1-2. San Preikiman 11:6 abi fu du nanga a preikiwroko fu a bun nyunsu fu a Kownukondre?

NA INI son kondre sma breiti srefisrefi te den yere a bun nyunsu. Dati na a sani di den ben e suku sensi ten! Ma na ini tra kondre sma no wani sabi sani fu Gado noso Bijbel. Fa den sma de na ini yu kondre? Awinsi fa den sma de, Yehovah wani taki wi tan preiki teleki a taki dati a wroko disi kaba.

² Yehovah bosroiti kaba o ten wi o tapu nanga a preikiwroko èn o ten „a kaba o kon” (Mat. 24:14, 36). Ma solanga a ten dati no doro, wi ’no musu meki wi anu rostu’. * Fa wi kan du dati?​—Leisi Preikiman 11:6.

3. San wi o luku na ini na artikel disi?

³ Na artikel fosi a wan disi taki fu fo sani di wi musu du fu man tron bun preikiman noso „fisiman di e fanga libisma” (Mat. 4:19). Na artikel disi o taki fu dri sani di o yepi wi fu tan preiki go doro, awinsi san e pasa. Wi o si fu san ede a prenspari taki wi (1) tan poti prakseri na a preikiwroko, (2) abi pasensi, èn (3) tan abi wan tranga bribi.

4. Fu san ede wi musu tan poti prakseri na a wroko di Yehovah gi wi fu du?

⁴ Yesus ben taki na fesi fa sma ben o de na ini den lasti dei èn sortu sani ben o pasa na a ten dati. A ben sabi taki den sani disi ben kan puru a prakseri fu den disipel na a preikiwroko. Dati meki a taigi den fu „tan na ai” (Mat. 24:42). Na ini a ten fu Noa, furu sani ben pasa di ben meki  taki sma no ben e poti prakseri di Noa ben e warskow den taki wan Bigi Frudu ben o kon. Na ini a ten disi den srefi sani kan puru wi prakseri tu na san prenspari (Mat. 24:37-39; 2 Petr. 2:5). Fu dati ede, wi musu tan poti prakseri na a wroko di Yehovah gi wi fu du.

5. Fa Tori 1:6-8 e sori o fara a preikiwroko ben o du?

⁵ Na ini a ten disi wi musu poti ala wi prakseri na a Kownukondre preikiwroko. Yesus ben taki na fesi dati den bakaman fu en ben o tan du a wroko disi baka te a dede èn den ben o preiki moro leki di a ben de na grontapu (Yoh. 14:12). Baka di Yesus dede, son disipel ben go du a fisiwroko baka. Baka di Yesus kisi wan opobaka a du wan wondru fu meki den disipel fanga bun furu fisi. Dan a sori den taki a preikiwroko di a ben gi den fu du ben prenspari moro iniwan tra wroko di den ben o du (Yoh. 21:15-17). Di Yesus ben o go na hemel a sori den disipel taki a wroko di a ben bigin no ben o du na ini Israel wawan, ma a ben o du na tra presi di de bun fara. (Leisi Tori 1:6-8.) Omeni yari baka dati Yesus meki na apostel Yohanes si wan fisyun pe a ben sori en san ben o pasa „na a dei fu Masra”. * Wan fu den sani di Yohanes si ben moi srefisrefi: Wan engel di „ben abi têgo bun nyunsu di a ben musu fruteri den sma di e libi na grontapu, iya, sma fu ala kondre, lo, tongo, nanga pipel” (Openb. 1:10; 14:6). A de krin taki na ini a ten disi Yehovah wani taki wi teki prati na a preikiwroko disi di e du na heri grontapu teleki a kaba.

6. San kan yepi wi fu tan poti prakseri na a preikiwroko?

⁶ Te wi e teki ten fu prakseri ala den sani di Yehovah du fu yepi wi, dan wi o  man tan poti prakseri na a preikiwroko. Nanga yepi fu buku di wi kan leisi na tapu papira noso computer, felem, broadcasting programa nanga tra sani fu arki, Yehovah e gi wi bun furu leri. Prakseri a sani disi: Na tapu a website fu wi yu man feni sani na ini moro leki 1000 tongo! (Mat. 24:45-47) Na ini a grontapu disi pe politiek, kerki nanga moni e prati sma, moro leki aiti milyun futuboi fu Gado e libi ini wánfasi leki brada nanga sisa. Wi ben man si wan eksempre fu disi tapu freida 19 april 2019 di Kotoigi na heri grontapu meki ten fu luku a deitekst. A neti dati 20.919.041 sma kon makandra na difrenti presi fu hori a Memrefesa fu a dede fu Yesus. Te wi e prakseri a bigi grani di wi abi fu ondrofeni den moi sani disi, dan dati o gi wi deki-ati fu tan poti prakseri na a Kownukondre preikiwroko.

7. Fa na eksempre fu Yesus e yepi wi fu tan poti prakseri na a preikiwroko?

⁷ Wan tra sani di kan yepi wi fu tan poti prakseri na a preikiwroko, na te wi e teki na eksempre fu Yesus. A no ben meki nowan sani puru en prakseri na a preikiwroko (Yoh. 18:37). A no ben puru en prakseri na a preikiwroko di Satan taigi en taki a ben o gi en „ala den kownukondre fu grontapu nanga a moi fu den”, noso di sma ben wani meki en tron kownu (Mat. 4:8, 9; Yoh. 6:15). A no ben feti baka gudu èn a no ben tapu fu du en wroko di gensman ben wani du en ogri (Luk. 9:58; Yoh. 8:59). Te sani e pasa di kan meki wi lasi bribi, dan wi kan tan du wi wroko te wi e memre a rai fu Paulus. A ben gi Kresten a rai fu teki na eksempre fu Yesus, so taki den ’no kon weri èn den no lasi-ati’.​—Hebr. 12:3.

8. O ten yu kan taki dati wan sma abi pasensi èn fu san ede a prenspari fu abi pasensi?

⁸ Wan sma abi pasensi te a e wakti rustig teleki wan situwâsi kenki. Awinsi wi e wakti fu wan muilek situwâsi pasa, noso wi e wakti fu kisi wan sani di wi wani trutru, wi alamala abi pasensi fanowdu. A profeiti Habakuk ben winsi taki den ogri sani di ben e pasa na ini Yuda ben o kaba (Hab. 1:2). Den disipel fu Yesus ben winsi taki a Kownukondre ben o kon „na a momenti dati”, so taki den ben o kisi frulusu fu den Romesma di ben e tiri den na wan ogri fasi (Luk. 19:11). Wi e angri fu si o ten Gado Kownukondre o puru ala ogri èn seti wan nyun grontapu pe soso reti-ati sma o de (2 Petr. 3:13). Ma wi musu wakti nanga pasensi teleki a ten fu Yehovah doro. Meki wi luku wan tu fasi fa Yehovah e leri wi fu abi pasensi.

9. Sortu sani e sori taki Yehovah abi pasensi?

⁹ Yehovah na a moro bun eksempre fu wan sma di abi pasensi. A ben gi Noa nofo ten fu bow na ark èn fu du en wroko leki „preikiman fu retidu” (2 Petr. 2:5; 1 Petr. 3:20). Yehovah ben arki Abraham ibri leisi di a ben aksi en efu a ben o pori den sma fu den ogri foto Sodom nanga Gomora trutru (Gen. 18:20-33). Hondrohondro yari langa Yehovah ben abi bun furu pasensi nanga den Israelsma di ben e trangayesi en (Neh. 9:30, 31). Na ini a ten disi wi man si taki Yehovah abi pasensi te wi e luku fa a e gi ala sma „na okasi fu sori berow” èn fu tron mati fu en (2 Petr. 3:9; Yoh. 6:44; 1 Tim. 2:3, 4). Te wi e prakseri fa Yehovah abi pasensi, dan wi srefi o wani abi pasensi tu te wi e preiki gi sma èn te wi e gi den leri. Yehovah e leri wi fu abi pasensi tu nanga  yepi fu wan agersitori di skrifi na ini en Wortu.

10. San wi kan leri fu a tori fu a gronman na ini Yakobus 5:7, 8?

¹⁰ Leisi Yakobus 5:7, 8. Wi kan leri fu abi pasensi te wi e luku a tori fu a gronman di musu wakti teleki den sani di a prani gro. Son sani e gro esi-esi. Ma furu sani, spesrutu den bon di e gi froktu, e teki wan heri pisi ten fosi den gro kon bigi. Na ini Israel sma ben e wroko gron sowan siksi mun langa. Den gronman ben e prani siri na wan ten fu mindri oktober èn den ben e koti nyanyan na wan ten fu mindri april (Mark. 4:28). A de wan koni sani fu abi pasensi neleki a gronman. Ma a kan muilek fu du disi.

11. Fa pasensi o yepi wi na ini a preikiwroko?

¹¹ Nofo tron sondu libisma no wani wakti fu si den bakapisi fu a wroko di den du. Ma efu wi wani taki a gron fu wi e gi nyanyan, dan wi abi fu wroko doronomo. Wi musu diki skopu, prani, puru grasi nanga takru wiwiri, èn wi musu kanti watra gi den sani di wi prani. A wroko fu meki sma tron disipel na wan wroko di musu du doronomo tu. A e teki ten fu leri wan Bijbelstudie fu lobi ala sma a srefi. A sani disi de leki den takru wiwiri di wi musu puru na ini a gron. Te wi abi pasensi, dan wi no o lasi-ati te sma no e arki wi. Ma te wan sma arki wi, wi musu abi pasensi tu. Wi no kan dwengi wan Bijbelstudie fu go na fesi. Son leisi srefi den disipel fu Yesus no ben e frustan wantewante san a ben e leri den (Yoh. 14:9). Èn wi no musu frigiti tu taki wi kan prani èn gi watra, ma na Gado e meki sani gro.​—1 Kor. 3:6.

12. Fa wi kan sori taki wi abi pasensi te wi e preiki gi famiriman?

¹² Son leisi a kan muilek gi wi fu abi pasensi te wi e preiki gi famiriman. Wan  sani di kan yepi wi skrifi na Preikiman 3:7. Drape skrifi: „Wan ten de fu tan tiri èn wan ten de fu taki.” Kande a fasi fa wi e tyari wisrefi o meki taki den o wani arki wi. Ma wi no musu frigiti tu taki ala ten wi musu de klariklari fu taki fu Yehovah (1 Petr. 3:1, 2). Wi musu de fayafaya te wi e preiki èn te wi e gi sma leri, ma wi musu abi pasensi tu nanga ala sma, srefi den famiri fu wi.

13-14. Kari wan tu eksempre di kan yepi wi fu abi pasensi.

¹³ Wi kan leri fu abi pasensi te wi e luku na eksempre fu futuboi fu Gado na ini Bijbel ten èn na ini a ten disi. Habakuk ben wani taki ogridu kaba, ma a ben sori taki a abi pasensi di a taki nanga ala overtoigi: „Mi o tan wakti” (Hab. 2:1). Nanga en heri ati, na apostel Paulus ben wani kaba en wroko, so taki a ben kan kisi en pai. Ma toku a ben abi a pasensi fu tan „preiki finifini fu a bun nyunsu”.​—Tori 20:24.

¹⁴ Wan moi eksempre na di fu wan trowpaar fu a Gileadskoro. Baka a skoro den seni den go na wan kondre pe wan tu Kotoigi nomo ben de èn pe furu fu den sma no ben de Kresten. Wan tu sma nomo ben wani studeri Bijbel. Ma den mati fu den fu a Gileadskoro di ben e dini na ini tra kondre ben e fruteri den ala sortu moi ondrofenitori fa den ben abi so furu Bijbelstudie. Toku a trowpaar disi tan du a wroko fu den nanga pasensi, aladi sma no ben wani arki so furu. Baka di den preiki aiti yari na ini wan kontren pe sma no ben lobi arki, den ben breiti fu si fa wan Bijbelstudie fu den dopu te fu kaba. San wi kan leri fu den eksempre disi fu fositen èn fu a ten disi? Den sma tan du a wroko fu den fayafaya. Den no meki den anu rostu èn Yehovah blesi den fu di den ben abi pasensi. Sobun, meki wi „teki na eksempre fu den sma di kisi den sani di Gado pramisi den, fu di den ben abi bribi èn fu di den ben abi pasensi”.​—Hebr. 6:10-12.

15. San na wan fasi fa den sani di wi e bribi e yepi wi fu tan preiki fayafaya?

¹⁵ Fu di wi e bribi na ini a boskopu di wi e tyari, meki wi de fayafaya fu fruteri sma so furu leki wi man. Wi e bribi den pramisi di de na ini Gado Wortu (Ps. 119:42; Yes. 40:8). Wi si fa Bijbel profeititori kon tru na ini a ten fu wi. Wi si fa a libi fu sma e kon moro bun te den e du san Bijbel e taki. Den sani disi e meki taki wi de seiker taki a bun nyunsu fu a Kownukondre na wan boskopu di ala sma musu yere.

16. Fa Psalm 46:1-3 e sori taki bribi ini Yehovah e gi wi deki-ati fu tan preiki go doro? Fa bribi ini Yesus e yepi wi tu?

¹⁶ Wi e bribi tu na ini Yehovah, a sma di gi wi a boskopu disi fu preiki. Wi e bribi tu na ini Yesus, a sma di Yehovah poti leki Kownu fu a Kownukondre (Yoh. 14:1). Awinsi san e pasa, Yehovah o de wi kibripe èn a o gi wi krakti ala ten. (Leisi Psalm 46:1-3.) Boiti dati, wi de seiker taki na hemel Yesus e tiri a preikiwroko èn a e gebroiki a makti nanga a krakti di Yehovah gi en.​—Mat. 28:18-20.

17. Gi wan eksempre di e sori fu san ede wi musu tan preiki go doro.

¹⁷ Bribi e meki taki wi de seiker taki Yehovah o blesi wi te wi e meki muiti èn son leisi a e blesi wi na wan fasi di wi no e denki (Preik. 11:6). Luku wan eksempre: Ibri dei dusundusun sma e waka pasa den bukuwagi nanga bukutafra fu wi. A fasi fu preiki disi abi bun bakapisi? Seiker!  Wi Kownukondre Diniwroko fu november 2014 ben fruteri fu wan yongu uma fu universiteit di ben wani skrifi wan artikel fu Yehovah Kotoigi. A no ben man feni wan Kownukondre zaal, ma ben feni wan tu buku nanga tra sani fu wi na wan bukutafra di ben de na a universiteit. Na so a ben feni san a ben abi fanowdu fu skrifi en artikel. Bakaten a dopu fu tron wan Kotoigi èn a e dini now leki wan gewoon pionier. Den sortu ondrofenitori disi e gi wi deki-ati fu tan preiki go doro, fu di den e sori taki sma de ete di musu yere a Kownukondre boskopu.

18. Fu san ede wi de seiker taki a Kownukondre preikiwroko o kaba na a ten di Yehovah wani?

¹⁸ Wi kan de seiker taki a Kownukondre preikiwroko o kaba na a yoisti ten. Luku san pasa na ini a ten fu Noa. Yehovah ben sori krin taki a e du ala sani na a yoisti ten. Sowan 120 yari na fesi Yehovah ben bosroiti kaba o ten a ben o tyari a Bigi Frudu kon. Furu yari baka dati a taigi Noa taki a ben musu bow na ark. Kande sowan 40 noso 50 yari fosi a Bigi Frudu Noa ben e wroko tranga ete fu kaba na ark. Aladi den sma no ben wani arki, toku a tan warskow den teleki Yehovah taki dati a ten ben doro fu tyari den meti go na ini na ark. Baka dati, na a yoisti ten „Yehovah tapu a doro”.​—Gen. 6:3; 7:1, 2, 16.

19. Sortu moi blesi e wakti wi efu wi no meki wi anu rostu?

¹⁹ A no langa moro fosi Yehovah o taki dati wi musu tapu nanga a Kownukondre preikiwroko. Dan a o „tapu a doro” gi na grontapu fu Satan èn a o tyari wan nyun grontapu kon pe soso reti-ati sma o de. Ma solanga a ten dati no doro, meki wi du leki Noa, Habakuk, nanga den tra sma di no ben meki den anu rostu. Meki wi tan poti prakseri na a preikiwroko, meki wi abi pasensi, èn meki wi tan abi wan tranga bribi na ini Yehovah nanga den pramisi fu en.