1. Soleki fa Maleaki 3:16 e sori, dan sortu buku Yehovah abi èn san a e skrifi na ini?

 DUSUNDUSUN yari kaba, Yehovah e skrifi den nen fu sma na ini wan prenspari buku. A buku disi abi a nen fu someni sma. A fosiwan fu den nen dati na a di fu Abel, a fosi getrow kotoigi fu Yehovah * (Luk. 11:50, 51). Sensi a ten dati, Yehovah skrifi moro nen na ini a buku èn tide na dei a buku abi milyunmilyun nen na ini. Bijbel e kari a buku dati „wan buku fu memre den wan di abi lespeki gi en” èn „a buku fu libi”. Na ini na artikel disi wi o kari en „a buku fu libi”.​—Leisi Maleaki 3:16; Openb. 3:5; 17:8.

2. Suma nen skrifi na ini a buku fu libi èn san wi musu du fu sorgu taki wi nen skrifi tu na ini a buku dati?

² A prenspari buku disi abi den nen fu ala den sma na ini di e anbegi Yehovah nanga bigi lespeki èn di lobi a nen fu en. Den sma disi o kisi na okasi fu libi fu têgo. Na ini a ten disi a nen fu wi kan skrifi tu na ini a buku dati efu wi e kon abi wan bun matifasi nanga Yehovah nanga yepi fu a frulusu-ofrandi fu en Manpikin, Yesus Krestes (Yoh. 3:16, 36). Wi alamala wani taki a nen fu wi skrifi na ini a buku dati, awinsi wi abi a howpu fu libi na hemel noso na grontapu.

3-4. (a) Wi o libi fu têgo efu a nen fu wi skrifi nownowde na ini a buku fu libi? Fruklari dati. (b) San wi o luku na ini na artikel disi èn na ini a wan di e kon?

³ Ma disi wani taki dati ala den sma di nen skrifi na ini a  buku disi o kisi têgo libi? Wi e kisi piki tapu na aksi dati te wi e luku san Yehovah taigi Moses na ini Eksodes 32:33. Yehovah taki: „Ibri sma di sondu teige mi, mi sa figi puru na ini mi buku.” Disi wani taki dati den nen di skrifi nownowde na ini a buku dati kan figi puru, neleki Yehovah ben skrifi den nanga potlood (Openb. 3:5). Wi musu sorgu taki a nen fu wi e tan na ini a buku teleki Gado skrifi en nanga enki di no man figi puru moro.

⁴ Disi e meki wan tu aksi opo kon. Fu eksempre, san Bijbel e taki fu den sma di nen skrifi na ini a buku fu libi èn fu den sma di nen no skrifi na ini? O ten den sma di nen skrifi na ini a buku o kisi têgo libi? Fa a de nanga den sma di dede sondro fu kisi na okasi fu leri sabi Yehovah? A nen fu den kan skrifi ete na ini a buku? Wi o kisi piki tapu den aksi disi na ini na artikel disi èn na ini a wan di e kon.

SUMA NEN SKRIFI NA INI A BUKU?

5-6. (a) Soleki fa Filipisma 4:3 e sori, dan suma na den sma di nen skrifi na ini a buku fu libi? (b) O ten a nen fu den o skrifi fu ala ten na ini a buku fu libi?

⁵ Suma nen skrifi na ini a buku fu libi? Fu man piki na aksi dati, dan wi o taki fu feifi difrenti grupu fu sma. A nen fu sonwan fu den sma na ini den grupu disi skrifi na ini a buku fu libi, ma a nen fu trawan no skrifi na ini.

⁶ A fosi grupu na den sma di Gado teki fu tiri makandra nanga Yesus na ini hemel. Den nen fu den sma disi skrifi na ini a buku fu libi nownowde? Iya. Te wi e luku san na apostel Paulus ben taigi den brada nanga sisa di ben e ’wroko makandra nanga en’ na ini Filipi, dan dati e sori taki den nen fu den salfuwan di kisi a kari fu tiri makandra nanga Yesus, skrifi na ini a buku fu libi nownowde. (Leisi  Filipisma 4:3.) Ma den salfuwan musu tan gi yesi na Gado efu den wani taki a nen fu den tan na ini a buku dati. Baka te den kisi a lasti marki fu den fosi den dede noso fosi a bigi banawtu bigin, dan a nen fu den o skrifi fu ala ten na ini a buku fu libi.​—Openb. 7:3.

7. Te wi e luku Openbaring 7:16, 17, dan o ten den nen fu a bigi ipi o skrifi fu ala ten na ini a buku fu libi?

⁷ A di fu tu grupu na a bigi ipi. A nen fu den sma disi skrifi na ini a buku fu libi nownowde? Iya. A nen fu den o de ete na ini a buku fu libi baka te den pasa Armagedon libilibi? Iya (Openb. 7:14). Yesus ben taki dati den sma disi di de leki skapu o „kisi têgo libi” (Mat. 25:46). Ma den sma di pasa Armagedon libilibi no o kisi têgo libi wantewante. A nen fu den o tan na ini a buku fu libi, ma a o skrifi nanga potlood, fu taki en so. Na a ten fu a Dusun Yari Tiri, Yesus „o tiri den èn a o tyari den go na den peti di abi watra di e gi libi”. Den sma di e saka densrefi na ondro a tiri fu Krestes èn di e tan gi yesi na Yehovah, o kisi a grani taki a nen fu den skrifi fu ala ten na ini a buku fu libi. A sani disi o pasa na a kaba fu a Dusun Yari Tiri.​—Leisi Openbaring 7:16, 17.

8. Suma na den sma di nen no skrifi na ini a buku fu libi èn san o pasa nanga den?

⁸ A di fu dri grupu na den bokoboko di o kisi pori na Armagedon. A nen fu den sma disi no skrifi na ini a buku fu libi. Yesus e taki dati den „o dede fu têgo” (Mat. 25:46). Nanga yepi fu santa yeye, Paulus e taigi wi taki „a strafu di den sma disi o kisi, na taki den o kisi pori fu têgo” (2 Tes. 1:9; 2 Petr. 2:9). A srefi sani disi o pasa nanga ala den sma di sondu fu espresi teige a santa yeye na ini a ten di pasa. Den no o kisi têgo libi, ma de o kisi têgo pori. A de krin taki den no o kisi wan opobaka (Mat. 12:32; Mark. 3:28, 29; Hebr. 6:4-6). Now wi o taki fu tu grupu sma di o kisi wan opobaka na grontapu. Meki wi go luku a tori dati moro fini.

DEN SMA DI O KISI WAN OPOBAKA

9. (a) Soleki fa Tori fu den apostel 24:15 e sori, dan suma na den tu grupu sma di o kisi wan opobaka na grontapu? (b) Fa den tu grupu disi e difrenti fu makandra?

⁹ Bijbel e taki fu tu grupu sma di o kisi wan opobaka fu libi fu têgo na grontapu. Dati na „den sma di du san reti” èn „den sma di no du san reti”. (Leisi Tori fu den apostel 24:15.) „Den sma di du san reti” na den wan di ben e dini Yehovah nanga den heri ati di den ben de na libi. Ma „den sma di no du san reti” na den wan di no ben e hori densrefi na den wet fu Yehovah fosi den dede. Te Bijbel e taki dati den tu grupu disi o kisi wan opobaka, dan dati wani taki dati den nen fu den sma disi skrifi na ini a buku fu libi? Wi o kisi piki tapu na aksi dati te wi e poti prakseri na ibriwan fu den tu grupu disi.

10. Fu san ede „den sma di du san reti” o kisi wan opobaka èn sortu grani sonwan fu den o kisi? (Luku sosrefi na artikel „Aksi fu leisiman” na ini A Waktitoren disi, di e taki fu na opobaka na grontapu.)

¹⁰ „Den sma di du san reti” na a di fu fo grupu. Fosi den sma disi kon dede, a nen fu den ben skrifi na ini a buku fu libi. A de so taki Gado ben figi den nen puru na ini a buku di den dede? Nôno, fu di den sma disi e „libi” ete na ini Gado en prakseri. Yehovah „no de wan Gado fu den dede sma, ma wan Gado fu den wan di de na libi, bika gi en den alamala e libi” (Luk. 20:38). Disi wani taki dati te den sma di  du san reti kisi wan opobaka na grontapu, dan a nen fu den o de fu feni na ini a buku fu libi, ma dati no o de fu ala ten ete (Luk. 14:14). Sonwan fu den sma disi di kisi wan opobaka o kisi a grani fu dini leki „tiriman fu heri grontapu”.​—Ps. 45:16.

11. San „den sma di no du san reti” o abi fu leri efu den wani taki den nen skrifi na ini a buku fu libi?

¹¹ Leki lasti, wi o poti prakseri now na „den sma di no du san reti”. Kande na fu di den sma disi no ben sabi den wet fu Yehovah, meki den no ben e anbegi Gado fosi den kon dede. Dati meki a nen fu den no ben skrifi na ini a buku fu libi. Ma te Gado o gi den wan opobaka, dan den o kisi na okasi fu tyari densrefi na so wan fasi taki den nen kan skrifi na ini. Den sma disi „di no du san reti” o abi furu yepi fanowdu. Sonwan fu den ben e du kefalek ogri sani fosi den dede. Den o abi fu kisi leri fa fu libi na wan fasi di Yehovah feni bun. Dati meki Gado Kownukondre o sorgu taki wan bigi wroko du na heri grontapu fu gi sma leri èn noiti ete so wan bigi wroko ben du.

12. (a) Suma o gi leri na den sma di no du san reti? (b) San o pasa nanga den sma di e weigri fu du san den leri?

¹² Suma o gi den sma di no du san reti a leri disi? Na a bigi ipi nanga den sma di du san reti èn di kisi wan opobaka. Den sma di no du san reti musu kon abi wan matifasi nanga Yehovah èn den musu anbegi en efu den wani taki a nen fu den skrifi na ini a buku fu libi. Yesus Krestes nanga den tra krutuman di o tiri makandra nanga en na hemel o luku ala den sma disi bun fu si san den o du nanga a leri di den o kisi (Openb. 20:4). Iniwan sma di e weigri fu du san den leri no o kisi na okasi fu tan na libi, awinsi o owru a de, iya, awinsi a abi 100 yari srefi (Yes. 65:20). Yehovah nanga Yesus man si na ini sma ati èn den no o meki nowan sma tyari problema kon na ini a nyun grontapu.​—Yes. 11:9; 60:18; 65:25; Yoh. 2:25.

 DEN O KISI WAN OPOBAKA FU LIBI NOSO WAN OPOBAKA FU KISI KRUTU

13-14. (a) Fa wi ben e frustan den wortu fu Yesus na Yohanes 5:29 fosi? (b) San wi musu hori na prakseri te a abi fu du nanga den wortu dati?

¹³ Yesus ben taki tu fu den wan di ben o kisi wan opobaka dyaso na grontapu. A ben taki a sani disi: „A yuru o kon te ala den sma di de na ini den grebi o yere en sten èn den o komopo drape. Den sma di du bun sani, o opo baka fu kisi libi èn den sma di du takru sani, o opo baka fu kisi krutu” (Yoh. 5:28, 29). San Yesus ben wani taki nanga den wortu disi?

¹⁴ Fosi, wi ben e frustan den wortu disi tra fasi. Wi ben e bribi taki Yesus ben e taki fu den sani di sma ben o du baka te den kisi wan opobaka. Sobun, wi ben e bribi taki son sma di ben o kisi libi baka ben o du bun sani, aladi trawan di ben o kisi libi baka ben o du takru sani. Ma hori na prakseri taki Yesus ben taki dati „den sma di du bun sani, o opo baka fu kisi libi, èn den wan di du takru sani o opo baka fu kisi krutu”. A de krin taki Yesus ben e taki fu den bun sani noso den takru sani di den sma disi ben du fosi den dede èn kisi wan opobaka. Wi kan frustan dati fu di nowan sma o kisi na okasi fu du takru sani na ini a nyun grontapu. Ma san den wortu „opo baka fu kisi libi” nanga „opobaka fu kisi krutu” wani taki?

15. Suma o „opobaka fu kisi libi” èn fu san ede?

¹⁵ Den sma di du san reti, noso den wan di du bun sani fosi den dede, o „opo baka fu kisi libi” fu di a nen fu den skrifi kaba na ini a buku fu libi. Disi wani taki dati na opobaka fu „den sma di du bun sani” soleki fa a skrifi na Yohanes 5:29, na a srefi opobaka leki a di fu „den sma di du san reti”, soleki fa a skrifi na Tori fu den apostel 24:15. A sani disi e kruderi nanga den wortu na Romesma 6:7, pe skrifi: „Te wan sma dede, dan a no abi fu pai gi den sondu fu en moro.” Di den sma di du san reti kon dede, dan Gado gi den pardon fu den sondu fu den, ma a o memre den bun sani di den du di den ben de na libi (Hebr. 6:10). A no de fu taki dati te den sma disi kisi wan opobaka, dan den o abi fu tan gi yesi na Gado so taki a nen fu den kan tan na ini a buku fu libi.

16. San a wani taki dati sma o „opo baka fu kisi krutu”?

¹⁶ Fa a de nanga den sma di ben e du takru sani fosi den dede? Aladi Gado gi den pardon fu den sondu fu den di den dede, toku den no dini Yehovah di den ben de na libi. A nen fu den no skrifi na ini a buku fu libi. Dati meki na opobaka fu „den sma di du takru sani” na a srefi opobaka leki a di fu „den sma di no du san reti”, soleki fa Tori fu den apostel 24:15 e sori. Den o „opo baka fu kisi krutu”. * Disi wani taki dati Yesus o luku efu den sma disi e du san den e leri (Luk. 22:30). Baka wan pisi ten, Yesus o sabi efu den sma disi warti nofo fu a nen fu den skrifi na ini a buku fu libi. Te den sma disi e tapu nanga den takru sani di den ben e du fosi èn te den e gi den srefi abra na Yehovah, dan fosi a nen fu den o skrifi na ini a buku fu libi.

17-18. (a) San ala den sma di o opo baka fu libi na grontapu o abi fu du? (b) Soleki fa Openbaring 20:12, 13 e sori, dan san na „den sani di den du”?

¹⁷ Awinsi den sma di kisi wan opobaka ben de sma di ben du san reti fosi noso  den no ben e du san reti, toku den alamala o abi fu gi yesi na den wet di skrifi na ini den nyun bukulolo di o opo na a ten fu den 1000 yari. Na apostel Yohanes e taki san a si na ini a fisyun: „Mi si den dede sma, den heihei sma nanga den mofinawan, e tanapu na fesi a kownusturu èn bukulolo ben e opo. Ma wan tra bukulolo ben e opo tu. Disi na a buku fu libi. Den krutu den dede sma fu den sani di den du, soleki fa skrifi na ini den bukulolo.”​—Openb. 20:12, 13.

¹⁸ San Yesus o luku te a o krutu den sma di kisi wan opobaka? A o luku den sani di den ben e du fosi den dede? Nôno! Hori na prakseri taki di den dede, Gado gi den pardon fu den sondu di den ben du. Sobun, te Bijbel e taki dati den sma o kisi krutu fu „den sani di den du”, dan dati no kan de den sani di den du fosi den dede, ma a musu fu de den sani di den o du baka te den kisi leri na ini a nyun grontapu. Srefi reti-ati man leki Noa, Samuel, David, nanga Danièl o abi fu leri sani fu Yesus Krestes èn den o abi fu sori bribi na ini a srakti-ofrandi fu en. A no de fu taki dati den sma di no du san reti o abi fu du dati tu.

19. San o pasa nanga den sma di o weigri fu teki a leri di den kisi?

¹⁹ San o pasa nanga den sma di weigri fu teki a leri di den kisi? Openbaring 20:15 e taki: „Ibri sma di a nen fu den no skrifi na ini a buku fu libi, a fringi go na ini a se di e bron nanga faya.” Iya, den o kisi pori fu têgo. Dati meki a prenspari srefisrefi fu sorgu taki a nen fu wi skrifi na ini a buku fu libi èn taki a tan drape!

20. Sortu span wroko o du na a ten fu a Dusun Yari Tiri? (Luku a fowtow na tapu a kafti.)

²⁰ A no de fu taki dati a Dusun Yari Tiri o de wan span ten! Na a ten dati wan kefalek bigi wroko o du na heri grontapu fu gi sma leri. Ma den sma di du san reti nanga den sma di no du san reti o abi fu sori taki den de klariklari fu gi yesi na den wet fu Yehovah (Yes. 26:9; Tori 17:31). Fa a bigi wroko disi o du? A tra artikel o yepi wi fu kon sabi fa a moi wroko disi o du.