu fu anbegi Gado, dan fa yu kan gebroiki yu ten na wan koni fasi now di sani e go bun?

4. Te yu luku 2 Kroniki 14:2, 6, 7, dan fa Asa gebroiki a ten di feti no ben de?

⁴ Leisi 2 Kroniki 14:2, 6, 7. Asa ben taigi a pipel taki na Yehovah ’meki ala sani waka bun gi den’. Ma Asa no ben feni taki a bun ten disi ben de fu sidon nomo. Na presi fu dati a bigin bow foto, skotu lontu den foto, toren nanga portu gi den foto. A taigi a pipel fu Yuda: „A kondre na fu wi.” Fu san ede Asa ben taki dati? A ben wani sori den taki den ben kan go na iniwan presi fu a kondre di Gado ben gi den èn nowan feanti no ben o tapu den fu bow pe den wani. Asa ben gi a pipel deki-ati fu gebroiki den ten bun now di feti no ben de.

5. Fu san ede Asa meki a legre fu en kon moro tranga?

⁵ Asa ben gebroiki a ten disi tu fu meki  a legre fu en kon moro tranga (2 Kron. 14:8). Ma disi no ben wani taki dati a no ben e frutrow na tapu Yehovah. Leki kownu, Asa ben sabi taki a ben abi a frantwortu fu sreka a pipel gi problema di ben kan opo kon. A ben sabi taki kande sani no ben o waka so bun gi Yuda bakaten, èn a ben abi leti.

6. Fa den fosi Kresten gebroiki a ten di sani ben e waka bun gi den?

⁶ Den fosi Kresten ben kisi frufolgu furu tron, ma son leisi den ben abi bun ten tu. Fa den ben gebroiki den ten te sani ben e waka bun? Den man nanga uma disi di ben lobi Yehovah, ben tan preiki a bun nyunsu fayafaya. Na ini a buku Tori fu den apostel wi e leisi taki den „ben abi bigi lespeki gi Yehovah”. Fu di den tan preiki a bun nyunsu, meki a grupu dati „ben kon moro bigi”. A no de fu taki dati Yehovah blesi den fu di den ben preiki fayafaya di sani ben e waka bun gi den.​—Tori 9:26-31.

7-8. San Paulus nanga trawan du di den ben abi na okasi fu preiki a bun nyunsu?

⁷ Den fosi Kresten ben gebroiki ibri okasi fu fruteri sma a bun nyunsu. Fu eksempre, di na apostel Paulus ben de na Efeise, a ben si taki a ben man preiki gi furu sma fu meki disipel na ini a foto dati.​—1 Kor. 16:8, 9.

⁸ Paulus nanga tra Kresten ben kisi moi okasi tu baka di den seti a besnèi tori na ini a yari 49 (Tori 15:23-29). Baka di den ben skrifi den gemeente san den bosroiti, den alamala wroko tranga fu fruteri sma ’a bun nyunsu, sobun a wortu fu Yehovah’ (Tori 15:30-35). San ben de a bakapisi? Bijbel e taki dati „a sani dati tranga a bribi fu a gemeente trutru èn dei fu dei moro nanga moro sma ben e tron bribiman”.​—Tori 16:4, 5.

9. Fa sani de now na ini furu kondre, èn san wi kan aksi wisrefi?

⁹ Na ini furu kondre wi kan preiki sondro fu sma tapu wi. Yu e libi na ini so wan kondre? Efu dati de so, dan aksi yusrefi: ’Fa mi e gebroiki mi ten now di mi abi na okasi fu preiki sondro fu sma tapu mi?’ Na ini den lasti dei disi pe so furu sani e pasa, Yehovah en organisâsi e du en wroko fayafaya. Noiti ete a preikiwroko du na so furu presi na grontapu èn noiti ete so furu sma kisi Bijbel leri (Mark. 13:10). Yehovah en pipel man du furu sani fu horibaka gi a wroko disi.

10. Sortu deki-ati 2 Timoteyus 4:2 e gi wi?

¹⁰ Fa yu kan gebroiki yu ten na wan koni fasi te sani e go bun? (Leisi 2 Timoteyus 4:2.) Luku fa a situwâsi de na ini yu osofamiri. Wan fasi de fa yu noso wan sma na ini yu osofamiri man du moro na ini a preikiwroko noso pionier srefi? Now a no a ten fu feti baka moni noso gudu. Den sani dati no o man yepi wi fu pasa a bigi banawtu.​—Odo 11:4; Mat. 6:31-33; 1 Yoh. 2:15-17.

11. San son sma du fu kan preiki a bun nyunsu gi moro sma?

¹¹ Furu preikiman leri wan tra tongo, so taki den man preiki èn studeri nanga sma di e taki a tongo dati. Yehovah en organisâsi meki buku, felem nanga tra sani na ini furu tongo fu yepi wi na ini a preikiwroko. Fu eksempre, na ini 2010 wi  ben abi den sani disi na ini sowan 500 tongo. Now wi abi sani na ini moro leki 1000 tongo!

12. Sortu wini a abi te sma e yere a Kownukondre boskopu na ini den eigi tongo? Gi wan eksempre.

¹² Te sma man yere Gado Wortu na ini den eigi tongo, dan fa den e firi? Luku na ondrofenitori fu wan sisa di ben go na wan kongres na ini Amerkankondre. A kongres ben hori na ini Kinyarwandatongo. Dati na wan tongo di furu sma e taki na ini Rwanda, Kongo (Kinsyasa) nanga Uganda. Baka a kongres a sisa disi di e taki Kinyarwandatongo, taki: „Mi froisi kon na Amerkankondre 17 yari pasa, ma disi na a fosi leisi di mi frustan ala sani na wan kongres.” A de krin taki a programa naki en ati trutru di a yere en na ini en eigi tongo. Yu man leri wan tra tongo fu yepi sma na ini yu kontren di e taki a tongo dati? Kande a boskopu o hari den moro te yu e taki nanga den na ini den eigi tongo. Yu o kisi furu prisiri te yu e meki muiti fu du a sani disi.

13. Fa wi brada nanga sisa na ini Rosiakondre gebroiki den ten bun di sani ben e waka bun?

¹³ A no ala brada nanga sisa man preiki fri. Son leisi lanti meki wet so taki wi no man preiki fa wi gwenti. Fu eksempre, luku san pasa nanga den brada nanga sisa na ini Rosiakondre. Furu yari langa den ben kisi frufolgu, ma na ini maart 1991 lanti gi den primisi fu anbegi Gado soleki fa den wani. Na a ten dati sowan 16.000 Kownukondre preikiman ben de na ini Rosiakondre. Baka tutenti yari den ben abi moro leki 160.000 preikiman! Wi kan si taki den brada nanga sisa gebroiki a ten fu den na wan koni fasi di den ben abi na okasi fu preiki sondro fu sma tapu den. Ma bakaten a situwâsi dati kenki. Toku noti no ben man tapu den fu dini  Yehovah fayafaya. Den e du ala san den man fu dini Yehovah go doro.

14-15. Fa Yehovah sori en makti di a yepi Asa?

¹⁴ Di Asa ben de kownu, sani no tan waka bun ala ten. Wan bigi legre fu wán milyun srudati ben komoto fu Etiopia fu kon feti nanga en. A legre-edeman Sera ben de seiker taki a legre fu en ben o wini Yuda. Ma Kownu Asa no ben meki a bigi legre fu den feanti frede en. A ben e frutrow na tapu en Gado, Yehovah. Asa begi: „Yehovah wi Gado, mi e begi yu, yepi wi fu di na ini yu wi poti bribi èn na ini yu nen wi hari kon feti nanga a bigi legre disi.”​—2 Kron. 14:11.

¹⁵ A legre fu Etiopia ben de tu tron moro bigi leki a legre fu Yuda. Ma toku Asa ben abi a frutrow taki Yehovah tranga moro den èn taki a ben o yepi en pipel. Èn na dati Yehovah du tu. A meki Asa wini a bigi legre fu den Etiopiasma.​—2 Kron. 14:8-13.

16. Fa wi du sabi taki sani no o go bun fu ala ten?

¹⁶ Wi no sabi finifini san o pasa nanga wi na ini a ten di e kon. Ma wi sabi taki sani o kon moro muilek gi wi. Hori na prakseri taki Yesus ben taki dati na ini den lasti dei sma fu ala kondre ben o teige den disipel fu en (Mat. 24:9). Na apostel Paulus ben taki tu dati „sma o frufolgu ala den wan di wani dini Gado fayafaya leki bakaman fu Krestes Yesus” (2 Tim. 3:12). Satan abi „bigi atibron”. Na kori wi e kori wisrefi efu wi denki taki a no o du wi noti.​—Openb. 12:12.

17. Sortu tesi wi o kisi?

¹⁷ Heri esi wi alamala o kisi tesi tapu a bribi fu wi. A no o teki langa moro fosi „wan bigi banawtu o de” na grontapu. „Noiti ete so wan ten ben de sensi a bigin fu grontapu teleki now” (Mat. 24:21). Na a ten dati a kan taki famiriman o gens wi èn kande lanti o tapu a wroko fu wi (Mat. 10:35, 36). Yu o de leki Asa di ben abi a frutrow taki Yehovah ben o yepi èn kibri en?

18. Soleki fa Hebrewsma 10:38, 39 e sori, dan san o yepi wi fu de srekasreka te sani no e go bun moro?

 ¹⁸ Yehovah e sreka wi now so taki wi kan abi wan tranga bribi te wi o kisi tesi. A e gebroiki „a koni srafu di de fu frutrow” fu gi wi gosontu „nyanyan na a reti ten” so taki wi kan tanapu kánkan (Mat. 24:45). Ma ibriwan fu wi musu du ala san wi man fu tranga wi bribi na ini Yehovah.​—Leisi Hebrewsma 10:38, 39.

19-20. Te wi luku san skrifi na 1 Kroniki 28:9, dan sortu sani wi musu aksi wisrefi èn fu san ede?

¹⁹ Neleki Kownu Asa, wi musu „suku Yehovah” (2 Kron. 14:4; 15:1, 2). Wi e du dati te wi e leri sabi Yehovah èn teki dopu. Wi musu du ala san wi man fu meki wi lobi gi Yehovah kon moro tranga. A bun fu aksi yusrefi a sani disi: ’Mi e go na den konmakandra doronomo?’ Te wi e go na den konmakandra di Yehovah organisâsi seti, dan wi e kisi leri di o yepi wi fu tan dini Yehovah èn wi e kisi deki-ati fu den brada nanga sisa (Mat. 11:28). Wi kan aksi wisrefi tu: ’Mi gwenti studeri? Mi e meki ten fu hori na Osofamiri Anbegi ibri wiki? Mi e meki ten fu studeri ibri wiki awinsi mi e libi mi wawan? Mi e du ala san mi man fu preiki gi sma èn fu studeri nanga den?’

²⁰ Fu san ede wi musu aksi wisrefi den sani disi? Bijbel e taki dati Yehovah e ondrosuku wi ati nanga den prakseri fu wi. Wi musu du a srefi tu. (Leisi 1 Kroniki 28:9.) Efu wi si taki wi musu kenki wi denki noso den sani di wani du na ini wi libi, dan wi musu aksi Yehovah fu yepi wi fu tyari kenki kon. Now na a ten fu sreka wisrefi gi den tesi di o kon. No meki nowan sani tapu yu fu gebroiki yu ten na wan koni fasi now di sani e go bun!