1. Fa wi o sabi efu wi kan frutrow wan sma?

 WAN sma di de fu frutrow e du muiti fu du san a e pramisi èn a no e fruteri lei (Ps. 15:4). Sma sabi taki den kan frutrow na en tapu. Wi wani taki den brada nanga sisa musu man frutrow na wi tapu tu. San wi kan du so taki den o frutrow wi?

2. Fa wi kan buweisi taki trawan kan frutrow wi?

² Wi no kan dwengi sma fu frutrow wi. Nanga den sani di wi e du wi musu buweisi taki den kan frutrow wi. Yu kan agersi en nanga moni. Yu musu wroko tranga fu kisi moni, ma yu kan lasi en makelek. Sobun, wi musu wroko tranga efu wi wani meki sma frutrow wi. Yehovah buweisi trutru taki wi kan frutrow en. Noiti a o du wan sani di meki taki wi no man frutrow en moro, fu di wi „kan frutrow ala den sani di a e du” (Ps. 33:4). A e fruwakti taki wi e du a srefi leki en (Ef. 5:1). Meki wi taki fu wan tu dinari fu Yehovah di ben de neleki den hemel Tata èn di ben de fu frutrow. Wi o taki sosrefi fu feifi fasi di wi musu abi so taki tra sma kan frutrow wi.

3-4. Fa a profeiti Danièl buweisi taki sma ben kan frutrow en? San na eksempre fu en musu meki wi aksi wisrefi?

³ A profeiti Danièl na wan tumusi moi eksempre fu wan sma di trawan ben man frutrow. Den Babilonsma ben tyari en gwe na ini katibo, ma na ini wan syatu pisi ten a buweisi den taki den ben kan frutrow en. Nanga yepi fu Yehovah a fruteri den san den dren fu Kownu Nebukadnesar fu  Babilon ben wani taki, èn a sani dati meki taki sma bigin frutrow en moro. Wan leisi Danièl ben musu taigi a kownu taki Yehovah no ben lobi san a du. Disi a no wan boskopu di wan kownu wani yere. Danièl ben abi deki-ati fanowdu fu tyari a boskopu dati fu di Nebukadnesar ben de wan man di ben e mandi esi! (Dan. 2:12; 4:20-22, 25) Furu yari baka dati, Danièl sori agen taki den ben kan frutrow en. Di den wortu ben kon de fu si na a skotu fu a kownu-oso fu Babilon, dan a fruteri soifri san den wortu ben wani taki (Dan. 5:5, 25-29). Bakaten Darius a Mediasma, nanga den heihei man fu en si tu taki Danièl „ben man du sani moro bun” leki trawan. Den ben sabi taki Danièl „no ben e bedrigi sma èn a ben e du en wroko bun. Den no ben man taki tu dati a ben e du sma ogri” (Dan. 6:3, 4). Iya, srefi den tiriman di ben anbegi tra gado kon si taki den ben kan frutrow a man disi di ben e anbegi Yehovah.

⁴ Te wi e denki dipi fu na eksempre fu Danièl, dan wi kan aksi wisrefi: ’San den sma di no de Yehovah Kotoigi e denki fu mi? Den sabi mi leki wan sma di e tyari en frantwortu bun èn di den kan frutrow?’ Fu san ede a prenspari fu aksi wisrefi den sani disi? Fu di te sma e frutrow wi dan wi e gi Yehovah glori.

5. San ben yepi Hananya fu de wan sma di trawan ben kan frutrow?

⁵ Na ini 455 Fosi Krestes, baka di Granman Nehemia bow den skotu fu Yerusalem baka, a ben suku mansma di a ben kan  frutrow fu sorgu a foto bun. Wan fu den man di Nehemia teki ben de Hananya, na edeman fu a Fortresi. Bijbel e taki fu Hananya taki „a ben de wan man di yu kan frutrow. Furu sma no ben de di ben abi so wan bigi lespeki gi a tru Gado leki en” (Neh. 7:2). Lobi nanga bigi lespeki gi Yehovah meki taki Hananya du en wroko bun, awinsi sortu wroko a ben kisi fu du. Lobi nanga bigi lespeki gi Yehovah o yepi wi tu fu wroko gi en na wan frantwortu fasi.

6. Fa Tikikus sori taki a ben de wan mati di na apostel Paulus ben kan frutrow?

⁶ Luku na eksempre fu Tikikus, wan brada di na apostel Paulus ben frutrow. Di Paulus ben de na strafu na ini wan oso, dan a ben frutrow tapu Tikikus fu du son sani gi en. Paulus ben taki fu en dati a ben de wan brada „di e dini Masra fayafaya” (Ef. 6:21, 22). Paulus ben frutrow en fu tyari brifi go na den brada na Efeise nanga Kolose, ma sosrefi fu gi den deki-ati èn fu trowstu den. Tikikus e meki wi prakseri den getrow man na ini a ten disi di e gi wi san wi abi fanowdu fu abi wan bun matifasi nanga Gado.​—Kol. 4:7-9.

7. Fu san ede yu kan teki na eksempre fu den owruman nanga den dinari ini a diniwroko na ini yu gemeente efu yu wani taki sma frutrow yu?

⁷ Na ini a ten disi wi e warderi den owruman nanga den dinari ini a diniwroko trutru. Wi kan frutrow den man disi. Neleki Danièl, Hananya, nanga Tikikus, den e si den frantwortu fu den leki wan seryusu sani. Fu eksempre, te wi e go na den mindriwiki konmakandra, dan wi sabi seiker taki ala pisi fu a programa o hori. Èn den owruman e warderi en efu den brada nanga sisa di kisi wan toewijzing na a konmakandra e sreka densrefi èn e hori a toewijzing fu den tu. Fu eksempre, te wi e gi wan Bijbelstudenti wan kari fu kon na a weekend konmakandra, dan wi no abi fu frede taki den brada frigiti fu sreka wan publikitaki. Èn wi abi a frutrow taki den buku di wi abi fanowdu gi a preikiwroko de fu feni. Den getrow brada disi e sorgu wi bun, èn wi e taki Yehovah tangi taki wi abi den brada disi! Ma na sortu fasi wisrefi kan buweisi taki trawan kan frutrow wi?

8. Gi san wi musu luku bun te wi wani sabi fa a e go nanga wan brada noso sisa? (Odo 11:13)

⁸ Wi lobi den brada nanga sisa fu wi èn wi wani taki a e go bun nanga den. Ma wi musu luku bun taki wi no e bumui ini den libi. Son sma fu a fosi yarihondro Kresten gemeente ben de ’konkruman èn den ben e bumui nanga tra sma tori, fu di den ben e taki sani di den no ben musu taki’ (1 Tim. 5:13). Wi no wani de leki den sma dati kwetikweti. Ma kon meki wi taki dati wan sma e fruteri wi wan sani fu ensrefi èn a e aksi wi fu no fruteri en go doro. Kande wan sisa e fruteri wi taki a abi wan problema nanga en gosontu, noso wan tra tesi di a abi, èn a e aksi wi fu no fruteri tra sma. Dan wi musu lespeki en èn wi musu du san a e aksi fu wi. * (Leisi Odo 11:13.) Meki wi luku tra situwâsi now pe a de prenspari fu no panya sma tori.

9. Fa sma na ini na osofamiri kan sori taki den de fu frutrow?

⁹ Na ini na osofamiri. Ibri sma na ini na osofamiri abi a frantwortu fu no taki nanga trawan fu spesrutu famiri afersi. Fu eksempre, kande wan Kresten wefi abi  wan gwenti di e meki en masra lafu. Ma a masra o taki fu a sani dati nanga trawan so taki a frow firi syen? A no o du dati kwetikweti. A lobi en frow èn a no o du noti fu hati en (Ef. 5:33). Yonguwan di e gro kon tron bigisma wani firi taki sma e lespeki den. A de prenspari taki papa nanga mama sabi disi. Den no musu taki nanga trawan fu den fowtu fu den pikin fu meki den pikin firi syen (Kol. 3:21). Wi musu leri den pikin fu wi taki den musu luku bun san den e fruteri trawan èn den no musu fruteri trawan sani di kan gi den tra sma na ini na osofamiri syen (Deut. 5:16). Efu ibri sma e du muiti fu no fruteri trawan sani di abi fu du nanga den eigi osofamiri, dan den o abi wan tranga banti nanga makandra.

10. San a wani taki fu de wan trutru mati? (Odo 17:17)

¹⁰ Te wi de nanga mati. Son leisi wi e feni en fanowdu fu fruteri wan bun mati fa wi e firi. Son leisi a muilek fu du dati. Kande wi no gwenti fu fruteri sma fa wi e denki trutru. Dati meki wi ben o brokosaka srefisrefi efu wi kon sabi taki a mati fu wi fruteri trawan san wi taigi en. Ma wi abi trutru warderi gi wan sma di no e panya den tori fu wi. A sma dati na „wan trutru mati”.​—Leisi Odo 17:17.

11. (a) Fa den owruman nanga den frow fu den kan sori taki den de fu frutrow? (b) San wi kan leri fu wan owruman di ben musu seti wan gemeente afersi di tra sma no ben mag sabi èn di a no ben fruteri en osofamiri bakaten? (Luku a fowtow.)

¹¹ Na ini a gemeente. Owruman di no e panya sma tori de leki „wan kibripresi gi tranga winti” gi den brada nanga sisa fu den (Yes. 32:2). Wi kan taki fu ala sani nanga den brada disi fu di wi abi a frutrow taki den no o panya den tori fu wi. Wi no e dwengi den tu fu fruteri wi sani di den musu hori gi densrefi. Boiti dati, wi e warderi den frow fu den owruman fu di den no e dwengi den masra fu fruteri den tori fu tra sma. Fu taki en leti, na wan bun sani gi a frow fu wan owruman efu na owruman  no e fruteri en den inibere tori fu den brada nanga sisa. A frow fu wan owruman ben taki: „Mi breiti taki mi masra no e fruteri mi noti fu den sma di a e go luku, noso fu sma di abi yepi fu den owruman fanowdu. A no e fruteri mi srefi na suma a ben e tyari wan herderfisiti. Mi warderi en taki a e hori den tori gi ensrefi so taki mi no e go broko mi ede nanga problema di mi no man lusu. Na so fasi mi man taki fri nanga ala sma na ini a gemeente. Èn mi sabi seiker taki mi masra no o panya den tori fu mi te mi e fruteri en fa mi e firi noso te mi abi wan problema.” A no de fu taki dati wi alamala wani de sma di de fu frutrow. Sortu fasi kan yepi wi fu kon de so wan sma? Meki wi luku feifi fu den fasi dati.

12. Fu san ede wi kan taki dati a de prenspari fu lobi sma efu wi wani taki den frutrow wi? Gi wan eksempre.

¹² Lobi na a moro prenspari fasi di wi musu abi efu wi wani taki sma frutrow wi. Yesus ben taki dati den tu moro bigi wet na fu lobi Yehovah èn fu lobi tra sma (Mat. 22:37-39). Yehovah na a moro bun eksempre fu wan sma di de fu frutrow. Fu di wi lobi Yehovah, meki wi wani du muiti fu waka baka na eksempre fu en. Fu di wi lobi den brada nanga sisa fu wi, meki wi no o panya den inibere tori fu den. Noiti wi wani fruteri sani di kan du den ogri, di kan gi den syen, noso di kan hati den.​—Yoh. 15:12.

13. Fa sakafasi kan yepi wi fu de sma di trawan kan frutrow?

¹³ Sakafasi o yepi wi fu de sma di trawan kan frutrow. Wan Kresten di abi sakafasi no e feti fu de a fosiwan fu fruteri sma wan tori (Fil. 2:3). A no e meki bigi na trawan taki a sabi prenspari sani di tra sma no mag sabi. Èn te wi abi sakafasi, dan wi o dwengi wisrefi tu fu no panya wi eigi denki fu sani di Bijbel noso den Bijbel publikâsi no e taki fu den.

14. Fa a koni fu man si sani krin kan yepi wi fu de sma di trawan kan frutrow?

¹⁴ A koni fu man si sani krin kan yepi wan Kresten fu si krin taki „wan ten de fu tan tiri èn wan ten de fu taki” (Preik. 3:7). Wan odo e taki: „Tan tiri a no don.” Disi wani taki dati son leisi a moro bun fu tan tiri leki fu taki. Fu dati ede Odo 11:12 e gi a rai disi: „Wan man di abi a koni fu man si sani krin, e tan pî.” Luku wan eksempre fu wan owruman di abi furu ondrofeni. Nofo tron den e aksi en fu go yepi tra gemeente nanga problema di muilek fu lusu. Wan tra owruman e taki fu a brada disi: „Ala ten a e luku bun taki a no e fruteri wi den inibere afersi fu tra gemeente.” A brada abi a koni fu si krin o ten a bun fu taki èn fu tan tiri, èn fu dati ede den tra owruman fu en eigi gemeente e lespeki en. Den sabi seiker taki a no o fruteri trawan den afersi fu den.

15. Gi wan eksempre di e sori taki trawan o frutrow yu efu yu de eerlijk.

¹⁵ De eerlijk. Disi na wan tra sani di de fanowdu efu wi wani taki trawan musu frutrow wi. Wi e frutrow wan eerlijk sma fu di wi sabi taki ala ten a o taki san tru (Ef. 4:25; Hebr. 13:18). Kon meki wi taki dati yu wani tron wan moro bun leriman fu Bijbel. Sobun, yu e aksi wan sma fu arki a lezing fu yu èn fu gi yu rai so taki yu kan du en moro bun. Suma yu o frutrow fu gi yu bun rai? A musu de wan sma di e fruteri yu san yu wani yere, noso wan sma di e fruteri yu na wan switifasi fa sani de trutru? Yu sabi a piki kaba. Bijbel e taki: „A moro betre fu piri-ai gi wan sma na fesi trawan, leki fu kibri yu lobi gi en. Den  soro di wan mati e meki, na fu a bun fu yu” (Odo 27:5, 6). Na ini a bigin wi kan feni en muilek fu arki wi mati te a e taki sani eerlijk, ma dati o yepi wi te fu kaba fu du sani moro bun.

16. Fa Odo 10:19 e sori taki a de prenspari fu dwengi wisrefi?

¹⁶ Dwengi yusrefi. A de tumusi prenspari fu dwengi wisrefi efu wi wani taki trawan frutrow wi. Disi kan yepi wi fu hori wi mofo te wi e firi fu fruteri wan tori di wan sma fruteri wi wawan èn di wi no mag fruteri go doro. (Leisi Odo 10:19.) A kan de wan muilek sani fu dwengi wisrefi te wi e gebroiki social media. Efu wi no luku bun, dan sondro taki wi wani, wan tori di trawan no mag sabi e panya go na furu sma. Te wi seni wan tori tapu Internet, wi no man du noti na a fasi fa tra sma o gebroiki a tori dati èn wi no man du noti fu no meki problema kon. Efu wi sabi dwengi wisrefi, dan dati o yepi wi tu fu no taki noti te gensman wani meki wi fruteri sani di kan tyari trobi kon gi den brada nanga sisa fu wi. Disi kan pasa te skowtu e aksi wi sani na ini wan kondre pe den tapu a wroko fu wi. Na ini den situwâsi disi èn sosrefi na ini tra situwâsi wi kan gi yesi na a rai fu „tai [wi] mofo tapu, so taki [wi] no man taki noti” (Ps. 39:1). Ala sma musu man frutrow wi, efu na wi famiri, wi mati, wi brada nanga sisa, noso tra sma. Efu wi wani taki den frutrow wi, dan wi musu dwengi wisrefi.

17. Fa wi kan yepi taki ala sma na ini a gemeente kan frutrow makandra?

¹⁷ Wi de nanga tangi trutru taki Yehovah hari wi kon na ini wan organisâsi fu brada nanga sisa di lobi makandra èn di e frutrow makandra! Wi alamala abi a frantwortu fu buweisi taki den brada nanga sisa fu wi kan frutrow wi. Ibriwan fu wi musu meki muiti fu sori lobi nanga sakafasi, fu gebroiki a koni fu si sani krin, fu de eerlijk, èn fu dwengi wisrefi. Na so fasi wi e yepi taki ala sma na ini a gemeente kan frutrow makandra. Wi musu tan wroko tranga fu sori taki wi na sma di de fu frutrow. Meki wi teki na eksempre fu wi Gado, Yehovah, èn meki wi tan sori taki wi na sma di trawan kan frutrow.