1. Fu san ede a no e fruwondru wi taki furu sma no e frutrow trawan?

 SMA na ini a grontapu fu Satan no sabi suma den musu frutrow. Ibri tron baka den e firi brokosaka te den e si a fasi fa bisnisman, politiekman nanga kerki fesiman e tyari densrefi. Furu sma feni tu taki den no man frutrow den mati, birtisma nanga famiriman srefi. Disi no musu fruwondru wi. Bijbel ben taki na fesi: „Na ini den lasti dei . . .  [sma] no o tai hori na trawan. . . . Den o fruteri ogri-ati lei fu trawan. . . . Den o tori trawan.” Nanga tra wortu, sma ben o tyari densrefi leki Satan, a gado fu a grontapu disi di yu no kan frutrow kwetikweti.​—2 Tim. 3:1-4; 2 Kor. 4:4.

2. (a) Suma wi kan frutrow trutru? (b) San son sma e aksi densrefi kande?

² Ma wi leki Kresten sabi taki wi kan frutrow Yehovah nanga wi heri ati (Yer. 17:7, 8). Wi de seiker taki a lobi wi èn taki a „no o gowe libi” den mati fu en noiti (Ps. 9:10). Wi kan frutrow Krestes Yesus tu fu di a dede gi wi (1 Petr. 3:18). Wi ondrofeni na ini wi eigi libi tu taki Bijbel e gi bun rai di wi kan bribi (2 Tim. 3:16, 17). Wi de seiker taki wi kan frutrow Yehovah, Yesus nanga a Bijbel. Ma kande son sma e aksi densrefi efu den kan frutrow den brada nanga sisa na ini a gemeente ala ten. Efu disi de so, dan fu san ede wi kan frutrow den?

3. Sortu moi grani wi abi? (Markus 10:29, 30)

³ Yehovah teki wi na ini en famiri fu anbegiman na heri grontapu. Disi na trutru wan bigi grani di e tyari furu wini kon! (Leisi Markus 10:29, 30.) Na heri grontapu wi abi brada nanga sisa di lobi Yehovah neleki wi èn di e du ala muiti fu libi soleki fa Yehovah wani. Kande a tongo fu den,  a kulturu fu den nanga den krosi fu den no de leki den di fu wi, ma toku wi lobi den awinsi na fosi tron wi miti den. Wi lobi fu de nanga den, spesrutu te wi e kon makandra fu prèise èn anbegi wi lobi-ati hemel Tata.​—Ps. 133:1.

4. Fu san ede wi abi wi brada nanga sisa fanowdu?

⁴ Now a de moro prenspari fu de wán nanga den brada nanga sisa fu wi. Son leisi den e yepi wi fu tyari den hebi fu wi (Rom. 15:1; Gal. 6:2). Den e gi wi deki-ati tu fu tan dini Yehovah èn fu tan mati fu en (1 Tes. 5:11; Hebr. 10:23-25). Prakseri fa wi ben o firi efu wi no ben abi a gemeente pe wi kan feni kibri èn pe wi kan feni yepi fu kakafutu gi wi feanti Satan Didibri nanga en ogri grontapu. Satan nanga den sma di a e tiri o kon feti nanga den sma di e dini Gado. Ma na a ten dati wi o breiti srefisrefi taki wi abi brada nanga sisa di de klariklari fu yepi wi!

5. Fu san ede son sma e feni en muilek son leisi fu frutrow den brada nanga sisa fu den?

⁵ Ma son sma e feni en muilek fu frutrow den brada nanga sisa. Kande den fruteri wan brada noso sisa wan inibere tori, dan a go fruteri tra sma a tori. A kan tu taki wan brada noso sisa pramisi den wan sani, ma a no du en. Kande wan sma na ini a gemeente taki noso du wan sani di hati den srefisrefi. Den sani disi kan meki en muilek gi wi fu frutrow trawan. Ma san kan yepi wi fu frutrow den brada nanga sisa fu wi?

6. Fa lobi kan yepi wi fu frutrow sma? (1 Korentesma 13:4-8)

⁶ Te wi lobi trawan, dan dati o yepi wi fu frutrow den tu. Wán Korentesma kapitel 13 e taki fu difrenti fasi di wi o sori efu wi abi lobi. Den fasi disi kan yepi wi fu frutrow trawan, noso fu frutrow den baka te  den ben du wan sani di hati wi. (Leisi 1 Korentesma 13:4-8.) Fu eksempre, vers 4 e taki dati „lobi abi pasensi èn a abi switifasi”. Yehovah abi pasensi nanga wi, srefi te wi sondu teige en. Sobun, wi musu abi pasensi tu nanga den brada nanga sisa fu wi efu den taki noso du sani di e hati wi. Vers 5 e taki: „[Lobi] no e mandi esi. A no e tan memre na ogri di trawan du.” Fu di wi no o „tan memre na ogri di trawan du”, meki wi no e go teri ala den leisi di wi brada noso sisa du wan hati sani nanga wi. Preikiman 7:9 e taki dati wi no musu ’de sma di e mandi esi’. A moro bun fu du san skrifi na ini Efeisesma 4:26: „No meki son dongo, aladi unu e mandi ete.”

7. Fa den gronprakseri na ini Mateyus 7:1-5 kan yepi wi fu frutrow wi brada nanga sisa?

⁷ Wan tra sani di kan yepi wi fu frutrow wi brada nanga sisa, na fu si den soleki fa Yehovah e si den. Gado lobi den èn a no e tan memre den sondu fu den. Wi no musu du dati tu (Ps. 130:3). Na presi fu tan poti prakseri na den fowtu fu den, wi musu pruberi fu si den moi fasi fu den èn prakseri den bun sani di den kan du. (Leisi Mateyus 7:1-5.) Fu di lobi „e bribi ala sani” meki wi e bribi taki den wani du bun èn taki a no fu espresi den wani du hati sani nanga wi (1 Kor. 13:7). Disi no wani taki dati Yehovah wani wi fu frutrow trawan sondro fu denki. A wani taki wi e frutrow den fu di den sori taki den na sma di wi kan frutrow. *

8. Fa yu kan leri fu frutrow den brada nanga sisa fu yu?

⁸ A e teki ten fu kon frutrow wi brada nanga sisa. Fa yu kan leri fu frutrow yu brada nanga sisa? Leri sabi den bun. Taki nanga den na den gemeente konmakandra. Go nanga den na ini a preikiwroko. Abi pasensi nanga den, so taki den kan sori yu taki yu kan frutrow den. Na ini a bigin te yu e kon leri sabi wan sma, dan kande yu no o fruteri en ala yu inibere tori. Ma bakaten te yu kon sabi en moro bun, dan kande yu no o frede moro fu fruteri en fa yu e firi (Luk. 16:10). Ma san yu kan du te wan brada noso sisa du wan sani di meki taki yu no e frutrow en moro? No taki wantewante dati yu kaba nanga a sma disi. Na presi fu du dati, teki ten fu denki fu a tori. No meki sani di son sma du, tapu yu fu frutrow den tra brada nanga sisa fu yu. Wi o luku wan tu eksempre fu anbegiman fu Yehovah di tan frutrow trawan awinsi son sma ben du hati sani nanga den.

9. (a) Fa Hana sori taki a ben frutrow Yehovah aladi wan tu sma di ben abi frantwortu ben du sani di no bun? (b) San yu leri fu na eksempre fu Hana di tan frutrow a seti fu Yehovah? (Luku a prenki.)

⁹ Oiti wan brada di abi frantwortu na ini a gemeente du wan sani di hati yu? Efu dati pasa nanga yu, dan a bun fu luku na eksempre fu Hana. Na ini a ten dati, Granpriester Eli ben e teki fesi na ini na anbegi fu Yehovah na ini Israel. Ma den sma na ini en famiri ben e du wan lo ogri. Nofo tron den manpikin fu en di ben abi spesrutu frantwortu, ben e tyari densrefi na wan syen fasi èn den ben e du hurudu. Ma toku a papa fu den no ben du furu fu meki den tapu nanga den sondu fu den. Yehovah no ben puru Eli wantewante leki granpriester. Toku Hana no drai baka gi a seti fu Gado. A tan go na a tabernakel fu anbegi Gado aladi Eli ben de granpriester ete. Di  Eli si Hana e begi nanga bigi sari, a ben denki taki Hana ben drungu. Na presi fu aksi Hana san pasa nanga en, Eli krutu na uma disi di ben firi brokosaka srefisrefi (1 Sam. 1:12-16). Toku Hana ben pramisi srefi taki efu a kisi wan manpikin, a ben o gi en na Yehovah fu meki a dini na a tabernakel pe Eli ben o sorgu gi en pikin (1 Sam. 1:11). Den manpikin fu Eli ben musu kisi piri-ai? Iya, èn Yehovah strafu den te fu kaba (1 Sam. 4:17). Ma fosi a du dati, a arki a begi fu Hana èn a gi en wan manpikin, Samuel.​—1 Sam. 1:17-20.

10. Fa Kownu David tan frutrow trawan aladi sma ben du en wan hati sani?

¹⁰ Oiti wan bun mati du wan sani di meki taki yu no frutrow en moro? Efu disi pasa nanga yu, dan luku san pasa nanga Kownu David. Wan fu den mati fu en ben nen Akitofel. Ma di David en manpikin Absalom pruberi fu puru en papa leki kownu, dan Akitofel teki a sei fu Absalom èn a opo ensrefi teige David. A sani disi ben musu fu hati David srefisrefi. En eigi manpikin nanga wan man di a ben si leki en mati drai baka gi en! Ma David no meki a sani disi tapu en fu frutrow trawan. A tan frutrow Husai, wan tra bun mati fu en di weigri fu opo ensrefi teige en. A no somaar David ben e frutrow Husai. Husai ben sori taki a ben de wan bun mati. A yepi David, aladi a ben kan lasi en libi srefi.​—2 Sam. 17:1-16.

11. Na sortu fasi wan fu den wrokoman fu Nabal sori taki a ben e frutrow trawan?

¹¹ Luku na eksempre tu fu wan fu den wrokoman fu Nabal. David nanga den man fu en ben sorgu taki ogri no miti den wrokoman fu na Israel man Nabal. Baka wan pisi ten David aksi a gudu man disi efu a ben man gi den pikinso nyanyan. Di Nabal weigri fu du a pikin sani disi gi David, dan David ati bron so te, taki a bosroiti fu kiri ala mansma na ini Nabal oso. Wan fu den wrokoman go fruteri Nabal en frow Abigayil san pasa. A man disi ben de na ini Nabal oso tu èn a ben sabi taki Abigayil ben kan yepi en fu tan na libi. Na presi fu lowe, a ben abi a frutrow taki Abigayil ben o man seti a tori disi. A ben sabi taki a ben kan frutrow Abigayil fu di ala sma ben sabi taki a ben de wan koni uma.  Te yu e luku den sani di Abigayil du baka dati, dan a de krin taki a wrokoman ben abi leti fu frutrow en. Abigayil teki deki-ati èn a du muiti fu meki David kenki en prakseri (1 Sam. 25:2-35). A ben abi a frutrow taki David ben o ben o teki a yoisti bosroiti.

12. Fa Yesus sori taki a ben e frutrow den disipel fu en awinsi den ben meki fowtu?

¹² Yesus ben frutrow den disipel fu en awinsi den ben e meki fowtu (Yoh. 15:15, 16). Di Yakobus nanga Yohanes aksi Yesus fu kisi wan spesrutu posisi na ini a Kownukondre, dan Yesus no krutu den èn a no taigi den taki den no ben kan de apostel moro. A ben sabi taki den ben wani dini Yehovah (Mark. 10:35-40). Bakaten ala den disipel fu Yesus gwe libi en na a neti di sma grabu en tyari gwe (Mat. 26:56). Ma Yesus noiti no lasi bribi na ini den. A ben sabi heri bun taki den ben abi fowtu, ma toku „a ben lobi den te na a kaba” (Yoh. 13:1). Baka di Yesus kisi wan opobaka, a gi den 11 apostel di tan nanga en a prenspari frantwortu fu teki fesi na ini a wroko fu meki disipel èn fu sorgu den skapu fu en di a ben lobi srefisrefi (Mat. 28:19, 20; Yoh. 21:15-17). A ben abi bun reide fu frutrow den man disi aladi den ben e meki fowtu. Den alamala tan du a wroko di a ben gi den te na a kaba fu den libi na grontapu. A no de fu taki dati Hana, David, a wrokoman fu Nabal, Abigayil nanga Yesus sori krin taki yu man frutrow trawan awinsi den e meki fowtu.

13. San kan meki en muilek gi wi fu frutrow trawan?

¹³ Oiti yu fruteri wan brada noso sisa wan inibere tori fu yu, dan a go fruteri tra sma yu tori? A sani dati kan hati kefalek. Wan leisi, wan sisa fruteri wan owruman wan sani di trawan no ben abi fu sabi. A dei baka dati, a frow fu na owruman bel a sisa disi fu gi en deki-ati. A ben de krin taki a ben sabi san a sisa ben fruteri na owruman. Wi kan frustan taki a sisa disi ben feni en muilek now fu frutrow na owruman dati nanga wan sani fu en. Ma a sisa du wan moi sani. A go suku yepi na wan tra owruman. Na owruman disi yepi en fu frutrow den owruman baka.

14. San yepi wan brada fu frutrow trawan baka?

¹⁴ Wan heri pisi ten wan brada ben mandi tapu tu owruman èn a ben feni taki a no ben man frutrow den. Ma a bigin prakseri wan sani di wan brada di a ben e lespeki ben taki. A brada ben taki a prenspari sani disi: „A no wi brada nanga sisa na wi feanti, ma na Satan na wi feanti.” A brada go prakseri a sani disi bun, a begi fu en èn te fu kaba a ben kan meki en bun baka nanga ala tu owruman.

15. Fu san ede a e teki ten fu frutrow sma baka? Gi wan eksempre.

¹⁵ Oiti yu lasi wan grani na ini a gemeente? A sani disi kan hati srefisrefi. Na ini den yari baka 1930 Grete nanga en mama ben e dini Yehovah fayafaya di den Nazi-srudati ben tapu a wroko fu wi na ini Doisrikondre. Grete ben abi a grani fu skrifi A Waktitoren abra gi den tra Kotoigi. Ma di den brada kon sabi taki en papa ben de teige a bribi fu wi, den puru a grani fu en fu di den ben frede taki en papa ben o fruteri den srudati sani fu a gemeente. Ma den tesi fu Grete no ben kaba ete. Na ini a heri pisi ten fu a Di fu Tu Grontapufeti, den brada no ben e gi Grete nanga en mama den tijdschrift fu leisi fu di den no ben frutrow den, èn den no ben wani taki nanga  den te den ben e miti den na strati. Dati ben hati en trutru! Grete taki dati a ben hati en so te, taki a ben teki bun langa fosi a gi den brada dati pardon èn fosi a ben kan frutrow den baka. Ma baka wan pisi ten a kon frustan taki efu Yehovah gi den pardon, dan en srefi ben musu gi den pardon tu. *

16. Fu san ede wi musu meki furu muiti fu frutrow wi brada nanga sisa baka?

¹⁶ Efu so wan hati sani miti yu, dan meki furu muiti fu frutrow sma baka. A kan teki ten, ma a muiti di yu e meki o abi bun bakapisi. Luku wan eksempre: Efu wi nyan wan sani di gi wi lusubere, dan wan tra leisi wi o luku moro bun san wi e nyan. Ma wi no o tapu fu nyan, soso fu di wi nyan wan sani wan leisi di no ben bun. Na so a de tu taki wi no o tapu fu frutrow ala wi brada nanga sisa, soso fu di wán fu den du wi wan hati sani wan leisi. Wi sabi taki wi alamala e meki fowtu sensi di wi gebore. Te wi e leri fu frutrow trawan baka, dan wi o de moro koloku èn wi o man poti prakseri na san wi kan du fu yepi sma na ini a gemeente fu frutrow makandra.

17. Fu san ede a prenspari fu frutrow trawan, èn san wi o luku na ini a tra artikel?

¹⁷ Na ini a grontapu fu Satan furu sma no e frutrow makandra, ma wi kan frutrow den brada nanga sisa fu wi fu di wi lobi den èn den lobi wi. Disi e yepi wi fu de koloku èn fu abi wánfasi now. A o yepi wi tu na ini den muilek ten di e kon. San yu musu du efu wan sma du wan sani di hati yu èn yu no e frutrow en moro? Pruberi fu si sani soleki fa Yehovah e si sani, du san den rai fu Bijbel e taki, leri fu abi trutru lobi gi den brada nanga sisa fu yu, èn luku san yu kan leri fu sma na ini Bijbel di ben de na ini wan srefi sortu situwâsi leki yu. Disi kan yepi wi fu no mandi tapu sma moro èn wi kan leri fu frutrow den baka. Te wi e du disi, dan wi o abi furu mati ’di lobi wi moro leki wan brada’ (Odo 18:24). Ma a no wi wawan musu frutrow trawan. Trawan musu man frutrow wi tu. Na ini a tra artikel wi o luku san wi kan du fu meki den brada nanga sisa frutrow wi.