STUDIE-ARTIKEL 40
„Den wan di e yepi furu sma fu kon de reti-ati sma”
„Den wan di e yepi furu sma fu kon de reti-ati sma, o kon de leki a leti fu stari di e skèin fu ala ten, iya, fu têgo.”—DAN. 12:3.
SINGI 151 A o kari
SAN WI O LERI *
1. Sortu moi sani o pasa na a ten fu a Dusun Yari Tiri?
DATI o de wan heri moi dei te sma o bigin kisi wan opobaka dyaso na grontapu na a ten fu a Dusun Yari Tiri fu Krestes. Ala sma di lasi lobiwan na ini dede e angri fu si den sma dati baka. Na so Yehovah e firi tu (Yob 14:15). Prakseri fa sma na heri grontapu o prisiri te den lobiwan fu den kisi wan opobaka. Soleki fa wi leri na ini na artikel na fesi, „den sma di du san reti” èn di nen skrifi na ini a buku fu libi, o „opo baka fu kisi libi” (Tori 24:15; Yoh. 5:29). Kande furu fu den lobiwan fu wi o de na mindri den sma di o kisi libi syatu baka Armagedon. * Boiti dati „den sma di no du san reti”, soleki den wan di no kisi na okasi fu kon sabi Yehovah noso fu anbegi en fosi den dede, o „opo baka fu kisi krutu”.
2-3. (a) Soleki fa Yesaya 11:9, 10 e sori, dan san sma o leri te a moro bigi wroko o du fu gi sma leri? (b) San wi o luku na ini na artikel disi?
2 Ala den sma di o kisi wan opobaka o abi fu kisi leri (Yes. 26:9; 61:11). Sobun, wan bigi wroko o bigin fu gi sma na heri grontapu leri. (Leisi Yesaya 11:9, 10.) Fu san ede? Wán reide, na taki den sma di no du san reti èn di kisi wan opobaka, o abi fu kon sabi moro fu Yesus Krestes, fu a Kownukondre, èn fu a frulusu-ofrandi fu Yesus. Den o abi fu kon sabi tu o prenspari a nen fu Yehovah de èn fu san ede en wawan abi a reti fu tiri. Srefi den sma di du san reti o abi fu kon sabi san Yehovah tyari kon na krin safrisafri gi a pipel fu en te a abi fu du nanga den sani di a o du nanga grontapu. Wan tu fu den reti-ati sma disi dede wan heri pisi ten fosi a heri Bijbel ben skrifi. Den sma di du san reti èn den sma di no du san reti o abi fu leri furu.
3 Na ini na artikel disi wi o poti prakseri na den aksi disi: Fa a bigi wroko disi o du? San o pasa nanga den sma di o teki a leri di den o kisi? San o pasa nanga den sma di no o teki a leri disi? Den piki tapu den aksi dati prenspari gi wi na ini a ten disi. Wi o taki fu wan tu span profeititori di skrifi na ini Danièl nanga Openbaring di o yepi wi fu kon frustan san o pasa te den dedewan kisi wan opobaka. Kow go luku den span sani fosi di skrifi na ini a profeititori fu Danièl 12:1, 2.
„DEN DEDEWAN DI E SRIBI NA ONDRO GRON, O WIKI BAKA”
4-5. San Danièl 12:1 e tyari kon na krin fu a ten fu a kaba?
4 Leisi Danièl 12:1. A buku Danièl e tyari kon na krin sortu span sani o pasa baka makandra na a ten fu a kaba. Fu eksempre, Danièl 12:1 e sori taki Mikael, di de Yesus Krestes, e „opo du sani fu yepi den sma fu [Gado] pipel”. A pisi dati fu a profeititori bigin kon tru na ini 1914 di Yesus tron Kownu fu Gado Kownukondre na hemel.
5 Ma na engel ben taigi Danièl tu taki Yesus ben o „opo du sani” te „wan ten fu banawtu o kon. Sensi a ten di a fosi pipel ben kon de, teleki a ten dati, noiti ete so wan banawtu kon.” A „ten fu banawtu” disi na a „bigi banawtu” di kari na Mateyus 24:21. Yesus o opo du wan sani, noso a o feti gi a pipel fu Gado na a kaba fu a ten fu a banawtu disi, èn a o du dati na Armagedon. A buku Openbaring e kari den sma disi wan bigi ipi „di komoto na ini a bigi banawtu”.—Openb. 7:9, 14.
6. San o pasa baka te a bigi ipi pasa Armagedon libilibi? Fruklari dati. (Luku sosrefi na artikel „Aksi fu leisiman” na ini A Waktitoren disi, di e taki fu na opobaka na grontapu.)
6 Leisi Danièl 12:2. San e pasa baka te a bigi ipi pasa a bigi banawtu libilibi? A profeititori disi no e taki dati den futuboi fu Gado ben o kisi wan opobaka na yeye fasi na a ten fu den lasti dei, soleki fa wi ben e frustan dati fosi. * Na presi fu dati, den wortu disi abi fu du nanga na opobaka fu den dedewan na ini a nyun grontapu di e kon. Fu san ede wi kan taki dati? Den wortu di vertaal nanga „ondro gron” na ini a tekst disi, vertaal nanga „ondro doti” na Yob 17:16 èn disi wani taki „Grebi”. Disi e sori taki Danièl 12:2 abi fu du nanga wan trutru opobaka di o pasa te den lasti dei kon na wan kaba èn baka a feti fu Armagedon.
7. (a) San a wani taki dati son sma o opo baka „fu kisi têgo libi”? (b) Fu san ede na opobaka disi na „wan moro betre opobaka”?
7 Ma te Danièl 12:2 e taki dati son sma o opo baka „fu kisi têgo libi”, dan san dati wani taki? Dati wani taki dati den sma di kisi wan opobaka èn e tan leri sabi Yehovah nanga Yesus èn e gi yesi na den na a ten fu den 1000 yari, o kisi têgo libi te fu kaba (Yoh. 17:3). Disi o de „wan moro betre opobaka” leki a wan di son sma ben kisi na ini owruten (Hebr. 11:35). Fu san ede? Fu di den sma di ben kisi wan opobaka na ini owruten, dede baka te fu kaba.
8. San a wani taki dati son sma o opo baka „fu kisi syen èn fu tron wan tegu sani fu ala ten”?
8 Ma a no ala sma di o kisi wan opobaka o wani teki a leri fu Yehovah. A profeititori fu Danièl e taki dati son sma o opo baka „fu kisi syen èn fu tron wan tegu sani fu ala ten”. Fu di den sma disi o opo densrefi teige Gado, meki a nen fu den no o skrifi na ini a buku fu libi èn den no o kisi têgo libi. Na presi fu dati, den o „tron wan tegu sani fu ala ten”. Disi wani taki dati den o kisi pori. Sobun, Danièl 12:2 e sori taki na a fasi fa sma o tyari densrefi baka te den kisi wan opobaka o sori san o pasa nanga den * (Openb. 20:12). Sonwan fu den sma disi o kisi têgo libi, ma trawan no o kisi dati.
„DEN WAN DI E YEPI FURU SMA FU KON DE RETI-ATI SMA”
9-10. Sortu tra sani o pasa baka a bigi banawtu, èn suma „o skèin leki a krin leti na loktu”?
9 Leisi Danièl 12:3. Sortu tra sani o pasa baka a „ten fu banawtu”? Neleki Danièl 12:2, vers 3 e taki tu fu wan sani di o pasa baka a bigi banawtu.
10 Suma „o skèin leki a krin leti na loktu”? Den sani di Yesus taki na Mateyus 13:43 e yepi wi fu kon sabi dati. Drape skrifi: „Na a ten dati den sma di Gado feni bun o brenki leki a son na ini a Kownukondre fu den Tata.” Na ini a srefi kapitel disi, Yesus ben e taki fu „den manpikin fu a Kownukondre”, den salfu brada fu en, di o dini makandra nanga en na ini a hemel Kownukondre (Mat. 13:38). Sobun, a musu de so taki Danièl 12:3 e taki fu den salfuwan èn fu a wroko di den o du na a ten fu a Dusun Yari Tiri.
Den 144.000 salfuwan o wroko makandra nanga Yesus Krestes fu tiri a wroko di o du fu gi sma leri na a ten fu den 1000 yari (Luku paragraaf 11)
11-12. Sortu wroko den 144.000 salfuwan o du na a ten fu den 1000 yari?
11 Fa den salfuwan o „yepi furu sma fu kon de reti-ati sma”? Den salfuwan o wroko makandra nanga Yesus Krestes fu tiri a wroko di o du fu gi sma leri na heri grontapu na ini den 1000 yari. Boiti taki den 144.000 salfuwan o tiri leki kownu, den o dini tu leki priester (Openb. 1:6; 5:10; 20:6). Na so den o yepi fu „dresi den pipel”. Dati wani taki dati safrisafri libisma no o abi sondu moro (Openb. 22:1, 2; Esek. 47:12). Dati o gi den salfuwan bigi prisiri trutru.
12 Suma na den „furu sma” di den o yepi fu tron reti-ati sma? Dati na den sma di o kisi wan opobaka, den sma di pasa Armagedon libilibi, èn den pikin di o gebore na ini a nyun grontapu. Na a kaba fu den 1000 yari, nowan sma di o libi na grontapu o abi sondu. Sobun, o ten a nen fu den sma disi o skrifi nanga enki na ini a buku fu libi, so taki a no man figi puru moro?
A LASTI TESI
13-14. Te nowan sma na grontapu no o abi sondu moro, dan san den o abi fu sori fu kan kisi têgo libi?
13 Wi no musu frigiti taki te wan sma no abi sondu moro, dan dati no wani taki ete dati a o kisi têgo libi. Prakseri Adam nanga Eva. Den no ben abi sondu, ma den ben musu sori taki den ben o gi yesi na Yehovah Gado, fosi den ben kan kisi têgo libi. Èn a sari taki den no ben gi yesi na en.—Rom. 5:12.
14 San o de a situwâsi fu den sma na grontapu na a kaba fu den 1000 yari? Nowan sma no o abi sondu moro. Ma dati wani taki dati ala den sma dati o horibaka gi a tiri fu Yehovah fu ala ten? Noso a de so taki sonwan fu den o de leki Adam nanga Eva di trangayesi Yehovah aladi den no ben abi sondu? Fa wi kan kisi piki tapu den aksi disi?
15-16. (a) O ten ala libisma o kisi na okasi fu sori taki den e tan gi yesi na Yehovah? (b) San o pasa baka a lasti tesi?
15 Yesus o sroto Satan na ini wan dipi peti 1000 yari langa. Na ini a pisi ten dati, a no o man kori nowan sma. Ma na a kaba fu den 1000 yari den o lusu Satan baka èn a o pruberi fu kori libisma di no abi sondu. A tesi disi o gi ala libisma na grontapu na okasi fu sori krin efu den e lespeki a nen fu Gado èn efu den e horibaka gi a tiri fu en (Openb. 20:7-10). Sobun, san ibriwan fu den o du na a ten dati, o sori efu a nen fu den o skrifi fu ala ten na ini a buku fu libi.
16 Bijbel e sori taki son sma o trangayesi Yehovah neleki Adam nanga Eva èn den o weigri fu horibaka gi a tiri fu en. San o pasa nanga den? Openbaring 20:15 e taki: „Ibri sma di a nen fu den no skrifi na ini a buku fu libi, a fringi go na ini a se di e bron nanga faya.” Iya, den sma disi di opo densrefi teige Yehovah o kisi pori fu têgo. Ma wan bun bigi grupu sma di no abi sondu moro o pasa a lasti tesi disi libilibi. Dan a nen fu den o skrifi fu ala ten na ini a buku fu libi.
NA „A TEN FU A KABA”
17. San ben o pasa na ini a ten fu wi, soleki fa na engel ben taigi Danièl? (Danièl 12:4, 8-10)
17 A e gi prisiri trutru fu prakseri den sani disi di o pasa. Ma na engel ben taigi Danièl wan tu prenspari sani tu di abi fu du nanga a ten fu wi, noso „a ten fu a kaba” (Leisi Danièl 12:4, 8-10; 2 Tim. 3:1-5). Na engel ben taigi en: „Furu sma . . . o kon sabi bun furu tru tori.” Iya, a pipel fu Gado ben o kon frustan den profeititori na ini a buku fu Danièl moro bun. Na engel taki tu dati na a ten dati ’den ogriwan o tan du den ogri fu den ma nowan enkri ogri sma o man frustan den tori disi’.
18. San o pasa heri esi nanga den ogri sma?
18 Na ini a ten disi a kan gersi leki den ogri sma no e kisi strafu (Mal. 3:14, 15). Ma heri esi Yesus o krutu den sma di de leki bokoboko èn a o poti den aparti fu den sma di de leki skapu (Mat. 25:31-33). Den ogri sma disi no o pasa a bigi banawtu libilibi èn den no o kisi wan opobaka tu fu libi na ini a nyun grontapu. A nen fu den no o skrifi na ini a „buku fu memre den wan di abi lespeki gi” Yehovah, soleki fa skrifi na Maleaki 3:16.
19. San wi musu du now èn fu san ede? (Maleaki 3:16-18)
19 Now na a ten fu sori taki wi a no ogri sma. (Leisi Maleaki 3:16-18.) Yehovah e tyari den sma di a e si leki en „spesrutu gudu” kon na wán. A no de fu taki dati wi wani de na ini a grupu dati tu.
A o de wan span sani fu si fa Danièl, den lobiwan fu wi, nanga furu tra sma o „opo baka” fu kisi den pai na ini a nyun grontapu! (Luku paragraaf 20)
20. Sortu lasti sani Yehovah pramisi Danièl, èn fu san ede yu e angri fu si a dei te a pramisi dati kon tru?
20 A de krin taki wi e libi na ini span ten. Ma heri esi moro span sani o pasa. Dyonsro wi o si fa wan kaba o kon na ala ogri. Baka dati, wi o si fa a sani disi di Yehovah ben pramisi Danièl o kon tru: „Yu o opo baka fu kisi yu pai na a kaba fu den dei” (Dan. 12:13). Yu e angri fu si a dei te Danièl nanga den lobiwan fu yu o „opo baka”? Efu dati de so, dan nownowde yu musu du ala san yu man fu tan gi yesi na Yehovah. Na so yu kan de seiker taki a nen fu yu o tan na ini Yehovah en buku fu libi.
SINGI 80 „Tesi èn si taki Yehovah bun”
^ Na ini na artikel disi wi o poti prakseri na a kenki di kon na ini a fasi fa wi ben e frustan Danièl 12:2, 3 di e sori taki wan bigi wroko o du na grontapu fu gi sma leri. Wi o luku o ten a wroko disi o du èn suma o du en. Wi o luku tu fa a wroko disi o sreka den sma na grontapu gi a lasti tesi di den o kisi na a kaba fu a Dusun Yari Tiri.
^ Den fosi sma di o kisi wan opobaka, na den sma di ben e anbegi Gado nanga den heri ati na ini den lasti dei. Baka dati den wan di dede fosi den sma dati o kisi wan opobaka. Efu sani waka so, dan ala sma o kisi na okasi fu gi de wan di den ben sabi bun wan switikon. Bijbel e taki dati ibri sma di o kisi wan opobaka na hemel o kisi na opobaka dati „te en ten doro”. Sobun, wi kan fruwakti taki te sma o kisi wan opobaka na grontapu, dan dati o pasa tu na wan orga fasi.—1 Kor. 14:33; 15:23.
^ Wan kenki kon na ini a fasi fa wi ben e frustan a tori disi soleki fa a de fu feni na ini a buku ¡Poti Prakseri na a Profeititori fu Danièl! kapitel 17, èn na ini A Waktitoren fu 1 yuli 1987, blz. 11-15.
^ Tra fasi leki dati, den wortu „den sma di du san reti” nanga „den sma di no du san reti” di skrifi na Tori fu den apostel 24:15, e poti prakseri na a fasi fa den sma di kisi wan opobaka tyari densrefi fosi den kon dede. Na so a de tu nanga den wortu „den sma di du bun sani” èn „den sma di du takru sani”, soleki fa skrifi na Yohanes 5:29.
